San Mateo 15

Inkowan nen Jesus i ngaaw wa aramid ira nonta Parisiyo tan mamaistoro ni dinteg

1Sota ira Parisiyo tan sota mamaistoro ni dinteg ni Hodiyos ja edapod Jerusalem, dimaw ira so nen Jesus jet kowan sha ey, 2“Apay nga sama ira toom ket eg sha onoren sota sigod ja ogadi nonta bayag da? No mengan ira ket eg ira nin manbodo.”

3Si Jesus, sinongbatan to ira ja kowan to ey, “Si‐kayo, eg jo onoren sota bilin nen Apo Shiyos. Say joka et ngo mowan nemnemnema, sota ogadiyo. 4Kaspangarigan say sakey ya bilin nen Apo Shiyos ja joka ibiyang, sota kowan to ey, ‘Shayaw mo si amam tan si inam’, tan sota kowan to pay ey, ‘Sota toon ngaaw i toka ikowan so nen ameto, ono si ineto, kenshat ta mebono.’ 5Nem si‐kayo, say joka itoro, kowan jo ey angken ibiyang ni too si ameto ono ineto, basta ikowan nonta too so nodta maka‐anak son si‐kato ey, ‘Sota istay i‐akan ko son si‐kayo ja panbiyag jo koma, indasin kon maytodong shi Timplo.’ 6Isonga sajay ya joka pengonod ni ogadiyon joka itoro, inpaskit jo nodta koston bilin nen Apo Shiyos, ja singa enshiy silbi to. 7Sesi‐kayo ngon toon kowan to ey ẃara son Apo Shiyos ni emin na poso to nem ẃaray pangkep jon ngaaw! Agpayso ey si‐kayo sota kaytoshongan nonta padto nen Isaias nonta bayag da ja esel nen Apo Shiyos met laeng, ja kowan to ey,

8‘Sajay iren too, shi bongot bengat i engintegan ni shaka panshedjaw son si‐kak, nem shi nemnem sha, araẃi son si‐kak. 9Enshiy silbi ni shaka panshedjaw son si‐kak, tep say shaka itodtoro ni olay, sota edapo met laeng shi nemnem ni si‐karen too, asan sha mango ikowan ey bilin kono nen Apo Shiyos.’ ”

10Jet si Jesus, tina‐ẃal to ira sota totoo jey ondaw ira di son si‐kato jet kowan to son si‐kara ey, “Itnengi jo iyay ya ikowan ko son si‐kayo jet awatiyo. 11Kowan ira nonta Parisiyo ey basol kono no eg kito manbodo asan mangan ja si‐katoy ondogit so ni nemnem. Nem aliẃen sota ikem‐ot jod bongot ja tetdenen jo i ondogit son si‐kayo, no diket sota kaonbo‐day ali shi bongot ja mandepod nemnem jo, si‐katoy kaondogit son si‐kayo.”

12Idi naksheng ja inkowan nen Jesus iyay, sota ira too to, dimaw ira di son si‐kato jet kowan sha ey, “Amtam? Idi intenengan ira nonta Parisiyo sota inkowan mo, ngaaw i nemnem sha son si‐kam.”

13Jet si Jesus simongbat ni arig ja kowan to ey, “Emin na too, may‐eshig ey singa mola jet sota aliẃen mola nen Apo Shiyos, a‐kalen to met laeng. 14Isonga baybay‐iyo ira ma Parisiyo; olay tos Apo Shiyos son si‐kara. Si‐kara sota may‐eshig ey ekorab ja emengiredan ni kait ton ekorab. No kowan nonta sakey ya ekorab ey to ibalnay sota kait ton ekorab, ma‐kas iren showa shi pel‐og.”

15Jet nontan met laeng, si Pedro kowan to so nen Jesus ey, “Ileẃag mo ga i olog nita arig son si‐kami.”

16Jet si Jesus simongbat ja kowan to ey, “Apay angken si‐kayo, eg kayo pay laeng maka‐aw‐awat? 17Apay eg jo amta ey sota maykem‐ot shi bongot ket say daẃan to, shi ekes, jet onbo‐day met laeng? Eg to dokiten i nemnem. 18Nem sota onbo‐day ali shi bongot ja esel, si‐katoy mandepo shi nemnem. Jet sotan na ẃared nemnem, si‐katoy ondogit so ni too. 19Ta say kedepo‐i ni ngaaw wa pangkep ni too, shi nemnem to. Isonga ẃaray ememono, ẃaray ememii tan emekileki, ẃaray emengibot, ẃaray emengi‐owap, tan ẃaray emenomang ni kait ton too. 20Sajay iray kaondogit so ni too. Kowan ni Parisiyo ey sota mengan ja eg nin manbodo, sotan i ondogit so ni too ja panbesolan to. Nem enshi kari.”

