Mataayi 19

Ʉlʉfingo ʉlwa vʉtolani

(Malɨka 10:1-12)

1ɄYesu ye amalile kujova amasio aghuo, akavʉʉka mʉ Galilaya, akalʉta kʉ kɨghavo ɨkya Yudea, ɨmwambo ɨja kɨkogha ɨkya Yolidani. 2Avaanhu vinga vakamʼbɨngɨlɨla, ʉkuo akavasosia avatamu vooni.

3AVafalisayi vamonga vakalʉta kʉkʉmʉghela, vakamposia vakati, “Asi, lukwɨtɨkɨsɨvua mʉ ndaghɨlo siitu, ʉmʉghoosi kʉkʉntavʉla ʉnʼdala ghwake mʉ nongua sooni?” 4ɄYesu akavamʉla akati, “Namwɨmbile mʉ Malembe aMɨmɨke kuuti, kuhʉma kʉvʉtengʉlɨlo, ‘ɄNgʉlʉve alyampelile ʉmʉghoosi nʉ nʼdala’?#Vʉtengʉlɨlo 1:27 5ɄNgʉlʉve akati, ‘Mʉ ʉluo, ʉmuunhu ɨkʉmʉleka ʉviise nʉ ngʼina, neke ivisagha nʉ nʼdala ghwake, vavɨlɨ ava viiva mʼbɨlɨ ghʉmo.’#Vʉtengʉlɨlo 2:24 6Apuo naviiva vavɨlɨ kange, looli viiva mʼbɨlɨ ghʉmo. Lɨno, kɨno ʉNgʉlʉve alʉngile, ʉmuunhu naangalekanɨsyaghe.”

7AVafalisayi vala vakamposia kange vakati, “Nave fye lʉlɨvuo, lwandaani ʉMoose mʉ ndaghɨlo saake alyajovile kuuti, ʉmʉghoosi anoghiile kʉkʉmpeela ʉnʼdala ghwake ɨkalata ɨja kʉntavʉla na kʉkʉmʉleka?” 8ɄYesu akavamʉla akati, “ɄMoose alyavɨtɨkisie kutavʉla avadala viinu, ʉlwakʉva namupʉlɨka mʉ sino muvʉlanɨsɨvua. Neke kuhʉma kʉvʉtengʉlɨlo nafye lʉlyale. 9Lɨno nɨkʉvavʉʉla kuuti, ʉmuunhu ghweni jʉno itavʉla ʉnʼdala ghwake, nave ʉnʼdala ʉjuo namʼbwafu, neke itoola ʉjʉnge, iiva ivwafuka.”

10Pe avavʉlanɨsɨvua vaake vakamʼbʉʉla vakati, “Nave fye lʉlɨvuo vwɨmɨla ʉmʉghoosi nʉ nʼdala, yekʉba kuvʉhɨɨla kutoola!” 11ɄYesu akavamʉla akati, “Nakwekʉti avaanhu vooni ndepoonu vikwʉpɨla ɨmhola ɨjɨ, looli va vano ʉNgʉlʉve avapeliile ʉvʉkagʉsi ʉvwa kwʉpɨla ɨmhola ɨjɨ. 12Nɨkʉvavʉʉla isio, ʉlwakʉva kwevale vano navitoola ʉlwakʉva vaholilue vaghʉmba. Kwevale vano navitoola ʉlwakʉva avaanhu avange vavavombile kuuva vaghʉmba. Vamonga navitoola vwɨmɨla kʉkʉmʼbombela ʉNgʉlʉve. Ʉmuunhu jʉno ikwʉpɨla ɨmhola ɨjɨ, ʉpɨlaghe.”

ɄYesu ɨkʉvafuunya avaana avadebe

(Malɨka 10:13-16; Lʉʉka 18:15-17)

13Avaanhu vamonga vakamʉletela ʉYesu avaana avadebe, kuuti avɨɨke amavoko ghaake pa veene na kʉkʉvasʉmɨla kwa Ngʉlʉve. Avavʉlanɨsɨvua vaake vakavadalɨkɨla avaanhu vala. 14Neke ʉYesu akavavʉʉla akati, “Mʉvaleke avaana avadebe visaghe kʉlyʉne, namʉngavasighaghe, ʉlwakʉva ʉVʉtwa vwa kʉkyanya vwa vaanhu vano valɨ ndavʉle avaana ava.” 15ɄYesu akavɨɨka amavoko ghaake pa veene kʉkʉvafuunya, pe akavʉʉka pala.

