LUKU 15
15
1DINVIE tòkuẹsinyantọ lẹ po ylandonọ lẹ po to dindọn sepọ e de nado sè ohó etọn. 2Falesi po wekantọ lẹ po to hunhlun, dọmọ, Dawe he to ylandonọ lẹ yí, bo sọ to núdù hẹ yé.
3E sọ dọ oló he hlan yé, dọmọ, 4Dawe tẹwẹ to mì me, he tindo lẹngbọ kanweko, eyín é hẹn dopo bú to yé mẹ, bọ e ma na jo kanwefọtọ̀nnukunẹnẹ he pò dai to zùngbo mẹ, bo dafona ehe bú, kaka é na do mọ ẹn. 5Whenuena é sọ mọ ẹn, é zé e do abọ́ etọn ji, é to ayajẹ. 6Whenuena e sọ biọ whègbè, é ylọ họntọn etọn lẹ, po kọmenu etọn le po plidopọ, bo dọ hlan yé, dọmọ, Mì jaya hẹ mi; na yẹn ko mọ lẹngbọ ṣie he bú. 7Yẹn dọ hlan mì, mọkẹdẹ wẹ ayajije na tin to olọn mẹ to ylandonọ dopo he vọjọ ji, hú to dódónọ kanwefọtọ̀nnukunẹnẹ he ma do vọjọ ji.
8Kavi yọnnu tẹwẹ he tindo fatakakuẹ ao, eyín é hẹn dopo bú, bọ é ma na tá zogbán, bo zà whégbè, bo sọ din in talala kaka é na do mọ ẹn? 9Whenuena é sọ mọ ẹn, é ylọ họ́ntọn etọn lẹ, po kọmẹnu etọn le po plidopọ, bo dọmọ, Mì jaya hẹ mi; na yẹn ko mọ akuẹ he yẹn hẹn bú. 10Yẹn do hlan mì, mọkẹdẹ we ayajijẹ tin to angẹli Jiwheyẹwhe tọn lẹ nukọn to ylandonọ dopo he vọjọ ji.
11E sọ dọmọ, Dawe de tindo ovisunnu awe: 12yọ̀pọ he to yé mẹ dọ hlan otọ́ etọn, dọmọ, Otọ́, na osọha agbàn he tọnnù ṣie mi. E sọ má onú he é tindo lẹ hlan ye, 13Azán vude godo, ovisunnu yọ̀pọ lọ bé onú he é tindo lẹpo plidopọ, bo yí gbéjizọnlin etọn biọ otò dindẹn de mẹ, finẹ, wẹ é zán agbàn etọn gbọn ogbẹ gbigble zinzán mẹ. 14Whenuena é zán onú lepo vò, huvẹ daho fọ́n to otò lọ mẹ, é sọ sè hẹnjẹ. 15E yì, bo sọ kòn ede dopo hẹ otòvi otò lọ mẹ tọn de: é sọ do e hlan oglè etọn mẹ nado to ohàn lẹ yìn. 16Homebùnhùn wẹ é na do dù floflo he ohàn le to dùdù gọhò; mẹdepope ma sọ na en. 17Whenuena e mọ ede, é dọmọ, Be nemunemu wẹ azọ́ntọ otọ́ ṣie tọn lẹ he tindo núdùdù he sù dùdù bo so pò to ai, bọ yen to kúkú na huvẹ 18Yẹn na fọ́n, bo yì otọ́ ṣie de, bo na dọ hlan ẹn, dọmọ, Otọ́, yẹn ko wà oylan do olọn go, podọ to nukon towe, 19yẹn ma jẹ mẹhe yè na ylọ ovisunnu towe ba gba; yí mi do basi dopo to azọ́ntọ towe lẹ mẹ. 20E sọ fọ́n bo yì otọ́ etọn de. Ṣigba vhenuena é tin to aganu, otọ́ etọn mọ en, lẹblanuwà ẹ, é sọ dowezun bo plalọ okò etọn, bo sọ donùnùgo nẹ̃. 21Ovi lọ sọ dọ hlan ẹn, dọmọ, Otọ́, yẹn ko wà oylan do olọn go, podo to nukọn towe, yẹn ma sọ jẹ mẹhe yè na ylo ovisunnu towe ba gba 22Ṣigba otọ dọ hlan afànumẹ etọn lẹ, dọ, Mì hẹn otewu dagbedagbe jẹgbonu wá, bo zé do nẹ̃; mì yí alọké do alọ etọn mẹ, podọ afọpa do afọ etọn: 23mì sọ yí oyìnsu wínyánwínyán wá, bọ sọ hù i; bo gbọ mí ni tọ dùdù bo to ayajẹ: 24na ovi ṣie he ko yín osiọ, é sọ tọgbè; é ko yín búbú, yè sọ mọ: ẹn. Yé sọ sè ayaje. 25Ṣigba ovi etọn mẹho ko tin to oglègbo: le é ja, bó dòn sepó owhé, é sè ogbè ohàn po owè po tọn. 26E sọ ylọ dopo to devi lẹ mẹ, bo kanse dọ, Etẹ yè yọ́n onú helẹ na? 27Ewọ sọ dọ hlan ẹn, dọ, Nọvisunnu towe gò, otọ́ towe sọ hu oyìnsu wínyánwínyán na é mọ ẹn yí gò jijọho, podo to agbasa mẹ wutu. 28Ewọ sọ yín homẹgblenọ, bo gbé whégbè bio: otọ́ eton jegbonu yi, bo vẹvẹ nẹ̃. 29Ṣigba é gblọn bo dọ hlan otọ́ etọn, dọmọ, Do ayi e go, sọn owhé nẹmu die gbọn yẹn ko to sinsẹ́n we, yen ma jẹsénmẹna gbèdide towe de gbede: gãnṣo hiẹ ma na gbọgbọẹvu dopo mi na yẹn nido jaya po họ́ntọn ṣie lẹ po gba: 30ṣigba le ovi towe he gò, he yí ogàlilọ do hẹn onú he hiẹ tindo lẹpo gble, hiẹ ko hù oyìnsu wínyánwínyán nẹ. 31Ewọ sọ dọ hlan ẹn, dọmọ, Ovi, hie tin to dẽ whepoponu, onú he yín ṣie lepo wẹ towe. 32Ṣigba e je mí ni jaya, bo sọ yín homẹhùnnọ; na nọvisunnu towe he ko yín osiọ, é sọ vó togbé; bo ko yín búbú, yè bo sọ mọ ẹn.
Currently Selected:
LUKU 15: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
