1 Samuel 20
20
Jonatán lecochiya ñe'me David qaedi dajoye
1David dajoye, ca'e di'me Naiot, jo'ne 'naleua di'me Ramá, qama'le yelaque ñe'me Jonatán qaedi dojapegue', qama'le yenat:
«¿Jach'e jogamaĝa eeta ga'me ja'uo? ¿Jach'e jogamaĝa yaviyaĝajet? ¿Jach'e jogamaĝa ja no'en ta'le je'etec joñe'me adet'a, qaedi jetaque jayem yalat?»
2Ñe'me Jonatán 'yateguet:
«¡Yataqachiñe ja naq'aeta ta'le jetaque am yalat! Qa'a ñe'me taĝadena' qaya'te ya'uo, ta'le ja jayem 'te yayatenaĝanaĝanec, temaq'aen ta'le t'adaic uotaĝa jaleca. Qama'le ¿toqoch'e ja jayem 'te 'yaĝatem da'me dojo'? Yataqachiñe ja naq'aeta.»
3Qalaĝaja David ja yaĝañi da'me yitaĝa enaac:
«Ñe'me adet'a qa'a yataqachiñe yayaten queda'me nach'e eta't 'uo da'me adiyamaĝadenataĝanaĝac joda'me jayem. Chane'eja uenata queda'me ja 'noota ta'le am totelegue da'me ta'le auayaten joga'me jetaque ya'uo. Qalaĝaja, 'ñaĝatot ñe'me Jaliaĝanec Dios, nach'e ena'am da'me am, queda'me jayem ue'tajop da'me yamta'le jeleu.»
4Qama'le Jonatán 'yateguet joñe'me:
«Jayem a'uaĝatem jach'e ga'me jetaque am je'etem, qama'le ja'uo.»
5Qama'le David enaac:
«Qom 'yoĝoñi qonetonec ga'me auoĝoic dalaĝaic, da'me jalchi'ena qoya'uo nale ga'me neualayaĝac, qama'le qoyouetaque ta'le jayem ñeuanaĝaua da'me deque'e ñe'me adet'a jo'ne jaliaĝanec. Qalaĝaja, jayem auaje'tem da'me ñañoĝochiñe, joue'ta ga'me 'nonaĝa, chayovida'a ga'me javit qom 'yoĝoñi laqaya. 6Qom ñe'me adet'a jayem nataĝanaque, qama'le a'uaĝatem queda'me am jojapegue' qaedi jayem auajeta da'me jajoyi di'me Belén, jo'ne mach'e 'yachaqa', qa'a gaa'me 'yachaqadiaĝa'u yauote ga'me lajaqaje'j jo'ne jalchi'ena yauote nale. 7Qom ñe'me adet'a 'yamaqaten joda'me, qama'le jen machiñe q'aen. Qalaĝaja qom dalemata, male yataqachiñe auayaten joñe'me da'me jetaque 'uo da'me jayem 'yetec. 8Qama'le 'noota qom jayem avichoĝoden, qa'a joote qa'naĝatot ñe'me Jaliaĝanec Dios da'me eja yataqachiñe qo'mi jaigaĝa'u. Qalaĝaja qom 'uo ga'me ja'uo jo'ne ja no'en, qama'le jayem aualat da'me am: ja qoyouetaque ta'le jayem auauecot ñe'me adet'a qaedi jayem yalat.»
9Qalaĝaja Jonatán 'yateguet joñe'me:
«¡Da'me dojo' 'noota qom ja am 'te yepaguelegue! Maq joda'me qom jayaten ñe'me taĝadena' da'me ja no'en da'me jetaque am 'yetec, qama'le paja'a da'me am jayatenaĝanaĝanec jaĝa'te.»
10Qama'le David yenat joñe'me:
«Qom ja matac ñe'me adet'a qom 'yat, ¿jach'e joga'me jayem 'yaĝatem qomle?»
