LUKAS 19

Yesus jeung Sakeus

1Yesus lebet ka kota Yeriho, sarta angkat-Na terus ngalangkungan eta kota. 2Di dinya aya hiji kapala tukang mulung pajeg, ngaranna Sakeus, jelema beunghar. 3Manehna ihtiar hayangeun nenjo saha Yesus teh. Tapi ku sabab kahalangan ku jalma loba tur awakna pendek, ihtiarna teu hasil. 4Tuluy lumpat miheulaan jalma loba, terekel naek kana hiji tangkal rek megat Yesus anu baris ngalangkung ka dinya. 5Sumping ka lebah dinya Yesus tanggah sarta ngalahir, ”Sakeus, geuwat turun! Poe ieu Kami rek nganjang ka maneh.”

6Sakeus turun tuturubun, tuluy ngamanggakeun ka Yesus bangun kacida atoheunana. 7Tapi jelema-jelema jadi gegelendeng, pokna, ”Kumaha Anjeunna teh? Bet kersa calik ka jelema anu doraka kitu!”

8Sakeus unjukan ka Yesus, nangtung ajeg, ”Juragan, harta banda abdi satengahna bade dihajatkeun ka nu mariskin. Sareng upami harta abdi aya anu kenging nipu, bade dipulangkeun opat kalieun.”

9Pilahir Yesus, ”Poe ieu, ieu imah geus didatangan ku kasalametan, sabab ieu jelema teh turunan Ibrahim keneh. 10Putra Manusa pang sumping teh rek neangan jeung nyalametkeun jelema nu leungit.”

Misil duit emas

(Mat. 25:14-30)

11Sabot jalma-jalma ngabarandungan keneh, Yesus terus nyarioskeun hiji misil. Harita Anjeunna geus deukeut pisan ka Yerusalem, sarta jalma-jalma nyarangka yen Karajaan Allah geus tereh ngawujud. 12Ku sabab kitu, kieu saur-Na, ”Aya hiji jalma bangsawan, angkat ka hiji nagri jauh arek diangkat dijenengkeun raja, sarta sabadana seja mulih deui. 13Memeh angkat, anjeunna ngumpulkeun sapuluh gandekna tuluy dititipan duit masing-masing sagebleg uang emas. Saurna, ʼGolangkeun ku maraneh sabot kami indit.ʼ 14Tapi urang dinya teu raresepeun ka anjeunna. Ku sabab kitu sanggeus anjeunna angkat, maranehna ngirim utusan nepikeun piunjuk, ʼSim kuring sadaya teu suka dirajaan ku anjeunna!ʼ

15Tapi eta bangsawan teh jadi dijenengkeunana raja, tuluy mulih. Geuwat nimbalan supaya gandek-gandek anu dititipan duit teh ngadareuheus, hoyongeun uninga kauntungan masing-masing. 16Piunjuk nu ngadeuheus pangheulana, ʼJuragan, tina artos emas Juragan anu sagebleg teh kenging untung sapuluh artos emas.ʼ 17ʼAlus,ʼ walerna, ʼmaneh gandek anu hade gawe! Ku sabab maneh gumati ka nu saeutik, ku kami rek dibere nyekel sapuluh kota.ʼ 18Ngadeuheus anu kadua, unjukan, ʼJuragan, tina artos emas Juragan anu sagebleg teh kenging untung lima artos emas.ʼ 19Walerna ka nu ieu, ʼManeh rek dibere nyekel lima kota.ʼ

20Ari gandek nu saurang deui kieu unjukanana, ʼJuragan, artos kagungan teh ieu, ku abdi dibungkus ku saputangan. 21Abdi sieun, reh terang Juragan bengis, sareng sok nyandak sanes kagungan ku anjeun, ngala sanes pelak ku anjeun.ʼ 22Walerna, ʼGandek goreng hate! Saomong maneh bieu ku kami rek dipake ngahukum ka maneh! Ceuk maneh kami jelema bengis, sok nyokot anu batur, sok ngala pepelakan batur. 23Nyaho kitu ku naon duit kami ku maneh teu digolangkeun, supaya ari kami datang eta duit katarima deui jeung batina?ʼ

