Gẹnẹsisi 13

1ABLAM sọ hẹ́ji tọ́nsọn Egipti, èwọ, po asi etọn po, po onú he é tindo lẹpo po, po Loti po hẹ ẹ yì Hùwàji. 2Ablam wàdọkun talala to whékanlin mẹ, to fataka mẹ, podọ to sika mẹ. 3E sọ to yìyì to gbèdopozọnlin etọn lẹ mẹ son Hùwàji kaka jẹ Beteli, jẹ ofi lọ fiè ogohò etọn ko te dai to sáunsáunwhenu to Beteli po Ai po ṣẹnṣẹn; 4jẹ ofi agbà lọ tọn he é ko tùn jẹnùkọn te: finẹ wẹ Ablam to avàleyàn oyín OKLUNỌ tọn té. 5Loti ga, mẹhe yì po Ablam po sọ tindo lẹngbọpa, po kanlinpa po, po ogohò po. 6Aigba lọ ma sọ sọgan hen yé, na yé nido nò pọ́: na núbépli yetọn sù, mọ bọ yé ma sogan nò pọ́. 7Wiwọ de sọ tin to ṣẹnṣẹn kanlinyintọ Ablam tọn lẹ, po kanlinyintọ Loti tọn lẹ po ṣẹnṣẹn: Kenaninu lẹ, po Pẹlizinu lẹ po sọ tin to aigba lọ ji to whenẹnu.

8Ablam sọ dọ hlan Loti, dọmọ, Yẹn vè we, a dike wiwọ de tin to yẹn po hiẹ pò ṣẹnṣẹn blo, podọ to kanlinyintọ ṣie lẹ, pó kanlinyintọ towẹ lẹ pò ṣẹnṣẹn bío, na nọvinọvi wẹ mí wutú. 9Bé aigba lẹpo péte ma tin to nukọn towe? Yẹn vẹ̀ we, klán dewe sọn dẽ: eyín hiẹ na yí amiyọnmẹ, bé yẹn na yí adusimẹ; kavi eyín hiẹ sọ yí adusimẹ, bé yẹn na yí amiyọnmẹ.

10Loti sọ zé nukun etọn daga bo pọ́n Dànfafa Jọdaní tọn lẹpo, dọ é do Osìn to ofi popo, na whẹpo OKLUNỌ do hù Sọdọmi po Gọmọla po súdo, di ojipa OKLUNỌ tọn, di aigba Egipti tọn, le hiẹ jei Zoali mẹ. 11Mowẹ Loti sọ dè Dànfafa Jọdani tọn lẹpo na ede; Loti sọ jẹgbèdopozọnlinjì yì whèzẹtẹn: yé sọ klán yéde mẹde sọn mẹde go. 12Ablam sọ sinai tọ Kenani, Loti sọ sínai to tòdaho Dànfafa tọn lẹ mẹ bo gbá ogohọ̀ etọn pànnukọn Sọdọmi 13Ṣigba sunnu Sọdọmi tọn lẹ yín mẹylankan ylandonọ gbahú do OKLUNỌ go.

14OKLUNỌ sọ dọ hlan Ablam, to godo he Loti ko klán sọn e de, dọmọ, Ze nukun towe daga lò, na a ni pọ́n sọn fie a te, hlan agewàji, hùwàji, whèzẹtẹnwàji, podo whèyìhọwàji dali: 15na aigba he hiẹ mọ nẹlẹ pó, hiẹ wẹ yẹn na na ẹn hlan, podo hlan okún towe kakadoi. 16Yẹn nasọ basi okún towedi kọ́gudu aigba tọn; sọmọ bọ eyín gbẹtọ de sọgan dọ sọha kọ́gudu tọn, bọ́ yè ma sọgan dọ sọha okún towe lẹ tọn ga. 17Fọ́n, bo dán gbon aigba lọ ji to ote e tọn mẹ, podọ to ogblo e tọn mẹ, na hiẹ we yẹn na na ẹn hlan.

18Whenẹnu wẹ Ablam diọtẹnna ogohọ̀ etọn, bo wá bo sinai to ozùn Mamle tọn le mẹ, ehe tin to Hẹbloni, bo sọ tùn agbà de to finẹ hlan OKLUNỌ.

Currently Selected:

Gẹnẹsisi 13: BWL23

Highlight

Copy