Juaa̱ 7

Já ntsꞌi̱e̱ Kjisoo̱ kisꞌijinjiín

1Ngije kamá kui nii̱, Kjisoo̱ kistsoꞌbá nangi Ngalilea̱, ngatꞌa̱ kamámejénjiín kijí xtji̱e̱e̱n nangi Jundea̱, ngatꞌa̱ já ngito̱ko̱o̱ xota̱ jundíoo̱ kamámejeén katsꞌénkꞌién. 2Kó je kjimatiña sꞌueé xota̱ jundíoo̱, sꞌueé ndiꞌańkꞌién xí xka̱ ꞌbíndoo̱ nkꞌaa̱. 3Kó já ntsꞌi̱e̱ Kjisoo̱, bi̱ katsoó Kjisoo̱:

–Chjiéngá kꞌuin jí nangi Jundea̱ tsi̱ꞌe̱ nga ko̱jo xota̱ tse̱ sku̱i̱e̱ ngayeje ni xi niꞌín ji. 4Ngatꞌa̱ ngojín xota̱ xi mejeén nga xcha̱ ni xi tsꞌén, tsi ꞌma sa̱ꞌín ngo ni. Tsi kui nii̱ tiniꞌín ji, ta̱sá takèe̱ yojòo̱ xota̱ xi tjín nga̱sondiee̱.

5Bo̱a̱ katsó já ntsꞌi̱e̱ Kjisoo̱, ngatꞌa̱ nde kui kisꞌijinjiín én xí tsíchji̱a̱. 6Ta̱nga Kjisoo̱, bi̱ katsó:

Kji̱e̱ fochójín chi̱bo̱a̱na, ta̱nga jún ta̱jmì chi̱bo̱a̱ní xi chi̱bo̱a̱ xi nda kjimajnú. 7Ka̱májiín xotaa̱ kui nga̱sondiee̱ sa̱ꞌínchꞌójnú jún, ta̱nga chꞌórií an, ngatꞌa̱ xiyàa̱ nga ndajín ndyi̱tsꞌèn. 8Tangínjnú sꞌueé, kjuínjín an, ngatꞌa̱ kji̱e̱ fochójín chi̱bo̱a̱na.

9Ngije katsó kui nii̱ Kjisoo̱, ki̱a̱ kisꞌijña nangi Ngalilea̱.

Bi̱ tsꞌén kijí Kjisoo̱ sꞌueé ndiꞌa tji̱nkꞌi̱én xí xka̱ ꞌbíndoo̱ nkꞌaa̱

10Ta̱nga ngije kijí sꞌueé já ntsꞌi̱e̱ Kjisoo̱, kijí si̱e̱n si̱e̱n Kjisoo̱ kui sꞌueé nga. 11Kó xota̱ jundíoo̱ tsangase Kjisoo̱ ngi̱jii̱n sꞌueé, kó bi̱ katsoó xkjín:

Ñá tikón kui nda̱a̱.

12Kó xotaa̱ tsíchji̱a̱ kjo̱a̱a̱ Kjisoo̱, kó tjín xí bi̱ katsó: “Ndaxota̱”, ta̱nga tjín xí bi̱ katsó: “Jmí, xota̱ tsꞌénꞌboṉcha̱jo.”

13Ta̱nga nde ngojín xi ta̱xkiya tsíchji̱a̱ kjo̱a̱a̱ Kjisoo̱ ngindyi̱ko̱n xotaa̱, ngatꞌa̱ katsakjónnií ngito̱ko̱o̱ xota̱ jundíoo̱.

14Ta̱nga ngije kjochó masiee̱n kui sꞌueé, kijí Kjisoo̱ xtji̱e̱e̱n na̱ngo̱xi̱i̱, kó ki̱a̱ akóyá. 15Kó kijíndikoón xota̱ jundíoo̱, nga bi̱ katsó:

–Ñá kijíkjaꞌání kui kjo̱a̱kjíntakoón kui nda̱a̱ nga jmí na̱xko̱yá kijíjín.

