Īmbōmbo Sya Batumịgwa 1

1Gwe Mwimikigwa Tyofịlị, mwa kalata gwa kwanda, mo nāsị̄mbịlemo syosa isị Jesụ ābōmbịle nukumanyịsya, ukwanda mbwandilo bwa mbōmbo jake, 2ukufịka pị̄sịku ili ēgịgwaga ukufyuka kumwanya, bo abalagịle mwa Mbepo Mwịkemo abatumịgwa aba ābasalịle. 3Amasịku amalōngo mana bo afụmịle pakufwa alinkubasetukila kā kị̄ngị, ifị fyali fịmanyịlo fya kumanyịlamo ukuti āli mūmị nalolị. Bālimmbwene, umwene alinkubabūla isya butwa bwa Kyala. 4Lelo bo ali pamopēne nabo, alinkubalagila alinkuti: Mụngasokāngamo mụ Jelụsalemụ mụlugụ̄lilege ulufị̄ngo ulu nābabūlịle umwe, ulu Tāta āfị̄ngịle. 5Buno Johanị ōsyaga namīsi, lolị umwe mwịsakōsịgwaga na Mbepo Mwịkemo, bo gakakīndapo amasịku mịngi.

Jesụ ịkufyuka kumwanya

6Abēne abatumịgwa bo babūngēne, balinkunndālūsya Jesụ balinkuti: Gwe Malafyale, kali pakabalilo kāko po kwịsakungomolelaga Ịsịlaelị ubutwa bwake? 7Umwene Jesụ alinkubabūla alinkuti: Ikyinja na kabalilo kali mmaka ga Tāta, sịkaja syinụ umwe ukumanya ukuti kịsakuja ndilị. 8Lolị mwịsakwambililaga amaka bo Mbepo Mwịkemo abịsị̄le, po mwịsakujaga bakētị bāngu mụ Jelụsalemụ na mōsa mụ Jụtaị, na mụ Samalịja, ukufịka kuno kimalikị̄le ikị̄su.

9Umwene bo ajobịle sịsịsị, alinkwegịgwa ukufyuka kumwanya bo bịkunkēta bōsa; ilịbīngu lilinkumfịsa balinkutolịgwa nukummbona kangi.

10Lelo bo bandūsamị̄le bo ịkubūka kumwanya, po papo balinkunyomoka abāndu babili bīmịle papo, bafwele imyenda imyelụ, 11bịkuti: Mwe bāndu ba mụ, Galịlaị, mwimịle fịkị mụkukēta kumwanya? Jesụ jujuju ēgị̄gwe kumyinụ ukubuka kumwanya, ịsakwịsilaga bo mụmo mụmmbonị̄le bo ịkubūka kumwanya.

Ukusalịgwa kwa ntumịgwa gwa kumpyanịlapo Jụ̄ta

12Po papo abatumịgwa balinkugomoka ukubūka mụ Jelụsalemụ, ukufụma pakyamba iki bạ̄tigi kya Mịsyunguti, iki kili pabupị̄pị na kāja ka Jelụsalemụ, pantāmbo gwa njila ja pị̄sịku lya sabāti (īkịlomịta jimo). 13Lelo bo bị̄ngị̄le nkāja, po papo balinkufyuka kunyụ̄mba ja kwịjulu, kuno bātūgasyaga ba Petelị na Johanị na Jakobụ na Andeleja na Fịlịpụ na Tomasị na Balịto maị na Mataị na Jakobụ unnya Alịfaị na Sịmonị Unsịlotị (ko kuti umwịpụkụlanị), na Jụ̄ta unnya Jakobụ. 14Bōsa babāba balinkubūngāna bwịla, balinkuja ndụmbụla jimojēne pakwịpụ̄ta, pamopēne na bakị̄kulu bamo na ju Malịja unna gwa Jesụ, nabamyabo ba Jesụ.

15Bo gakīndịle amasịku manāndi ịtolo, lulinkujapo ulukomāno lwa bị̄tikị, abāndu aba bāfịkịle pāmịa jimo namalongo mabili. Petelị alinkwima pakāti pamyabo, 16Alinkubabūla alinkuti: Mwe bị̄nāngu, syabagị̄le ukuti isị, sịsịmbị̄gwe mwa kalata, ịsị Mbepo Mwịkemo asị̄jobị̄le nganị nkanwa ka Ndabitị isya Jụ̄ta uju abalongo ị̄le bala bankolaga Jesụ; 17Namanga Jụ̄ta jope āli mwịnītu ābalilị̄gwe lumo nanụswe, ājabilị̄gwe ikijabo kyake mụmmbōmbo iji.

18Lolị umụ̄ndu jujuju ālyulịle ikị̄su nindalama sya mbunịongafụ isị balinhōmbịle, alinkugwila bukụpama, alinkupufụka pakāti, ubula bwake bōsa bulinkōneka. 19Sịsịsị sịlinkwenda nukufụmụka kuli bōsa aba bāli mụ Jelụsalemụ, fyobēne ikị̄su kila kilinkupēgịgwa ija Hakelịtamụ mụnjobelo jabo; ko kuti kị̄su kya ịlopa.

20Namanga sịsị̄mbị̄gwe mwa kalata gwa sabulị ukuti:

Ākāja kāke kị̄pelịle ukuja kisāme,

kangi najumo angajēngangamo mụmo;

kangi lisị̄mbị̄gwe ilya kuti:

Jope nimbōmbo jake fịkuti apyanịlēngepo ujūngi.

21Po lelo umụ̄ndu jumo mbāndu aba bēndaga nanụswe akabalilo kōsa aka Umalafyale Jesụ āsyungūtilaga nanụswe, 22ukwanda pakabalilo akā Johanị ōsyaga, ukwịsakufịka pị̄sịku lila Jesụ egigwaga kumyitu ukufyuka kumwanya, jo ajege nkētị gwa kusyuka kwake pamopēne nanụswe.

23Po papo balinkubabīka abāndu babīli, Josefụ uju bạ̄tigi jo Balisaba, uju īmbēgwa āli jo Jụsịtị, na Matịja. 24Po papo balinkwịpụ̄ta balinkuti: Gwe NTWA, gwe mmanya ndụmbụla sya bāndu bōsa, utunāngisyege uju unsalịle muli aba babili. 25Ugwa kupyanịlapo pabubōmbelị ubu na pabutumịgwa ubu ābulekịle Jụ̄ta, apa ābūkaga pabujo bwake jūjo. 26Po papo balinkubīka ulusalo kunjila ja bulagusị, ubwene ubulagusị bulinkunsala Matịja; po papo alinkubalilịgwa lumo na batumịgwa kalōngo na jumo.

Currently Selected:

Īmbōmbo Sya Batumịgwa 1: NYB96

Highlight

Copy