Sota kaba‐deg ni pamati nonta sakey ya biin aliẃen Hodiyos

21Nontan ma si Jesus indekjas to sotan na dogad jet dimaw shi nankinaw‐an ni Tira tan Sidon. 22Jet idi nonta ẃares Jesus shiman, ẃaray biin dimaw ali son si‐kato ja too nodtan na dogad. Aliẃen Hodiyos tep poli nonta sigod ja too nodtan, nem kimeljaw ja kowan to ey, “Apo, naka memati ey si‐kam aliy mengibengon son Ari David nonta bayag da! Kaasimak, ta ẃaray anak kon bii nem angsan i kepesing nonta dimonyo ja pimeket son si‐kato, toka pedigaten pasiya!”

23Nem si Jesus, eg to sinongsongbatan. Anongosto ma ey kowan nonta too nen Jesus son si‐kato ey, “Pagi‐nan mo ga et ita bii; aliẃen en ontentened ali ja onkelkeljaw.”

24Si Jesus simongbat ja kowan to ey, “Say inbetkagan towak so bengat nen Apo Shiyos, sota ira Hodiyos ja may‐eshig ey kalniron imaraẃi, jet enshiy biyang ko shiya tood jay ya aliẃen Hodiyos.”

25Nem sota bii dimaw et ali ja en nantalimokod shi sango‐an nen Jesus ja kowan to ey, “Apo, kaasi‐imak.”

26Jet si Jesus simongbat ja kowan to ey, “Aliẃen nebeng ja nak pekeẃas sota istay para a‐anak ja i‐akan ko so ni aso.”

27Nem sota bii simongbat ja kowan to ey, “Owen apo, amtak ita kowan mo, nem angken sota ira aso, mebedin met ja manbiyag ira nonta ema‐kas shi damisaan nonta apo sha.”

28Simongbat si Jesus so nonta bii ja kowan to ey, “Agpayson ebadeg i pamatim! Isonga sota shawat mo, medeka.” Jet nontan met laeng, sota anak nontan na bii, mimapteng nga shagos, ja bimetik sota dimonyo son si‐kato.

Inpamapteng nen Jesus sota eshakel la totoo

29Si Jesus, indekjas to mowan sotan na dogad, jet nanshalan shima kilig ni baybay shi Galilia, asan tomiyed shima shontog. Timongaw shiman ja mantosho, 30jet eshakel la pasiyay totoon dimaw ali son si‐kato. Jet sota ira epilay, ekorab, omel, tan sota ira eshom pay ya ẃaray sakit to, indaw sha son si‐kato shima shontog a kawad‐an to, jet inparokol sha shi kad‐an ni sedi to. Jet si Jesus, inpamapteng to ira.

31Jet sota ira eshakel la totoo, nasshaaw ira nonta in‐asas sha so ey nan‐esel ira sota istay eg maka‐esel, nan‐akad ira sota istay epilay, tan angken sota ira ekorab, nan‐asas ira. Jet kowan sha ey, “Agpayso gayam noman na manakabalin i Shiyos ni Hodiyos!”

Sota maykepinshowen inparakel nen Jesus i ootik ka mekan

32Si Jesus, tina‐ẃal to ira sota too to jet kowan to son si‐kara ey, “Naka kaasi‐i ira ja totoo, ta tedon akew sha niman ja ẃared jay son si‐kak jet enshi may kenen sha. Ekak koston pa‐ekad ira ja eg nin engan, say eg ira onkapoy shi shalan.”

33Jet sota ira too nen Jesus, kowan sha ey, “Toway pengal‐an tayod jay ni kenen sha ey enshiy baley shiyay? Eshakel met iren pasiya.”

34Jet si Jesus, kowan to son si‐kara ey, “Pigen boknol la tinapay sota ẃara son si‐kayo?”

Simongbat ira ja kowan sha ey, “Piton boknol la tinapay, tan ẃara pay i piskaw, nem aliẃen eshakel.”

35Jet si Jesus, inkowan to so nonta ira totoo ey ontongaw ira nodta bo‐day. 36Inda nen Jesus sota piton boknol la tinapay tan sota piskaw jet nan‐iyaman so nen Apo Shiyos asan toka showashowa‐a. In‐akan to so nonta ira too to ja si‐karay mengiweshis so nonta ira totoo, jet tinongpal sha. 37Jet emin ira sota eshakel la totoo, engan ira jet napsel iren emin. Idi naksheng ira, sina‐nop sha sota ebay‐an ja eg sha kinan et ondaw wa piton baskit. 38Sota engan niyay ya tinapay, epat ta dibo ja daleki, powisha sota bibii tan a‐anak, ja eg ekibidang. 39Jet nontan ma, inpa‐ekad to ira sota totoo jet en nandogan nodta bangka jet dimaw shima dogad ja kowan sha ey Magadan.

Currently Selected:

San Mateo 15: DMP

Highlight

Copy