LUKAS 13
13
Wanakiyman qayakiy
1Key tyempuchowmi keykáyarqan tseychow jukkuna willakurnin galilewkunapa yawarninta Pilátu takonqanta sakrifisyunkunawan. 2Yaskirnin Jesús nerqan: “¿Pensayanki key galilewkunapaq, key kosaskunata jipayarnin, kayarqan mas jutsasapatsuraq llapan galilewkunapita? 3Niyaqmi: Manam; sitsum llapeykikuna mana wanakuyanki, tseynowllam wanuyanki. 4Ó taqeykunapa chunka puwaq janankunaman Siloweychow torri seqikarqan, i wanutserqan, ¿pensayanki peykuna mas jutsayoq kayanqanta Jerusalenchow llapan yachaq nunakunapita? 5Niyaqmi: Manam, sitsum mana wanakuyanki; llapeykikunam tseynowlla wanuyanki.”
Mana wayoq iguswan tinkutsikiy
6Key tinkutsikiytapis nerqanmi: “Juk nunapam kaporqan juk ígus yuran chakranchow plantashqan, i shamorqan wayíninta ashirnin i manam tarerqatsu. 7I nerqan ubas tápaqta: ‘Kaq key, kima watana shamú wayíninta ashir key ígusman, i manam tarítsu; roquriykiy, ¿imapaqtaq allpatapis mana sirweqpaq churan?’ 8Tseynam pey, yaskirnin, nerqan: ‘Señor, jaqiriykiyraq key watalla, peypa jiruroqninpa uchkurir wanyanápaq.’ ” 9I si wayínin kanqa, allim, i sinowqa, tseypitanam roqurinkiy.
Jesús kachakátsin qorukashqa warmita
10Jesús yachatsikoq juk eyllukána wayichow jamakiy junaqchow; 11i tseychow karqan juk warmi chunka puwaq watana qeshya espirituyoq, i purerqan qorukashqa, i manam imanowpapis pwederqantsu derechakeyta. 12Jesús rikeykurnam, qayarqan i nerqan: —Warmi, librinam kankiy qeshyeykipita.
13I makinkunata peypa jananman churarqan; i peynam deréchakárerqan tseyllana, i Dyosta glorifikarqan. 14Eyllukáyanan wayipa mandakoqninnam, piñarnin Jesús jamakiy junaqchow kachakátsishqanreykur, nerqan nunakunata: —Joqta junaqmi kan uryanantsikpaq; keykunachow, shayámi, i kachakashqa kayey, i ama jamakiy junaqchowqa.
15Tseynam Señor yaskirnin nerqan: —¡Motolítu! Qamkunapita meqeykikunapapis ¿manaku paskayanki jamakiy junaqchow yuntata ó ashnunta wataranqanpita i apayanki yakútseq? 16I key Abrahampa tsurinta, Satanas watashqa karqan chunka puwaq wata, ¿manaku paskashqa kanman wataraqninpita jamakiy junaqchow?
17Pey key kosaskunata niptin, penqakuyarqan llapan chikeqninkuna; peru llapan nunakunam kushikuyaq llapan sumey kosaskuna pey rurashqanpa.
Tinkutsikiy ñushta muruwan
18I nerqan: —¿Imanow niraqtaq Dyospa reynún, i imawanraq tinkutsishaq? 19Ñushtapa murún niraqmi, juk nuna tsarir i murorqan wertanchow; i winarqan, i jatun montiyarerqan, i syelu pishqukuna qeshunkuna rurayarqan rámankunachow.
Qontsuwan tinkutsikiy
20I yapey nerqan: —¿Imawanraq tinkutsishaq Dyospa reynunta? 21Qontsu niraqmi, juk warmi tsarirkur pichurqan kima tupu jarinawan, llapan poqushqanyaq.
Salbasyonpa kichki punkun
22Jesús paseykarqan pweblukunapa i tunankunapa yachatsikurnin Jerusalenman eyweykarnin. 23I juknam nerqan: —Señor, ¿wallkallaku kayan salbakoqkuna?
I peynam nerqan: 24—Sinchikuyey kichki punkupa yeykita; niyaqmi atskaqmi munayanqa yeykita, i manam pwediyanqatsu. 25Kastapa teytan sharkur i punkuta wichqariptinna, jaqchow keykar qalleykuyanki qayakur punkuman, nishpa: “¡Señor, Señor, kicheykayámey!” Pey yaskirnam nenqa: “Manam musyátsu meypita kayanqeykita.” 26Tseynam qalleykuyanki nirnin: “Qampa nowpeykichowmi mikuyarqó i upuyarqó, i plásákunachowmi yachatsikorqonki.” 27Peru niyáshunkim: “Niyaqmi manam musyátsu meypita kayanqeykita. ¡Llapeyki noqapita rakikáyey, mana alli ruraqkuna!” 28Tseychowmi kanqa waqakiy i kirukuna ruchuchútsi, rikarnin Abrahamta, Isakta, Jakobta i llapan profetakunata Dyospa reynunchow, i qamkuna keykáyanki qarqushqa. 29Shayámonqam inti ullumunanpita i inti jeqananpita, nortipita i surpita i táyanqa mésaman Dyospa reynunchow. 30I kaq keymi, qepakunam kayanqa puntachow, i puntakunam qepachow.
Jesús llakikun Jerusalenpaq
31Tsey junaqmi cháyarqan wakin farisewkuna, niyarnin: —Yarqiy, i ewkiy keypita, Eródismi munan wanutsishiynikita.
32I peykunata nerqan: —Eywayey, i niyey taqey atoqta: “Keymi key, qarqú demoniyukunata i kanan i warey rurá kachakátsikiykunata, i kima junaqtam ushariy rureyníta.” 33Tseynow karpis, presisanmi kanan i warey i warátin nánita qatiná; manam allitsu juk profeta wanunan Jerusalenpa jaqninchow.
34”¡Jerusalen, Jerusalen, profetakunata wanutseq, i rumiwan qonpankiy qanman kachamushqákunata! ¡Eyka kutim munarqá tsurikikuna purweyta, wallpa chipinkunata álasnin rurinman eylloqnow, i manam munarqeykitsu! 35Kaq keymi, wayikikuna kanqa jaqirishqa chusyákoq; i niyaqmi mananam rikáyámankinatsu, tyempu chámuptin niyanqeykiyaq: ¡Benditum Señorpa jutinchow shamoq!
Currently Selected:
LUKAS 13: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
