Эхин 43
43
Иосифой аханарай Египет руу хоёрдохиёо Бэньямиинтэй хамта ерэлгэ
1Ханаһаанда үлэсхэлэн хооһон байдал улам дортожо, 2Египедһээ асарһан орооһоной дууһахада, эсэгэнь хүбүүдтээ хэлэбэ:
— Дахин ошожо, багаханшье һаа, эдихэ хоол асарагты!
3Иуда харюусаба:
— Дүүгээ дахуулжа ерээгүй һаа, нюдэндэмни бү харагдагты гэжэ тэрэ хүн занаа һэн. 4Хэрбэеэ дүүемнай маанадтай хамта табяа һаатнай, эдеэ хоол асархабди. 5Хэрбэеэ табяагүй һаатнай, манай тиишэ ошоһонойшье туһагүй, юуб гэхэдэ, дүү хүбүүгүйгөөр нюдэндэмнишье бү үзэгдэгты гэжэ тэрэ хүн хэлээ ха юм.
6— Тэрэ хүндэ дүүтэйбди гэжэ хэлэхэ ямар хэрэг байгаа юм? Тэрээнһээтнай боложо, намда дахин зоболон ушархань, — гэбэ Израиль.
7Тиихэдэнь аха дүүнэр хэлэбэ:
— Тэрэ хүн маанадһаа хамаг юумыемнай — өөһэд, түрэл гарал тухаймнай, эсэгэтнай амиды мэндэ гү, үшөө дүүнэр, аханар бии гү гэжэ үсэдөөр һурагшалаа. Дүүгээ абаад ерэхэт гэжэ хэлэхыень одоо хаанаһаа мэдэхэ байгаабибди?
8Иуда Израиль эсэгэдээ хэлэбэ:
— Дүү хүбүүемнай маанадтай табиит даа, тиигээ һаатнай, ябахаар бэлэмди. Тиигэжэ бидэ бүгэдэ — бидэшье, ташье, манай хүүгэдшье — туража үхэнгүй, амиды мэндэ гарасалдахалди. 9Би Бэньямиинэй аюул усалгүй байдалай түлөө харюусанаб. Ами наһыень өөр дээрээ даажа абанаб. Би тэрэниие танай урда улаан гараараа хүтэлэн бусаажа асархаб. Тиигээгүй һаа, бүхэли наһаараа танай урда буруутан, зэмэтэй ябуужаб. 10Зүгөөр иигэжэ удааржа байхын орондо тиишээ хоёр дахин ошоод, ерээд байха һэмди!
11— Зай, яахаб, — гэбэ Израиль. — Тиигээ һаа, иимэ юумэ хэгты: энэ газар дайдын хамагай һайн бэлэг бэлдээд, тэрэ хүндөө абаашагты. Бага-багаар янза бүриин үнэ сэнтэй гүгэлнүүдые, зүгын бала, бүйлөөһэ, миндаль һамарһаашье абалсаад ошогты. 12Сагаа мүнгэ түрүүн абаашаһанһаа хоёр дахин ехээр абахат. Туламуудай амһартахи мүнгые бусаагаарайгты. Тэдэ эндүүржэ, туламуудтатнай сагаа мүнгэ хэжэрхижэ магад. 13Тиигээд дүүгээ дахуулан, тэрэ хүндөө дахин ошогты. 14Түгэс Хүсэтэ Бурхан тэрэ хүнэй сэдьхэл зүрхые зөөлэрүүлжэ, нүгөө ахыетнай Бэньямиинтэй хамта бусааха шиидхэбэри гаргуулхань болтогой. Нам тухай хэлэбэл, бүхы хүүгэдээ алдаха гэһэн заяатай һаа, алдахал болоно бэзэб.
15Иигэжэ Яковой хүбүүд бэлэг-сэлэг болон түрүүн абаашаһанһаа хоёр дахин ехэ сагаа мүнгэ абаад, Бэньямииные дахуулан, Египет руу ошожо, дахин Иосифой урда бараалхаба. 16Бэньямиинэй тэдэнтэй хамта ерэһые Иосиф хаража, гэрэйнгээ ахалагша зарасада хандан, иимэ захиралта үгэбэ:
— Эдэ зониие минии гэртэ оруула. Тиигээд мал гаргаад, эдеэ хоол бэлдэ. Би тэдэнтэй хамта үдын хоол барихаб.
