Yohani 2

ɄYesu kʉ kɨkulukulu ɨkya vʉtolani kʉ Kana

1Ɨkɨghono ɨkya vʉtatu kuhʉma ijova isio, kwevʉlyale ʉvʉtolani mʉ kɨkaaja ɨkya Kana, mʉ kɨghavo ɨkya Galilaya. Pa vʉtolani ʉvuo pwealyale ʉngʼina ghwa Yesu. 2Ghwope ʉYesu na vavʉlanɨsɨvua vaake pwevalyale pa vʉtolani, ʉlwakʉva valyakutilue. 3Pa vʉtolani apuo ʉlʉhʉʉje#2:3 Ʉlʉhʉʉje: Ɨmba ɨlɨsio Lʉhʉʉje kʉ Vʉghanʉle vwa Masio aMahesia. lʉkasila, pe ʉngʼina ghwa Yesu akamʼbʉʉla ʉYesu akati, “Avaanhu vamalile ʉlʉhʉʉje.” 4ɄYesu akamwamʉla ʉngʼina akati, “Mama, kɨki ʉkʉmbʉʉla isio? Ʉnsiki ʉghwa kʉvomba ɨmbombo jango ghʉkyale.” 5Pe ʉngʼina akavavʉʉla avavombi akati, “Kɨno kyaɨkʉvavʉʉla, mʉvombaghe.”

6Pa vʉtolani pala, pwesilyale isaaji ntanda isa mavue. Isaaji isio silyale sa malenga agha kwogha mʉlwa kuvalasia ndavʉle lwale lwiho kʉ Vayahudi. Ʉlʉsaaji lʉmo lʉkamemagha amalenga amateneka ghahaano nambe ntanda ndɨɨkɨ. 7ɄYesu akavavʉʉla avavombi vala akati, “Mʉmemie amalenga mʉ saaji.” Avavombi vala vakamemia.

8Pe ʉYesu akavavʉʉla akati, “Lɨno, negha amalenga ghamonga mʉ saaji, mʉntwalɨle ʉmʼbaha ʉghwa kɨkulukulu.” Pe vakanegha, vakantwalɨla ʉmʼbaha jʉla. 9Ʉmʼbaha jʉla akavonja amalenga ghala, ghano ghakahambwike kuuva lʉhʉʉje. Neke naalyakagwile kʉno lʉhʉmile, looli avavombi vano valyaneghile amalenga, valyakagwile kʉno lʉhʉmile. Pe ʉmʼbaha ʉghwa kɨkulukulu akankemeela ʉntolanʼdala, 10akamʼbʉʉla akati, “Ʉmuunhu ghweni taasi ihʉmia ʉlʉhʉʉje ʉlʉnono, neke kyande avaanhu vanywile vakwɨlile, pe ihʉmia ʉlʉhʉʉje ʉlʉpepe. Neke ʉve ʉveele ʉjiighe ʉvikile ʉlʉhʉʉje ʉlʉnono kuhanga kʉvʉsililo!”

11ɄYesu alyavombile ɨkɨdegho ɨkɨ kʉ Kana, kʉ kɨghavo ɨkya Galilaya. Ɨkɨdegho ɨkio kyale kɨvalɨlo kya kwanda kuhʉfia ʉvʉvaha vwake. Mʉ ʉluo avavʉlanɨsɨvua vaake vakaghina kʉkʉmwɨtɨka. 12Ɨkɨkulukulu kya vʉtolani ye kɨsilile, ʉYesu palɨkɨmo nʉ ngʼina na vanuuna na vavʉlanɨsɨvua vaake vakalʉta kʉ lɨkaaja ɨlya Kapelenaumu. Ʉkuo vakikala ifighono fidebe.

