Jénesii̱s 16

Bi̱ tsꞌén kisꞌiee̱ na̱ Angaa̱r ngo ndí xí tsi̱ꞌe̱ Abra̱n

1-3Abra̱n je ra tjiín tie nó nga síndo ki̱a̱ nangui Kanaa̱n, kó na̱ Saraii̱ kui xi chjo̱ón Abra̱n kji̱e̱ jmí ndí kisꞌiejiín, ta̱nga na̱ Saraii̱ kisꞌijñaa̱ ngo na̱ moso̱ xi chji̱a̱ni nangui Ejipto̱ xi ꞌmí na̱ Angaa̱r. Kó na̱ Saraii̱ bi̱ katsoó xi̱ꞌii̱n: «Abra̱n, Néná ndi̱ katsꞌénna, kuíni nga ta̱sá na̱ moso̱na tsjajnije̱ ji. Jè ye ji kjo̱a̱xchaáná, nga tsi kui na̱ moso̱na ngo ndí kꞌuieé, tsa̱ꞌa̱n ka̱ma, ngatꞌa̱ na̱ moso̱na boá».

Kó Abra̱n kasasiennii̱ kui nii̱, kó na̱ Saraii̱ katsjaá Abra̱n na̱ mosoo̱. 4Kó Abra̱n kisꞌiejo̱ na̱ Angaa̱r sꞌe̱ tsaꞌa ndí.

Kó nguije kamábe na̱ Angaa̱r nga ndí jè yaꞌa, katsꞌénchꞌó na̱ Saraii̱. 5Kósꞌe̱ na̱ Saraii̱ bi̱ katsoó Abra̱n:

—¡Jí xí konnii̱ Abra̱n nga tjítsꞌénchꞌóna kui naa̱! Ngatjaꞌátsjiee̱n nga an boá xi katsꞌenkꞌasꞌiee̱n, kó nguije yaꞌa ndí ꞌne̱, tjítsꞌénchꞌóna, ngatꞌa̱ je ngase kjimaa̱ yojoo̱. Kuíni nga Néná boá xi ko̱tíjeé ji.

6Kó Abra̱n, bi̱ katsoó na̱ Saraii̱:

—Ngu̱i̱ya ndse̱ jí tikón na̱ mosoo̱, jí xí ye ji mí ni xi si̱ꞌinje̱.

Kósꞌe̱ na̱ Saraii̱ ndajín katsꞌénjo̱ na̱ Angaa̱r, kó ta̱sá tsanga na̱ Angaa̱r.

7Nga jachó na̱ Angaa̱r tꞌa ndańchꞌi̱ xi tikón nangui kixí ki̱a̱ xtji̱e̱e̱n ndi̱ya xi fí xtji̱e̱e̱n na̱ngui, ki̱a̱ jachókoón ndítsjie xi Néná, 8kó bi̱ katsoó:

—¡Na̱ Angaa̱r! Na̱ mosoo̱ na̱ Saraii̱, mí xí tiniꞌín ji kꞌi̱e̱e̱, kó ñá tiꞌmi ji.

Kó na̱ Angaa̱r bi̱ katsó:

—Na̱ Saraii̱, ndi̱a̱na tsꞌénmongáa̱.

9-11Sꞌe̱ ndítsjie xi Néná bi̱ katsoó:

Tasá tꞌenꞌoyé nguiní ji, kó ndaꞌyeꞌíi̱n na̱ Saraii̱. Án boá xi sa̱ꞌin an nga ka̱makjín xota̱ tji̱e̱ tse̱, kó ngaskande nde ngojín xi ka̱maxki̱i̱ kókjiꞌi kjín ka̱ma.

Ngotꞌe̱ ꞌne̱ nguije kichꞌié ji ndí,

nga stse̱n kuí ndií «Ismae̱l»#16:09-11 «Néná ntꞌié» tsó kui jaꞌeén títꞌe jaꞌén,

ngatꞌa̱ jè tsintꞌie an kjo̱a̱ndasée̱n.

12Ismaee̱l xikónií ngo ndi̱je̱ xi kji̱e̱ machji̱ni̱e̱jín

ka̱ma ngu̱i̱jii̱n xotaa̱,

ngatꞌa̱ ngayeje xotaa̱ xi skjánjo̱ kui,

ta̱nga ti̱ kuí xí ka̱manii̱ nga nda kꞌuijñá,

nda tsi ngaskande ntsꞌi̱e̱ kondra̱ kꞌuíndonii̱.

13Nguije Néná tsíchji̱a̱jo na̱ Angaa̱r, kui naa̱ bi̱ tsꞌén ítꞌa jaꞌén: «Jí boá kui Néná xí ngayeje nii̱ xi be». Ngatꞌa̱ bi̱ katsó: «Jè kamábe an kui Néná xi je kamábena an nga». 14Ndeskande koó kjiꞌa kui ndańchꞌií «Ndańchꞌií kui Néná xi tikoón ko̱jo xi be ngayeje nii̱» kiꞌmí. Kui ndańchꞌií ki̱a̱ tikón ngamasiee̱n na̱xi̱ńdá Kadee̱ ko̱jo na̱xi̱ńdá Beree̱d.

15-16Kjiꞌa má nga kamá ichítié ko̱jo kantjiꞌún ngo noó Abra̱n nga katsꞌén ndií na̱ Angaa̱r. Kó Abra̱n «Ismae̱l» ítꞌa jaꞌén.

Currently Selected:

Jénesii̱s 16: MAIX

Highlight

Copy