11Joñe'me Jonatán 'yateguet:
«Qolaq, jec'otaĝa'ya di'me 'nonaĝa.»
Qama'le joñaa'me dos yec'adeta ga'me 'nonaĝa. 12Naqaedi ueda'a da'me Jonatán dojapegue' ñe'me David, enaac:
«'Ñaĝatot ñe'me Jaliaĝanec, Nedios di'me Israel, queda'me qom 'yoĝoñi, nach'e ena'am nayi jaga'me ajeua, uotaĝa qom 'yoĝoñi laqaya, male jenatec ñe'me taĝadena' qom 'noota ga'me jetaque ya'uo jo'ne jetaque am 'yetec. Qom 'noota, qama'le am jamaĝa qomle ga'me yamaĝajec qaedi am 'yaĝatem. 13Qalaĝaja qom ñe'me taĝadena' ja no'en da'me jetaque am 'yetec, qama'le am ja'aqataĝanem qomle qaedi auaqanatet da'me auajoyi. Qalaĝaja, qom ja am 'te ja'aqataĝanem, 'noota qom ñe'me Jaliaĝanec Dios lama'aja da'me lalemataic jayem yachalegue. Qama'le joñe'me Jaliaĝanec am ue'tajop, ena'am ca'li ue'tajop ñe'me taĝadena'. 14Qom maqachaĝa nach'e eta't da'me jec'aletaye, jayem auanem qomle da'me adichoĝodenataĝanaĝac, ena'am da'me am netela ñe'me Jaliaĝanec Dios. Qalaĝaja, qom jeleu, 15qom ñe'me Jaliaĝanec yapalaĝa't onolqa'tape jogaa'me adaute'u, nach'e eta't auanema qomle da'me adichoĝodenataĝanaĝac jogaa'me 'yachaqadiaĝa'u.»
16Qama'le naq'aeta da'me 'laqata'j ñe'me Jonatán nataq'aen David da'me nayachidigui. Qama'le Jonatán yitaĝa enaac:
«¡'Noota qom joñe'me Jaliaĝanec mach'eñe qomle 'uo ga'me 'yeteque jogaa'me adaute'u!»
17Yem qama'le Jonatán, yajouaĝat da'me yataqachiñe noqopita joñe'me David, nachoĝodenot joñe'me qaedi yitaĝa ya'uo ga'me 'naĝataĝac, qaedi yema yepaquichigui joga'me nenaĝategue. 18Qama'le yitaĝa enaac:
«Qom 'yoĝoñi qa'a niqui'yaĝac da'me qonetonec ga'me auoĝoic dalaĝaic, qama'le qom qoyauana da'me qaya'te na'ña joga'me onapi'ña, qama'le am qoyaqataq. 19Chane'eja a'viyelaĝa ga'me oue'ta ca'li yemta da'me anañoĝochiñe, jo'me nolo' ca'li male am yejauaĝat ñe'me yet'a. Qama'le yitaĝa anañoĝochiñe, oue'ta ga'me qa' jo'ne ua'a di'me Ézel. Qama'le qom 'yoĝoñi laqaya, auatetaque ga'me 'yaqataĝanaĝac. 20Qomle da'me jayem ñec'ate'ga ga'me 'nonaĝa, qama'le jeloĝodegue jogaa'me tres chiquenal, ena'am qom jeloĝotapega gamachaqaega jo'ne di'yoq. 21Yem qama'le jamaĝalegue ñe'me yalemaĝajet qaedi que'galo jogaa'me chiquenal. Qom jenaac: “Auaconalo gaa'me chiquenal jo'ne lejeque'ta ga'me oue'ta”, qama'le anenoĝonegue, jayem anec'ata, qa'a qaya'te am 'uaĝaguet. 'Ñaĝatot ñe'me Jaliaĝanec Dios queda'me eja qaya'te am 'uaĝaguet. 22Qalaĝaja qom jenaac da'me jojapegue' ga'me yamaĝajec: “Auaconalo gaa'me chiquenal jo'ne qaya'a ga'me tachidi'ña”, qama'le oc, auajoyi, qa'a joñe'me Jaliaĝanec naq'aeta da'me lelnataĝac ta'le oc. 23Qama'le da'me qat'aqatac jo'ne jauoqo quelqaya, joñe'me Jaliaĝanec Dios nach'eñe yayaten joga'me jauoqotaque.»
