San Mateo 17
17
Nanbalin ni emenenili i bakdang nen Jesus nodta shontog
1Idi ẃaray enem ma akew ja edabas da ni engikowanan nen Jesus niyay, inodop to si Pedro, tan si Santiago nen Juan ja san‐agi, jet timiyed ira ni a‐abos sha shima shontog ga ekayang. 2Jet idi mimotok ira nodtan, inon‐an shen nanbaliw i itsora nen Jesus ja emenenili. Singa sekit i itsora ni dopa to jet sota baro to, empotin pasiya. 3Jet nontan met laeng, inon‐an sha si Moises nen Elias ja emekitbal so nen Jesus. 4Jet si Pedro, kowan to so nen Jesus ey, “Apo, mapteng i kawasha tayod jay. No piyan mo, mengemagak ni tedon kampod jay: sota sakey para son si‐kam, sota sakey para son Moises, tan sota sakey para so nen Elias.”
5Jet nonta marama pay laeng ja eman‐a‐sel si Pedro, ebiglen ẃaray kolpot ta emenenili ja dimespag ali son si‐kara ja dinikopan to ira. Jet ẃaray esel ja edapo nodtan ja intenengan sha ja kowan to ey, “Sajay i Anak ko jet ensemek ko. Si‐katoy naka kosto‐i, isonga patiyon emin i ikowan to.” Kowan nonta esel alid kolpot. 6Jet idi intenengan ira nonta too nen Jesus iyay, nanshomog ira ja epaladoy takot sha. 7Nem si Jesus, dimaw ali son si‐kara jet to ira pinishat ja kowan to ey, “Ekẃas kayo, karekayo ontakot.” 8Jet idi onshemang ma ira, enshi met i eshom ma ẃara nodtan, no diket si Jesus bengat.
9Jet idi ireka manshedong ja edapo nodta shontog, si Jesus binidin to ira sotan na too to ey eg sha ikokowan so ni eshom, ja angken sipa, sota inon‐an sha nonta ẃara ired ma shontog. Jet inkowan to ey asan shaka ikowan iyay nem man‐ongal ma ali sota kowan sha ey Anak ni Too.
10Jet sota ira too to, inbag‐an sha si Jesus ja kowan sha ey, “Jet ngantoy kabol la kaikowani so ni mamaistoro ni dinteg ey mesepol la mepangdo alis Elias asan sota naypadto nonta bayag da ey ibetkag ali nen Apo Shiyos ja mengisedakan?”
11Simongbat si Jesus ja kowan to ey, “Owen, agpayso ja si Elias nin aliy mepangdo jet si‐katoy mengi‐odi nonta kimapoy ya pamati ni totoo say onkedsang ma. 12Nem iyay i kowan ko son si‐kayo. Si Elias, naksheng alin dimaw, nem eg indasin ni too ey si‐kato. Jet dingkara son si‐kato i kompormin kedsel la ninemnem sha. Jet iso met laeng nga sotan i dag‐en sha so nonta kowan ni para padto ey Anak ni Too.” Kowan nen Jesus.
13Jet sota ira too to, ineẃatan sha ey say toka pan‐i‐arig ja kowan to ey si Elias, si‐kato sota si Juan ja para bonjag.
Inpamapteng nen Jesus sota nga‐ngen mankelshas ja ẃaray dimonyon pimeket son si‐kato
14Idi simabi ira nodta kad‐an ni eshakel la totoo, ẃaray toon en nantalimokod shi sango‐an nen Jesus ja kowan to ey, 15“Apo, kaasi‐im sota anak ko, ta say sakit to, emankelshas. Kakaasin pasiya, ta kanayon na kaonkaro, nakol ni emetowang ni olay shi apoy, tan kanayon na emay‐a‐neng shi shanom. 16Indaw ko so nonta ira toom nem eg sha met kabaalan.”
17Jet si Jesus, kowan to ey, “Enshiy pamatiyo eshan, ap‐apil kayon too! Ebayagak met shiyay ja eman‐enos son si‐kayo, nem eg jo pay laeng pati‐en i panakabalin nen Apo Shiyos! Ilaw mo did jay son si‐kak sota nga‐nga.”
18Indaw sha ali nontan met laeng jet si Jesus, inkowan to so nonta dimonyon pimeket so nonta nga‐nga ey, “Betik ked ta nga‐nga!” Jet bimetik nga agpayso sota dimonyo. Jet mimapteng nontan met laeng nga shagos sota nga‐nga.
19Idi abos sha, sota ira too nen Jesus, kowan sha ey, “Apay nga eg mi binaalan na inpabtik nontan sota dimonyo so nontan na nga‐nga?”
20Simongbat si Jesus ja kowan to son si‐kara ey, “Ekolang eshan i pamatiyo. Agpayso iya ikowan ko son si‐kayo. No ẃara koma i pamatiyo ja angken ootilik, ja inges toy kaba‐deg nonta botil nonta mola ja kowan sha ey mostasa, mebedin na ikowan jo so nima shontog ey on‐etan shi apil la dogad jet ma‐tan nga agpayso. Jet no inges nontan i pamatiyo, enshiy jo ikowan ey edigat son si‐kayo. 21Nem sajay ya kalasin dimonyo, eg mebedin na pebtik bengat nem eg kita nin mengshaw ni tolong son Apo Shiyos tan mengibiyang ni pangan tayo.”
Inpa‐amta to mowan sota ketey to di
22Idi sakey ya akew, nan‐o‐odop ira shi Galilia, jet si Jesus kowan to so nonta ira too to ey, “Si‐kak sota kowan ni para padto nonta bayag da ey Anak ni Too, nem may‐eẃatak so nonta ira toon makakontra son si‐kak, 23jet si‐karay memono son si‐kak. Nem no maykatdon akew, manbiyagak met laeng.”
Sajay ya inkowan nen Jesus son si‐kara, ireka mandeshingit ta pasiya.
Nanbayad met laeng si Jesus ni alos ni Timplo
24Idi dimaw ired Kapirnaom, sota para singil ni alos ni Timplo shi Jerusalem, dimaw ira so nen Pedro jet kowan sha ey, “Sigosho sota apom, eg man‐edos emo ni para so nonta Timplo shi Jerusalem?”
25Simongbat si Pedro ja kowan to ey, “Emengi‐kan ngo ni alos to.”
Jet idi mimotok si Pedro nodta baley, si Jesus i epangdon imesel ja kowan to ey, “Simon, piyan kon amta‐an i moka pannemnem niya ikowan ko son si‐kam. Sipa iray kepansingili ira nonta a‐ashi? Sota ira annak sha, ono sota ira eshom ma totoo?”
26Simongbat si Pedro ja kowan to ey, “Sota ira eshom.”
Jet si Jesus, kowan to ey, “No kasta, sota ira annak ni ari, dibshi mango ira. 27Isonga si‐kak, mebedin na dibshi‐ak ni alos ni Timplo nen Apo Shiyos ja Amak. Nem say kowan ko, say eg mesekitan i nemnem ira nonta totoo, daw ka shima baybay et mo ipekat sota bengẃit mo. Jet sota pilmiron nigay ya mekna, si‐katoy al‐en mo. Panga‐ẃab mo et ẃaray on‐an mon pilak nodta bongot to. Si‐katoy al‐en mo ja mo i‐akan ja alos ten showa.”
Currently Selected:
San Mateo 17: DMP
Highlight
Share
Copy
Want to have your highlights saved across all your devices? Sign up or sign in
© 1978, Wycliffe Bible Translators, Inc. All rights reserved.
