Chɔɔn 4

Jusu wlu dě Sɛmewlea nynɔ̌ we̍

1Ka Jusu-a chlì-a la̍ nyɔ̍ iě ɔ̍ po̍-a kòà dɔu nǐ dlǔ ɛ̍ sìì-a Chɔɔn-ɛ, ɛ̍ kɔn pɔ̀n bo Fɛlesii nyɔ̍ wɔ̌n. ( 2Kǎ ɛ̍ nɛ, jɛ Jusu-a chɛ̀ se̍ nyɔ̍ nǐ dlǔ po̍, ɔ̍ kòà bo.) 3Ɔ̍ wɔ̌n-a ìh la-ɛ, iě ɔ̍ sɔ dě Judia fɔɔ, wɛ̀ ɔ̍ mu̍ de̍ Kaladii fɔɔ. 4Nɛ̀ Sɛmewlea fɔɔ bo ɔ̍ kɔn ɔ̍ iě jii.

5Ɔ̍ mu̍-a la̍-ɛ, wɛ̀ ɔ̍ sǐ dǒ Sɛmewlea nyɔ̍-a wlɔ̀ due di̍i̍ i̍, ɛ̍ nynɛ̌ bo Sika. Ɛ̍ se̍ klè ɛ̀ Jekɔ nyǐ-a ɔ̍ jǔ Josɛ tɛin-ɛ we̍ i̍ ti̍ɛ̍ɛn. 6Dǒ Jekɔ-a nǐ biě nɛ. Sɔ dɛ̍ u̍h na-aɛ, nɛ̀ Jusu se̍a̍ wɛ̀. Iě ɔ̍ tè i̍ dǒ nǐ biě laa̍ pùn, nɛ̀ ɛ̍ ji̍ la̍ jlǔhgbàɔ̀ nu̍ la̍.

7Wɛ̀ Sɛmewlea nynɔ̌ due ji̍ niɔ̍. Iě Jusu la̍a̍ dě ɔ̍ we̍, “Nyǐ ǐn nǐ iě nǎ o.” ( 8Nɛ̀ ɔ̍ kòà mu̍ di̍-dɛ̍ᵻ tɛ̀n la̍ dě wlɔ̀.)

9Wɛ̀ nynɔ̌ la̍a̍ dě ɔ̍ we̍, “Mɔ̀ Juu jǔ, iě ǐn nu̍ Sɛmewlea nynɔ̌. Dɛ̍nu̍ àn jbǎ-ɛ ǐn nǎ-nǐ ɛ?” (Dɛ̍nu̍ɛ, Juu nyɔ̍ ke Sɛmewlea nyɔ̍-ɔ pu̍e̍e dɛ̍ᵻ kwa̍a̍ i̍.)

10Wɛ̀ Jusu la̍a̍, “Pò ìn juo Nyɔsoa-a nyǐ-dɛ̍ de wɛ̀ ìè nyɔ̍ ɔ̀ jbǎ-ɛa ìn nǐ-ɛ juo ke de-ɛ, nɛ̀ àn mu̍ ɔ̍ i̍ tèle wɛ̀ ɔ̍ iě ìn nǐ ɛ̀ nyǐ-a nyɔ̍ feɛ-ɛ nyǐ de.”

11Iě nynɔ̌ la̍a̍, “Nyɔ̍ klaa, nǐ biě la ɛ̍ tɛn di̍i̍, iě ìn se̍ nǐ plǐn dɛ̍ blě, nɛ̀ tàwe̍ àn mu̍ nǐ ɛ̀ nyǐ-a nyɔ̍ feɛ-ɛ sà ɛ? 12À baa Jekɔ bo ɔ̀ nyǐ à nǐ biě la. Ɔ̍ chɛ̀ ke, ɔ̍ jɔ̍gbauᵻ nynuu̍ ke, ɔ̍ nɛadɛᵻ bo ùh-a nǎ nǐ la. Nɛ̀ àn pɔ̀n ìè wɔ̍n ku̍ ìè ɔ̍ sìì ae?”