24Qama'le David yec'ate'ga ga'me 'nonaĝa da'me nañoĝochiñe.
Da'me yovita ga'me niqui'yaĝac jo'ne qonetonec ga'me auoĝoic dalaĝaic, ñe'me jaliaĝanec Saúl ñiiñe, dajoyalegue ga'me niqui'yaĝala' da'me deque'e. 25Ga'me jo'ne jalchi'ena naya'ac, ñe'me Saúl neje'oñgui jaga'me neje'onaĝaiqui, nalo'te' ga'me emec lae. Ñe'me Jonatán dajoya'aguet joñe'me, qama'le ñe'me Abner na'ña lae ñe'me Saúl, qalaĝaja ga'me napi'ña ñe'me David qamqa'me qaya'te na'ña. 26Jo'me jojo' nolo', ñe'me Saúl qaya'te nenaĝategue, qa'a joga'me lelnataĝac etapega 'uo joga'me lajouaĝac ñe'me David qama'le jona'li niyola't. 27Nete' laqaya ca'li, nach'ega jo'ne neualayaĝac jo'ne qonetonec ga'me auoĝoic dalaĝaic, ga'me napi'ña ñe'me David queta da'me qaya'te na'ña. Qama'le ñe'me Saúl male yenat ñe'me Jonatán:
«¿Toqoch'e jo'me c'oĝot ñe'me Jesé ja novita ga'me qadiqui'yaĝac jaa'me dos noloqo'ote?»
28Qama'le Jonatán 'yateguet, enaac:
«David jayem dojapegue' qaedi jaje'tem da'me dajoyi di'me Belén. 29Enaac: “Am ñachoĝodenot qaedi auajeta da'me jec'ata ga'me 'lachaqa't gaa'me mach'e yayi, qa'a jogaa'me jetaque yauote ga'me lajaqaje'j, nataq'aen ga'me yachoqolec joote jayem t'aqataĝanem qaedi cada'ac jouetauelo. Qom aua'uo ga'me jepaquetapega, qama'le cada'ac jejapichiyalo gaa'me yaqaya'”. Jouaĝat da'me dojo' ñe'me David ja nec'ata nayi jenjo' adiqui'yaĝala'.»
30Qalaĝaja ñe'me Saúl da'me yataqachiñe jaqachigui da'me lalemataic, dalemataya ñe'me Jonatán, enapega joñe'me enaac:
«¡Am lec'oĝot jaga'me yauo jo'ne ja no'en! ¿Qo'li auetapega ja ami 'te jayate'n, queda'me yataqachiñe ami jaigaĝa'u? Da'me yataqachiñe auen anaigaĝaua ñe'me c'oĝot ñe'me Jesé, ¿qo'li qaya'te adepocoĝo? ¡Chayovida'a jaga'me mach'e adat'e 'uo ga'me lepocoĝo let'adaic! 31Qa'a qom nach'e eta't da'me nec'aletaye ñe'me c'oĝot ñe'me Jesé, qama'le da'me am nataq'aen da'me adejaliaĝa ja yataqatelegue. Chane'eja auamajoĝolegue qaedi qonauequena, qa'a joñe'me 'noota qom qoyalat.»
32Qalaĝaja Jonatán 'yateguet joñe'me let'a:
«Qama'le, ¿toqoch'e qoyalat qomle? ¿Jach'e ga'me ya'uo jo'ne ja 'noota?»
