Mataayi 18

Ʉmʼbaha mʉ Vʉtwa vwa kʉkyanya

(Malɨka 9:33-37; Lʉʉka 9:46-48)

1Ʉnsiki ʉghuo avavʉlanɨsɨvua va Yesu vakalʉta pa mwene, vakamposia vakati, “Asi, ghwe veeni jʉno mʼbaha kukila avange mʉ Vʉtwa vwa kʉkyanya?” 2ɄYesu akankemeela ʉmwana ʉnʼdebe, akamʼbɨɨka pakate pa veene, 3akavavʉʉla akati, “Kyangʼhaani nɨkʉvavʉʉla, nave namusyetʉka na kuuva ndavʉle avaana avadebe, namʉlingila mʉ Vʉtwa vwa kʉkyanya. 4Lɨno, ʉmuunhu ghweni jʉno ikujisia ndavʉle ʉmwana ʉjʉ, ʉjuo ghwe mʼbaha mʉ Vʉtwa vwa kʉkyanya. 5Kange, ʉmuunhu jʉno ɨkʉmwʉpɨla ʉmwana ʉnʼdebe ndavʉle ʉjʉ mʉ vughane vwango, iiva ɨkʉnyʉpɨla ʉne.

Imhavɨlo vwɨmɨla ingelo

(Malɨka 9:42-48; Lʉʉka 17:1-2)

6“Neke ʉmuunhu jʉno ɨkʉmwambʉsia kuvomba inyɨvi jʉmonga mʉ vadebe ava vano vikʉnyɨtɨka ʉne, anoghiile kupinyilisivua ʉlwala ʉlʉkome kʉ singo na kutaghua pa kyogho mʉ nyanja. 7Ɨga mwe vaanhu va ɨɨsi ɨjɨ vwɨmɨla ingelo sino sipelela avaanhu kuvomba inyɨvi! Ingelo isio kwesili, neke ɨga kwa muunhu jʉno ipelela ingelo isio! 8Ʉlʉvoko lwako, nambe ʉlʉghʉlʉ lwako lʉngakwambʉsie, dumula na kutaagha kʉ vʉtali. Yekʉba kukwingila kʉ vwʉmi nʉ vʉlema, kukila kujigha na mavoko ghe ghavɨɨlɨ nambe amaghʉlʉ ghe ghavɨɨlɨ, neke ʉtaghue kʉ lʉpumuko lwa mwoto ghʉno naghusima lʉsiku. 9Kange, ɨliiso lyako lɨngakwambʉsie ngʼomotola, ʉtaaghe kʉ vʉtali. Yekʉba kukwingila kʉ vwʉmi nɨ liiso lɨmo, kukila kujigha na maaso ghe ghavɨɨlɨ, neke ʉtaghue kʉ lʉpumuko lwa mwoto ghʉno naghusima lʉsiku.

Ɨkɨhwanɨkɨsio ɨkya ngʼholo jɨno jɨsovile

(Lʉʉka 15:3-7)

10“Mulolelelaghe, mʉlekaghe kʉkʉmʼbeda jʉmonga mʉ vadebe ava, ʉlwakʉva nɨkʉvavʉʉla kuuti, avanyamhola vaave kʉkyanya, ʉnsiki ghwoni valɨ pamaaso gha Nhaata ghwango jʉno alɨ kʉkyanya. 11Ʉlwakʉva ʉne ne Mwana ghwa Muunhu nɨlisile mʉ ɨɨsi, kuuti nɨvapoke avaanhu vano vasovile vwɨmɨla inyɨvi saave.#18:11 Akadebe aka namwekale mʉ fitabu fimonga ifikʉʉlʉ. 12Asi, muvona ndaani? Nave ʉmuunhu alɨ ni ngʼholo kɨlʉndo kɨmo, neke jɨmonga jɨsove, ivomba kɨki? Asi, naɨkʉsileka ingʼholo fijigho budikalʉbale na budikalʉbale na kulʉta kʉ fidunda kulonda ɨngʼholo jɨmo jɨno jɨsovile? 13Kyangʼhaani nɨkʉvavʉʉla, nave ajaaghe, ihovoka fiijo vwɨmɨla ɨngʼholo jɨla jɨmo kukila ingʼholo fijigho budikalʉbale na budikalʉbale sino nasivele sisovile. 14Enendɨɨkɨ, najʉ Nhaata ghwinu jʉno alɨ kʉkyanya, nailonda kuuti jʉmonga mʉ vadebe ava asove.

