Эхин 37
37
Яковой хүбүүн Иосиф
Иосиф ба аханарынь
1Яков Исаак эсэгынгээ наһа баратар Ханаһаан орон дайдада ажаһуугаа.
2Яковой гэр бүлын түүхэ эндэһээ эхилнэ.
Яковой хүбүүн Иосиф арбан долоо наһаяа гүйсөөд, эсэгынгээ бага һамгад болохо Билһаа, Зилпаагай хүбүүдтэй хамта хони, ямаа адуулдаг болоо һэн. Аханарайнгаа юу хэһые тэрэ эсэгэдээ хоблодог байгаа. 3Үндэр наһатай болоһон хойнонь түрэһэн Иосифтоо Израиль бусад хүбүүдһээ үлүү дуратай бэлэй. Тиигээд тэрэ Иосифто үргэн хамсытай, ута хормойтой, гоё һайхан дэгэл бүтээжэ үмдэхүүлхэ болобо.
4Аханарынь эсэгэмнай маанадта орходоо тэрээндэ үлүү дуратай гэжэ харахадаа, атаархан, Иосифые үзэн ядадаг болобо, тэрээнтэй эбтэйгээр харилсажа шадахаяа болибо.
5Нэгэтэ Иосиф зүүдэ хараба. Тиигээд тэрэ зүүдэеэ аханартаа хөөрэбэ, тиихэдэнь тэдэ Иосифые бүришье үзэн ядадаг болобо.
6— Шагнагты, — гэбэ Иосиф. — Ямар зүүдэ зүүдэлһыемни! 7Таряалан дээрэ бидэ хадаһан таряагаа хэһэг хэһэгээрнь багсалан боожо байна хэбэртэйбди. Минии уяһан сомоо гэнтэ газарһаа бодоод согсойшобо, харин таанадай уяһан боолтонууд тэрэниие хүреэлэн, урдаһаань мүргэн, доро дохёол.
8Тиихэдэнь аханарынь хэлэбэ:
— Тиихэдээ ши манай хаан болохо гээ гүш? Үнэхөөр маанадай дээрэ гараха гэжэ байна гүш?
Иигэжэ тэдэ энэ зүүдэнһөөнь боложо, тэрэниие бүри ехээр үзэн ядадаг болобо.
9Иосиф дахин зүүдэ хаража, тэрээнээ баһал аханартаа хөөрэбэ:
— Шагныт, би ондоо нэгэ зүүдэ зүүдэлээб. Зүүдэндэмни наран, һара болон арбан нэгэн одо мүшэд намда доро дохин байна гэжэ үзэгдэбэ!
10Энэ зүүдэеэ эсэгэдээ хөөрэхэдэнь, эсэгэнь хүбүүгээ харааба:
— Ямар зүүдэ харадаг хүмши? Бишье, эхэшнишье, шинии аханаршье шамда ерэжэ, хүлдэшни һүгэдэн унаха болоно гүбди?
11Аханарынь Иосифто атаархан хоролхобо, харин эсэгэнь энэ хөөрөөень һанаандаа хадуун абаа бэлэй.
12Яковой гэр бүлэ Хэброон хотын хажуудахи тала газарта ажаһуудаг байгаа. Нэгэтэ хүбүүдынь эсэгынгээ мал Шэхээм хотын ойрохоно адуулжа байба ха. 13Тиигээд Израиль Иосифтоо хэлэбэ:
— Аханаршни Шэхээмэй хажуугаар малаа адуулжа байна хаш. Би шамайе тиишэнь эльгээхэм.
— Зай, — гэжэ Иосиф зүбшөөбэ.
14— Ябыш даа, — гэжэ эсэгэнь хэлэбэ. — Аханаршни мэндэ гү, малынь ямар бэ гэжэ мэдээд ерэ.
Тиигээд эсэгэнь тэрэниие ябуулжа, Иосиф Хэброонһоо гараад, Шэхээмдэ дүтэ ерэбэ. 15Аханарайнгаа байһан газар бэдэржэ, хээрэ талаар ябажа байхадань, танигдаагүй хүн ушарба.
— Ши эндэ юу бэдэрнэш? — гэжэ тэрэ асууба.
16— Би аханараа бэдэрнэб, — гэжэ Иосиф харюусаба. — Хаана тэдэмни малаа адуулнаб гээшэб, хэлыт?
17— Тэдэшни эндэһээ ябаа, — гэбэ тэрэ. — Дотаан ошохомнай гэжэ хэлэхыень би дуулаа һэм.
