Эхин 32
32
Яковой Эсаавтай эблэрэлгэ
1Үглөөгүүрынь Лаваан эртэлэн бодоод, зээнэрээ, басагадаа таалаад, үреэгээд, нютагаа бусаба.
2Яковой эсэгынгээ орон нютаг руу шэглэн ябаха замдань Бурханай хэдэн эльгээмэлнүүд тэрээнтэй ушарба. 3Тэдэниие хараад, Яков иигэжэ хэлэбэ:
— Энэ Бурханай бууса байра гээшэ.
Тиигээд тэрэ газараа «Маханааим», оршуулбал, «Хоёр бууса», гэжэ нэрлэбэ.
4Энэ үедэ Дабһата далайн урда талада оршодог Эдоом ороной Сэһиир гэдэг газарта ажаһуугша Эсаав ахадаа Яков хэдэн хүнүүдые эльгээжэ, 5иигэжэ дуулгахыень захирба:
— Танай богоол болохо Яков мүнөө хүрэтэр Лаваанайда ажаһуужа байгаа. 6Мүнөө намда ехэ мал һүрэг, эрэ, эмэ зарасануудшье бии. Танһаа үршөөл эрижэ, хоорондоо эе эб тогтоохын тула энэ мэдээ элшэнүүдээр эльгэнэб.
7Эльгээгшэдынь Эсаавтай уулзаад бусахадаа, Яковто иигэжэ хэлэбэ:
— Эсаав ахатайтнай уулзаабди. Тэрэ урдаһаатнай дүрбэн зуун хүнтэй хамта наашаа ерэжэ ябана.
8Яков айхабтар ехээр айба. Тиигээд тэрэ өөрынгөө зониие, адуу малаа хоёр бүлэг болгон хубаажа, 9«хэрбэеэ Эсаав нэгэ бүлэгтэ добтолжо усадхаа гээшэ һаань, нүгөө бүлэг зугадажа шадахадаа болохо» гэжэ бодобо.
10Тиигээд Яков Эзэн Бурханда мүргэн зальбарба:
— Үбгэ эсэгэ Абраһаамай, минии эсэгэ Исаагай Эзэн Бурхан! «Түрэһэн нютагаа, түрэл сададаа ши буса. Тэндэ шамда һайн һайханиие Би үгэхэб» гэжэ Та намда айладаа бэлэйлта. 11Танай богоол би хамаг үршөөл хайраһаатнай, хэшэгһээтнай хүртэхэ эрхэтэй гээшэ гүб? Түрэл нютагһаа гаража, Иордан гол гаталхадаа, би гартаа гансахан тулгууртай ябаа бэлэйб. Мүнөө бусажа ябахадаа, хоёр бүлэг болгон хубаарилһан олон зонтой, үй түмэн адуу малтай ябанаб. 12Маанадые минии аха Эсаавһаа абарыт! Би айнаб: тэрэ ерэжэ, намайе, һамгад, хүүгэдыемни бултыень алахал! 13Та намда һайн һайханиие хүргэжэ, уг удамыем далайн эрьеын элһэн мэтэ тоо томшогүй болгохоб гэжэ айладаа бэлэйлта. Тэрэ үгэеэ һанажа, намда туһалыт!
14Яков тэндээ хоноод, Эсаавта бариха бэлэг бэлдэжэ, 15хоёр зуун ямаа, хорин тэхэ, хоёр зуун хони, хорин хуса, 16ботоготой гушан энги, дүшэн үнеэ, арбан буха, хорин эмэ, арбан эрэ элжэгэ илгаба. 17Тиигээд энэ малаа түрэл түрэлөөрнь илган, хэдэн һүрэг болгоод, тус бүрииень нэгэ зарасада даалгажа, иигэжэ хэлэбэ:
— Таанад минии урда ороод ябагты! Һүрэг бүхэнэй хоорондо зай баряад туугты!
