LUKAS 2

Jesuspa yurikiynin

1Tsey junaqkunachownam; Augustu Sésarpita ley yarqamorqan jinantin mundu sensashqa kananpaq. 2Key punta sensum rurakarqan Sirenyu Siryachow gobernador keykaptin. 3Llapankuna eywayaq apuntashqa kayánanpaq, kada únu markankunata. 4I Josénam witsarqan Galileyapita Nasaret pweblupita, Judeata, Dabidpa markanman, Belen jutiyoqman, Dabidpa wayinpita i kastanpita karnin. 5Warmin Maryawan apuntakushqa kayánanpaq, peywan kasakushqa, pey qeshyaq keykarqan.

6I susederqan peykuna tseychow keykáyaptin, tinkurerqan qeshpikunan junaqkuna. 7I qeshpikorqan wawanta, i pitorqan ayukunawan, i iskatserqan juk pesebrichow, posádachow peykunapaq sityu mana kaptin.

Angelkuna willakuyan mitseqkunata

8Mitseqkuna kayarqan tsey markachow, úshankunata ampipa tápayarqan. 9Kaq key, Señorpa angelnin yuripuyarqan, i Señorpa gloryan jirururirqan chipapeypa; i mantsakáyarqan allápa. 10Peru angelnam nerqan: —Ama mantsakáyeytsu; kaq keymi qoyaq mushoq jatun kushikiyta, llapan pweblupaqmi kanqa: 11Kananmi yurishqa qamkunapaq, Dabidpa markanchow, juk Salbakoq, keymi KRISTU Señor. 12Keymi kanqa señalnikikuna: Tariyankim wamrata ayukunawan pitushqata, pesebrichow iskareykaqta.

13I illaqpita yurirkuyarqan angelwan shuyni syelu trópakuna, Dyosta alabayaq, i niyaq: 14—¡Rarakunachow Dyosta glorya, I patsachow yamey key, alli muney nunakunapaq!

15Angelkuna peykunapita syeluman ewkuyaptinnam, mitseqkuna ninakuyarqan jukninkuna jukninkunawan: —Eywashun, Belenyaq, i rikámushun key pasakushqanta, i Señor rikátsimashqantsikta.

16Shayámorqan weyralla, i tariyarqan Maryata i Joséta, i wamratana pesebrichow iskareykaqta. 17I rikárirnam, willakuyarqan wamrapaq niyashqanta. 18I llapan wiyaqkunam, almirakuyarqan mitseqkuna niyanqanta. 19Key llapan kosaskunata Marya pakaraq shonqunchow yarpakachar. 20Mitseqkuna kutikuyarqan Dyosta sumátsirnin i alabarnin llapan kosaskuna wiyayanqanta i rikáyanqanpita, niyashqanmannow.

Jesusta presentayan templuchow

21Puwaq junaq tinkuriptinna wamrata sirkunsidátsiyánanpaq, jutin churayarqan JESUS, manaraq qeshyaqtukuptin angel ninqannowlla.

22I purifikasyon junaqkuna peykunapa tinkuriptinna, Moysespa leyninmannow, apayámorqan Jerusalenman Señorman presentayánanpaq 23(Señorpa leyninchow qellqareykashqannow: Llapan ollqu punta yurikoqqa santu nishqam Señorchow), 24Señorpa leynin nishqanmannow qoyánanpaq: Ishkey tortolakunata ó ishkey palumakunata.

Simeyonpa kantakiynin

25Kaq keymi Jerusalenchow karqan juk nuna Simeyon jutiyoq, i key nuna, allita ruraq i ankupákoq, shuyaraq Israyelpa shoqakiyninta; i Espiritu Santu keykarqan peychow. 26I Espiritu Santupa rebelashqa kanaq, waníta mana rikánanpaq manaraq Señorpa Ungídunta rikanqanyaq. 27I Espiritupa pushashqa, shamorqan templuman; i ñíñu Jesusta teytankuna templuman apayámuptin, peypaq leypa kostumbrinmannow rurayánanpaq, 28peynam mellqarkur, Dyosta bendiserqan, nishpa: 29—Kanan, Señor, despidikiy sirweqnikiyta yamey keychow, palabreykimannow; 30nawíkuna rikáshqanam salbasyonnikita, 31keytam alistarqeyki llapan markakunapa nowpanchow; 32aktsin gentilkunata rikátsinanpaq i gloryan Israyel markeykipa.

33I José i maman almirakushqa kayarqan peypaq llapan niyanqanpita. 34I Simeyon bendiserqan i nerqan maman Maryata i kaq key: Keymi churashqa keykan ishkiyánanpaq i sháriyánanpaq atskaqkuna Israyelchow i señalpaq kontradisishqa kanqa 35(i juk espádam traspasanqa almeykiyta), rikakashqa kayánanpaq shonqunkunapa yárpeyninkuna.

Anapa willakiynin

36Tseychowmi keykarqan Ana, profetisa Fanuelpa tsurin, Aserpa purwanpita, tsatsana, qowanwan kawanaq qanchis wata kasakonqanpita, 37i biwdayanqan karqan puwaq chunka chusku watana; i manam rakikarqantsu templupita ampipa i junaqpa sirwikur ayúnukunawan i Dyos mañakiykunachow. 38Tsey órállachow yeykurir, Dyosta grasyasta qorqan, i wamrapaq parlarqan Jerusalenchow reskatakiy shuyaraqkunata.

Jesuspa wamrakeynin Nasaretchow

39Señorpa leynin llapan nishqanta kumplirirna, Galileyata kutikuyarqan, Nasaret markanta. 40I wamra winarqan i sinchiyarqan, i yacheychow juntapakarqan; i Dyospa grasyan peywan karqan.

Ñíñu Jesús yachatsikoqkunachow

41Teytankuna eywayaq Jerusalenman kada wata paskwa fyestaman; 42i chunka ishkey watayoq keykaptinnam witsáyarqan Jerusalenta fyestaman kostumbrinkunamannow. 43Fyesta ushey peykuna kutiyámunam, ñíñu Jesús keydakorqan Jerusalenchow, José i maman mana musyayashqan. 44Atskaq nunakunachowchi eywan nirnin, eywayarqan juk junaq náni eyweyta; i ashiyarqan kastankunachow i reqishqankunachow; 45peru mana tarirnam, kutiyarqan Jerusalenman ashirnin.

46I kima junaqtanam tariyarqan templuchow, leypa doktorninkunapa chowpinchow teykaqta, wiyarninkuna i tapurninkuna. 47I llapan wiyaqkunam, almirakuyarqan yacheyninkunapita i yaskikiyninkunapita. 48Rikáriyarnam, almirakuyarqan; i mamannam nerqan: —Wawa, ¿imanirtaq keynow rurayámarqonkiy? Llakishqam teyteykiwan ashiyarqoq.

49Tseynam pey nerqan: —¿Imanirtaq ashiyámarqonkiy? ¿Manaku musyayankiy wananmi Teytápa negosyunkunachow keykaná?

50Peykunaqa káyiyarqantsu parlanqan palabrankunata. 51I peykunawan, kuterqan Nasaretta, i peykunata wiyakoq karqan. I mamannam shonqunchow llapan key kosaskunata katseq. 52I Jesús winarqan yacheychow i tamáñuchow, i grasyachow Dyospaq i nunakunapaq.

Currently Selected:

LUKAS 2: QUEAN

Highlight

Copy