MATEO 15

Nunata muyaq

1Tseynam witiyarqan Jesusman judyukunapa leynin yachatseqkuna i farisewkuna Jerusalenpita, nirnin:

2—¿Imanirtaq disípuliykikuna jarukuyan awkinkunapa kostumbrinkunata? Manataq paqakuyantsu makinkunata tantata mikurnin.

3Pey yaskirnin, nerqan: —¿Imanirtaq qamkunapis jarukuyanki Dyospa kamatsikiyninta kostumbrikikunapa? 4Dyosmi mandarqan nirnin:

Onrey teyteykita i mameykita;

i: Teyta ó mamata maldiseqqa,

wanutsun mana ankupashqa.

5Peru qamkunaqa niyanki: “Meyqanpis teytanta ó mamanta neqqa: Llapan yanapanaq kaqtam Dyosta qoykorqó,” 6mananam onranqatsu teytanta i mamanta.

»Tseynowmi mana kaqpaq churayarqonki Dyospa kamatsikiyninta kostumbrikikunapa. 7¡Motolítukuna! Allim profetisarqan qamkunapaq Isaias, nenqannow:

8Key pwebluqa shiminkunallawanmi onraman;

shonqunqa noqapita karuchowmi.

9Ardeymi onrayáman,

yachatsikur yachatsikiykunatanow, nunakunapa

kamatsikiyninkunata.

10I tseynow atskaqkunata qayarir, nerqan: —¡Wiyayey, i káyiyey! 11Shimiman yeykoqqa manam nunata muyantsu; shimipita yarqoqmi, muyan nunataqa.

12Tseynam disípulunkuna witiykur, niyarqan: —¿Musyankiku farisewkuna piñakuyanqanta key palabrata wiyariykur?

13Peru yaskirnin pey, nerqan: —Syeluchow Teytá llapan planta mana plantanqanqa llutishqam kanqa. 14Jaqiyey; wiskukunam kayan wiskukuna pushaq; wiskutsun pushanqa juk wiskuta, ishkanmi jeqayanqa uchkuman.

15Yaskirnin Pedru, nerqan: —Káyitsiyamey key tinkutsikiyta.

16Jesús nerqan: —¿Qamkunapis káyikiyninnaqku kayanki? 17¿Manaku káyiyanki shimiman llapan yeykoqqa eywan pachaman; i yarqun letrinaman? 18Peru shimipita yarqoqqa, shonqupitam yarqun; i keymi muyan nunata. 19Shonqupitam yarqun mana alli yarpakacheykuna, wanutsikiykuna, olteron keykuna, lluta wátanakiykuna, suwakiykuna, uli willakiykuna, maldisikiykuna. 20Keykunam muyayan nunata; peru makinkunata mana paqakushpa mikoqqa manam muyantsu nunata.

Karu warmipa kreyikiynin

21Jesús tseypita yarqurir, ewkorqan Tíru i Sidon ládupa. 22I kaq key taqey ládupita yarqamorqan juk kananea warmi rowakur, nirnin: —¡Señor, Dabidpa tsurin, ankupákiyniki katsun noqapaq! Wawámi juk demoniyupa allápa tormentashqa.

23Peru Jesús manam yaskirqantsu ni ima palabrata: Tseynam disípulunkuna witiykur, rowayarqan, nirnin: —Despidikiy, qepantsikchowmi qaparikachan.

24Pey yaskirnin, nerqan: —Manam noqa kachamushqatsu karqó sinowqa Israyelpa wayinpita oqrakashqa úshakunallamanmi.

25Tseynam pey shamorqan i qonqurikiykurqan peypa nowpanman, nirnin: —¡Señor, ankupeykallámey!

26Yaskirnin pey, nerqan: —Manam allitsu tsurikunapa tantanta tsari, i chuschukunapaq jitari.

27Warminam nerqan: Awmi, Señor. Peru chushchukunapis mikuyanmi dweñunkunapa mesanpita tanta pakipikuna shikwaqta.

28Tseynam Jesús yaskirnin, nerqan: —¡Warmi, jatunmi kreyikiyniki! Rurakátsun qamwan munanqeykinow.

I wawan kachakashqa karqan tsey órapita.

Jesuspa wakin milagrunkuna

29Tseypita Jesús pasarir shamorqan Galileya lamar láduman; jirkaman witsarkurna, tákurerqan tseychow. 30I atska nunakuna witiyarqan peyman i apayarqan kojukunata, wiskukunata, múdukunata, mankukunata, i wakin atska qeshyayoqkunata; i churayaporqan Jesuspa chakinkunaman, i kachakátserqan. 31Tseynowpa atska nunakuna almirakuyarqan, mudukuna parlaqta rikar, mankukuna kachakátsishqata, kojukuna pureqta, wiskukuna rikaqta; i glorifikáyaq Israyelpa Dyosninta.

Jesús mikutsin chusku waranqata

32I Jesús disípulunkunata qayarir, nerqan: —Ankupámi nunakunata, kima junaqna noqawan keykáyan, i manam kayápuntsu ima mikuyananpaq; i manam mallaqta kacharita munátsu, itsapis desmayariyanman nánichow.

33Tseynam disípulunkuna niyarqan: —¿Meypitataq noqakunapa kayápamanqa atska tantakuna chusyaqchow, teqñatsiyánapaq key atska nunakunata?

34Jesusnam nerqan: —¿Eyka tantakunataq kayápushunki?

I peykunanam niyarqan: —Qanchis, i wallka peskadukunallam.

35I mandarqan atska nunakunata patsachow kikitariyananpaq. 36I qanchis tantata i peskadukunata tsarirkur, grasyasta qorirqan, i pakirqan i disípulunkunata qorqan, i disípulunkunana atska nunakunata. 37I llapankuna mikuyarqan i teqñayarqan; i sobrashqan pakipinkunata, eylluyarqan qanchis kanastakuna junta. 38I mikoqkuna kayarqan chusku waranqa ollqukuna, warmikunata i wamrakunata mana yupashpa. 39Tseynam, nunakunata despidirir, yeykorqan barkaman, i shamorqan Magdalapa ládunman.

Currently Selected:

MATEO 15: QUEAN

Highlight

Copy