Gẹnẹsisi 26

1OHÙVẸ do tin tọ aigba lọ ji, dogọ́ hùvẹ̀ he tin to azán Ablaham tọn lẹ mẹ. Isaki sọ yì Abimẹlẹki ahọlu Bilistinu lẹ tọn de to Gẹlali.

2Okluwọ sọ sọawúhia ẹ, bo dọmọ, A jẹte yì Egipti blo; nò aigba he tọn yẹn na dọ na we ji; 3wáwási to aigba he ji, yẹn nasọ tin hẹ we, bo nasọ dona we; na hlan hiẹ, podọ hlan okún towe wẹ yẹn na na aigba he lẹpo; yẹn nasọ hẹn whiwhlé he yẹn whlé hlan Ablaham otọ́ towe lódo; 4Yẹn nasọ hẹn okún towe jipligégé di sunwhlẹvu olọn tọn lẹ, yẹn nasọ na aigba helẹ hlan okún towe; na to okún towe mẹ wẹ akọta aihọn tọn lẹpo na yín donanọ te: 5na Ablaham yí ogbè ṣie sè wutu, bo sọ yìn asẹ ṣie, gbèdide ṣie, osẹ́ndai ṣie, po osẹ́n ṣie lẹ po wutù.

6Isaki sọ nọ̀ Gẹlali. 7Omẹ finẹ tọn lẹ sọ kàn asi etọn tọn biọ: é sọ dọmọ, Nọviyọnnu ṣie wẹ; na é dibú nado dọmọ, Asi ṣie; é dọ, Omẹ finẹ tọn lẹ nikã hù mi na Lebeka wutu; na é yónwhanpẹ na pinpọ́n wutu.

8E sọ wá jọ, whenuena é ko tin to finẹ na ojiẹ dindẹn, wẹ Abimẹlẹki ahọlu Fìlistinu lẹ tọn pọ́n gbonu, to vẹsẹnu, bo mọ, bo dayi e go, Isaki to aihúnda hẹ Lebeka asi etọn. 9Abimẹlẹki ylọ Isaki, bo dọmọ, Dayi e go, nugbo nugbo asi towe wẹ ewọ: na hiẹ dọmọ, Nọviyọnnu ṣie wẹ ewọ do? Isaki sọ dọ hlan ẹn, dọmọ; Na yẹn dọmọ, Yẹn nikã kú na ewọ wutu. 10Abimẹlẹki sọ domọ, Etẹwẹ hiẹ wà do mí he? dopo to gbẹtọ lẹ mẹ do ko zánhẹ asi towe mahòpón, hiẹ bo nasọ hẹn whẹgbledo wá míwle ji. 11Abimẹlẹki sọ dosẹ́n na gbẹtọ lẹpo dọmọ Mẹdepope hẹ sọ doalọ dawe he, kavi asi etọn go, yè na hù i dándán.

12Whenẹnu wẹ Isaki dónu do aigba lọ ji, bo sọ mọ to owhè nẹ mẹ, kanweko donu sọha mọ: OKLUNỌ sọ dona ẹn. 13Dawe lọ sọ zùn mẹkiklo, bo to susu yì nukọn kaka é do lẹzùn mẹkiklo talala. 14E tindo adọkun lẹngbọ lẹ tọn, po adọkun kanlin tọn po, po whédo daho po; ònú etọn sọ vẹun na Filistinu lẹ. 15Odòtó he devi otọ́ etọn tọn lẹ ko kùn to Ablaham otọ́ eton whenu lẹpo, wẹ Filistinu lẹ hẹn dote, bo yí okó do sú yé.

16Abimẹlẹki sọ dọ hlan Isaki, dọmọ, Yì sọn mí de; na hiẹ yín huhlọnnọ hú míwlẹ. 17Isaki sọ tón sọn finẹ, bo whesla do agbàdo Gẹlali tọn mẹ, bo-sọ nọnọ̀ finẹ.

