Juaa̱ 5

Bi̱ tsꞌén katsꞌéndaya Kjisoo̱ ngo nda̱ xi oo̱n

1Jaskan ngije kamá kui nii̱ kamá ngo sꞌueé já jundíoo̱, kó kijí Kjisoo̱ na̱xi̱ńdáꞌniú Jerusale̱n. 2Ki̱a̱ na̱xi̱ńdáꞌniú Jerusale̱n, tiñaa̱ ngo ngi̱ndie xi ꞌmí nga̱ntjo̱a̱a̱ cho̱tsa̱nga̱, kisꞌijña ngo ti̱xa̱ je xi ndyi̱a̱ ndáfoa xi ꞌmí Betesnda̱ nga én ebreo̱, xi ún ngi̱ndie tji̱nkꞌi̱én kisꞌiee̱. 3Ngindie tji̱nkꞌi̱e̱én kui ngi̱ndiee̱, achichí má xota̱ xi oo̱n kisꞌińdo, xi ti̱ka̱, ko̱jo xi fí ni̱ma̱ tꞌa, ko̱jo xi ni̱ma̱ se, xi askoyaá nga ka̱matíyaá ndáfoaa̱, 4ngatꞌa̱ ta̱ kjiꞌa xóní nga ngo xò ndítsjiee̱ Néná jatjajen nínga tikón kui ti̱xa̱ xi ndyi̱a̱ ndáfoaa̱, sꞌe̱ tsꞌéntíyà xoò ndáfoaa̱, kó ta̱ xota̱ xi tjón sa̱ngínjin xò yojoo̱ kui ti̱xa̱a̱, mandaya xò, ta̱jñà chiꞌinní xi tjiín. 5Kó ki̱a̱a̱ kisꞌijña ngo nda̱ xi ni̱ma̱ se xi kantjiꞌún ján nónií nga kjiꞌijñaꞌon. 6Nga kamábe Kjisoo̱ nga kjiꞌijña ko̱jo nga kjín nónií nga oo̱n, bi̱ katsoó:

–A mejeén nga ka̱mandaya ji.

7Nda̱ xi ni̱ma̱ see̱, bi̱ katsoó Ndi̱a̱a̱:

–Jmíjínna xi sa̱ngínjinna ti̱xa̱ xi ndyi̱a̱ ndáfoaa̱ ngije matíyaá, ngatꞌa̱ tji̱e̱nga tsꞌénfí an, kje̱ꞌe xí tsꞌénna.

8Sꞌe̱ Kjisoo̱, bi̱ katsoó:

–Ti̱sítji̱n, chjábé ṉcháa̱n, kó tꞌen ji.

9Ti̱ kjiꞌa kamándaya kui nda̱a̱, kó iskjíbé ṉchaa̱n, sꞌe̱ kijíyise. Ni̱xtjin ndikón má nga kamá kui nii̱. 10Kósꞌe̱ xota̱ jundíoo̱, bi̱ katsoó nda̱ xi kamándayaa̱:

–Ni̱xtjin ndikón ngotꞌe̱, kó tsjandièjín kjo̱a̱kitii̱ nga xꞌi̱e̱nijín ji ṉcháa̱n.

11Sꞌe̱ bi̱ katsó kui nda̱a̱:

–Ta̱nga kui xi katsꞌéndayana, ti̱kuíní xi: “Chjábé jí ṉcháa̱n, kó tꞌen ji.” Katsóna.

12Kó bi̱ katsó já jundíoo̱:

–ꞌYání bo̱a̱ kui nda̱ xi bi̱ katsoó: “Chjábé jí ṉcháa̱n, kó tꞌen ji”.

13Kó nda̱ xi kamándayaa̱, kamábejín ꞌyání bo̱a̱ xi bo̱a̱ katsoó, ngatꞌa̱ Kjisoo̱ kichajájin ngi̱jii̱n kui xota̱ xi síndo kui ngi̱ndiee̱. 14Jaskan ngije kamá kui nii̱, Kjisoo̱ kamábe kui nda̱a̱ ngi̱ya na̱ngo̱xi̱i̱, kó bi̱ katsoó:

–Jànꞌa̱n, je kamándaya ji, ngiti̱ niꞌínjéjín ꞌne̱, tsájmi̱ ngo ni xi tsie ngase ka̱maa̱.

15Kijí kui nda̱a̱, kó katsóyaà xota̱ jundíoo̱ nga Kjisoo̱ boá xi katsꞌéndaya. 16Kó ta̱ngatꞌanii̱ kui nii̱ nga xota̱ jundíoo̱ tsangatji̱ngii̱ Kjisoo̱, kó kamámejeén katsꞌénkꞌién, ngatꞌa̱ ni̱xtjin ndikón nga katsꞌén kui nii̱. 17Kó Kjisoo̱, bi̱ katsoó:

–Na̱ꞌmina ngaskande ngotꞌe̱ tsꞌénxá, kó ko̱jo an tsꞌenxá án nga.