16Sꞌe̱ Kjisoo̱, bi̱ katsó:

–Ni xi bokoyá an tsa̱ꞌa̱njín, tsi̱ꞌe̱ xi katsangiyana boá, 17tsi tjín xí mejeén sa̱ꞌínkjatjosón ni xi mejeén Néná, sku̱i̱e̱ tsi tsi̱ꞌe̱ Néná ni xi bokoyá an, ko̱jo tsi tsa̱ꞌa̱n. 18Kui xota̱ xi tsi̱ꞌe̱ ni xi chji̱a̱a̱, mongase nga ngayeje xi sku̱i̱e̱ kjo̱a̱jee̱, ta̱nga xi mongase nga xcha̱ kjo̱a̱jee̱ xi katsangiya, kuí xi̱ꞌbi̱ xi ja̱koxi̱i̱, kó kuí xí kixi̱.

19A mí tsi Moisee̱ katsjájnú kjo̱a̱kitii̱. Ta̱nga nde ngojín jún xi niꞌánkjatjosónjnú. Ja̱, kó míkjo̱a̱a̱ nga mejénjnú si̱ꞌankꞌiénjnúꞌun.

20Sꞌe̱ bi̱ katsó xota̱ kjiín:

–Xindajín tikónjii̱n yojòo̱, ꞌyá xí mejeén sa̱ꞌínkꞌieén.

21Sꞌe̱ Kjisoo̱, bi̱ katsó:

–Ngayejejnú nga fíndikónjnú kjo̱a̱a̱ ngo kjo̱a̱ndikón xí katsꞌen an. 22Moisee̱ katsjájnú tsi̱ꞌe̱ nga si̱ꞌánjnú sirkunsisioo̱n, kó kui nii̱, tsi̱ꞌe̱ xota̱ tji̱e̱ xchájnú boá, jmí tsi tsi̱ꞌe̱ Moisee̱, kó ndatsi nga ni̱xtjin ndikón, ti̱ kuí xí niꞌánjnú jún kui nii̱. 23Ja̱ kó tsi tsi̱ꞌe̱ nga si̱ꞌankjatjosónjnú kui kjo̱a̱kitii̱, nga ngaskande nga ni̱xtjin ndikón niꞌánjnúu̱ sirkunsisio̱n ngo nda̱, míkjo̱a̱a̱ nga niꞌánxchánjo̱jnúꞌun nga ngo ni̱xtjin ndikón tsꞌendaya an ngo nda̱. 24Nga ta̱xkiya ꞌmíjínjnú tsi nda ko̱jo tsi ndajínkjiꞌi ngo ni xi bo̱a̱ tsꞌén bee̱takónjnú, bo̱a̱ ti̱ꞌánjnú ta̱nga kjo̱a̱a̱ ngo ni xi kixi̱.

Bi̱ tsꞌén kamákjínjiín xota̱ tsi̱ꞌe̱ Kjisoo̱ nga kui xi Kristoo̱

25Tjín xota̱ xi chji̱a̱ni na̱xi̱ńdáꞌniú Jerusale̱n, xi bi̱ katsó:

–A kuijín nda̱a̱ xi tjimíndyisé tsi̱ꞌe̱ nga si̱ꞌankꞌien. 26Ja̱ tsitsíjenjnúu̱, ki̱a̱a̱ tikón, kó tsꞌénchji̱a̱jo ngayeje xota̱, kó jmí ni tjíꞌmíjiín. A jè kamábe já xí botixómaá tsobo̱a̱, nga ja̱koxi̱ nga kui nda̱a̱ xi Kristoo̱. 27Ta̱nga kui nda̱a̱ jè ya ñá, ñání chji̱a̱ni, ta̱nga nga kjo̱e̱ꞌe Kristoo̱, ta̱ꞌyajín xi sku̱i̱e̱ ñání kjindibáni.