18Эгээл урид ябаһан һүрэг туугша зарасадаа Яков иигэжэ захирба:
— Минии аха Эсаавтай уулзахадашни, тэрэ шамһаа «хэнэй зараса гээшэбши? Хайшаа зоринош? Хэнэй мал туунаш? «гэжэ һурахадань, 19иигэжэ харюусахаш: «Энэ танай дүү, үнэн сэхэ богоол Яковойтнай мал. Эдэ бүгэдые дүүтнай танда бэлэг болгон үгэнэ. Эзэмнай хойноһоомнай ерэжэ ябана».
20Хоёрдохи, гурбадахи болон бусад һүрэг туужа ябааша зарасанарта адли эдэ үгэнүүдые хэлэхыень заажа үгөөд,
— Таанад Эсаавтай уулзахадаа 21«танай үнэншэ зараса Яков маанадай хойноһоо ерэжэ ябана» гэжэ заабол хэлээрэйгты, — гэбэ. «Хэрбээ Эсаав ахадаа уридшалан иимэ олон бэлэг үгөө һаам, сэдьхэлынь зөөлэржэ, намтай уулзажа магадгүй» гэжэ Яков досоогоо бодоһон байгаа.
22Бэлэг болохо малаа туулгажа эльгээгээд, Яков өөрөө тэрэ һууридаа дахин хонохоёо үлэбэ.
23Гэбэшье тэрэл һүни Яков Лэһаа, Рахээл һамгадаа, Зилпаа, Билһаа гэдэг хоёр зараса эхэнэрнүүдээ, арбан нэгэн хүүгэдээ абаад, Яббоок голые гарасаар гаталан гараба. 24Удаань тэрэ бүхы зөөри хогшолоо, мал һүрэгөө голой саана гаргаба. 25Тиигээд Яков һөөргөө голоо гаталан, хуушан газартаа ерэжэ, гансаараа үлэбэ.
Һүниндөө танигдаагүй хэн нэгэн Яковто ерэжэ, үүр сайтар тэрээнтэй барилдаба.
26Яковые диилэхэгүй байһанаа тэрэ ойлгоод, Яковой ташаагай яһанай үеһөөнь гаратар сохибо. 27Тиигээд тэрэ хүн Яковто хэлэбэ:
— Намайе таби, үүр сайхаяа байна.
— Намай үреэгээгүйдэтнай табихагүйб, — гэбэ Яков.
28— Шинии нэрэ хэн бэ? — гэжэ тэрэ хүн асууба.
— Яков, — гэбэ ха тэрэ.
29Тиихэдэнь тэрэ хүн хэлэбэ:
— Энээнһээ хойшо шинии нэрэ «Яков» бэшэ болохо. Ши хүнтэй тэмсэжэ, илаад, удаань Бурхантай тэмсэжэ диилэһэн хадаш шамда «Израиль», оршуулбал, «Эзэн Бурхантай тэмсэгшэ» гэдэг нэрэ үгтэбэ.
30— Өөрынгөө нэрэ намда хэлыт! — гэжэ Яковой гуйхада,
— Ши минии нэрэ мэдээд яаха гээбши? — гэжэ тэрэ хүн харюусаад, үреэл табяад, ошобо.
31— Бурхантай нюураараа уулзаһан аад, амиды мэндэ үлэһэмни гайхалтай, — гэжэ Яков хэлээд, тэрэ газарые «Пэнүһээл», оршуулбал, «Бурханай нюур», гэжэ нэрлэбэ.
32Наран гараба. Яков Пэнүһээлһээ ошоходоо, ташаа яһанайнгаа үеһөөн гараһанай ушарһаа дохолжо ябаа бэлэй. 33Мүнөө болотор израильшууд ташаа гуяын мяха юундэ эдидэггүйб гэбэл, Яковой тэрэ газарайнь үе мүсэ булгалуулагдаһанһаа болоно.
Currently Selected:
Эхин 32: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