33Joñe'me Saúl yacona jaga'me miyoĝo qama'le yajaĝac joñe'me Jonatán qaedi 'uo joga'me yédiñe joñe'me. Qama'le da'me dojo' yauana ñe'me Jonatán, male yataqachiñe yayaten ñe'me let'a queda'me eja da'me jetaque yalat ñe'me David. 34Chane'eja ñe'me Jonatán, da'me yataqachiñe najaqachigui da'me lalemataic, ñejeguem, ca'e ga'me niqui'yaĝala' da'me dajotalegue, qama'le ja deque'e jo'me jojo' nolo' jo'ne neualayaĝaiqui da'me qonetonec ga'me auoĝoic dalaĝaic, qa'a yataqachiñe yec'on da'me 'yetec ñe'me David joñe'me mach'e let'a, da'me jetaque yalat. 35Ga'me nolo' laqaya ca'li jo'ne ne'teta, nach'e ena'am jaga'me ajeua ca'li dojetapegue' ñe'me David, ñe'me Jonatán yec'ata ga'me 'nonaĝa, lequiaĝaua ga'me lalemaĝajet, 36qama'le enaac:
«Qom jeloĝodegue naa'me chiquenal, qama'le anaqalegoq, ocalo jogaa'me.»
Mane'e da'me naqalegoq ñe'me lalemaĝajet, ma'ejama'le en qaya'ague da'me yaenegue ga'me chiquena, napacalegue ga'me ue'ta ñe'me lalemaĝajet. 37Da'me yovida'a ñe'me lalemaĝajet ga'me ueta'ña jaga'me chiquena, ñe'me Jonatán netenec ga'me 'laqatac da'me yiyaĝana:
«¡Jaga'me chiquena jo'ne qaya'a ga'me tachi'ña, ja adavi'ta!» 38Yem qama'le ñe'me Jonatán yitaĝa neten da'me yiyaĝana ñe'me lalemaĝajet:
«¡Am e'tegue! ¡Anaqalegoq, ena'te am 'viiguet!»
Qama'le ñe'me lalemaĝajet yaconalo gaa'me chiquenal, qama'le yanema ñe'me Jonatán. 39Qalaĝaja yataqachiñe ja ch'e ta'le yayaten joga'me 'uo ca'li, qa'a nach'eñeta ñe'me David nataq'aen ñe'me Jonatán yayate'n joga'me yelo'teguet.
40Yem qama'le Jonatán yanema gaa'me 'leuoĝonaqa'te joñe'me lalemaĝajet qama'le eetac ga'me 'laqatac:
«Jamo, oc, auedotegue di'me noic.»
41Ca'li joote ec ñe'me nalemaĝajet, joñe'me David male nenoĝonegue, chiyaqa'ña ga'me ue'ta da'me nañoĝochiñe, qama'le tres 'viyelaĝalegue da'me naĝa'ñijop, chayovida'a yeda'aguet ga'me aleua jaga'me nepe. Yem qama'le nec'ouaĝa't nataq'aen da'me noye'n, qalaĝaja ñe'me David yaguegue da'me noenaĝac. 42Qama'le Jonatán eetac da'me dojapegue' ñe'me David:
«Jamo, oc. Ena'te 'uo ga'me anedaqataque. Anetouetac queda'me qauajoya'aguet ñe'me Jaliaĝanec Dios da'me qa'naĝatot da'me yataqachiñe qo'mi jaigaĝa'u. Joñe'me Jaliaĝanec nach'eñe yayaten joga'me jauoqotaque, nach'e ena'ama jogaa'me mach'e qadolelaĝayaqa.»
Yem qama'le David ñejeguem da'me chiyaqaue ga'me aleua qama'le ec. Joñe'me Jonatán 'viyelaĝague di'me noic.
Currently Selected:
1 Samuel 20: TDO
Highlight
Share
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.