MARKUS 14

Jesusta wanutsiyanampaq yachatsinaki

1Tseypita ishkey junaqtanam paskwa karqan i lebadurannaq tantakunapa fyestan. Prinsipal saserdotikuna i judyukunapa leynin yachatsikoqkuna ashikayarqan imanow tsariyanampaq engáñupa i wanutsiyanampaq, 2i niyarqan: “Ama fyestachowqa, búllakurkuyanqam pwebluchow.

Jesusta ungiyan Betaniachow

3Betaniachow pey keykar Simon leprosupa wayinchow i mésaman teykaptin shamorqan juk warmi juk frasku alabastrunwan nardu púru pukutaq allápa chaniyoqwan. I alabastru fraskuta pakirirnin, ramarerqan Jesuspa peqanman. 4Peru tseychow wakin kaqkuna piñakurkuyarqan kikinkunapura i niyarqan: —¿Imapaqtaq key pukutaqta perditsin? 5Kima pachak denaryuchowmi rantikurishwan karqan key pukutaqta i qoykushwanmi karqan waktsakunata.

I jamuláyarqan warmipaq, 6Jesusnam nerqan: —Jaqiyey. ¿Imanirtaq piñapáyanki? Peyqa rurarqon alli rureytam nowqawan. 7Waktsakunataqa imeypis katsiyankim qamkunawan, i munayanqeyki óram pwediyanki alli rureyta, peru noqataqa manam wiñeypatsu katsiyámanki. 8Peyqa rurarqon pwedishqanta, puntákurerqon kwerpúta llushir sepultúrapaq. 9Tseqeypam niyaq meychowpis key ebangelyu predikashqam kanqa llapan munduchow, key rureyninpis willakushqam kanqa peyta yarpáriyanampaq.

Judas ánikun Jesusta traysyonanampaq

10Tseynam Judas Iskaryoti chunka ishkeypita jukninkaq, eywarqan prinsipal saserdotikunaman entreganampaq. 11Peykuna, wiyarirnam, kushíkuyarqan i ániyarqan qelleyta qoyánanpaq. I pey ashirqan imanowpa entreganampaq.

Alistapakiy Paskwapaq

12Punta junaq lebadurannaq tantapa fyestam, Paskwapa achkasnínta sakrifikáyaptin, disípulunkuna niyarqan: —¿Meymantaq munanki eywayánata i alistayanápaq Paskwata mikuneykipaq?

13Pey kacharqan ishkey disípulunkunata i nerqan: —Eywayey pwebluta, juk nunawanmi topayanki kuntupa yakuta apeykaqta. Qatiyey. 14Meymampis yeykonqanman, wayiyoqta niyey: “Mayestrum nin: ‘¿Meychowtaq kwartú i meychowtaq mikushaq paskwata disípulúkunawan?’ ” 15I peymi rikátsiyashunki altuschow juk kwartuta alistashqatana. Tseychow alistayey noqantsikpaq.

16Disípulunkuna yarqurir, pwebluman yeykuyarqan i tariyarqan pey nishqannowlla i alistayarqan paskwata.

Jesús willakun Judas traysyonananta

17Tardiyariptinnam eywarqan chunka ishkeywan; 18i mikur mésachow teykayaptinnam, Jesús nerqan: —Tseqeypam niyaq qamkunapita juknikim noqawan mikoqmi, entregamanqa.

19Tseynam qalleykuyarqan llakikurnin jukpayan niyarqan: —¿Noqatsuraq?

20Peynam nerqan: —Chunka ishkeypita juknikim, noqawan platuchow tantata tullpoqmi. 21Rasonpam, Nunapa Tsurin eywan, peypaq qellqashqannowlla. Peru ¡allaw tsey nuna Nunapa Tsurin entregaq! Allichi yurinmantsu karqa tsey nuna.

Señorpa seynan

22Peykuna mikuyanqanyaq, Jesús tantata tsarirkur bendiserqan; pakirir, qorqan nishpa: —Mikuyey; keymi kwerpú.