18Kó kuíni nga ꞌniú tsangasee̱ já ngito̱ko̱o̱ xota̱ jundíoo̱, nga kamámejeén sa̱ꞌínkꞌién Kjisoo̱, ngatꞌa̱ kamábendikónjín ni̱xtjin ndikoón, kó íni̱jmì nga Néná xí Na̱ꞌmii̱ kui, kó nga ti̱ Néná kuí katsó.

Bi̱ tsꞌén katsóyà xaá Kjisoo̱

19Sꞌe̱ Kjisoo̱, bi̱ katsó:

–Ja̱koxi̱, ja̱koxi̱ ni xi xiánjnúꞌun: Ta̱ jmíjín ni xi ka̱maa̱ sa̱ꞌín soboá ndií Néná, ta̱kuítsí ni xi tsꞌén, ni xi be nga tsꞌén Na̱ꞌmii̱, ngatꞌa̱ ngayeje ni xi tsꞌén Na̱ꞌmii̱, ti̱kuíní ni xi tsꞌén ndií. 20Ngatꞌa̱ Na̱ꞌmii̱ achichí tjoó ndií, kó bokoó ngayeje ni xi tsꞌén, kó tsie ngase ni xi sꞌe̱ ko̱ko̱ó, xi ngaskande jún ko̱e̱je̱ndikónjnú. 21Ngatꞌa̱ xikótsꞌèn maá Na̱ꞌmii̱ nga tsꞌénkjaꞌáꞌyaá xota̱ xi je jesón, kó tsjá nginií kjo̱a̱mindyion, ti̱ bo̱a̱ ti̱ tsꞌén ndií Néná, ka̱ma tsja̱á kjo̱a̱mindyion xota̱ xi mejeén kui. 22Ngatꞌa̱ Na̱ꞌmii̱jín xi tsáyà tsi nda ko̱jo tsi ndajín ndyi̱tsꞌèn xotaa̱, ndií boá xi katsjaá nga kui xi ka̱tso̱yà tsi nda ko̱jo tsi ndajín ndyi̱tsꞌèn xotaa̱, 23tsi̱ꞌe̱ nga ngayeje xota̱ sku̱i̱e̱ndikón ndií xikótsꞌèn bendikón Na̱ꞌmii̱. Xi bendikónjín ndií, bendikónjín Na̱ꞌmi xi katsangiya kui nga.

24Ja̱koxi̱, ja̱koxi̱ ni xi xiánjnúꞌun: Xi ku̱i̱ntꞌiè énna, kó sꞌijii̱n xi katsangiyana, kꞌuieé kjo̱a̱mindyion ngatsjéni̱xtjii̱n, kó ka̱majéjiín, ngatꞌa̱ xín je katsꞌénkjaꞌa kjo̱a̱bo̱yaa̱, kó je katseꞌeé kjo̱a̱mindyioo̱n. 25Ja̱koxi̱, ja̱koxi̱ ni xi xiánjnúꞌun: Nga jè jachó chi̱bo̱a̱ nga ngayeje xota̱ xi je jesoón ku̱i̱ntꞌiè eén ndií Néná, kó xi ku̱i̱ntꞌiè, kꞌuíndo nginí. 26Ngatꞌa̱ Na̱ꞌmii̱ ta̱kó tikón, kó ti̱ bo̱a̱ ti̱ tsꞌén katsjaá kjo̱a̱nda ndií nga ta̱kó tikón. 27Kó ti̱ katsjaá xá, tsi̱ꞌe̱ nga ka̱ma ka̱tso̱yà tsi nda ko̱jo tsi ndajín ndyi̱tsꞌèn xotaa̱, ngatꞌa̱ kuí boá xi ndií nda̱ xi̱ꞌii̱n. 28Ngata̱ fíndikónjínjnú kjo̱a̱a̱ kui nii̱, ngatꞌa̱ sꞌe̱ kjo̱chó chi̱bo̱a̱ nga ngayeje xota̱ xi je jesoón ku̱i̱ntꞌiè nda̱a̱, 29kó xota̱ xi ni nda katsꞌén, kjo̱a̱ꞌáꞌyaá tsi̱ꞌe̱ nga kꞌuíndo nginí, ta̱nga xi ndajín katsꞌén, ti̱ kjo̱a̱ꞌáꞌyaá nga, ta̱nga tsi̱ꞌe̱ nga ka̱majérií.