18Isaki sọ vó odòtó osìn tọn lẹ kùn, he yé ko kùn to Ablaham otọ́ etọn whenu, na Filistinu lẹ ko hẹn yé dote to okú Ablaham tọn godo: é sọ ylọ oyín yetọn kẹdẹdi oyín he otọ́ etọn ko do na yé.

19Devi Isaki tọn lẹ sọ kùndò to agbàdo lọ mẹ, bo mọ odòtò aaisa tọn de to finẹ. 20Kanlinyintọ Gẹlali tọn lẹ núwhlẹn hẹ kanlinyintọ Isaki tọn lẹ, dọmọ, Mítọn wẹ osìn lọ: é sọ ylọ oyín odòtó lọ tọn dọ Esẹki ; na yé hòavùn hẹ ẹ wutu. 21Yé vó odòtò devo kùn, yé sọ whlẹn enẹ ga; é sọ ylọ oyín etọn dọ Sitna. 22E sọ tón sọn finẹ, bo sọ kùn odòtó devo; enẹ wẹ yè ma whlẹn hẹ ẹ gba: é sọ ylọ oyín etọn dọ Lehoboti : é sọ dọmọ, Na dinvie wẹ OKLUNỌ basi otẹnmẹ na mí die, mìwlẹ nasọ yín sinsẹ́nnọ to aigba lọ ji.

23E sọ hẹji sọn finẹ yì Bẹeli-ṣeba. 24OKLUNỌ sọ sọawúhia ẹ to ozán nẹ mẹ, bo dọmọ, Yẹn Jiwheyẹwhe Ablaham otọ́ towe tọn wẹ: a dibú blo, na yẹn tin to de we, bo na dona we, bo na hẹn okún towe jipligégé na Ablaham devi ṣie wutu. 25Ewọ sọ tùn agbà de to finẹ, bo yànavàle oyín OKLUNỌ tọn, bo sọ pẹ́n gohọ̀ etọn do finẹ, devi Isaki tọn lẹ sọ kùn odòtọ̀ de do finẹ.

26Whenẹnu wọ Abimẹlẹki yi e de sọn Gẹlali, po Ahuzati po, họ́ntọn etọn, po Fikoli awhàngán daho etọn po. 27Isaki sọ dọ hlan yé, dọmọ, Etẹwutu wẹ mi wá dè, na mi gbẹwanna mi, bo sọ yàn mi sọn mi de?

28Yé sọ dọmọ, Míwlẹ mọ gbangba dọ OKLUNỌ tin hẹ we: mí sọ dọmọ, Dinvie gbọ whiwhlé ni tin to mí ṣẹnṣẹn, yèdọ to mí po hiẹ po ṣẹnṣẹn, na mí ni sọ nùalẹ́ de hẹ we; 29dọ hiẹ ma na wàylan de do mí, dile míwlẹ ma doalọ go we, podọ dile míwlẹ ma ko wà núde do we, adavo dagbe, bo ko sọ dè we hlan gbonu jijọho: donanọ sọn OKLUNỌ de wẹ hiẹ dinvie.

30E hẹjó yé, yé sọ dù, bo nù. 31Yé fọ́n to afọnnufú, bo sọ whlé hlan yénọzo: Isaki do yé hlan, yé sọ yi sọn e de jijọho.

32E sọ wá jọ to gbèdoponẹ, wẹ devi Isaki tọn lẹ wá, bo dọ nẹ̀ gbọn odòtò he yé kùn tọn dali, dọmọ, Míwlẹ ko mọ osìn. 33E sọ ylọ oyín etọn dọ Ẹiba: enẹwutu wẹ oyín otò lọ tọn do nọ yín Bẹeli-ṣeba kaka jẹ egbẹ́.

34Whenuena Esau yín owhè kande mẹho, é yí na asi Juditi viyọnnu Bẹeli tọn Hittànu po Basemati po viyọnnu Elọni tọn Hittinu: 35yé sọ yín adinọ ayiha tọn hlan Isaki po hlan Lebeka.

Currently Selected:

Gẹnẹsisi 26: BWL23

Highlight

Copy