Juaa̱ 17

Kjisoo̱ bi̱ tsꞌén tsíchji̱a̱tjé xota̱ tsi̱ꞌe̱

1Kui nii̱ xi tsíchji̱a̱ Kjisoo̱, kó askotsijen ndiꞌakꞌajmi jàn, sꞌe̱ bi̱ katsó:

–Na̱ꞌmi, jè jachó chi̱bo̱a̱, takèe̱ xotaa̱ kjo̱a̱jee̱ ndíi̱, tsi̱ꞌe̱ nga ndíi̱ ko̱ko̱ó xotaa̱ kjo̱a̱je tse̱, 2xikótsꞌèn katseꞌéní xá nga án kotixomáa̱ xotaa̱, ko̱jo tsi̱ꞌe̱ nga an tsjàa̱ kjo̱a̱mindyion ngatsjéni̱xtjii̱n ngayeje xota̱ xi ji katseꞌée̱. 3Kó kuí xi̱ꞌbi̱ xi kjo̱a̱mindyion ngatsjéni̱xtjii̱n: Nga sku̱i̱e̱e̱ ji, nga ta̱ jí tsí xi Néná xí ja̱koxi̱i̱ ji, ko̱jo Jesukristoo̱, kui xi kanangiye ji.

4An jè ako an kjo̱a̱jèe̱ kꞌi̱e̱ tꞌanangii̱, kó jè katsꞌenkjatjosón an ni xi katseꞌéní nga sa̱ꞌin an. 5Ngotꞌe̱ ꞌne̱ Na̱ꞌmi, tꞌa nínga tindyin jí, te̱ꞌéní kjo̱a̱je xi kisꞌiena nga kisꞌijñajoo̱, ngindiee̱ nga kamánda kui nga̱sondiee̱.

6Jè akòo̱ xotaa̱ ꞌyání jí, kui xota̱ xi katseꞌéní xí tjín nga̱sondiee̱, tse̱ kamá, kó an katseꞌéní, kó jè ndyi̱tsꞌènkjátjosón ée̱n. 7Ngotꞌe̱ boá ꞌne̱ nga je be, nga ngayeje ni xi ji katseꞌéní, ki̱a̱ kjindibáni nínga tindyin ji. 8Ngatꞌa̱ én xí katseꞌéní, jè katsjáa̱, kó iskjíbé, kó jè kamábe nga ja̱koxi̱ nga ji jatjoxiejinñaa̱, kó jè kisꞌijii̱n nga ji xi kanangiyení.

9An ꞌniú tsꞌénmíꞌá an kjo̱a̱a̱ kui xotaa̱, jmí tsi kjo̱a̱a̱ xotaa̱ kui nga̱sondiee̱, tsꞌénmíꞌáñaá kjo̱a̱a̱ xota̱ xi katseꞌéní, ngatꞌa̱ jí tse̱, 10kó ngayeje ni xi tsa̱ꞌa̱n tse̱ boá, kó ni xi tse̱ tsa̱ꞌa̱n boá, kó kjo̱a̱jena ya kjo̱a̱a̱ xikótsꞌèn síndo kui xotaa̱.

11Kó jè ngiti̱ kuijín nga̱sondiee̱ tikòn an, ta̱nga kui xotaa̱, ta̱kó ki̱a̱ síndo, kó án ki̱a̱ tsꞌénfikoo̱n ji. Na̱ꞌmi tsjie, xota̱ xi katseꞌéní, chíi̱n nga ti̱ꞌinkjìn jí ngaꞌniuú jaꞌée̱n, tsi̱ꞌe̱ nga ngo ka̱ma kui, xikótsꞌèn ngo má ñá. 12Nga kisꞌijñajo̱ an kui xotaa̱ kꞌi̱e̱ kui nga̱sondiee̱, askóo̱n ngi̱yaa̱ ngaꞌniuú jaꞌée̱n, kui xota̱ xi ji katseꞌéní, kó askóo̱n, kó nde ngojín xi kichajá, ta̱kuítsí ndí kichajaá, tsi̱ꞌe̱ nga kjo̱tjosón ni xi tjítꞌa xo̱jo̱n ée̱n.