28Sꞌe̱ Kjisoo̱ nga tsꞌénbokoyá na̱ngo̱xi̱i̱, ꞌniú tsíchji̱a̱ nga bi̱ katsó:

–Jún jè yàjnúꞌun, kó yàjnú ñá chji̱a̱ni an, ta̱nga jmí tsi kjo̱a̱a̱ an nga jéꞌe̱ an, jéꞌe̱ án kjo̱a̱a̱ nga ja̱koxi̱ xí katsangiyana, kui xi yàjínjnú jún. 29Ta̱nga be án ꞌyání kui, ngatꞌa̱ ki̱a̱ kjindibáni an nínga tikón kuí, kó kuí xí katsangiyana.

30Sꞌe̱ kui jaá kamámejeén katsoboá, ta̱nga kamájín kón, ngatꞌa̱ kji̱e̱ fochójín chi̱bo̱a̱a̱. 31Kó achichí má xota̱ xi kisꞌijii̱n Kjisoo̱, kó bi̱ katsó:

–Nga kjo̱e̱ꞌe Kristoo̱, a kjín ngase kjo̱a̱ndikón sa̱ꞌín ta̱bo̱a̱jiín kui nda̱a̱.

Bi̱ tsꞌén katsangiya jájún já fariseoo̱ tsi̱ꞌe̱ nga stso̱ba̱ Kjisoo̱

32Já fariseoo̱ tsintꞌié ngayeje ni xi katsó xotaa̱ kjo̱a̱a̱ Kjisoo̱, sꞌe̱ já ngito̱ko̱o̱ chináꞌmii̱ ko̱jo já fariseoo̱, katsangiya jun xi kondaa̱ tsi̱ꞌe̱ nga stso̱ba̱ Kjisoo̱. 33Sꞌe̱ Kjisoo̱, bi̱ katsó:

–Ta̱ ngi chiboa tsí ni̱xtjin kotíjña̱jinjnúꞌun, sꞌe̱ kjuín án ngijee̱ nínga tikón xi katsangiyana. 34Ku̱i̱ndyi̱séjnúꞌun, kó sa̱kójínjnú án, kó nínga kjuín án, ka̱májín kjóchójnú.

35Sꞌe̱ bi̱ katsoó xkjín xota̱ jundíoo̱:

–Ñání tsꞌénfí kui nda̱a̱ nga ka̱májínná sa̱kóná. A tsꞌénkjó nga ki̱a̱ ko̱e̱je̱ nínga síndo xota̱ jundíoo̱ xi chji̱a̱ni kje̱ꞌe na̱xi̱ńdá, sꞌe̱ ko̱kóyaá xota̱ ngriengoo̱. 36Mí ni xi mejeén tsó nga bi̱ katsó: “Ku̱i̱ndyi̱séjnúꞌun, kó sa̱kójínjnú án nínga kotíjña̱ an, kó nínga kotíjña̱ an, ka̱májín kjóchójnú”.

Bi̱ tsꞌén katsóyà Kjisoo̱ nga kuí xí ndáfoaa̱ kjo̱a̱mindyioo̱n

37Kó ni̱xtjin nga kjifetꞌa sꞌué xí ꞌboxié kui xotaa̱, Kjisoo̱ kasasienkixi̱, sꞌe̱ ꞌniú tsíchji̱a̱, nga bi̱ katsó:

–Tsi tjín xí xíndaá, ngatjandibakónna tsi̱ꞌe̱ nga ngiti̱ ka̱ma xíndájiín. 38Xi sꞌijii̱n an, xikó tsó xo̱jo̱n eén Néná, ngi̱jin ini̱ma̱a̱ ko̱ngajii̱n ndáfoaa̱ ndejèꞌ xi tikón.