ɄYesu ivalasia ɨnyumba ɨnyɨmɨke ɨja kufunyila

(Mataayi 21:12-13; Malɨka 11:15-17; Lʉʉka 19:45-46)

13Ʉnsiki ʉghwa kyɨmɨke ɨkya Pasaka#2:13 Kyɨmɨke ɨkya Pasaka, kwekʉti ɨkɨkulukulu ɨkya Vaisilaeli ɨkya kʉkʉmbʉka, vʉle ʉNgʉlʉve alyavapokile avakʉʉlʉ vaave kuhʉma mʉ vʉkami mʉ ɨɨsi ja Misili (Kuhʉma 12). ɨkya Vayahudi ye ghʉlɨ piipi, ʉYesu akalʉta kʉ Yelusalemu. 14Ye afikile kʉla, akingila mʉ lʉvɨɨka ʉlwa nyumba ɨnyɨmɨke ɨja kufunyila,#2:14 Lʉvɨɨka ʉlwa nyumba ɨnyɨmɨke ɨja kufunyila: Ɨmba ɨlɨsio Nyumba ɨnyɨmɨke ɨja kufunyila kʉ Vʉghanʉle vwa Masio aMahesia. akavaagha avaanhu vighʉsia ingʼombe, ingʼholo ni ngʼhʉnda, kange avange vakananiagha indalama. 15ɄYesu akatenda ʉnʼjeledi ʉghwa ngoji, akatengʉla kʉkʉvadaga vooni mʉ lʉvɨɨka ʉlwa nyumba jɨla. Akavadaga palɨkɨmo ni ngʼombe ni ngʼholo saave. Akabɨlɨvandʉla imeesa isa vano vakananiagha indalama na kukuungʼa indalama saave. 16Pe akavavʉʉla vano valyale vighʉsia ingʼhʉnda akati, “Vʉsia ingʼhʉnda apa. Namʉngavɨkaghe ɨnyumba ja Nhaata ghwango kuuva lɨghʉlɨlo.” 17Avavʉlanɨsɨvua vaake ye vapʉliike isio, vakakʉmbʉka amasio ghano ghalembilue mʉ Malembe aMɨmɨke kuuti, “Ʉlʉghano lwango vwɨmɨla ɨnyumba jaako, lʉkʉmbuda.”#Sabuli 69:9

18Pe avalongosi va Vayahudi ye vasivwene isio, vakamposia vakati, “Ghuhʉfia ɨkɨvalɨlo kɨki kuvonia kuuti, ʉlɨ nʉ vʉtavʉlɨlua ʉvwa kʉvomba isi?” 19ɄYesu akavamʉla akati, “Memʉla ɨnyumba ɨnyɨmɨke ɨjɨ ɨja Ngʉlʉve, ʉne nijenga kange mʉ fighono fitatu.” 20Pe aveene vakamwamʉla vakati, “Ɨnyumba ɨnyɨmɨke ɨja kufunyila jɨlyajengilue amaaka fijigho fine nɨ ntanda. Lɨno, lwandaani ʉve ghujenga mʉ fighono fitatu?”

21ɄYesu naakava ijova ɨnyumba ɨnyɨmɨke ɨja kufunyila, akava ijova vwɨmɨla ʉmʼbɨlɨ ghwake. 22Lɨno, ye asyʉsivue kuhʉma kʉ vafue, avavʉlanɨsɨvua vaake vakakʉmbʉka amasio aghuo ghano alyajovile, vakɨtɨka amasio ghano ghalembilue mʉ Malembe aMɨmɨke na masio ghano alyajovile ʉYesu.

ɄYesu avatangʼhinie avaanhu vooni

23ɄYesu ye alɨ kʉ Yelusalemu kʉ kyɨmɨke ɨkya Pasaka, avaanhu vinga valyamwɨtiike, ʉlwakʉva valyafyaghile ifivalɨlo vwɨmɨla ifidegho fino alyale ivomba. 24Neke ʉYesu naalyavɨtiike mʉ mwojo ghwake, ʉlwakʉva alyavatangʼhinie avaanhu vooni vʉle valɨvuo. 25Kange, nakwevʉlyale ʉvʉfumbue ʉvwa muunhu kʉkʉmʼbʉʉla sino avaanhu vakava visaagha, ʉlwakʉva alyasikagwile sooni isa mʉ moojo ghaave.

Currently Selected:

Yohani 2: wbi

Highlight

Copy