JOHANU 19

1ENẸWUTU whenenu we Pilati yí Jesu, bo hò e. 2Awhanvipẹ le sọ lòn ojegbakun owun tọn de, bo yí ṣinyọn ota nẹ, bo sọ yí awù ogefunwunmẹ tọn do nẹ̃, 3bo dọmọ, Oyínjla, Ahọlu Ju le tọn! ye sọ yí alọhomẹ yetọn do doasífén en. 4Enẹwutu Pilati sọ vó tọ́njegbonu yì, bo dọ hlan yè, dọ, Mì pon, yẹn sọ hẹn en jẹgbonu wá mì de, na mì nido yọnẹn dọ, yẹn ma mọ ylando de to ewọ mẹ gba 5Enẹwutu Jesu tonjẹgbonu wá, yè sinyon ojegbakun owun tọn nẹ̃ bo sọ do awù ogefunwunmẹ tọn nẹ̃. Pilati sọ dọ hlan yé, dọmọ, Mì pọ́n dawe lọ! 6Enẹ wutu whenuena ogán yẹwhenọ lẹ tọn, po ogán lẹ po mọ ẹn, yé dawhá daga dọ, Whè e do satin go! whè e do satin go! Pilati sọ dọ hlan yé, dọ, Mìlọsu yí i, bo whè e do satin go: na yẹn ma mọ ylando de to ewọ mẹ gba. 7Ju lẹ sọ gblọnna ẹn, dọ, Mìwlẹ tindo osén de, podọ gbọn osén nẹ dali é jẹ nado kú, na ewọ yí ede do basi Ovi Jiwheyẹwhe tọn wutu. 8Enẹwutu whenuena Pilati sè ohó he, obu di i humọ talala; 9é sọ vó gbàngan owhẹda tọn mẹ biọ, bo dọ hlan Jesu, dọ, Fie wẹ hiẹ sọn? Ṣigba Jesu ma na gbègbingblọn de e. 10Enẹwutu Pilati dọ hlan ẹn, dọ, Hiẹ ma dọhó hlan mi? be hiẹ ma yọnẹn dọ yẹn tindo asè nado whè we do satin go, bo sọ tindo aẹó nado dè we do ote? 11Jesu sọ gblọn nẹ̃ dọmọ, Hiẹ ma do ko tindo asé de to oji e gba, adavo yè nawe sọn aga: enẹwutu ewọ he jo mi hlan we wẹ tindo ylandó klohú. 12Ehe ji wẹ Pilati din nado dè e do ote: ṣigba Ju lẹ dawhá lélé dọ, Eyin hiẹ jo dawe he dai, be hiẹ ma yín họ́ntọn Sesali tọn gba: mẹdepope he yí ede do basi ahọlu de, jagò do Sesali. 13Enẹwutu whenuena Pilati sè ohó helẹ, é hẹn Jesu jẹgbonu wá, bo sọ sinai do ofìn owhẹda tọn ji, to ofi he yè nọ ylọ dọ, Zannutité, ṣigba to ogbè Heblu tọn mẹ, Gabbata. 14E sọ yín awuwle juwayì tọn gbè, to ogàn sidopotọ jlẹmẹ: é sọ dọ hlan Ju lẹ, dọ, Mi pọ́n ahọlu mìtọn 15Enẹwutu yé dawhá lélé dọ, Dè e sè, dè e sè, 1 whè e do satin go. Pilati sọ dọ hlan yé, dọ, Be yẹn na whè Ahọlu mìtọn do satin go? Ogán yẹwhenọ lẹ tọn dọmọ, Mìwlẹ ma tindo ahọlu de, adavọ Sesali. 16Enẹwutu whenẹnu wẹ é jo e hlan yé, nado yín whiwhe do satin go. Enẹwutu yé yí Jesu; 17ewọ sọ yì gbonu hìnhẹn satin ede tọn jẹ ofi otaka de tọn lọ, he yè nọ ylọ to Heblu mẹ Golgọta: 18ofi he yé whè e do satin go te podọ omẹ awe devo po e po, ode to awà he ji, awetọ to awà awetọ ji, Jesu tin to ṣẹnṣẹn. 19Pilati sọ wlan owó de bo yí i do satin ji. Owé winwlan lọ we, JESU NAZALẸTI TỌN, AHỌLU JU LẸ TON. 20Enẹwutu susu Ju lẹ tọn wẹ hia owé kinkan he; na ofi he yè whè Jesu do satin go te sepó otòdaho lọ: yè sọ kàn ẹn to ogbè Heblu tọn mẹ, tò Gleki tọn mẹ, podọ to Latini tọn mẹ. 21Enẹwutu yẹwhenọ daho Ju lẹ tọn dọ hlan Pilati, dọ, A wlan dọ, Ahọlu Ju lẹ tọn blo; ṣigba dọ ewọ dọmọ, Yẹn wẹ Ahọlu Ju lẹ tọn. 22Pilati sọ gblọn dọmọ, Onu he yẹn ko wlan, yẹn ko wlan.

