Псалманууд 9
9
1[Дуунай бүлэгэй хүтэлбэрилэгшэдэ: «Хүбүүнэйнгээ орондо үхэ» гэһэн аялга. Давидай псалма.]
2Эзэн, үнэнхэ зүрхэнһөө Танда һайниие хүргэнэб,
гайхамшагта хэрэгүүдыетнай тунхагланаб.
3Тан тушаа баярлан, баясан байнаб,
Дээдэ Бурхан, нэрыетнай магтан дууланаб.
4Эрьехэдэтнай, дайсадни һөөргөө сухарижа,
бүдэрэн унаба, хосорбо!
5Иигэжэ Та минии сүүд, зарга хэрэг шиидхээт,
сэнтиидээ залараат, Үнэн шударга шүүгшэ!
6Арадуудые номгоруулаат, хорото муу зониие усадхаат,
тэдээн тушаа дурсагдахашье юумэн үгы болоо.
7Дайсад хэтэдээ һандаргагдан һалаа,
хотонуудыень үндэһөөрнь абажа хаяат,
тэдээн тушаа юуншье һануулнагүй.
8Эзэн хэтэ мүнхэдөө хааншалан байха.
Сүүд ябуулхын тула Тэрэ шэрээгээ дэлгээ.
9Бүхы дэлхэйе Тэрэ үнэн шударга сүүдлэхэ,
арадуудые шударга сэхээр шүүбэрилхэл.
10Дарлагдаад байгаа хүндэ Эзэн хорохо газар,
бэрхэшээлтэй сагта хоргодохо газар болохо.
11Нэрыетнай мэдэдэг зондо Та этигэл найдалынь гээшэт,
юуб гэбэл, Таниие бэдэрэн дагагшадые орхидоггүйт.
12Сиондо оршодог Эзэндэ магтаал дуулагты,
хэһэн үйлэ хэрэгүүдынь зоной дунда тунхаглагты.
13Шуһа урдахуулагшадһаа үһөөгөө Тэрэ абадаг, һанажа байдаг,
зобогшодой ёолоон хашхараае мартадаггүй.
14Эзэн, намайе үршөөгыт! Дайсад намайе зобоожо байнал, харыт!
Үхэлэй хаалгаһаа намайе бодхоонот.
15Юунэй түлөө бэ гэхэдэ,
Сионой хаалгануудта Таниие магтан байхым тула.
Намайе абарһандатнай баясан байхаб!
16Үндэһэтэнүүд өөһэдын малтаһан нүхэндэ унаа,
өөһэдын нюуһан торон зангада хүлөөрөө орошоо.
17Иигэжэ Эзэнэй сүүд эли тодо болоо,
хорото муу хүн өөрын торон зангада ороо!
[Хүгжэм]
18Бурханиие мартадаг бүхы үндэһэтэнүүд —
хорото муу зон Үхэлэй орон руу бусаха.
19Үгытэй хүн хэтэ мүнхэдөө мартагдаа бэшэ,
ядуу зонһоо найдалынь мүнхэдөө таһараа бэшэ!
20Эзэн, заларыт! Хүнэй бардамынь бү илаг лэ!
үндэһэтэнүүд Танай сүүдтэ ерэг лэ!
21Эзэн, тэдэниие айлган һүрдүүлыт,
яяр хүнүүд гээшэлди гэжэ үндэһэтэн мэдэдэг байг лэ!
[Хүгжэм]
Currently Selected:
Псалманууд 9: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.