13Jusu la̍a̍, “Nyɔ̍ kli̍hgbɛ̍ ùh-a mu̍-a nǐ la nǎ-ɛ, dǒ u̍h wlì-a mu̍ bǔ dode̍. 14Jɛ nyɔ̍-o-nyɔ̍ ǎn mu̍-a nǐ nyǐ wɛ̀ ɔ̍ iě ɛ̍ nǎ-ɛ, nɛ̀ dǒ ɔ̍ wlì se̍ gba̍ bǔ dɛ. Nǐ ǎn mu̍-a ɔ̍ nyǐ-ɛ, ɛ̍ mu̍ kao̍dlu nu̍ dě ɔ̍ ja̍a̍, wɛ̀ ɛ̍ klɛ̀nklɛ̀n iě ɔ̍ kmɔ̌ sie feɛ nyǐ.”

15Wɛ̀ nynɔ̌ la̍a̍ dě ɔ̍ we̍, “Nyɔ̍ klaa, nyǐ ǐn nǐ la iě nǎ, wɛ̀ dǒ ǐn wlì-i je̍e bǔ dɛ. Nɛ̀ ǐn se̍ nɔ̌ niɔ̍ la wìè-i po̍ mu̍.”

16Wɛ̀ Jusu la̍a̍ dě ɔ̍ we̍, “Mu̍ àn kɔan dǎ mɔ̀ iě ji̍.”

17Iě nynɔ̌ la̍a̍, “Ǐn se̍ kɔan kɔn.”

Jusu la̍a̍, “Ka nàa̍ ìn se̍-a kɔan kɔn-ɛ, nɛ̀ tìh-a taǐn bo àn sà-a. 18Dɛ̍nu̍ɛ, kɔanᵻ m̀m̌ bo ìn jii kwa̍a̍ i̍ wɛ̀, iě jɔ ìn nɛ-a ka kwa̍a̍-ɛ, ɔ̍ se̍ àn kɔan gbe̍i̍n. Sɔ nɛ̀ àn wlu̍ se̍ si̍h i̍ nɛ.”

19Nynɔ̌ la̍a̍, “Nyɔ̍ klaa, ǐn ja ɛ̍ jě-ɛ nɛ̀ na̍ mɔ̀ Nyɔsoa-a tu̍owli po̍ nyɔ̍. 20Da̍a tlu̍h la kɛ̍n bo à baaᵻ sà-ɛ Nyɔsoa wɛɛ, jɛ mɔ̀ɔ̍ Juu nyɔ̍ mɔ̀ la̍ Juluslɛn bo ɛ̀ nu̍ tà nyɔ̍ iě wɛɛ sà-ɛ.”

21Wɛ̀ Jusu la̍a̍ dě ɔ̍ we̍, “Nynɔ̌ chɛ̀, mɛ̍ ǎn wlu̍ la jlǐhɛ̍ kɛ̍ɛ̍n, ɛ̍ mu̍ ti̍ kɔn nɛ̀ mɔ̀ se̍ Baa wɛɛ sà mu̍ da̍a tlu̍h la kɛ̍n ke dě Juluslɛn. 22Mɔ̀ɔ̍ Sɛmewlea nyɔ̍, nyɔ̍ mɔ̀-a sà-a wɛɛ-ɛ, mɔ̀ se̍ ɔ̍ juo. Jɛ àɔ̀ Juu nyɔ̍ nɔ̀ɔ̍, à juo nyɔ̍ à sà-a wɛɛ-ɛ, dɛ̍nu̍ɛ, Nyɔsoa-a nyɔ̍ sèìe-ɛ sɔ-ɛ dě Juu nyɔ̍ we̍. 23Ti̍ wɛɛ sà nyɔ̍ chɛ̀-a mu̍-a Baa wɛɛ sà dě Nyɔsoa-a Sùù ke tìh-a taǐn di̍i̍-ɛ, ɛ̍ ji̍ la̍-ɛ. Wɛ̀ ɛ̍ chɛ̀ nɛ da̍a wɛ̀ se̍e̍. Wɛɛ sà nyɔ̍ kaɛn laa̍ bo Baa-a pɔ̀n i̍ u̍h iě ɔ̍ wɛɛ sà. 24Nyɔsoa bo ɔ̀ nu̍ Sùù, nɛ̀ ɔ̍ wɛɛ sà nyɔ̍ kɔn u̍h iě ɔ̍ wɛɛ sà dě ɔ̍ Sùù ke tìh-a taǐn di̍i̍.”