Bi̱ tsꞌén katsóyà Kjisoo̱ ni xi bokó xaá

30Ka̱májínna sa̱ꞌin an ngo ni an so̱bo̱a̱, xikótsꞌèn ntꞌie an, bo̱a̱ tsꞌén xiya an tsi nda ko̱jo tsi ndajín ndyi̱tsꞌèn xotaa̱, kó kixi̱ tsꞌénkotsijée̱n tsi nda ko̱jo tsi ndajín ndyi̱tsꞌèn xotaa̱, ngatꞌa̱ jmí tsi ni xi mejénna an xi mongase an, ni xi mejeén xi katsangiyana xí mongase an. 31Tsi ti̱ an xi tsꞌen an chistiko̱ yojona, jmí ni chjíjiín ni xi xian an. 32Kje̱ꞌe xí chistiko̱ kjima kjo̱a̱a̱ ꞌyání án, kó be án nga ja̱koxi̱ ni xi tsáyà kjo̱a̱a̱ an. 33Jún kanangiyachonjnúu̱ xota̱ xi asíyaá Juaa̱, kó kui katsóyàjnú ngo ni xi ja̱koxi̱, 34ta̱nga an, chjiénjínna tsi ngo xota̱ ka̱tso̱yà kjo̱a̱a̱ an, ta̱nga kui nii̱ xiyà án tsi̱ꞌe̱ nga kjo̱tjoꞌajnú. 35Juaa̱ boá kui ndiꞌí xí kití ko̱jo xi katsꞌéntsijee̱n, kó jún kamámejénjnú nga tsja kamájnú kui ndiꞌií chiboa ni̱xtjin. 36Ta̱nga an tikónná ngo én chistiko̱ xi je ngase, ta̱bo̱a̱jiín xi tsíchji̱a̱ Juaa̱ kjo̱a̱a̱ an, ngatꞌa̱ kuí xá xí katsjána Na̱ꞌmina xi katsangiyana, tsi̱ꞌe̱ nga kjo̱tjosón ni xi tsꞌen an ngotꞌe̱, kuí xí chji̱a̱ kjo̱a̱a̱ ni xi tsꞌen an. 37Ko̱jo Na̱ꞌmina xi katsangiyana xí kjima chistiko̱ kjo̱a̱a̱ an, ndatsi kji̱e̱ ndaꞌyájínjnú nda̱a̱, ko̱jo kji̱e̱ yàjínjnú kókjiꞌi a̱sie̱én, 38kó ti̱nde tikónjinjínjnú eén, ngatꞌa̱ kui xi katsangiya kui, kiniꞌánsꞌijinjínjnú. 39Chjátꞌayájnú ni xi tsó xo̱jo̱n eén Néná, ngatꞌa̱ bo̱a̱ tsꞌén nga ki̱a̱ sa̱kójnú kjo̱a̱mindyion ngatsjéni̱xtjii̱n, kó kuí boá kui én chistiko̱ xi chji̱a̱ kjo̱a̱a̱ an, 40kó mejénjínjnú nga kꞌi̱e̱ kjoéꞌe̱chonjnúꞌun tsi̱ꞌe̱ nga kꞌuiéjínjnú kjo̱a̱mindyioo̱n.

41Tsꞌenjoꞌojín an kjo̱a̱je xi tsja̱ana xotaa̱, 42ta̱nga jè kamábe an nga tikónjínjnú kjo̱a̱tjoó Néná. 43Ngajoo̱ Na̱ꞌmina jeꞌe an, kó kiniꞌánjo̱ꞌojínjnúꞌun, ta̱nga tsi kje̱ꞌe xí jeꞌe xki̱ tsi̱ꞌe̱ soboá, kuí xi̱ꞌba̱ xi niꞌánjo̱ꞌójnú. 44Kótsꞌèn ka̱ma sꞌi̱jinjnú, nga ja̱kꞌi̱e̱ ja̱ngaján ndyi̱boeꞌéjnúu̱ kjo̱a̱je xingi̱jnú, kó ndyi̱mindyiséjínjnú kjo̱a̱je xi tsja̱aná Néná xí ngototoo̱. 45Ngata̱ niꞌánkjójínjnú nga an xi kongítaꞌínjnúꞌun ngindyi̱ko̱n Na̱ꞌmina, kjo̱a̱kiti xi katsꞌénda Moisee̱ boá xi ko̱óngítaꞌínjnú, kuí xí ndyi̱chiyákjo̱a̱jnú. 46Ngatꞌa̱ tsi kiniꞌánsꞌijinjínjnúu̱ Moisee̱, ti̱ kiniꞌánsꞌijinjínjnú án tsobo̱a̱, ngatꞌa̱ kuí Moisee̱ xi katsꞌénꞌindó xo̱jo̱n kjo̱a̱a̱ an. 47Ta̱nga tsi kiniꞌánsꞌijinjínjnúu̱ ni xi katsꞌénꞌindó Moisee̱ ja̱, kótsꞌèn sꞌi̱jinjnú énna.

Currently Selected:

Juaa̱ 5: MAIX

Highlight

Copy