Li-vi Ki 16

Su̍k-chhui-ngit ke Thiàu-li

1Â-lùn ke lióng-ke lai-é chhîn-khiun Song-chú#16:1 Khon Li-vi Ki 10:1-3., sí-thet yî-heu, Song-chú chhiu tui Mô-sî kóng: 2“Oi lâu ngiâ-kô Â-lùn kóng, cho-m̀-tet sùi-sṳ̀ sùi-yi chin-ngi̍p chong-man heu-poi ke chṳ-sṳn-só, to yok-khui táng su̍k-chhui ke koi-é mien-chhièn, miên-tet kì sí-thet; yîn-vi Ngài chhai su̍k-chhui ke koi-é táng tui yùn-chûng hién-hien.”

3Chiap-tén, Song-chú siên-pu yî-ha ke chṳ́-sṳ. Â-lùn chin-ngi̍p sṳn-só, oi khiên yit-chak se ngiù-kú cho su̍k-chhui-chi, lâu yit-chak mièn-yòng-kú cho sêu-fa-chi. 4Kì oi sé-sṳ̂n, yèn-heu chok-hó chi-sṳ̂ lî-fu̍k: chok mà-sâ cho ke sṳn nui-sâm lâu tón-fu, kiê-tén mà-sâ cho ke yêu-tai, yu tai mà-sâ cho ke mo-é. 5Yî-set-lie̍t fi-chung oi chiông hien-chi ke thèu-sâng kâu-pûn kì: lióng-chak sân yòng-kú cho su̍k-chhui-chi, yit-chak mièn-yòng-kú cho sêu-fa-chi.

6Â-lùn yit-thin oi vi chhṳ-kâ lâu kì ke kâ-su̍k hien ke-chak ngiù-kú cho su̍k-chhui-chi. 7Yèn-heu, kì oi khiên ke lióng-chak sân yòng-kú to sṳn-chong-phùng mùn-héu, piong chhai Song-chú mien-chhièn, 8vi lióng-chak sân-yòng-kú chhû-chhiâm, yit-chhiâm siá “kûi-pûn Song-chú”, nang-ngoi yit-chhiâm siá “kûi-pûn Â-sat-siet-le̍t#16:8 “Â-sat-siet-le̍t” ngièn-vùn ke yi-sṳ mò chhîn-chhú, khó-nèn he khóng-yâ kúi ke miàng, ya-he “piong-thet ke sân-yòng-kú” ke yi-sṳ.”. 9Â-lùn oi chiông chhû-tó “kûi-pûn Song-chú” ke sân yòng-kú hien-cho su̍k-chhui-chi, 10chiông chhû-tó “kûi-pûn Â-sat-siet-le̍t” ke nang-ngoi yit-chak sân yòng-kú sâng-sâng hien-pûn Song-chú, yèn-heu piong-to khóng-yâ hi kûi-pûn Â-sat-siet-le̍t, vi ngìn-mìn su̍k-chhui.

11Â-lùn oi vi chhṳ-kâ lâu kì ke kâ-su̍k hien ke-chak ngiù-kú cho su̍k-chhui-chi; kì chiông liá ngiù-kú chhṳ̀-thet yî-heu, 12oi nâ-tén hiông-lù, tui Song-chú mien-chhièn ke chi-thàn táng chông-mân fó-than, pin tai-tén lióng-kha̍k hiông-fún, chin-ngi̍p chong-man heu-poi ke chṳ-sṳn-só. 13Kì oi chhai Song-chú mien-chhièn sêu-hiông, sṳ́ yên châ-tén yok-khui táng su̍k-chhui ke koi-é, miên-tet kì sí-thet. 14Kì oi nâ-têu ngiù-kú ke hiet, yung sú-chṳ́ vun-hiet, fin chhai su̍k-chhui ke koi-é tûng-phién, yu chhai su̍k-chhui ke koi-é thèu-chhièn fin chhit-pái.

15Chiap-tén, kì oi chhṳ̀ sân-yòng-kú, vi ngìn-mìn hien su̍k-chhui-chi. Kì oi chiông yòng-hiet tai-ngi̍p chong-man heu-poi ke chṳ-sṳn-só, fin chhai su̍k-chhui ke koi-é táng lâu koi-é thèu-chhièn, chhiu-chhiong kì fin ngiù-hiet án-ngiòng. 16Yîn-vi Yî-set-lie̍t-ngìn ke mò chhiang-li lâu só fam yit-chhiet ke chhui, kì oi yung liá-chúng fông-fap vi chṳ-sṳn-só hàng kiet-chhiang-lî#16:16 “kiet-chhiang-lî” ya-he yi̍t-cho “su̍k-chhui-lî”. Chhâm-cheu 17-18, 20, 33 chiet.; kì ya oi vi sṳn-chong-phùng hàng kiet-chhiang-lî, yîn-vi sṳn-chong-phùng chhai yàng ke chûng-kiên, yàng chhai lî-ngì song he mò chhiang-li ke. 17Tui Â-lùn chin-ngi̍p chṳ-sṳn-só hàng kiet-chhiang-lî to kì chhut-lòi ke liá-chham sṳ̀-kiên, sṳn-chong-phùng tî-poi cho-m̀-tet yû-ngìn. Kì oi vi chhṳ-kâ, kiâ kâ-su̍k, lâu Yî-set-lie̍t chhiòn fi-chung hàng su̍k-chhui-lî. 18Yèn-heu kì oi chhut-lòi, oi to Song-chú mien-chhièn ke chi-thàn hien sêu-fa-chi, kiet-chhiang chi-thàn. Kì oi nâ-têu ngiù-kú ke hiet lâu sân-yòng-kú ke hiet, kò chhai chi-thàn ke si-chak kok. 19Kì yit-thin oi yung sú-chṳ́ vun-hiet, chhai chi-thàn táng fin chhit-pái. Kì oi yung liá-chúng fông-fap, chhù-thet Yî-set-lie̍t-ngìn ke vû-ve, kiet-chhiang chi-thàn, sṳ́ kì sàng-cho sṳn-kiet.

