Jenesii̱s 21

Bi̱ tsꞌén katsen Isaa̱

1-2Kó Néná katsꞌénkjatjosón ni xi katsoó na̱ Saraa̱ nga sa̱ꞌín. Kó kui ni̱xtjin xi katsó, tsaꞌa na̱ Saraa̱ ngo ndí xí tsi̱ꞌe̱ Abraa̱n, ndatsi Abraa̱n jè ꞌniú xchá. 3Kó Abraa̱n Isa̱ ítꞌajaꞌén kuí ndií, 4kó xi ma jin ni̱xtjin, Abraa̱n katsꞌeén sirkunsisio̱n kui ndií, kó bo̱a̱ tsꞌén katsꞌénkjatjosón ni xi katsoó Néná nga sa̱ꞌín. 5Úchán má noó Abraa̱n nga katsen Isaa̱. 6Kósꞌe̱ na̱ Saraa̱ bi̱ katsó:

«¡Néná katsꞌénkajnóna, kó ta̱ꞌyaní xi sku̱i̱e̱ nga ngo ndí tjínna ti̱ ko̱jno̱jona nga! 7Abraa̱n jmíni̱xtjin katsꞌénkjiín kon nga je xchá, kó nga an kꞌuiéná ngo ndí xí tsi̱ꞌe̱».

8Kó Isaa̱ kjimaxchá, kó ti̱chaa̱n jachó ni̱xtjin nga kachjeꞌéxiín chiki, kó kjiꞌa ngo sꞌué ꞌniú katsꞌén Abraa̱n.

Bi̱ tsꞌén ikiyotji̱ngii̱ na̱ Angaa̱r ko̱jo Ismaee̱l ki̱a̱ ndiꞌaa̱ Abraa̱n

9Ngo ndi̱yà kamábe na̱ Saraa̱ nga ndií na̱ Angaa̱r tsajnókie Isaa̱. 10Kó na̱ Saraa̱ bi̱ kijítsoó Abraa̱n: «Ti̱yítji̱ngìi̱ kui na̱ chji̱ni̱e̱ꞌboo̱ ko̱jo ndií, ngatꞌa̱ ndií kui xota̱chjo̱on jmíjiín kjo̱a̱nda nga ko̱jo kui stso̱ba̱a̱ ni xi tsoboaá ndína Isaa̱». 11Nde chiíjín tsjá kamaá Abraa̱n kui nii̱, ngatꞌa̱ ti̱ ndií boá xi̱ꞌba̱ nga. 12Kósꞌe̱ Néná bi̱ katsoó Abraa̱n:

«Ngata̱ nda̱jín maá kjo̱a̱a̱ kui ndií ko̱jo na̱ chji̱ni̱e̱ꞌboo̱. Ta̱sá ti̱ꞌinsée̱n ngayeje ni xi ka̱tso̱o̱ na̱ Saraa̱, ngatꞌa̱ Isaa̱ boá xi kjo̱tjojinnii̱ xota̱ tji̱e̱ tse̱. 13Ta̱nga ndií na̱ mosoo̱ ti̱ ki̱a̱ kꞌoxiéni an kjín xota̱ na̱xi̱ńdá, ngatꞌa̱ ti̱ ndíi̱ boá kui nga».

14Nga kamángindyiojón Abraa̱n achichí ta̱jñó jastjíe̱n iskjíbé pan ko̱jo ngo ti̱jìtjíxin ndáfoa, kósꞌe̱ katsjaá na̱ Angaa̱r nga íjñasón tjiaa̱, kó katsꞌénkixotꞌa nga tsangatji̱ngii̱ na̱ Angaa̱r ko̱jo ndií.

Kó kui xota̱chjo̱on ko̱jo ndií ta̱xkiya kijí xtji̱e̱e̱n nangi kixií Beersebaa̱. 15Kó ngije je ndáfoa xi ndyi̱yaꞌa, ki̱a̱ yíjñá ndií ngindie nkꞌieén ngo yá, 16kó nga kamámejénjiín sku̱i̱e̱ nga ko̱yà kuí ndií, kijíboaꞌá kó kjin chií kijíkꞌíjñá. Kó tji̱e̱nga xió kisꞌijña na̱ Angaa̱r achichí askjandá.

17Kó Néná tsintꞌieé nga tsꞌénkjandayá nda̱chií, kósꞌe̱ ndítsjie xi Néná ndeskande ndiꞌakꞌajmii̱ tsíchji̱a̱a̱ na̱ Angaa̱r nga bi̱ katsoó:

«Mí xí kjimaa na̱ Angaa̱r. Ngata̱ ndakinjín má ji, ngatꞌa̱ jè tsintꞌie an nda̱a̱ kui ndií. 18Ti̱sítji̱n, kó chjanínkꞌé ji kui ndií, kó tjaꞌní jí tsja. Jmí ni ka̱májiín, ngatꞌa̱ an boá xi sa̱ꞌin an nga ngo na̱xi̱ńdá xí je ka̱ma xota̱ tji̱e̱e̱».