23Kópata tsarirkurnam, grasyasta qorirna qorqan; tseypita llapankuna upuyarqan. 24I peynam nerqan: —Keymi yawarniy paktupa, keymi ramashqa kanqa atskaqkunapa faborninpaq. 25Tseqeypam niyaq manam upushaqnatsu key ubaspa wayíninpita, tsey junaq Dyospa reynunchow yapey upunqáyaq.

26Juk imnuta kantakurirna yarquriyarqan Olibus jirkaman.

Jesús musyatsikun Pedru negananta

27Tseynam Jesús nerqan: —Llapeykikunam penqakuyanki noqapita; qellqashqam keykan: Mitseqtam wanutsishaq, i llapan úshakunam witsikashqa kayanqa. 28Tseypita kawariramurna, nowpeykikunata eywashaq Galileyata.

29Tseynam Pedru nerqan: —Llapankuna penqakuyaptinpis, noqaqa manam.

30Jesusnam nerqan: —Tseqeypam neq kanan, key ampim, manaraq ishkey kuti gallu kantaptin kima kutim qam negamanki.

31Peru peynam nerqan allápa jikutarnin: —Qanwan wanuriná kaptinpis, imeypis negashqeykitsu.

Llapankunapis tseynowlla niyarqan.

Jesuspa llakikiynin Getsemaníchow

32Cháriyarqan Getsemani nishqan sityuman, disípulunkunata nerqan: —Tákuriyey keychow, noqa Dyosman mañakonqayaq.

33Pusharqan Pedruta, Jakobuta i Juanta i qalleykorqan allápa llakikurnin. 34I nerqan: —Almámi keykan allápa llakikushqa, waníkama. Keychow keydakuyey i riwakuyey.

35Nowpaman ichik pasarirnam, qonqurikorqan patsaman i Dyosta mañakorqan tsey óra pasarinanpaq. 36Nerqan: —¡Abba, Teyta, llapampis qampaqqa fasilllam! ¡Witiratsi noqapeq key kópata! Peru ama munashqata, sinowqa qam munashqeykinow.

37Kutirirna tarerqan punukiykayaqta, i Pedruta nerqan: —Simon ¿pununkiku? ¿Manaku pwederqonki juk órallapis riweyta? 38Riwakuyey i Dyosta mañakuyey, tentasyonman mana yeykuyaneykipaq. Espirituqa rasonpam listu keykan, peru eytsaqa kallpannaqmi.

39Yapey rakikárir Dyosta mañakorqan punta nenqannowlla. 40Yapey kutirnam, tarerqan punukiykayaqta, nawinkunachow allápa puniy kaptin. I musyayarqantsu ima yaskita.

41Kima kuti kutenqanchowna nerqan: —¿Punukikayankiraqku i jamakikáyankiraqku? Tseyllana. Óra shamushqanam. Kaq key Nunapa Tsurin entregashqam jutsasapakunapa makinkunaman. 42¡Sharkuyey, aku! Kaq key, keychownam, entregamaqni.

Jesusta presuyan

43Tseyllana, pey parleykaptinraq chárerqan Judas, chunka ishkeypita juknin kaq, i peywan atskaq nunakuna espadakunawan i shukshunkunawan, prinsipal saserdotikunapa, judyukunapa leynin yachatsikoqkunapa i awkinkunapa kachankuna. 44Entregaqnin señalta qorqan nishpa: “Pitam mutseykushaq, peymi kanqa. Tsariykur sinchi apakuyey”. 45Chárirna, weyralla peyman witiykur nerqan: —¡Rabi!

I mutseykorqan. 46Tseynam peykuna tsariykuyarqan; 47peru juk tseychow keykaq, espadanta jorqurir, apun saserdotipa sirweqninpa rinrinta roqurerqan.

