Juaa̱ 13

Bi̱ tsꞌén aniéjón Kjisoo̱ se xota̱ tsi̱ꞌe̱

1Kó ngindiee̱ sꞌué paskuaa̱, nga ja̱bo̱a̱ je be Kjisoo̱ nga je jachó chi̱bo̱a̱a̱, nga ko̱e̱je̱ kui nga̱sondiee̱ sꞌe̱ ko̱e̱je̱koo̱n Na̱ꞌmii̱, katsꞌéntjó xotaa̱ kui nga̱sondiee̱, katsꞌéntjó ngaskande nga fetꞌani.

2Kó nga ndyi̱kjinie ṉño̱ nga kamájñoó, xindajín ndiabloo̱ ja̱bo̱a̱ je tsꞌasꞌieén ngi̱jin ini̱ma̱a̱ Junda̱ Iskariotee̱, tsi̱ꞌe̱ nga sa̱ꞌínkꞌasꞌien Kjisoo̱, 3Kjisoo̱ ja̱bo̱a̱ jè be nga Na̱ꞌmii̱ katsjaá ngi̱ya tsja ngayeje nii̱, kó nga Néná jatjoni, ko̱jo nga ti̱ kuii̱ ko̱e̱je̱kon nginií, 4jastjíe̱n nga tsꞌénkjinie ṉño̱, kó jaꞌáxín ńjñoo̱ xi kjitꞌa nga̱xto̱n, sꞌe̱ iskjíbé ngo ńjño xi niꞌánxíjón ndsa̱, sꞌe̱ ítꞌa ndáyaá, 5sꞌe̱ indyiá ndáfoa ngo ndástsié, kósꞌe̱ ítsꞌi̱yanii̱ nga aniéjón sé xota̱ tsi̱ꞌe̱, kó katsꞌénxíjón ńjño ndsa̱ xi íkjá ndáyaá.

6Sꞌe̱ nga katsoboaá Ximo̱ Peé, bi̱ katsó kui nda̱a̱:

–Ndi̱a̱, a jí ko̱níjín ndsa̱ko án.

7Sꞌe̱ Kjisoo̱, bi̱ katsó:

–Ni xi tjítsꞌen an, kjimakjínjiín ngotꞌe̱, ta̱nga jaskan ka̱makjiín.

8Sꞌe̱ bi̱ katsó Peé:

–Jmí ni̱xtjin ko̱níjín ji ndsa̱ko án.

Sꞌe̱ Kjisoo̱, bi̱ katsó:

–Tsi ko̱e̱ꞌéndièjín ji, ka̱májín xota̱na ka̱ma ji.

9Sꞌe̱ bi̱ katsó nginí Peé:

–Ndi̱a̱, ja̱ jmí tsi ta̱ ndsa̱ko án tsí xi taníjín ji, ti̱ taníjín ndsa̱ án, ko̱jo tokó án nga.

10Sꞌe̱ Kjisoo̱, bi̱ katsó:

–Xi je tsangóyá, ta̱ sé tsí xi chjieén nga ko̱niéjón, ngatꞌa̱ jè tsjie ngayeje yojoo̱, kó jún jè tsjiejnú, ndatsi jmí tsi ngayejejnú.

11Kjo̱a̱a̱ ja̱bo̱a̱ jè be Kjisoo̱ ꞌyá xí sa̱ꞌínkꞌasꞌien, kuíni nga bi̱ katsó: “Jmí tsi ngayejejnú nga tsjiejnú.”

12Ngije aniéjón sé kui jaá, ítꞌa nginí ńjñoo̱ nga̱xto̱n, sꞌe̱ kisꞌijñatꞌa nginí yámíxa̱a̱, kó bi̱ katsó:

