Псалманууд 19
19
1[Дуунай бүлэгэй хүтэлбэрилэгшэдэ: Давидай псалма.]
2Тэнгэри Бурханай һүр жабхалангые зарлан тунхаглана,
огторгой Тэрэнэй хэһэн бүтээлнүүдые айладхана.
3Үдэр дараадахи үдэртэ яряа дамжуулна,
һүни нүгөөдэ һүнидэ эрдэм мэдээсэнэ.
4Шэмээгүй, үгэшье соностоногүй,
дуу хоолойньшье дуулданагүй.
5Тэдэнэй хэлээшэнь бүхы газар дэлхэйгээр тараа,
тэдэнэй үгэнүүдынь газар дэлхэйн заха хизаар хүрөө.
Тэндэ Бурхан наранда гэжэ майхан табяа.
6Хуримаа наадажа байгаа залуу хүндэл
наран тэрэ үргөөһөө гарана,
урилдаанай баатар мэтэ
тэрэ баясана.
7Мандахань тэнгэриин нэгэ захаһаа,
тойрохонь нүгөө заха хүрэтэр,
халуунһаань хорохо арга байхагүй.
8Эзэнэй һургаал тэгшэ түгэлдэр,
һүр һүлдэ һэргээдэг.
Эзэнэй заабари бата,
гэнэн хүниие ухаатай болгодог.
9Эзэнэй захиралтань зүб, зүрхэ баясуулдаг,
һургаал заабаринь һаруул тодорхой,
нюдэ онгойлгодог.
10Эзэнһээ айхань сэбэр,
хэтэ мүнхэдөө оршодог.
Эзэнэй сүүдүүд үнэн,
бүгэдэ зүб шударга.
11Тэдэ алтанһаа,
обоо шэжэр алтанһаа үлүү хүсэмөөр.
Зүгын балаһаа,
зүгын һархинагһаа дуһагша юумэнһээ үлүү амтатай.
12Би, Танай богоол, тэдэниие сахидагби,
тэдэниие сахиһанай түлөө агууехэ шагнал байдаг.
13Өөрын бурууе хэн ойлгожо шадахаб даа.
Далда байгаа бурууһаам намайе арюудхыт.
14Һанаашалһан нүгэлнүүдһээм намайе зайлуулыт,
богоолыетнай тэдэ бү зонхилог.
Тиигэбэл, би гэмгүй боложо,
агууехэ нүгэлһөө сүлөө болохоб.
15Минии Хабсагай, минии Абарагша болохо Эзэн!
Аманһаамни гарагша үгэнүүд, сэдьхэлэймни бодолнууд
Танда тааламжатай байхань болтогой!
Currently Selected:
Псалманууд 19: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.