24Raja ngalahir ka nu araya di dinya, saurna, ʼCokot duit kami ti eta jelema, bikeun ka gandek anu meunang sapuluh uang emas.ʼ 25Jawab anu diparentah, ʼJuragan, manehna parantos gaduh sapuluh uang emas.ʼ 26Waler raja, ʼSing nyaraho, nu geus boga bakal dibere deui, sabalikna nu can boga, naon nu aya di manehna keur saeutik teh bakal dicokot pisan. 27Ayeuna kari musuh-musuh kami, anu arembungeun dirajaan ku kami. Seredan ka dieu, paraehan hareupeun kami!ʼ ”

Yesus diarak ka Yerusalem

(Mat. 21:1-11; Mar. 11:1-11; Yoh. 12:12-19)

28Sanggeus sasauran kitu, Yesus ngalajengkeun angkat-Na ka Yerusalem, angkat-Na di payun. 29Deukeut kota Betpage jeung Betania, deukeut Gunung Jetun, Anjeunna miwarangan dua murid, 30saur-Na, ”Terus ka ditu ka kampung beh hareup. Sasupna ka ditu maraneh bakal manggih anak kalde keur dicangcang, tacan kungsi aya anu numpakan. Buka talina terus bawa ka dieu. 31Lamun ditanya ku naon dileupaskeun, bejakeun yen diperlukeun ku Juragan.”

32Dua murid tuluy arindit, ti heula, enya bae manggih anak kalde sakumaha pilahir-Na. 33Keur diudaran talina, nu bogana nanyakeun, ”Ku naon eta kalde dileupaskeun?”

34Dijawab, ”Diperlukeun ku Juragan.” 35Kalde disanggakeun ka Yesus, geus ditilaman ku jubah maranehanana. Yesus dibarantuan nitih kana kalde. 36Sanggeus Yesus majeng, jalma-jalma ngalamparkeun papakeanana di jalan.

37Di pupudunan Gunung Jetun, geus deukeut ka Yerusalem, jelema-jelema nu ngariringkeun mimiti surak ngamulyakeun jeung nganuhunkeun ka Allah lantaran geus dipareng narenjo sagala perkara anu aragung. 38Pokna, ”Mugia diberkahan, Raja anu sumping kalayan pajenengan Pangeran! Kerta di sawarga, mulyakeun Allah!”

39Urang Parisi anu araya campur jeung nu loba mihatur ka Yesus, ”Guru, repehkeun eta para panganut Guru teh!”

40Waler Yesus, ”Lamun maranehna repeh, sing percaya, batu-batu anu bakal surak.”

Yesus nangisan Yerusalem

41Anjeunna beuki deukeut ka Yerusalem. Sanggeus eta kota katingalieun, Anjeunna ngalimba, 42saur-Na, ”Tada teuing hadena upama heug maneh poe ieu nyaho ka nu rek ngadatangkeun kakertaan. Hanjakal eta ku maneh ayeuna henteu katenjo! 43Maneh bakal nyorang mangsa dikepung ku musuh, sakurilingna rekep dijaga dipegatan ku panghalang, didesek ti unggal juru. 44Maneh jeung sakumna rahayat di jeroeun kuta tangtu lebur ku musuh; kabeh adegan batuna geus moal aya hiji-hiji acan anu nyusun sakumaha tadina, lantaran waktu Allah sumping nyandak pitulung ku maneh teu dipalire.”

Lebet ka Bait Allah

(Mat. 21:12-17; Mar. 11:15-19; Yoh. 2:13-22)

45Ti dinya Yesus lebet ka Bait Allah; padagang-padagang anu keur daragang di dinya diusiran, 46sarta saur-Na, ”Geus ditulis dina Kitab Suci yen Allah ngandika, dawuhana-Na, ʼBait Kami bakal disarebut tempat paragi sembahyang.ʼ Ari ku maraneh geus dijieun sayang begal!”

47Saban poe Yesus ngawulang di Bait Allah. Imam-imam kapala, guru-guru agama, jeung para pamingpin urang Yahudi geus harayangeun maehan ka Anjeunna, 48ngan teu manggih jalan, lantaran jalma-jalma taronggoy bae ngadarengekeun ka Anjeunna semu anu parogot kana saucap-ucap kasaurana-Na.

Currently Selected:

LUKAS 19: LAISUN

Highlight

Copy