Lʉʉka 21

Ɨlɨtekelo lya mʉkɨjʉʉva ʉmfwɨle

(Malɨka 12:41-44)

1ɄYesu ye alɨ mʉ nyumba ɨnyɨmɨke ɨja kufunyila, akavaagha avamofu visopa ɨlɨtekelo lyave mʉ kyombo ɨkya kʉsopela. 2Akamwagha najʉ mfwɨle jʉmonga ʉnkotofu, isopa mula isendi ivɨlɨ.#21:2 Isendi ivɨlɨ: Isi silyale ndalama ndebe fiijo kukila indalama sooni isa masiki aghuo. 3Apuo, ʉYesu akati, “Kyangʼhaani nɨkʉvavʉʉla, ʉmʉkɨjʉʉva ʉmfwɨle ʉjʉ ʉnkotofu atavwile kukila vooni. 4Ʉlwakʉva avange vooni, vatavwile fidebe mʉ finga fino valɨ nafyo. Neke ʉmfwɨle ʉjʉ mʉ vʉkotofu vwake, atavwile fyoni fino fiveele fya kʉntanga mʉ vwʉmi vwake!”

Kumemʉlua ɨnyumba ɨnyɨmɨke ɨja kufunyila

(Mataayi 24:1-2; Malɨka 13:1-2)

5Avavʉlanɨsɨvua vamonga ava Yesu, valyale vijova ʉlwa nyumba ɨnyɨmɨke ɨja kufunyila, ndavʉle jɨlyajengilue na mavue amanono, palɨkɨmo ni fiinu ifya lʉtogo fino avaanhu valyatavwile kwa Ngʉlʉve. Pe ʉYesu akati, 6“Ifio fyoni fino mʉkʉfyagha lɨno, filikwisa ifighono fino nalɨlasighala nambe lɨvue lɨno lilighelama pa lɨngɨ, ʉlwakʉva ghooni ghilihemʉlua!”

Imhumuko ifighono ifya vʉsililo

(Mataayi 24:3-14; Malɨka 13:3-13)

7Avaanhu vala vakamposia vakati, “Mʼbʉlanɨsi, isio silivombeka lɨɨghi? Kange, kɨvalɨlo kɨki ɨkya kʉtʉhʉfia kuuti sili piipi kuvombeka?” 8Akavavʉʉla akati, “Mʉvisaghe maaso, kuuti mʉleke kusyangua! Ʉlwakʉva vinga vilikwisagha mʉ lɨtavua lyango, nʉjʉnge itisagha, ‘Neene Kɨlɨsite!’ Kange, vitisagha, ‘Ʉnsiki ghʉlɨ piipi!’ Avaanhu avuo, mʉlekaghe kʉkʉvavɨngɨlɨla! 9Ʉmue mʉlaava mupʉlɨka imhola isa vʉlʉgʉ, nʉ vʉgalʉsi vwa vaanhu, mʉlekaghe pikwoghopa. Ndalʉve ndaani isio silivoneka taasi, neke ʉnsiki ʉghwene ʉghwa vʉsililo ghuuva ghʉkyale.”

10ɄYesu akafijovagha kuuti, “Ɨɨsi jɨlalwisagha nɨ ɨɨsi ɨjɨngɨ, ʉvʉtwa kulua nʉ vʉtwa ʉvʉnge. 11Imbale ni mbale kwefiliiva ifisenyeena ifivaha, kwejiliiva ɨnjala ni nhamu isa kwambʉkɨla. Kange, kwefiliiva ifiinu ifya kwoghofia ni fivalɨlo ifivaha kuhʉma kʉkyanya.

12“Neke, isio sooni ye sikyale kuvoneka, avaanhu vilikʉvakola ʉmue na kʉkʉvapumusia. Vilikʉvatwala kʉkʉvahɨgha mʉ masinagogi, na kʉkʉvadindila mʉ ndinde. Kange, mulitwalua kʉ vatwa na kʉ vanya vʉtavʉlɨlua kuuti mʉhɨghue, ʉlwakʉva ʉmue mʉlɨ vavʉlanɨsɨvua vango. 13Neke kʉlyʉmue, ʉghuo ghuuva ghwe nsiki ghwa kwoleka ʉlwɨtɨko lwinu. 14Lɨno, mʉlekaghe kusaagha mʉ moojo ghiinu kuuti kyamukwamʉla kɨki. 15Ʉlwakʉva ʉne nɨkʉvapeela ʉlʉhala na masio agha kʉjova, kuhanga avalʉgʉ viinu vikunua kʉkʉvatola nambe kʉkʉvasigha.

16“Kange, mulikwohelwagha na vapaafi viinu, na vajiinu, na vanyalʉkolo viinu, nava vamanyaani viinu. Kange vamonga mʉlyʉmue vilibudua. 17Avaanhu vooni vilikʉvakalalɨlagha, ʉlwakʉva mʉkʉmbɨngɨlɨla ʉne. 18Neke nalulisova nambe lʉnyele lʉmo, mʉ matu ghiinu! 19Neke ʉmue nave mukuguda, apuo mulikwʉpɨla ʉvwʉmi ʉvwa kʉvʉsila kʉsila.