Ʉvʉtavɨke ʉvwa kʉntanga jʉno akʉhokile

15“Nave ʉmwɨtɨki ʉnʼjaako akʉhokile, lʉta ʉmposie jʉʉve ghwe mwene. Nave mwɨtɨngʼhiine, pe ghuuva ʉntangile kugomoka kuuva mwɨtɨki nʼjaako. 16Neke nave namwɨtɨngʼhiine, nkemeele ʉmuunhu ʉjʉnge jʉmo nambe vavɨlɨ, vapʉlɨkɨsie ɨlɨsio lɨno ʉlɨ nalyo vwɨmɨla ʉnʼjaako kuuti, ʉvwolesi vʉkagʉlɨke na vaanhu vavɨlɨ nambe vatatu.#Similisio sa Ndaghɨlo 19:15 17Neke nave naɨkʉvapʉlɨka voope avuo, lʉta ʉvavʉʉle avaanhu ava kɨpʉgha ɨkya vɨtɨki. Nave naɨkʉvapʉlɨka nava vaanhu ava kɨpʉgha ɨkya vɨtɨki, pe ʉmʼbɨɨke hwene nsongesia songo nambe mʉpanji.

Ʉvʉtavʉlɨlua ʉvwa kʉkaana na kukwɨtɨkɨsia

18“Kyangʼhaani nɨkʉvavʉʉla, sooni sino mʉkanile mʉ ɨɨsi ɨjɨ, ghwope ʉNgʉlʉve iiva akanile kʉkyanya. Kange, sooni sino mwɨtɨkisie mʉ ɨɨsi ɨjɨ, najʉ Ngʉlʉve iiva ɨtɨkisie kʉkyanya. 19Kange, nɨkʉvavʉʉla kuuti, mʉ ɨɨsi muno avaanhu vavɨlɨ mʉlyʉmue nave vɨtɨngʼhiine kusʉʉma kɨmonga, ʉNhaata ghwango ʉghwa kʉkyanya, ɨkʉvapeela. 20Ʉlwakʉva avaanhu vavɨlɨ nambe vatatu pano vakongʼhanile mʉ lɨtavua lyango, na jʉʉne niiva pwenɨlɨ bahapuo palɨkɨmo na veene.”

Imbʉlanɨsio vwɨmɨla kusaghɨlana

21Pepano ʉPeteli akalʉta pa Yesu, akamposia akati, “Ghwe Mʉtwa, nave ʉmwɨtɨki ʉnʼjango ifikʉhoka ʉne, nɨnoghiile kʉkʉnsaghɨla kalɨngi? Asi, nifikʉnsaghɨlagha kuhanga kufika ʉlwa lekelalʉbale?” 22ɄYesu akamwamʉla akati, “Naniiti ʉnsaghɨlaghe ʉnʼjaako kufika ʉlwa lekelalʉbale, ʉlwene ʉnoghiile kʉkʉnsaghɨla ʉnʼjaako amasiki ghooni mʉ vwʉmi vwako.#18:22 Kʉkʉnsaghɨla ʉnʼjaako amasiki ghooni mʉ vwʉmi vwako: Mʉ Kɨyunaani lɨlembilue, Ʉnsaghɨlaghe ʉnʼjaako kufika lekelalʉbale mala fijigho lekelalʉbale.

