Gẹnẹsisi 28

1ISAKI sọ ylọ Jakobu, bo dona ẹn, bo na aṣẹ ẹ, bo dọ hlan ẹn, dọmọ, Hiẹ ma na yí asi to viyọnnu Kenani tọn lẹ mẹ gba. 2Fọ́n, yì Padan-alami, to owhé Bẹtueli tọn gbè, otọ́ onọ towe tọn, bo yí asi de sọn finẹ wá to viyọnnu Labani nọvisunnu onọ towe tọn lẹ mẹ. 3Jiwheyẹwhe Ganhunupo ni sọ dona we; bo hẹn we yín sinsẹ́nnọ, bo hẹn we jipligégé, na hiẹ nido yín agùn akọta lẹ tọn de tọn. 4Bo na dona Ablaham tọn hlan we, podọ hlan okún towe po hiẹ po ga: na hiẹ ni dugú aigba wási towe tọn lẹ, he Jiwheyẹwhe na hlan Ablaham.

5Isaki sọ do Jakobu hlan; ewọ sọ yì Padan-alami to Labani de, yisunnu Bẹtueli Silianu tọn, nọvisunnu Lebeka tọn, onọ Jakobu po Esau po tọn.

6Esau sọ mọ dọ Isaki ko dona Jakobu bo sọ do e hlan Padan-alami, nado yí asi sọn finẹ; podọ le é dona ẹn é na asẹ ẹ dọ, Hiẹ ma na yí asi to viyọnnu Kenani tọn lẹ mẹ gba; 7podọ Jakobu yí ogbè otọ́ etọn tọn po onọ etọn po tọn se, bo ko yì Padan-alami. 8Whenuena Esau sọ mọ dọ viyọnnu Kenani tọn lẹ ma jlo Isaki otọ́ etọn gba; 9Esau yì Iṣmaeli de, bo yí Mahalati, viyọnnu Iṣmaeli tọn, visunnu Ablaham tọn, nọviyọnnu Nẹbajoti tọn nado yín asi ẹtọn gọna ehe é tindo lẹ.

10Jakobu sọ tón sọn Bẹeli-seba bo yì Halani dali. 11E sọ jẹ ofi lọ, bo nọte to finẹ to ozán lọ mẹ, na owhè ko biọ wutu; é yí dopo to osé he to ofi lọ lẹ mẹ do dokọ̀, bo mlọnai to finẹ nado damlọn. 12E sọ kudlọ, bo dayi e go, ayila de yè zé dote to aigba bọ aga etọn sú olọn: bo dayi e go, angẹli Jiwheyẹwhe tọn lẹ to jihẹ́, bo sọ to tejẹ to e ji. 13Bo dayi e go, OKLUNỌ site to aga etọn, bo dọmọ, Yẹn OKLUNỌ wẹ, Jiwheyẹwhe Ablaham otọ́ towe tọn, podọ Jiwheyẹwhe Isaki tọn: aigba he ji hiẹ mlọn nẹ, hiẹ wẹ yẹn na na ẹn hlan, podọ hlan okún towe; 14okún towe nasọ taidi kógudu aigba tọn; hiẹ nasọ vún hlan whèyìhọ dali, podọ hlan whèzẹtẹn dali, hlan agewàji dali, podọ hlan hùwàjì dali: to hiẹ mẹ podọ to okún towe mẹ wẹ yè na dona hẹnnu he to aigba ji lẹpo te. 15Bo dayi e go, yẹn tin hẹ we, bo na pọ́n ogo we to fie hiẹ yìyì lẹpo, bo nasọ hẹn we gọ̀wá aigba he ji: na yẹn ma na jo we do, kaka yẹn nado wà enẹ he yẹn ko dọ hlan we tọn dali.

16Jakobu sọ fọ́n sọn amlọn etọn mẹ, é bo sọ dọmọ, Nugbonugbo OKLUNỌ tin to ofi he; yẹn ma yónẹn. 17Obú di i, é sọ dọmọ, Ofi ka dobú ján! ehe ma yín ofi devo de, adavo ohọ̀ Jiwheyẹwhe tọn, ehe sọ wẹ hòngbo olọn tọn.

18Jakobu sọ fọ́n to afọnnufù, bo yí osé he é do dokò, bo yí i dote na kódòtin, bo kọ̀n amì do aga etọn ji. 19E sọ ylọ oyín ofi nẹ tọn dọ Beteli : aigba oyín tòdaho lọ tọn daì wẹ Luzi. 20Jakobu sọ dopa de, dọmọ, Eyín Jiwheyẹwhe na tin hẹ mi, bo na pọ́n ogo e to aliho he yẹn gbọn jei he mẹ, bo na na dùdù mi nado dù, po avọ́ po nado ṣinyọn, 21bọ yẹn sọ lẹ́gọ̀ wá owhé otọ́ ṣie tọn gbè jijọto mẹ; bé OKLUNỌ na yín jiwheyẹwhe ṣie, 22podọ osé he, he yẹn ko zé dote na kódòtin na yín ohò Jiwheyẹwhe tọn: podọ sọn enẹ he hiẹ na na mi lẹpo mẹ, yẹn na nọ na madao etọn hlan we dándán.

Currently Selected:

Gẹnẹsisi 28: BWL23

Highlight

Copy