Gẹnẹsisi 43

1HÙVẸ̀ lọ sọ sinyẹn to aigba lọ ji. 2E sọ wá jọ, whenuena yé ko dù ogbado he yé hẹn gò sọn Egipti pó, otò yetọn dọ hlan yé, dọmọ, Mì vò yì, hò núdùdù vude na mí.

3Juda sọ dọhó hlan ẹn, dọmọ, Dawe lọ kò vivẹvivẹ hlan mí, dọmọ, Mì ma to nukunmẹ ṣie na mọ, adavo nọvisunnu mítọn tin gòna mì. 4Eyín hiẹ na do nọvisunnu mítọn hlan po mí po, mí na jẹte yì bo hò núdùdù na we: 5ṣigba eyín hiẹ ma na do e hlan, mívdẹ ma na jẹte yì gba: na dawe lọ dọ hlan mí, dọ, Míwlẹ ma na mọ nukunmẹ ṣie adavo nọvisunnu mítọn tin gòna mì.

6Islaeli sọ dọmọ, Etòwutu wẹ mì do zán oylan sọmọ hẹ mi, na nado dọ na dawe lọ eyín mì gbò tindo nọvisunnu de? 7Yé sọ dọmọ, Dawe lọ kanbiọ jlọjlọ gbọn mílọsu dali, podọ gbọn hennu mítọn tọn dali, dọmọ, Otò mítọn gbé sọ tin to ogbẹ? mì tindo nọvisunnu devo? mí sọ dọ nẹ kẹdẹdi ohó helẹ nkọ tọn: na mí sọgan yọ́nẹn do dọ ewọ na dọmọ, Hẹn nọvisunnu mítọn wá?

8Juda sọ dọ hlan Islaeli otò etọn, dọ, Do visunnu lọ hlan po yẹn po, mí na fọ́n bo yì; na mí nido nọgbò, bo ma kú, míwlẹ po hiẹ po, po mẹflinfiin mítọn lẹ po ga. 9Yẹn na yín alọyítọ nò; yẹn sí wẹ hiẹ na biọ ẹ te: eyín yẹn ma hẹn ẹn wá de we, bo sọ ẹ do nukọn towe gba, bé gbọ yẹn ni hẹn whòyinylan lọ kakadoi : 10na adavo le mí to awúwhle do he, nugbo mí na ko lògò whlawetọ.

11Islaeli otò yetọn sọ dọ hlan yé, dọmọ, Eyín é yín mọ lò, mì bo basi ehe; mì yi sọn sinsẹ́n dagbedagbe aigba lọ tọn lẹ mẹ do núzinzán mítọn lẹ mẹ, bo hẹn núnina de sọ yì na dawe lọ, núsisá vude, po owín vude po, núwhẹnwan po zuya po, sinsẹ́n bibia lẹ, po almọndi lẹ po: 12bo sọ yí akuẹ dònuawe hẹn to alọ mítọn mẹ; po akuẹ he yè gòjo to onù apò mítọn lẹ tọn mẹ po mì ni sọ vò yíhẹn to alọ mítọn mẹ; eya ojiwinwọn wẹ: 13mì yí nọvisunnu mítọn ga, bo fọ́n, bo sọ gọ̀yì dawe lọ de: 14jiwheyẹwhe Gánhunupo ni na lẹblanu mì to dawe lọ nukọn, na é nido dè nọvisunnu mítọn awetọ po Bẹnjamini po jo na mì. Eyín yè sọ fò ovi ṣie lẹ yì sọn así ṣie, bó yè fòyì sọn así e.

15Omẹ ewlẹ sọ yí núnina nẹ, yé sọ yí akuẹ dònuawe to alọ yetọn mẹ po Bẹnjamini po; bo fọ́n, bo jẹte yì Egipti, bo site to Josefu nukọn.

16Whenuena Josefu mọ Bẹnjamini po yé po, é dọ hlan họ̀nkọ̀nsi owhó etọn tọn, dọ, Hẹn omẹ ewlẹ biọ whógbè, bo hù, bo wleawu dai; na omẹ ewlẹ na dùnú hẹ mi to whèmẹ. 17Dawe lọ sọ basi dile Josefu degbèna do; dawe lọ sọ hẹn omẹ ewlẹ biọ owhó Josefu tọn gbè.

