Īmbōmbo Sya Batumịgwa 3
3
Umụ̄ndu jumo unndemale ịkubūmbulusịgwa
1Ilị̄sịku limo Petelị na Johanị bāfyukaga ukubūka nnyụ̄mba ja NTWA, pakabalilo aka kwipụ̄tila aka buhāno na buna. 2Lelo umụ̄ndu jumo uju ākwemaga uju ālemēle ukufụma mụ mụ̄nda mụnna, āpīmbịgwaga bwịla na bāndu, jo bammbikaga pakifịgo kya nyụ̄mba ja NTWA iki bạ̄tigi kinụnụ, ukuti asūmege ifya busūsilwa kuli aba bị̄ngilaga nnyụ̄mba ja NTWA. 3Lelo bo ababwene ba Petelị na Johanị bịkuja pakwịngila nnyụ̄mba ja NTWA, alinkubasūma ukuti bampege ifya busụ̄silwa. 4Po papo Petelị na Johanị balinkundūsamịla, umwene Petelị alinkummbūla alinkuti: Kēta kuno. 5Umwene alinkusanụka alinkubalūlalila, alinkusūbila ukwambilila fịmo kumyabo. 6Lolị Petelị alinkuti: Fesa na sahabu fyo ngaja nafyo, lolị ifị ndinafyo fyo nịkukupaga: Mụngamụ ja Jesụ Kilisịtị ugwa mụ Nasaletị sụmụka gwendege. 7Po papo alinkunkola ikiboko ikị̄līlo, alinkunsụmụsya. Nakalīnga ịtolo amalūndi na mafụ̄ndo gāke galinkukaka. 8Umwene alinkunyēla alinkwima, alinkwenda. Alinkwịngila nabo nnyụ̄mba ja NTWA bo ịkwenda nukunyēlanyēla, alinkuntụ̄fya Kyala. 9Po papo abāndu ikilūndilo kyosa balinkummbona bo ịkwenda nukuntụ̄fya Kyala. 10Bo bammēnye ukuti jo uju ātūgalaga nukusūma ifya busụ̄silwa pakifịgo ikinụnụ kya nyụ̄mba ja NTWA; kilinkubāga ikitēngusị, balinkuswịga fị̄jo kuli isị syalimmwagị̄le.
Amasyu ga Petelị nnyụ̄mba ja NTWA
11Lelo bo ịkubumị̄lila ba Petelị na Johanị, po papo abāndu bōsa balinkubabopela bo bali mwịbalasa ili bātigi lya Solomonị, balinkuswịganịka. 12Umwene Petelị bo asịbwene sịsịsị, alinkubabūla abāndu bala alinkuti: Mwe bany'Ịsịlaelị umwe, syo mụkuswịga syakị sịsịsị, kangi mụkutulūsamịla fị̄kị̄ ukuti tụkufwana tumpelịle ukwenda namaka gītu jujuswe, pamo nubwịkemo bwitu? 13Kyala gwa Abụlahamụ na Ịsịhaka na Jakobụ, Kyala gwa bātāta jo uju ammwimị̄ke ummbōmbị gwake Jesụ, uju umwe mwalimmbīkịle mmaboko ga balugu, nukunkāna nkyenị mwa Pịlāti, bo umwene Pịlāti atụmwịle ilya kummwabula. 14Umwe mụlinkunkāna Umwịkemo, Unngolofụ, mụlinkunsūma ju nngogị ukuti jo ābuligwege. 15Lolị mụlinkunngoga unndōngolelanjila ja kubūmị, lolị umwene Kyala ālinsyusị̄sye mbafwe, syo tuli bakētị bāke uswe. 16Īngamụ ja Jesụ nulwịtiko mụngamụ ijo fyo ifị fịmpēle amaka umụ̄ndu uju mụkummbona kangi mụmmēnye. Ulwịtiko kwa Jesụ, lo ulu lummbūmbulwịsye umụ̄ndu uju bo mụkukēta mwesa.
17Lilino lelo mwe bāmyitu, Mmēnye ukuti umwe na balōngōsị bīnụ, mwalimmbōmbị̄le Jesụ sịsịsị kisịta kumanya. 18Lolị syo isị kyala asibōmbịle bo mụmo āsịfụmụkịsyaga ukwendela mbakụngụlụka bōsa isya kuti Kilisịtị gwake āli gwa kukubilwa. 19Amụpīndukege lelo mụgomokege kwa Kyala po īnongwa syinụ sịsakōmolịgwaga, ukuti utubalilo twịsege kumyinụ utwakuhobokelamo ukufụma ku NTWA 20ukuti antumege Kilisịtị Jesụ uju ābasalị̄le ngānị. 21Uju ịkusyalaga ku kumwanya ukufịka pakabalilo ka kwandulịgwa fyosa, bo mụmo Kyala ājobị̄le nkanwa mbakụ̄ngụlụka bāke abị̄kemo ukufụma mụ mmbwandilo. 22Namanga Mose ājobị̄le ātị̄le: UNTWA Kyala ịsakubasụmụkisyaga unkụ̄ngụlụka uju ali bo jujune ukufụma mbāmyinụ. Jo mwịse mụmpilikege syosa isị linga ịkubabūla. 23Lolị sịsakujaga bo bunobuno, ukuti gwesa uju linga atịkumpilika unkụ̄ngụluka jujuju, ịsakusōsịgwangako kubāndu ba Kyala nukupyụtịgwa. 24Kangi bōsa abakụ̄ngụlụka aba ābajobaga ukwandila ju Samwelị nāba bakōngị̄lepo pamyake, bope bāfụmụsyaga sịsịsị sịkubōmbịgwa amasịku aga. 25Umwe mụli bāna ba bakụ̄ngụlụka, kangi mụli bāna ba lwịtiko ulu Kyala ālitikēne na bị̄sēmwe bo ịkummbūla Abụlahamụ ukuti: Ndujụ̄ngụ lwako mo fịsakusajilị̄gwaga ifịkolo fyosa fya nkị̄su. 26Umwene Kyala bo ansụmwịsye ummbōmbị gwake, alinkutala ukuntuma kumyinụ, ukuti abasajege umwe bo ịkubagomola jumo jumo kubutulanōngwa bwinụ.
Currently Selected:
Īmbōmbo Sya Batumịgwa 3: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