Thoi-chhui ke Sân-yòng-kú

20Â-lùn vi chṳ-sṳn-só, sṳn-chong-phùng, lâu chi-thàn hàng kiet-chhiang-lî yî-heu, chhiu oi chiông “kûi-pûn Â-sat-siet-le̍t” ke-chak sâng ke sân yòng-kú khiên ko-lòi. 21Kì oi chiông sûng-sú piong chhai yòng ke thèu-nà táng, sṳ̀n-ngin Yî-set-lie̍t-ngìn yit-chhiet ke chhui-ok lâu ko-fam, chiông liá-têu chhui chhiòn-phu kûi-to yòng ke thèu-táng, yèn-heu phai yit-sà chiông liá-chak yòng sung-to khóng-yâ hi. 22Liá-chak yòng chhiu oi tâm-tông kì-têu yit-chhiet ke chhui, chhiòn-phu tai-to mò ngìn he̍t ke thi-fông hi; ke-sà ngìn chhiu oi chiông yòng liù chhai khóng-yâ.

23Yèn-heu, Â-lùn oi chin-ngi̍p sṳn-chong-phùng tî-poi, chiông kì ngi̍p chṳ-sṳn-só ke sṳ̀ só-chok ke chi-sṳ̂ lî-fu̍k thot hâ-lòi, piong chhai ke-vi. 24Kì oi chhai sṳn ke só-chhai sé-sṳ̂n, chok-hó phien-fu̍k, yèn-heu chhut-lòi vi chhṳ-kâ lâu ngìn-mìn ke chhui hien sêu-fa-chi. 25Kì oi chhai chi-thàn táng sêu sên-ngì ke yù cho su̍k-chhui-chi. 26Ke chiông sân-yòng-kú sung-to khóng-yâ “kûi-pûn Â-sat-siet-le̍t” ke ngìn, kì yit-thin oi siên sé-chhiang sâm-fu ya oi sé-sṳ̂n chang cho-tet chón-to yàng-tú. 27Oi chiông su̍k-chhui-chi ke ngiù-kú lâu sân yòng-kú tai-to yàng-ngoi sêu; phì, ngiuk, chhòng chhiòn-phu oi sêu-thet. Kì-têu ke hiet yí-kîn tai-ngi̍p chṳ-sṳn-só su̍k-chhui lé. 28Ke sêu thèu-sâng ke ngìn yit-thin oi siên sé-chhiang sâm-fu ya oi sé-sṳ̂n chang cho-tet chón-to yàng-tú.

Chûn-sú Su̍k-chhui-ngit

29Yî-set-lie̍t-ngìn oi yún-yén chûn-sú yî-ha ke thiàu-li. Tak-ngièn chhit-ngie̍t chhû-sṳ̍p, Yî-set-lie̍t-ngìn lâu chhiam-sṳ̀ he̍t chhai kì-têu tông-chûng ke lî-hak yit-thin oi kim-sṳ̍t, khiet-khú chhṳ-kâ, cho-m̀-tet cho-se. 30Chhai liá yit-ngit, oi vi kì-têu hàng su̍k-chhui-lî, kiet-chhiang kì-têu, sṳ́ kì-têu chhai Song-chú mien-chhièn chhiang-li, chhù-thet kì-têu só-yû ke chhui. 31Liá he chṳ-sṳn ke ôn-sit-ngit; kì-têu yit-thin oi kim-sṳ̍t, khiet-khú chhṳ-kâ, cho-m̀-tet cho-se. Liá he yún-yén ke thiàu-li. 32Ke cheu-fap sat-li̍p, sṳ̀n-chiap â-pâ chṳp-hàng chi-sṳ̂ chṳt-vu ke thai-chi-sṳ̂ oi hàng su̍k-chhui-lî. Kì oi chok-hó chi-sṳ̂ lî-fu̍k, 33vi chṳ-sṳn-só, sṳn-chong-phùng, lâu chi-thàn kí-hàng kiet-chhiang-lî, ya vi khì-thâ ke chi-sṳ̂ lâu chhiòn-phu fi-chung kí-hàng su̍k-chhui-lî. 34Liá-ke thiàu-li yit-thin oi yún-yén chûn-sú. Liá su̍k-chhui-lî tak-ngièn yit-thin oi kí-hàng yit-pái, vi Yî-set-lie̍t-ngìn chhù-thet só-yû ke chhui.

Mô-sî chhiu chûn-cheu Song-chú ke min-lin hi-cho#16:34 “Mô-sî chhiu chûn-cheu Song-chú ke min-lin hi-cho” ya-he yi̍t-cho “Â-lùn chhiu chûn-cheu Song-chú min-lin Mô-sî ke fa hi-cho”..

Currently Selected:

Li-vi Ki 16: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Li-vi Ki 16

Popular Bible Verses from
Li-vi Ki 16

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 16

Li-vi Ki 16

Popular Bible Verses from Li-vi Ki 16

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 16

Popular Bible Verses from
Li-vi Ki 16