Иосиф тэндэһээ ябажа, аханараа Дотаанда олобо.
18Тэдэнэр Иосифой ерэжэ ябахые холоһоо хараад, алаха гэжэ хоорондоо хэлсэбэ.
19— Энэ манай зүүдэлдэг ноён ерэбэ, — гэжэ тэдэ хөөрэлдэбэ. 20— Тэрэниие барижа алаад, шэргэһэн худаг руу хаяя. Тиигээд тэрэниие арьяатан барижа эдеэ гэжэ хэлэхэбди. Эгээл тиигээд тэрэнэй зүүдэн хэр үнэн дээрээ бэелэгшэ ааб гэжэ харахабди!
21Харин эгээл аха болохо Рэүбээн энээниие дуулаад, бусадһаа тэрэниие абархые оролдон, иигэжэ хэлэбэ:
— Тэрэниие хороогоод яахамнайб. 22Шуһа урдахуулаад яахамнайб? Уһа суглуулдаг хээрын нүхэн руу амидыгаар хаяыт. Харин ами наһыень өөһэдөө бү таһалдуулагты.
Үнэн дээрээ тэрэ Иосифые абаржа, эсэгэдээ амиды мэндэ эльгээхэ гэжэ һанаһан байгаа.
23Иосифой аханартаа ерэхэдэнь, тэдэ үргэн хамсытай, ута, гоё һайхан дэгэлыень хуулажа абаад, 24өөрыень уурай худаг руу хаяба.
25Тиигээд Рэүбээнэй үгы байха үедэ Яковой бусад хүбүүд эдеэ хоол барихаяа һуун байтараа холоһоо ерэжэ ябаһан тэмээн хамбы хараба. Энэ хадаа ишмаэль обогой наймаашад Галаад хотоһоо Египет руу анхилма һайхан үнэртэй гүгэл болон бусад угаа үнэтэй ашаа аралжаа наймаа эрхилхэеэ абаашажа ябаба. 26Тиигээд Иуда аха дүүнэртээ иигэжэ хандаба:
— Дүүгээ алаһанай ямар олзо байхаб? Адхаһан шуһа нюуха хэрэг гараха. 27Тиихын орондо дүүгээ ишмаэль наймаашадта худалдая, тиигээд гарнайшье сэбэр үлэхэ. Юуншье һаа, манай түрэһэн дүү, манай мяханай таһардаһан ха юм.
Аха дүүнэрынь зүбшөөбэ.
28Мидианай наймаашадай дүтэлэн ерэхэдэ, аханарынь Иосифые худагһаа гаргаад, хорин сагаан мүнгөөр худалдаба. Измаилай наймаашад Иосифые Египет руу абаад ошобо.
29Рэүбээн бусажа, худаг руу тонгойжо харахадаа, Иосифой үгы байһаниие обёоржо, хубсаһаа урижа, уйлан шаналба.
30— Одхон хүбүүмнай үгыл! — гэжэ дүүнэртээ ерээд, Рэүбээн хэлэбэ. — Харин би яахабиб? Һалаалби даа.
31Иосифой аханар эшэгэ гаргаад, Иосифой үргэн хамсытай, ута һайхан дэгэлые шуһанда зуураад, 32Яков эсэгэдээ абаашажа харуулба.
— Бидэ хээрэдэ энээниие олообди. Танай хүбүүнэй хубсаһан бэшэ бэзэ? — гэжэ асууба. 33Яков дэгэлые харамсаараа танижа хашхарба:
— Хүбүүнэйм самса! Тэрэниием зэрлиг арьяатан бажуугаа гээшэ! Алаа, эдеэ гээшэл Иосиф хүбүүем!
34Хубсаһа хунараа удара татаад, ташаадаа гансал үнэгүй шэрүүн бүдэй удархай үлээгээд, Яков олон хоногой туршада хүбүүгээ шаналан бархиржа байгаа бэлэй. 35Хүбүүд, басагадынь һаатуулха, һамааруулха гэжэ ерэхэдэнь, Яков:
— Үгы! Би үхэлэй орон руу ошон ошотороо хүбүүнэйнгээ хойноһоо уйлан гашуудан байхаб! — гэдэг байба.
36Тэрэ үедэ мидиан обог аймагай наймаашад Иосифые Египет абаашаад, фараоной ордоной сэрэгэй дарга Потифарта богоол болгон худалдаба.
Currently Selected:
Эхин 37: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