23Enẹwutu awhanvipẹ lẹ, whenuena yé whè Jesu do satin go, yí avọ̀ etọn, bo má ẹn do donù ẹnẹ, dopo hlan awhanvipẹ dopodopo; podọ awù etọn ga: awù lọ ma tindo titọtẹn, yè lón ẹn sọn aga kaka yìdo. 24Enẹwutu yé dọ to yede ṣẹnṣẹn j dọ, Mì dike mí tlẹn ẹn blo, ṣigba mí ni do ovò e ji, mẹhe tọn é na yín: na yè nido hẹn Owé wiwe di, ehe dọmọ, Yé má avọ̀ ṣie to yéde ṣẹnṣẹn, Bo sọ do ovò áwù ṣie ji. Enẹwutu onú helẹ wẹ awhanvipẹ lẹ wà. 25Omẹ delẹ site to ofi he satin Jesu tọn te, onọ etọn po nọviyọnnu onọ etọn tọn po, Malia asi Kleopasi tọn, po Malia Magdaleni po. 26Enẹwutu whenuena Jesu mọ onọ etọn po nuplọntọ lọ po, mẹhe Jesu yiwanna site to finẹ, é dọ hlan onọ etọn, dọ, Yọnnu, pọ́n ovisunnu towe. 27Whenẹnu wẹ é sọ dọ hlan nuplọntọ lọ, dọ, Pọ́n onọ towe. Sọn ojlẹ nẹ mẹ wẹ nuplọntọ lọ ko plan ẹn yì owhé ede tọn gbè.

28To ehegodo, Jesu yinyọnẹn dọ yè ko dotana onú lẹpo to dinvie, na yè nido hẹn Owé wiwe di, é dọmọ, Ové hú mi. 29Yè zé núzinzán de do ote to finẹ, ehe gó na ovẹ̃n vivé; mọwẹ yé sọ ylón tekan de do ovẹ̃n vivé mẹ, do atin hisọpe tọn ji, bo hẹn ẹn wá onù etọn. 30Enẹwutu whenuena Jesu yí ovẹ̃n vivé lọ, é dọmọ, E vò: é sọ dé ota etọn, bo jo gbigbọ etọn do.

31Enẹwutu Ju lẹ, na é yín awuwlegbè wutu, dọ osiọ ma na do tin to satin gò to azán gbọjẹ tọn gbè, (na azán daho de wẹ azán gbọjẹ tọn nẹ) biọ to Pilati si dọ yè ni wén asapadahu yetọn, podọ na yé nido yín zizé sè. 32Enewutu awhanvipẹ lẹ wá, bo wén asapadahú omẹ tintan tọn, po omẹ awetọ tọn po, he yè whè do satin go po e po lẹ: 33ṣigba whenuena yé wá Jesu de, bo mọ dọ é ko ku, yé ma wén asapadahú etọn gba. 34Ṣigba dopo to awhanvipẹ lẹ mẹ yí owhán, bo só adaja mẹ nẹ̃, afọdoponẹji ohùn po osìn po sà jẹgbonu. 35Podọ ewọ he mọ ẹn dékunnu, nugbo sọ wẹ okunnu etọn: é sọ yọnẹn dọ nugbo wẹ é dọ, na mìwlẹ ga nido yise. 36Na yè wà onú helẹ, na yè nido hẹn Owé wiwe di, Ohú etọn de ma na yín gbigbà. 37Owé wiwe devo ga, sọ dọmọ, Yé na to pinpọ́n mẹhe yè sọ whán.

38To onú helẹ godo we Josẹfu Alimate tọn, mẹhe yín nuplọntọ Jesu tọn de, ṣigba é ma yín to gbangba, na osi Ju lẹ ton wutu, biọ to Pilati de na é nido zé osiọ Jesu tọn sè: Pilati sọ degbè nẹ̃. Enẹwutu é wá, bo zé ọsiọ etọn yì. 39Nikódemi sọ wá finẹ ga, mẹhe wá é de dai to ozán mẹ, é hẹn oflusọ zuya pò aloe po tọn wá, é yì ojlé kanweko hunkọ. 40Mọwẹ yé zé osiọ Jesu tọn, bo yí alà do bla ẹ po nuwhẹnkún po, kẹdẹdile owàlọ Ju lẹ tọn yín to osiọ didi yetọn mẹ. 41Ojipa de tin to ofi he yè whè e do satin go te; oyèwhé yóyè de tin to ojipa lọ mẹ, ehe mẹ yè ma tó omẹ depope do gbède. 42Finẹ wẹ yé tó Jesu do, na awuwlezán Ju lẹ tọn wutu; na oyòwhó lọ sẹpọ́ talala.

Currently Selected:

JOHANU 19: BWL23

Highlight

Copy