19Kósꞌe̱ Néná katsjandieè na̱ Angaa̱r nga kamábe ngo ndáńchꞌi̱ kó ki̱a̱ kijí, kó íkitsie nginí ti̱jìtjíxin xí mindyia ndáfoaa̱, kósꞌe̱ katsjaá kui nda̱chií, kó katsꞌe.

20-21Ngije kamáxchá kuí nda̱chií, ki̱a̱ kisꞌijña nangi kixií Paraa̱n. Kó ki̱a̱ kamaá nga nda katsꞌénxájo̱ yáchjonyá ko̱jo yáyojó, kó Néná ngatsjéni̱xtjin asíko̱jo. Kó nga jachó ni̱xtjin, na̱aa̱n ki̱a̱ tsangii̱ ngo na̱ xi chji̱a̱ni nangi Ejipto̱ xi kisꞌijñajo̱ kui nda̱a̱.

Bi̱ tsꞌén índa ngo ni Abraa̱n ko̱jo Abimelee̱k

22Ti̱ mejeén ti̱ kui ni̱xtjin Abimelee̱k ko̱jo Fikoo̱l nda̱ xtitjoón jájuún kijíkoón Abraa̱n, kó bi̱ katsoó:

—Jè kamábe an nga Néná boá xi bosikójoo̱ ngayeje ni xi niꞌín ji. 23Ngotꞌe̱ ꞌne̱ ngiboanéná tꞌín ji nga jmí ni chꞌokjiꞌi si̱ꞌinje̱jínní án ko̱jo ndína ko̱jo xota̱ tji̱e̱na, kó nga nda si̱ꞌinje̱jne̱ xi kótsꞌèn nda katsꞌenjoo̱ ji kꞌi̱e̱ kui ngi̱ndie nínga tindyin ji ngotꞌe̱, ko̱jo nga nda si̱ꞌinje̱ ji xota̱ xi chji̱a̱ni kui na̱xi̱ńdaá nga.

24Kó ngiboanéná katsó Abraa̱n, 25ta̱nga Abraa̱n katsóyaà Abimelee̱k nga kje̱ꞌe ni̱xtjin já mosoo̱ kui nda̱a̱ jaꞌáxiín ngo ndáńchꞌi̱. 26Kó Abimelee̱k bi̱ katsoó Abraa̱n:

—Bejín an ꞌyá xí bo̱a̱ katsꞌénjoo̱, ngatꞌa̱ kasayejínní ngasꞌe̱, kó sꞌe̱ tsí ngotꞌe̱ tsꞌén be an kui nii̱.

27Kó Abraa̱n iskjíbé cho̱tsa̱nga̱ ko̱jo cho̱yojo, kó katsjaá Abimelee̱k tsi̱ꞌe̱ nga katsꞌén ngo kjo̱a̱ꞌbínda nga joó. 28Kósꞌe̱ Abraa̱n íjñátꞌaxín yito ndí cho̱tsa̱nga̱ ínchjín. 29Kó Abimelee̱k bi̱ katsoó Abraa̱n:

—Kó si̱ꞌinni ji nga yito kui ndí cho̱tsa̱nga̱ ínchjín xi ikꞌíjñítꞌaxín ji.

30Kó Abraa̱n bi̱ katsó:

—Mejénna nga ngi̱ya ndsa̱ án má sa̱ꞌinkꞌasꞌiee̱n nga yito kui ndí cho̱tsa̱nga̱ ínchjiín, tsi̱ꞌe̱ nga kui nii̱ xi ko̱kó nga án boá xi katsꞌenda an kui ndáńchꞌií.

31Kuíni nga kui ngi̱ndiee̱ Beersebaa̱ kiꞌmí, ngatꞌa̱ ki̱a̱ boá nínga Abraa̱n ko̱jo Abimelee̱k índa ngo ni.

32Ngije índa kui nii̱ ki̱a̱ Beersebaa̱, Abimelee̱k ko̱jo Fikoo̱l nda̱ jún ngito̱ko̱o̱ kijí nginí nangii̱ xota̱ Filisteaa̱. 33-34Kó Abraa̱n tsie kamaá nga kisꞌijña nangii̱ xota̱ Filisteaa̱. Kó ngo yátamarisko̱ ítji̱e̱ ki̱a̱ Beersebaa̱, kó ki̱a̱ tsíchji̱a̱a̱ Néná xi tikón ngatsjéni̱xtjii̱n.

Currently Selected:

Jenesii̱s 21: MAIX

Highlight

Copy