17Иосифой захирһанай ёһоор, ахалагша зарасань тэдэниие гэртэнь асарба. 18Зүгөөр аха дүүнэр айжа, хоорондоо хэлсэбэ:
— Урда тээ орооһо худалдан абахадамнай, тэдэ манай мүнгэ зорюута туламууд руумнай хэжэ, мүнөө гэртээ асаржа, маанадые барижа, богоол болгоод, элжэгэ унааемнай буляажа абаха хара һанаатай хаш.
19Тиигээд гэрэй богоһо дээрэ тэдэ ахалагша зарасадань хандаба:
20— Эрхим хүндэтэ эзэн, хэлэхыемнай зүбшөөгыт. Бидэ урид иишээ эдеэ хоол абахаяа ерээ һэмди. 21Бусаха харгыдаа хонохоёо тогтоод, туламуудаа нээгээ һэмди. Харахадамнай, хэн хэнэймнай тулам соо орооһоной түлөө түлэһэн сагаан мүнгэмнай байба.
Тэрэ мүнгэеэ мүнөө һөөргэнь тэрэ шэгээрнь бусаан асарбабди. 22Тэрээнһээ гадна мүнөө эдеэ хоол худалдан абаха мүнгэн маанадта байна. Харин хэн тиихэдэ сагаан мүнгэ тулам соомнай хэһыень мэдэнэгүйбди.
23— Һанаагаа бү зобогты! — гэбэ Иосифой ахалагша зараса. — Бү айгты. Магад, танай болон эсэгынтнай шүтэн хүндэлдэг Бурхан тэрэ мүнгэ нюусаар туламууд соотнай хэжэ болоо. Харин би та бүхэнэй мүнөө түлэһэн мүнгэл тооложо абаха уялгатайб.
Тиигээд тэрэ Симеоные тэдээндэ асараад, 24бүгэдыень Иосифой гэртэ уриба, хүлнүүдээ угаахыень уһа асарба, тиихэдэнь тэдэ хүлөө угаажа амарба. Зараса элжэгэнүүдтэнь тэжээл үгэбэ.
25Иосиф ерэхэдээ, тэдээнтэй хамта эдеэ хоол бариха гэжэ мэдэһэн ушарһаа тэдэ бэлэг-сэлэгээ гарган бэлдэбэ. 26Иосифой ерэхэдэ, асарһан бэлэгээ гэртэнь оруулжа баряад, урдань тэдэ үбдэг дээрээ һүгэдэн мүргэбэ. 27Иосиф тэдэнэй амар мэндые асууһанай удаа иигэжэ һураба:
— Намда хөөрэһэн тэрэ үбгэн буурал эсэгынтнай тамир һайн гү? Амиды мэндэ гү?
28Тиихэдэнь тэдэ дахин урдань үбдэг дээрээ һүгэдэн мүргэжэ, иигэжэ харюусаба:
— Танай богоол болохо эсэгымнай бэе һайн.
29Иосиф нэгэ эхэһээ түрэһэн Бэньямиин дүүгээ хараад, иигэжэ асууба:
— Энэ танай намда хөөрэгшэ одхон дүү хүбүүнтнай болоно гү? Бурхан шамайе үршөөхэнь болтогой, хүбүүмни!
30Дүү хүбүүгээ харахадаа, Иосиф үнэн зүрхэнһөө уяржа, сурхирса бархирхаар болоод байба. Яаралтайгаар ондоо таһалга ороод, тэндээ тэрэ уйлаба. 31Тиигээд нюур, гараа угаажа, айлшадтаа ерэбэ, бэеэ барижа, зарасанартаа эдеэ хоол табихыень захирба. 32Иосиф гансаараа тусхай шэрээдэ һууба, аха дүүнэрынь ондоо шэрээдэ һууба. Египет зон еврей зонтой хамта хоол барихые бузартай гэжэ тоолодог байһан ушарһаа тэндэ байһан Египет ороной зон ондоо шэрээдэ аминдаа һууба. 33Иосифой аха дүүнэрынь тэрэнэй урдаһаа харуулан табиһан шэрээдэ һуухадаа, тэдэнэй наһанай эеэр бүхы һандали табиһаниие хараад, бэе руугаа гайхан харасалдаба. 34Зарасанарынь Иосифой шэрээ дээрэ табяатай хоолһоо тэдэндэ табаг соо хэжэ үгэхэдөө, Бэньямииндэ бусад аханарһаань таба дахин үлүү ехэ эдеэ хоол үгэжэ байба.
Иигэжэ Иосиф аха дүүнэрээ садатарынь эдеэлүүлжэ, жэмэсэй архяар нилээд халатарынь хүндэлөө бэлэй.
Currently Selected:
Эхин 43: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