–A kamákjínjnú ni xi katsꞌen an. 13Jún, Mostro̱ ko̱jo Ndi̱a̱ ndyi̱ꞌmìjnúu̱, kó nda kandokjo̱a̱jnú ngatꞌa̱ kuí án. 14Ja̱ tsi an xi Ndi̱a̱a̱ ko̱jo xi Mostroo̱, kó aniejón an ndsa̱kojnú, ko̱jo jún chjiéngá ko̱níjónjnú se xingi̱jnú, 15ngatꞌa̱ an jè ijñájnúꞌun ngo chi̱bo̱a̱, tsi̱ꞌe̱ nga si̱ꞌánjnú ni xi je katsꞌen an. 16Ja̱koxi̱, ja̱koxi̱ ni xi xiánjnúꞌun: Nda̱ mosoo̱ ꞌniújín nkꞌa ngase ka̱ma ta̱bo̱a̱jiín ndi̱a̱a̱, ti̱nde nda̱ xi kanangiyaa̱ nkꞌajín ngase xaá ta̱bo̱a̱jiín xi katsangiya. 17Tsi yàjnú kui nii̱, achichíra̱ tsjajnú tsi si̱ꞌánjnú.

18Jmí tsi kjo̱a̱a̱ ngayejejnú ni xi tꞌíxián an, jè be an ꞌyání xi je jaꞌajin an, ta̱nga tsi̱ꞌe̱ nga kjo̱tjosón ni xi kjitꞌa xo̱jo̱n eén Néná, nínga bi̱ tsoó: “Xi kꞌi̱e̱ tsꞌénkjiniejo̱na pan, kondra̱na je tikón.” 19Xiyàjnúꞌun kui nii̱ ngindiee̱ nga ka̱ma, ki̱a̱ ka̱maa̱ nga sꞌi̱jinjnú nga án boá. 20Ja̱koxi̱, ja̱koxi̱ ni xi xiánjnúꞌun: Nga tsi tjín xí sa̱ꞌínkjaꞌa ngi̱ya ndiꞌaa̱ xi sangiya an, án boá xi tjítsꞌénkjáꞌana, kó xi tjítsꞌénkjáꞌana an, ti̱ tjítsꞌénkjáꞌá kui Néná xí katsangiyana nga.

Bi̱ tsꞌén katsóyà Kjisoo̱ kjo̱a̱a̱ nga Jundaa̱ xi sa̱ꞌínkꞌasꞌien

(Matioo̱ 26:20-25; Markoo̱ 14:17-21; Rkaa̱ 22:21-23)

21Ngije katsó Kjisoo̱ kui nii̱, achichí nda̱ kamaá a̱si̱énni̱xtjii̱n, kó bi̱ katsó:

–Ja̱koxi̱, ja̱koxi̱ ni xi xiánjnúꞌun: Nga ngo jún xi sa̱ꞌínkꞌasꞌienna.

22Sꞌe̱ xota̱ tsi̱ꞌe̱ Kjisoo̱ askoꞌá xkjín nga ngo nga ngo, kó nde kamákjínjiín kjo̱a̱a̱ kui xi tjindókjo̱a̱a̱. 23Kó ngo nda̱ xi xota̱ tsi̱ꞌe̱, kui xi tjó kamaá Kjisoo̱, ki̱a̱ tiña tikóntꞌaa̱, tꞌa yámíxa̱a̱. 24Kó Ximo̱ Peé katsꞌéntíyaá to̱ko̱ nga asíyaá Kjisoo̱ ꞌyá nda̱a̱ xi tjítsó. 25Kósꞌe̱ kui nda̱a̱ ítꞌaa̱ to̱ko̱ ni̱se̱e̱n Kjisoo̱, kó bi̱ katsoó:

–Ndi̱a̱, ꞌyá nda̱a̱ xi se ji.

26Sꞌe̱ bi̱ katsó Kjisoo̱:

–Kuí boá kui nda̱ xi tsjàa̱ kui pan ndyi̱i̱.

Sꞌe̱ Kjisoo̱ katsengindá paa̱n ngi̱ya ti̱bo̱a̱a̱, sꞌe̱ katsjaá Junda̱ Iskariotee̱, ndií Ximoo̱. 27Kó ngije iskjinie Jundaa̱ kui ndso̱ꞌba paa̱n, xindajín Satanaa̱ tsꞌasꞌienjii̱n yojoo̱. Sꞌe̱ Kjisoo̱, bi̱ katsó:

–Ni xi si̱ꞌin, tsá ti̱ꞌin.