23“Nijova enendɨɨkɨ, ʉlwakʉva ʉVʉtwa vwa kʉkyanya vʉlɨngʼhiine nɨ kɨhwanɨkɨsio ɨkya ntwa jʉmonga jʉno akalondagha kuvala fino isighila avavombi vaake. 24Ʉntwa ʉjuo ye atengwile kuvala fino ɨkʉvasighila, ʉmʼbombi jʉmonga jʉno alyale isighilua italanta imbilima kɨjigho,#18:24 Italanta imbilima kɨjigho: Ɨtalanta jɨmo jɨlyalɨngʼhiine nʉ lʉhombo ʉlwa mbombo ʉlwa muunhu jʉmo kʉ maaka kɨjigho na ghahaano na kukila. Pe ʉmʼbombi jʉla alyale isighilua indalama isa kʉkwɨla kʉkʉvahomba avaanhu imbilima kɨjigho kʉ maaka kɨjigho na ghahaano na kukila. akaletua pa mwene. 25Ʉmʼbombi ʉjuo, ʉlwakʉva alyakunilue kuhomba indalama sino alyale isighilua, ʉntwa akavavʉʉla avavombi avajaake kuuti, ʉmʼbombi ʉjuo aghʉsɨvue ʉmwene, ʉnʼdala ghwake, avaana vaake ni fiinu fyoni fino alyale nafyo, neke ahombe fyoni fino isighilua nʉ ntwa ghwake.

26“Pe ʉmʼbombi jʉla akafughama pa ntwa, akampelepesia akati, ‘Ghwe ntwa ghwango, sivuo nɨkʉkʉsʉʉma, ʉnguule padebe, ifiinu fyako fyoni fino nisighilua, nihomba.’ 27Ʉntwa jʉla akamʼbonela ɨkɨsa ʉmʼbombi ghwake, akansaghɨla fyoni fino isighilua, akantavʉla alʉtaghe.

28“Ʉmʼbombi jʉla ye avʉkile pala, akatangʼhana nʉ mʼbombi ʉnʼjaake jʉno alyale ɨkʉnsighila idinali kɨlʉndo,#18:28 Idinali kɨlʉndo, salɨngʼhiine nʉ lʉhombo ʉlwa mʼbombi jʉmo kʉ meesi ghane. akankola, akantaka kʉ singo, akamʼbʉʉla akati, ‘Ʉhombe fyoni fino nɨkʉkʉsighila.’ 29Ʉmʼbombi ʉnʼjaake jʉla akafughama pamaaso ghaake, akampelepesia akati, ‘Sivuo nisʉʉma ʉnguule padebe, ifiinu fyako fyoni fino nisighilua, nihomba.’ 30Neke ʉmwene akakaana, pe akalʉta kʉkʉnʼdindila ʉnʼjaake jʉla mʉ ndinde kuhanga pano ihomba ifiinu fyoni fino isighilua.

31“Avavombi avajaake ye vasivwene isio, vakalemala kyongo mʉ moojo ghaave, vakalʉta kwa ntwa ghwave vakamʼbʉʉla sooni sino sivombiike. 32Pepano ʉntwa akankemeela ʉmʼbombi jʉla, akamʼbʉʉla akati, ‘Ghwe mʼbombi ʉve, ʉlɨ mʼbiivi kyongo! Ʉve ye ʉsʉmile ʉne, nakʉsaghɨla fyoni fino nakʉsighilagha! 33Asi, nʉveele ʉnoghiile kʉkʉnsʉngʉkɨla ʉmʼbombi ʉnʼjaako ndavʉle nɨveele nɨkʉsʉngʉkiile ʉve?’

34“Ʉntwa jʉla akakalala fiijo, pe akalaghɨla atwalue mʉ ndinde, kupumusivua kuhanga pano ihomba ifiinu fyoni fino isighilua.

35“Enendɨɨkɨ, najʉ Nhaata ghwango ʉghwa kʉkyanya fye ilikʉvavomba na jʉmue nave namʉkʉvasaghɨla nʉ mwojo ʉmʼbalafu avɨtɨki avajiinu.”

Currently Selected:

Mataayi 18: wbi

Highlight

Copy