48Jesús yaskirna nerqan: —¿Suwamannowku yarqayamorqonki espadakunawan i shukshukunawan tsariyámaneykipaq? 49Kada junaqmi qamkunapa nowpeykikunachow karqó templuchow yachatsikur, i manam tsariyamarqeykitsu. Peru tseynowmi, Eskritúrakuna kumplikánampaq.

50Tseynam peypa kaqkuna jaqirir ewkuyarqan. 51Peru juk jobin, qalapáchunman sabanaswan aqshukurkur, qaterqan; i tsaríkuyarqan. 52Peynam sabanasta jaqirikur, qalapachow safeykorqan.

Jesús sanedrinchow

53Jesusta apayarqan apun saserdotiman; i eyllukáriyarqan peywan llapan prinsipal saserdotikuna, awkinkuna i judyukunapa leynin yachatsikoqkuna. 54I Pedrunam qaterqan karullapa apun saserdotipa patyunyaq, wardiyakunawan teykarqan qoñúkur ninachow.

55Prinsipal saserdotikuna i llapan Sanedrin ashiyarqan Jesuspa kontran, waníman entregayanampaq; peru manam tariyarqantsu. 56Atskaqmi ulikurkur willakuyarqan Jesuspa kontran, peru willakiyninkuna tinkurqantsu. 57Tseynam shárikurkuyarqan jukkuna, i niyarqan uli willakiykunata peypa kontran, i nishpa:

58—Noqakunam wiyayarqó neqta: “Key templu makiwan rurashqata noqam juchurishaq, i kima junaqchowmi rurashaq jukta makiwan mana rurashqata.

59Peru manam key niyanqampis tinkorqantsu peykuna willakuyashqanwan. 60Tseynam apun saserdoti chowpiman sharkur taporqan Jesusta nirnin: —¿Manaku imatapis yaskikunki? ¿Imatataq willakuyan keykuna qampa kontreyki?

61Peru peyqa upállakorqan manam imata yaskerqantsu. Yapeyman apun saserdoti tapurqan i nerqan: —¿Qamku kanki Kristu, Benditupa Tsurin?

62Jesusna nerqan: —Noqam ká. Rikáyankim Nunapa Tsurinta Dyospa Podernin deréchanchow teykaqta i pukuteykunawan shamoqta syelupita.

63Tseynam apun saserdoti rachirerqan bestidunta i nerqan: —¿Imapaqnataq wanantsik shimpikoqkunatapis? 64Qamkuna wiyayarqonkim maldisenqanta ¿Imataq nirápuyashunki?

I llapankuna kondenayarqan presunow wanunampaq. 65Wakinkunana qalleykuyarqan toqapurnin, qaqllanta tsaparkur laqyarnin nishpa: —¡Profetisey!

Wardyakunapis jina chaskiyarqan laqyarnin.

Pedru negan Jesusta

66Pedru ura patyuchow keykaptinna, shamorqan apun saserdotipa sirweqninkunapa juknin kaq. 67Pedruta qoñúkiykaqta rikárir, alleq peyta rikeykur nerqan: —Qampis keykarqeyki Nasaretpita Jesuswanmi.

68Peynam negarqan nishpa: —Manam reqítsu, ni musyatsu nenqeykitapis.

I yarqurerqan punkuman, i gallu kantarerqan. 69Sirwikoqna rikárir, yapey nerqan tseychow keykaqkunata: —Keymi key peykunapita juknin.

70Peynam negarqan yapey.

Juk ratullatana, tseychow keykaqkuna niyarqan Pedruta yapey: —Rasonpam kanki peykunapita juknin, galileyu kar.

71Peru pey qalleykorqan jurarnin i maldesirnin: —¡Manam reqítsu tsey nunata pipaq parlayanqeykita!

72Tseyllanam gallu kantarerqan yapey, i Pedru yarpárerqan, Jesús nenqanta: “Manaraq ishkey kuti gallu kantaptinmi, kima kuti negamanki.” Keyta yarparkurmi, waqarqan.

Currently Selected:

MARKUS 14: QUEAN

Highlight

Copy