Эхин 34
34
Дииные хүсөөр эдлэлгэ, аханарайнь үһөөгөө абалга
1Лэһааһаа түрэһэн Яковой басаган Диина тэрэ нютагай басагадые харахаяа гэрһээ гараа бэлэй. 2Тиихэдэ тэндэхи обог зоной удамаршан, хиив обогтон болохо Хамоорой хүбүүн Шэхээм тайжа тэрээниие хаража, хүсөөрөө барин, эдлэбэ. 3Тиигээд Шэхээм Диинэдэ, Иаковай басаганда, сэдьхэл зүрхөөрөө татагдан дурлажа, басаганда инаглан һайхан үгэнүүдые хэлэбэ. 4Удаань тэрэ өөрынгөө эсэгэ Хамоорто ошожо, иигэжэ гуйба:
— Тэрэ басагые намда һамган болгон абажа үгыт.
5Хамоорой хүбүүн Шэхээмэй Диина басагыень бузарлаһан, хүсөөрөө эдлэһэн тухай Яков дуулаба, гэбэшье хээрэ талада малаа адуулһан хүбүүдэйнгээ ерэтэр абяагүй байха гэжэ шиидээ һэн.
6Шэхээмэй эсэгэ Хамоор Яковтой хөөрэлдэхэеэ ерэбэ. 7Яковой хүбүүд хээрэ талаһаа ерэхэдээ, Дииные бузарлаһан тухай дуулажа, угаа ехээр сухалдаба. Шэхээм Яковой басаган Дииные хүсөөрөө эдлэжэ, болошогүй юумэ хэжэ, бүхы израильшуудые доромжолһон болоно шуу.
8Хамоор иигэжэ хэлэжэ эхилбэ:
— Минии хүбүүн Шэхээмэй сэдьхэл танай басаган тээшэ тэгүүлнэ. Тиимэһээ басагыетнай минии хүбүүндэ һамган болгон үгэгты гэжэ эринэб. 9Таанар маанадтай худа ураг болыт гэхэ байнаб, танай басагад манай бэри болохо, манай басагад танай хүбүүдэй һамгад болохо. 10Манаар суг ажаһуугты, газарнай үргэн, үмсэдөө абахада, аралжаа наймаа хэхэдэ болохо.
11Тиигээд өөрөө Шэхээмшье Диинын эсэгэдэ, аханарта иимэ үгэнүүдтэй хандаба:
— Та бүгэдын талархалда хүртэхын тула хэлэһэн юумыетнай дүүргэхөөр бэлэмби. 12Эгээл ехэ энжэ эригты, эгээл сэнтэй бэлэгүүдые нэрлэгты, хэлэһэн юумыетнай би таанадта үгэхэб, гансал энэ басагаяа намда һамган болгон үгыт!
13Дүү басаган Дииныень Шэхээмэй бузарлан доромжолһон ушарһаа Яковой хүбүүд Шэхээм болон тэрэнэй эсэгэ Хамоорые мэхэлхэ гэжэ шиидээд, иигэжэ хэлэбэ:
14— Үгы, бидэ тиигэжэ шадахагүйбди. Бэлгэеэ отолуулаагүй хүндэ дүү басагаяа һамган болгон үгэхые сээрлэнэбди. Энэнь бидэндэ эшхэбтэр үйлэ мүн. 15Зүгөөр нэгэ эрилтыемнай дүүргээ һаатнай — таанадай хамаг эрэшүүлэй маанад мэтэ отололго хүүлээ һаа, зүбшөөл үгэхэбди. 16Тиигэбэлтнай, бидэ басагадаа таанадта хадамда үгэдэг, өөһэдөө танай басагадаар һамга хэдэг боложо, таанадаар хамта һуужа, нэгэ арад болохобди. 17Хэрбэеэ манай хэлэһые арсаа һаатнай, бэлгэеэ отолуулхаһаа татагасаа һаатнай, бидэ дүү басагаяа абаад, зөөжэ ошохомнай.
18Хамоор Шэхээм хоёр энэ хэлэгшыень зүбшөөбэ. 19Яковой басаганда тэсэбэригүй болотороо хүсэн дурлаһан залуу хүбүүн дары түргэн тэрэ ёһолол хүүлэхэеэ шиидэбэ. Шэхээм гэр бүлэдөө хамагай хүндэтэй хүн байһан болохолоорнь хэлэһэн үгэнь шанга хуули мэтэ бэлэй.
20Иигэжэ тэрэ Хамоор эсэгэтэеэ хамта хотын хэрэмэй бартаануудай хажууда суглаа хурал хэдэг эрэшүүлдэ ошоод, иигэжэ идхажа оробо:
21— Эдэ зон энхэ тайбан байха дуратай зон. Тиимэһээ манай газар дайдада нютаглаг, дайдаарнай наймаа хэжэ ябаг. Газар дайдамнай уужам ха юм. Бидэ тэдэнэй басагадые һамгад болгожо абахабди, өөһэдынгөө басагадые тэдээндэ һамгад болгожо үгэхэбди. 22Зүгөөр маанадаар сугтаа ажаһууха, нэгэ арад болохын тула тэдэнэр нэгэл эрилтэ табина: манай эрэшүүл тэдээн шэнги бултаараа бэлгэ отолуулга хүүлэхэ ёһотой гэнэ. 23Хэрбэеэ энэ эрилтыень дүүргээ һаамнай, эдэ зон маанадаар нэгэн амин ажаһуудаг болохо, тиихэдэнь тэдэнэй мал һүрэг, эд зөөринь манай гарта орохо.
24Хотын хүн зон Хамоор Шэхээм хоёрой үгэдэ орожо, бүхы эрэшүүл отололго хүүлэбэ.
25Бэлгэ отолһон ёһололһоо хойшо гурбадахи хоногто эрэшүүлэй үшөө үбшөөрхэжэ, тэнхээгүй байхада, энэ үе һамбаашалан, Яковой хоёр хүбүүд, Диинын түрэһэн аханар Симеон ба Левий һэлмэнүүдээ абажа, һаадгүй хото балгааһандань ороод, тэндэхи эрэшүүлые бүгэдыень хюдаба. 26Тэдэ Хамоорые болон тэрэнэй хүбүүн Шэхээмые һэлмээр сабшажа алаад, Дииные тэдэнэйхиһээ абажа, гэртээ бусаба. 27Дүү басагыень удамаршынь хүбүүнэй доромжолон бузарлаһанай харюуда бүхы хотын зонһоо үһөөгөө абаха гэжэ Яковой бусад хүбүүд хото руу ерээд, айл бүхэнэй гэр тоножо, сүйд хэбэ. 28Хотын зоной бүхы мал, элжэгэ болон хээрэ байгаа бүхы зүйл, 29бүхы эд зөөрииень хаман абажа, эхэнэрнүүдыень болон хүүгэдыень баряанда абаба.
30Энээнэй удаа Яков Симеон Левий хоёрто иигэжэ хэлээ бэлэй:
— Таанар намда гай тодхор асарбат! Энэ нютагай яһатан, ханаһаан, пэриззии обог зон бултадаа бидэндэ хоролхохо. Бидэ үсөөмди. Хэрбээ тэдэнэй хамта бидэнэй урдаһаа дайлаа һаань, бидэ бултадаа усадхагдахабди!
31Зүгөөр Симеон Левий хоёр иигэжэ харюусаба:
— Энэ нютагаархинай дүү басагыемнай янхан эхэнэр мэтээр доромжолһоной удаа бидэ абяа шэмээгүй һуужа байха юм гүбди?!
Currently Selected:
Эхин 34: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