28Ta̱nga nde ngojín xi síndotꞌa yámíxa̱a̱ xi kamákjiín míkjo̱a̱a̱ nga bo̱a̱ katsó Kjisoo̱. 29Ngatꞌa̱ tjín xí katsꞌénkjó nga kjo̱a̱a̱ nga Jundaa̱ kisꞌijñaa̱ stsatoo̱n, tsi kuíni nga Kjisoo̱, bi̱ katsoó: Tsꞌi̱tsie ni xi chjiénná tsi̱ꞌe̱ sꞌueé, axa̱ tsi̱ꞌe̱ nga tsja̱a chií to̱n xota̱ ni̱ma̱a̱. 30Ngije iskjinie Jundaa̱ kui ndso̱ꞌba paa̱n, tji̱e̱nmá jataxie, kó je kjimajñó nga bo̱a̱ kamaá.

Bi̱ tsꞌén katsóyà Kjisoo̱ ngo kjo̱a̱botíxoma tja̱tsi̱e̱

31Ngije jataxie Jundaa̱, Kjisoo̱, bi̱ katsó:

–Ngotꞌe̱ ꞌne̱ nga xcha̱ kjo̱a̱jee̱ ndií nda̱ xi̱ꞌii̱n, kó kuí xí xcha̱ni kjo̱a̱jee̱ Néná. 32Tsi ta̱ngatꞌanii̱ kui nga xcha̱ kjo̱a̱jee̱ Néná, ja̱ ti̱ Néná ko̱kó kjo̱a̱jee̱ kui, kó Néná tsá sa̱ꞌín kui nii̱. 33Jún bo̱a̱ ndí ndí tsa̱ꞌa̱n, ta̱ chiboa tsí ni̱xtjin kotíjña̱jojnúꞌun. Ku̱i̱ndyi̱séjnúꞌun, ta̱nga xikó kixiáa̱n xota̱ jundíoo̱, ti̱ bo̱a̱ ti̱ xiánjnúꞌun jún: Nínga tsꞌénfí an, ka̱májín kongínjnú. 34Ngo kjo̱a̱botíxoma tja̱tsi̱e̱ tsjajnúꞌun: Tjó ti̱ꞌánjnú nga ngo nga ngo xingi̱jnú, xikótsꞌèn katsꞌentjójnúꞌun jún, ti̱ bo̱a̱ ti̱ tsꞌén ti̱ꞌantjójnú xingi̱jnú. 35Tsi tjó ka̱majnú xingi̱jnú, ja̱ kjiꞌá boá nga xcha̱ nga jún xí xota̱na.

Bi̱ tsꞌén katsóyàtjón Kjisoo̱ nga Peé sa̱ꞌínkiejín yojoo̱

(Matioo̱ 26:31-35; Markoo̱ 14:27-31; Rkaa̱ 22:31-34)

36Sꞌe̱ Ximo̱ Peé, bi̱ katsoó Kjisoo̱:

–Ndi̱a̱, ñání tiꞌmi ji.

Sꞌe̱ Kjisoo̱, bi̱ katsó:

–Nínga tsꞌénfí an, ka̱májín kꞌuíntjingíni ngotꞌe̱, ta̱nga sájín ka̱ma kꞌuin jí.

37Sꞌe̱ ti̱ bi̱ ti̱ katsó nginí Peé:

–Ndi̱a̱, míkjo̱a̱a̱ nga ka̱májín kjuíntjíngií ngotꞌe̱. Jmí nijiín ndatsi tsja an kjo̱a̱mindyionna ta̱ngatꞌanii̱ ji.

38Sꞌe̱ Kjisoo̱, bi̱ katsó:

–A kjo̱a̱jiín ndatsi ko̱yè jí kjo̱a̱a̱ an. Ja̱koxi̱, ja̱koxi̱ ni xi xiáa̱n: Nga ngindiee̱ nga skja̱ndáyà xo̱nda̱xi̱ꞌii̱n, ji ján ndi̱yà je kiniꞌínkiejín yojòo̱ nga yení.

Currently Selected:

Juaa̱ 13: MAIX

Highlight

Copy