39Ta̱nga kui nii̱ katsó kjo̱a̱a̱ a̱siénni̱xtjin xi sa̱ko̱ó ngayeje xota̱ xi sꞌijii̱n kui. Nga kamá kui nii̱ kji̱e̱ sakójiín A̱si̱énni̱xtjii̱n Néná, ngatꞌa̱ kji̱e̱ boeꞌéjiín kjo̱a̱je nga si̱tꞌa kro, ko̱jo nga kjo̱a̱ꞌáꞌyaá Kjisoo̱.

Bi̱ tsꞌén tsakjanga xotaa̱ ta̱ngatꞌanii̱ Kjisoo̱

40Kósꞌe̱ kjín xota̱ xi síndojii̱n xota̱ kjiín nga tsintꞌié kuí eén, bi̱ katsó:

–Ja̱koxi̱ nga chji̱ni̱e̱ꞌe̱én Néná boá kui nda̱a̱.

41Kje̱ꞌe xota̱, xi bi̱ katsó:

–Kuí xi̱ꞌbi̱ xi Kristoo̱.

Ta̱nga tjín xí, bi̱ katsó nga:

–Kótsꞌèn nga nangi Ngalilea̱ kji̱ndi̱báni Kristoo̱. 42A mí tsí bo̱a̱ tsó xo̱jo̱n eén Néná nga Kristoo̱, xota̱ tji̱e̱e̱ Ndabii̱ ka̱ma, ko̱jo nga na̱xi̱ńdáꞌniú Belee̱n xò kji̱ndi̱báni, nangi nínga katsen Ndabii̱.

43Kósꞌe̱ tsakjanga xotaa̱ ta̱ngatꞌanii̱ Kjisoo̱. 44Tjín kuí xotaa̱ xi kamámejeén katsoboá Kjisoo̱, ta̱nga nde ngojín xi iskjíbé.

Já ngito̱ko̱o̱ já jundíoo̱ bi̱ tsꞌén kisꞌijinjiín Kjisoo̱

45Jájún xi kondaa̱ kijí nginí nínga síndo já fariseoo̱ ko̱jo já ngito̱ko̱o̱ chináꞌmii̱, kó bi̱ kiꞌmií nga akasíyaá:

–Ánní nga kjindibájo̱jínjnú.

46Sꞌe̱ bi̱ katsó jájún xi kondaa̱:

–Kji̱e̱ ngo nda̱ xi bo̱a̱ tsꞌénchji̱a̱ xikótsꞌèn chji̱a̱ kui nda̱a̱.

47Sꞌe̱ bi̱ katsó já fariseoo̱:

–A ko̱jo jún jè kichꞌíṉcha̱jojnú nga. 48A jè kisꞌijii̱n kui já xí botixómaá, ko̱jo tsi já fariseoo̱. 49Ta̱nga kui xota̱ xi bejín kjo̱a̱kitii̱, ngatꞌíko̱joni.

50Sꞌe̱ Nikondemoo̱, nda̱ fariseo̱ xi kijíkoón Kjisoo̱ ngo ni̱xtjin nga jñó, bi̱ katsoó kui jaá:

51–A tsjandiè kjo̱a̱kitii̱ nga ka̱ma si̱ꞌanjée̱ ngo nda̱, tji̱e̱nga kji̱e̱ sakoséndi̱yàjínná mí ni xi katsꞌén.

52Sꞌe̱ bi̱ katsoó já fariseoo̱:

–A nangi Ngalilea̱ ndókjo̱e̱ni ji nga. Ti̱ꞌinye ji xo̱jo̱n eén Néná, kó xchi̱e̱ ji nga nde kji̱e̱ ngo nda̱ chji̱ni̱e̱ꞌe̱én Néná xí ndibání nangi Ngalilea̱.

Xota̱chjo̱on xí katsꞌéntꞌaa̱ kjo̱a̱ xi̱ꞌii̱n

53Sꞌe̱ ńgó ńgó kijí ndiꞌaa̱.

Currently Selected:

Juaa̱ 7: MAIX

Highlight

Copy