18Obú sọ di omẹ ewlẹ, na yè hẹn yé biọ owhó Josefu tọn gbè wutu; yé sọ dọmọ, Na akuẹ he yè gòjo to apò mítọn lẹ mẹ to tintan whenu tọn wutu wẹ yè dó hẹn mí biọ họmẹ; na é nido din aklọn to mí nù, bo jẹ mí ji, bo yí mí na mẹglọnọ lẹ, po kẹtẹkẹtẹ mítọn lẹ po. 19Yé sọ sẹpọ́ hònkònsi owhó Josefu tọn tọn, yé sọ dọhó hlan ẹn Mto ohòn owhé lọ tọn ji, 20bo dọmọ, A klunọ ṣie, nugbo míwlẹ jẹte wá to tintan whenu nado hò núdùdù: 21é sọ wá jọ, whenuena mí wá jẹ adọtẹn, bọ mí opò mítọn lẹ, bo, dayi e go, akuẹ omẹ dopodopo tọn tin to onù apò etón tọn, akuẹ mítọn to ojlẹ gigọ́ mẹ: mí sọ hẹn ẹn wá to alọ mítọn mẹ. 22Mí sọ hẹn akuẹ devo jẹte wá to alọ mítọn mẹ nado hò núdùdù: mí ma yón mẹhe yí akuẹ mítọn do apò mítọn lẹ mẹ gba.

23Ewọ sọ dọmọ, Jijọho tin hlan mì, mì dibú blo: Jiwheyẹwhe mítọn, podọ Jiwheyẹwhe otọ́ mítọn tọn, ko na adọkun mì to apò mítọn lẹ mẹ: yẹn tindo akuẹ mítọn. E sọ hẹn Simeoni tón wá yé de.

24Dawe lọ sọ hẹn omẹ ewlẹ wá owhó Josefu tọn gbè, bo na osìn yé, yé sọ klọ afọ yetọn lẹ; é sọ na kanlinmahúhú kẹtẹkẹtẹ yetọn lẹ. 25Yé sọ wleawu núnina tọn dai pọ́n wiwá Josefu tọn to whèmẹ: na yé sè dọ yé na dùnú to finẹ. 26Whenuena Josefu wá whégbè, yé hẹn núnina lọ he tin to alọ yetọn mẹ biọ whógbè wá nẹ̃, yé sọ dé yéde hlan ẹn hlan aigba. 27E sọ kàn jijọho yetọn tọn sè yé, bo dọmọ, Otọ́ mítọn tin to jijọho, dawe yónhonọ lọ ohó mẹhe tọn mì dọ? E gbó sọ tin to ogbè?

28Yé sọ dọmọ, Devi towe otọ́ mítọn tin jijọho, é gbó sọ tin to ogbè. Yé sọ àó ota, bo sọ basi ogbégbo.

29E sọ zé nukun etọn lẹ daga, bo mọ Bẹnjamini nọvisunnu etọn, visunnu onọ etọn tọn, bo dọmọ, Nọvisunnu mítọn agọ̀gbọnẹn wẹ ehe, ohó mehe tọn mì dọ hlan mi? E sọ dọmọ, Jiwheyẹwhe ni yín dagbenọ hlan we, visunnu ṣie.

30Josefu sọ deawú; na hòmẹ etọn blawu to nọvisunnu etọn ji: é sọ din fie é na viavi te yi; é sọ biọ abò etọn mẹ, bo viavi to finẹ. 31E klọ nukunmẹ etọn, bo sọ tón wá; é sọ wún ede do ogo, bo dọmọ, Zé núdùdù dai. 32Yé sọ zédai nẹ̃ do ede dali, podọ na yé to yélọsu dali, podọ na Egiptinu lẹ, he nọ dùnú hẹ ẹ le, to yélọsu dali: na Egiptinu lẹ ma na sọgan dùnú hẹ Heblu lẹ wutu; na enẹ wẹ osùnú de hlan Egiptinu lẹ. 33Yé sọ sinai to nukọn etọn, plọnji kẹdẹdi jijihuhlọn etọn, podọ agọ̀gbọnẹn kẹdẹdi ovu etọn: omẹ ewlẹ sọ kẹhẹli dó zénọzo. 34E sọ yí bo do mimá núdùdù tọn lẹ hlan yé sọn nukọn etọn: ṣigba mimá núdùdù Bẹnjamini tọn tọn yín gégé susu whlatón di depope yéwlẹ tọn tọn. Yé sọ nù, bo yín ayanọ po e po.

Currently Selected:

Gẹnẹsisi 43: BWL23

Highlight

Copy