13Ta̱nga ngotꞌe̱ ꞌne̱, jè tsꞌénfikoo̱n ji, kó kui nii̱ tsꞌénxiyàa̱ xotaa̱ kui nga̱sondiee̱, tsi̱ꞌe̱ nga kꞌuié ndo̱jò ndójo̱ò kjo̱a̱tsjana. 14An jè katsjáa̱ ée̱n, kó xotaa̱ kui nga̱sondiee̱ katsꞌénchꞌó, ngatꞌa̱ jmí tsi kui nga̱sondiee̱ chji̱a̱ni, xikoó án, nga ti̱ jmí tsi kui nga̱sondiee̱ chjiá an. 15Jmí tsi ꞌniú tsꞌénmíꞌaá tsi̱ꞌe̱ nga chje̱ꞌéxín ji kui xotaa̱, kui nga̱sondiee̱, tsꞌénmíꞌáñaá tsi̱ꞌe̱ nga xín si̱ꞌinkjeꞌee̱ xindajín. 16Kuijín nga̱sondiee̱ chji̱a̱ni, xikótsꞌèn ti̱ jmí tsi kui nga̱sondiee̱ chjiá an. 17Ti̱ꞌintsjieni ngi̱yaa̱ ja̱koxi̱i̱, ngatꞌa̱ ja̱koxi̱ boá ée̱n. 18Xikó tsꞌén kanangiyení kui nga̱sondiee̱, ti̱ bo̱a̱ ti̱ tsꞌén katsangiya an kui xotaa̱, kui nga̱sondiee̱, 19kó ta̱ngatꞌanii̱ kui nga matsjie yojona, tsi̱ꞌe̱ nga ka̱matsjie kui xotaa̱ ngi̱yaa̱ ja̱koxi̱i̱.

20Ta̱nga jmí ta̱ kjo̱a̱a̱ kuí tsí kui xotaa̱ nga tsꞌénchji̱a̱ñáa ji, tsꞌénchji̱a̱ñáa an, ko̱jo kjo̱a̱a̱ xota̱ xi sꞌijii̱n an, kjo̱a̱a̱ én xí ku̱i̱chji̱a̱ kui xotaa̱, 21tsi̱ꞌe̱ nga ka̱ma ngo, xikoó ji Na̱ꞌmi, nga ngo má ñá ji ko̱jo an, ti̱ bo̱a̱ ti̱ tsꞌén nga ngo ngatama kui xotaa̱ ko̱jo ñá, tsi̱ꞌe̱ nga sꞌi̱jii̱n xotaa̱ kui nga̱sondiee̱ nga ji xi kanangiyení. 22Kó kui kjo̱a̱je xi katseꞌéní, jè katsjáa̱ kui xotaa̱, tsi̱ꞌe̱ nga ka̱ma ngo xikoó ñá nga ngo má, 23ngatama ngo kui xotaa̱ ko̱jo an, kó jí ko̱jo an, tsi̱ꞌe̱ nga kjóchotꞌáa̱ kjo̱a̱a̱ ngo tjín xí ja̱koxi̱i̱, tsi̱ꞌe̱ nga xotaa̱ nga̱sondiee̱ sku̱i̱e̱ nga ji xi kanangiyení, kó nga tjoó kui xotaa̱ xikótsꞌèn tjoó an.

24Na̱ꞌmi, kui xota̱ xi je katseꞌéní, mejénna nga nínga tikòn an, nga ti̱ ki̱a̱ kꞌuíndojo̱na nga, tsi̱ꞌe̱ nga sku̱i̱e̱ ngayeje kjo̱a̱je xi katseꞌéní, ngatꞌa̱ kiniꞌíntjéní ndeskande koó nga ítjatsꞌennii̱ kui nga̱sondiee̱. 25Na̱ꞌmi kixi̱, nga ja̱koxi̱ xotaa̱ kui nga̱sondiee̱ kamábejiín jí, ta̱nga beñaá jí, kó kui xotaa̱ be nga ji xi kanangiyení, 26kó án jè akòo̱ ꞌyání jí, kó ta̱kó koko ngasee̱, tsi̱ꞌe̱ nga kjo̱a̱tjó xi katseꞌéní kꞌuieé kui xotaa̱, kó án kotíjña̱jìi̱n kui xotaa̱.

Currently Selected:

Juaa̱ 17: MAIX

Highlight

Copy