Ʉlʉtalamu ʉlwa mmofu kukwingila mʉ Vʉtwa vwa kʉkyanya

(Malɨka 10:17-31; Lʉʉka 18:18-30)

16Ʉnsoleka jʉmonga akalʉta kwa Yesu, akamposia akati, “Ghwe Mʼbʉlanɨsi, nɨvombe kɨki ɨkɨnofu, neke nɨkave ʉvwʉmi ʉvwa kʉvʉsila kʉsila?” 17ɄYesu akamwamʉla akati, “Kɨki ʉkʉmhosia ʉne vwɨmɨla ʉvʉnofu? ɄNgʉlʉve mwene ghwe nnofu! Nave ghulonda kukwingila kʉ vwʉmi ʉvwa kʉvʉsila kʉsila, ʉvɨngɨlɨlaghe indaghɨlo sa Ngʉlʉve.” 18Ʉnsoleka jʉla akaposia akati, “Indaghɨlo silɨku?” ɄYesu akamwamʉla akati, “Nʉngabudaghe, nʉngavwafukaghe, nʉngahɨjaghe, nʉngolekaghe isa vʉdesi, 19ʉmwoghopaghe ʉvaaso nʉ mamaajo, na kʉkʉmʉghana ʉnnino ndavʉle ghukughana jʉʉve.”#Kuhʉma 20:12-16; Similisio sa Ndaghɨlo 5:16-20; Valeevi 19:18 20Ʉnsoleka jʉla akati, “Isio sooni nɨsigadɨliile! Kɨɨnu kɨki ɨkɨngɨ kɨno naghilue?” 21ɄYesu akamʼbʉʉla akati, “Nave ghulonda kuuva mʉgholofu,#19:21 Kuuva mʉgholofu: Apa kwekʉti kʉkʉvaghana avaanhu avange ndavʉle ʉNgʉlʉve vʉle ɨkʉvaghana. ʉlʉte ʉkaghʉsie fyoni fino ʉlɨ nafyo, neke indalama sino ʉpatile, ʉvapeele avakotofu. Apuo pe ghuuva nɨ kyʉma kʉkyanya. Pepano ghwisaghe, ʉmbɨngɨlɨlaghe.” 22Ʉnsoleka jʉla ye apʉliike isio, akavʉʉka asukuniile, ʉlwakʉva alyale nɨ kyʉma kinga.

23Pepano ʉYesu akavavʉʉla avavʉlanɨsɨvua vaake akati, “Kyangʼhaani nɨkʉvavʉʉla, lʉtalamu kyongo kwa muunhu ʉmmofu kukwingila mʉ Vʉtwa vwa kʉkyanya. 24Nɨkʉvavʉʉla kange kuuti, kɨhʉʉgʉ fiijo ɨngamɨla pikila pa kalyoli ka honelo, kukila ʉmmofu kukwingila mʉ Vʉtwa vwa Ngʉlʉve.” 25Avavʉlanɨsɨvua vaake ye vapʉliike amasio aghuo, vakadegha kyongo, vakamposia vakati, “Pe veeni lɨno jʉno anoghiile kupokua?” 26ɄYesu akavalola, akavavʉʉla akati, “Kʉ vaanhu, ʉluo lʉtalamu, neke kwa Ngʉlʉve sooni sivombeka.”

27Pepano ʉPeteli akamʼbʉʉla akati, “Lolagha, ʉsue tʉfilekile fyoni, tʉkʉkʉvɨngɨlɨla ʉve! Pe tuvʉmbʉlɨla kɨki?” 28ɄYesu akavamʉla akati, “Kyangʼhaani nɨkʉvavʉʉla kuuti, ʉne ne Mwana ghwa Muunhu niliiva nikalile pa kɨtengo kyango ɨkya vʉvaha mʉ ɨɨsi ɨmhia, na jʉmue mwe vano mʉkʉmbɨngɨlɨla lɨno, mulikukala mʉ fitengo kɨjigho na fivɨlɨ. Mulikukala kuhɨgha ifisina kɨjigho na fivɨlɨ ifya Isilaeli. 29Ʉmuunhu ghweni jʉno ajɨlekile ɨnyumba jaake, nambe avanine, nambe avalʉmbʉ, nambe ʉviise, nambe ʉngʼina, nambe avaana vaake, nambe amaghʉnda ghaake vwɨmɨla ʉne, ikwʉpɨla finga fiijo kukila fino afilekile,#19:29 Finga fiijo kukila fino afilekile: Mʉ Kɨyunaani lɨlembilue, ikwʉpɨla mala kɨlʉndo. na kukwʉpɨla ʉvwʉmi ʉvwa kʉvʉsila kʉsila. 30Neke vinga vano va kwanda valaava va vʉsililo, ava vʉsililo valaava va kwanda.

Currently Selected:

Mataayi 19: wbi

Highlight

Copy