Ifighono ifya kʉtipulua ɨlɨkaaja ɨlya Yelusalemu

(Mataayi 24:15-21; Malɨka 13:14-19)

20“Ʉnsiki ye muvona ɨlɨkaaja ɨlya Yelusalemu lɨsyʉngʉtilue na valua lɨlʉgʉ, pepano mʉkagʉlaghe kuuti, ʉnsiki ʉghwa kʉtipulua ɨlɨkaaja ɨlio ghʉlɨ piipi. 21Pepano vano valɨ mʉ Yudea, vakɨmbɨlɨlaghe kʉ fidunda. Vano valɨ mʉ lɨkaaja ɨlya Yelusalemu, vahʉmaghe vakɨmbɨlaghe, na vano valɨ kʉ maghʉnda, valekaghe kugomoka mʉ lɨkaaja. 22Ʉlwakʉva, ifighono ifio filiiva fya lʉpumuko, kuuti amasio ghooni ghano ghalembilue mʉ Malembe aMɨmɨke ghavombeke. 23Ɨga avakɨjʉʉva vano viliiva vakunue na vano vilikwongʼhelesyagha ifighono ifio! Ʉlwakʉva luliiva lʉtalamu kyongo mʉ ɨɨsi ɨjɨ, najɨ ngʼhalaasi ja Ngʉlʉve jilikʉvisila avaanhu ava kɨsina ɨkɨ. 24Avaanhu avange, vilibudua ni bamba, avange vilitwalua kʉ vʉkami kʉ ɨɨsi isingi. Neke avaanhu vano naVayahudi, vilikwisa kutema ɨlɨkaaja ɨlya Yelusalemu, kuhanga ifighono fyave ifya kʉtema pano filiiva fisilile.

Kukwisa kwa Yesu ʉMwana ghwa Muunhu

(Mataayi 24:29-31; Malɨka 13:24-27)

25“Filivoneka ifivalɨlo kʉ lɨjʉva, kʉ mwesi na kʉ nhondue. Neke pa ɨɨsi apa, inyanja siliiva na mavɨngo amavaha ghano ghisambalʉka kyongo. Ʉluo lulipelela avaanhu ava fisina fyoni, kuuva nʉ lʉpumuko nʉ lʉdwesi. 26Isio sooni, siliiva sikwisa mʉ ɨɨsi, avaanhu vilipelanɨka kuhanga kusilika vwɨmɨla kukwoghopa kyongo. Vilisaghagha kuuti lukwisa ʉlʉtalamu ʉlʉkome, ʉlwakʉva ifiinu fyoni ifya kʉkyanya filasukanɨka.

27“Pepano valambona ʉne ne Mwana ghwa Muunhu nikwisa mʉ mafunde ni ngʉfu nyinga nʉ vʉvaha. 28Isio sooni, silaava sitengʉla kuvombeka, mʉvisaghe nɨ hʉʉvi nʉ lʉkeelo, ʉlwakʉva isio sihʉfia kuuti, ʉNgʉlʉve alɨ piipi kʉkʉvavanga!”

Ɨkɨhwanɨkɨsio ɨkya mpiki ʉntini

(Mataayi 24:32-35; Malɨka 13:28-31)

29Pe ʉYesu akavavʉʉla avavʉlanɨsɨvua vaake ɨkɨhwanɨkɨsio akati, “Lolagha ʉmpiki ʉntini na mapiki aghange ghooni. 30Pano muvona amapiki ghatengwile kulemba, apuo mʉkagʉlaghe kuuti, amasiki gha fula ghalɨ piipi.

31“Fye lʉlaava, muliiva mʉkʉsivona sino noliike sivombeka, mʉkagʉlaghe kuuti, ʉVʉtwa vwa Ngʉlʉve vʉlɨ piipi. 32Kyangʼhaani nɨkʉvavʉʉla niiti, ɨkɨsina ɨkɨ nakɨlakila kuhanga isi sooni sivombeke. 33Ʉvʉlanga nɨ ɨɨsi filakila, looli amasio ghango naghalakila.

Mʉvisaghe maaso

34“Mʉvisaghe maaso, kuuti mʉlekaghe kulemua nʉ vʉhojofu, nʉ vʉghaasi, nʉ vʉkamɨngʼhanɨlua ʉvwa mbombo isa mʉ ɨɨsi ɨjɨ, ɨkɨghono ɨkio ɨkya vʉsililo kɨlavisila mʉ ngʼhenyemʉkɨla. 35Ʉlwakʉva ɨkɨghono ɨkio kilikʉvangʼhʉlania avaanhu vooni mʉ ɨɨsi jooni. 36Lɨno, mʉvisaghe maaso ʉnsiki ghwoni, mʉnsʉmaghe ʉNgʉlʉve kuuti, avapelaghe ingʉfu isa kʉkila vʉnono mʉ sooni sino silihʉmɨla, neke mʉnoghele kukwɨma pamaaso ghango ne Mwana ghwa Muunhu.”

37Mʉ fighono ifio pamwisi, ʉYesu alyale ivʉlanɨsia avaanhu mʉ lʉvɨɨka ʉlwa nyumba ɨnyɨmɨke ɨja kufunyila. Pakɨlo, akalʉtagha kughona kʉ kɨdunda ɨkya Miseituni. 38Neke jaatu, avaanhu vooni vakasisimukagha lʉlwakɨlo na kulʉta kʉ nyumba ɨnyɨmɨke ɨja kufunyila, kuuti vampʉlɨkɨsie.

Currently Selected:

Lʉʉka 21: wbi

Highlight

Copy