25Iě nynɔ̌ la̍a̍ dě ɔ̍ we̍, “Ǐn juo i̍h Nyɔsoa-a Chèɛ̀ Tba̍ju u̍h-a dǎɛ-a Klai-ɛ, ɔ̍ mu̍ ji̍. Ti̍ ɔ̍ mu̍-a ji̍-ɛ, ɔ̍ mu̍ à dɛ̍ᵻ kli̍hgbɛ̍ wlùh sèàɛ̍.”

26Jusu la̍a̍, “Mɔ̍ bo ɔ̀ wlu-a dě ìn we̍.”

27Dǒ u̍h sǐi wɛ̀ ɔ̍ kòà ji̍ de̍. Sɔ ɛ̍ kèle u̍h i̍ wɛ̀ u̍h iě ɔ̍ nynɔ̌gbaɔ we̍ wlu la̍ jě. Jɛ u̍h-a nyɔ̍ se̍ tìh i̍ tèle, “Nynɔ̌ chɛ̀, dɛ̍ àn pɔ̀n i̍ ɛ?” Àe̍e̍, “Dɛ̍ɛ tìh àn sà-a dě nynɔ̌ la we̍ ɛ?” U̍h-a nyɔ̍ se̍ ɛ̍ nu̍.

28Wɛ̀ nynɔ̌ si̍e̍ ɔ̍ tee̍, iě ɔ̍ mu̍ de̍ wlɔ̀. Wɛ̀ ɔ̍ sèàɛ̍ nyɔ̍ɔ wlùh, ɔ̍ la̍a̍, 29“Mɔ̀ ji̍, jɔ̍gbau ɔ̀ bla̍-a dɛ̍ᵻ kli̍hgbɛ̍ ǐn dǔ-a nu̍-ɛɛ we̍i̍ dě ǐn we̍-ɛ, mɔ̀ iě ɔ̍ jě. Ɔ̀ la, ɔ̍ nɛ Chèɛ̀ Tba̍ju nu̍ ka̍ o.” 30Iě u̍h wɛ̀-e wlɔ̀ i̍ u̍h-a mu̍ dě ɔ̍ we̍.

31Nɛ̀ kǎ ɔ̍ kòà-a ba̍le ɔ̍, u̍h la̍a̍, “Dlǔtu, gbɛ̀n-o i̍ ìè dɛ̍ di̍ ke̍.”

32Wɛ̀ ɔ̍ la̍a̍ dě u̍h we̍, “Ǐn blě di̍-dɛ̍ iě di̍, jɛ mɔ̀ se̍ ɛ̍ dɛ̍ i̍ juo.”

33Sɔ ɔ̍ kòà-a sǔh-a pu̍e̍e la̍ ɛ̍ wɔ̍ɔ̍n i̍ sǔh. U̍h la̍a̍, “Nɛ̀ nyɔ̍ ja ɔ̍ di̍-dɛ̍ ae?”

34Wɛ̀ Jusu la̍a̍, “Nyɔ̍ ɔ̀ dbo̍-a m-ɛ, ɔ̍ wlùh nu̍-ɛ ke ɔ̍ dbo̍ i̍ wɔ̀-ɛ bo ɛ̀ nu̍ ǎn di̍-dɛ̍. 35Mɔ̀ blě wlu̍, mɔ̀ la̍a̍, ‘Chǔhᵻ nyìɛ̍ sie-o nɛ̀ ɛ̍ nu̍ klèᵻ chɛ̍n ti̍.’ Ǎn sèàɛ̍ mɔ̀ wlùh, mɔ̀ dǔ dlǔ ja̍i̍ mɔ̀ iě nyɔ̍ la ùh wɔ̀-a klèᵻ ìh sàni-a iě ìh nɛ-a dǒ chɛ̍n la̍-ɛ ja̍ gbɛ̀n. 36Nyɔ̍ ɔ̀ chɛ̍n-a klè-ɛ, ɔ̍ jě pɛ̌ɛ la. Iě ɔ̍ gbòe i̍h-a jɔ̌ i̍ i̍h iě kmɔ̌ sie feɛ jě. Wɛ̀ nyɔ̍ ɔ̀ tù-a dɛ̍ dě klè-ɛ ke, jɔ chɛ̍n-a klè-ɛ, u̍h iě mɔna̍ tàdùè nui. 37Wlu̍ la tìh-a taǐn bo, ɛ̍ la̍a̍, ‘Nyɔ̍ due nu̍ dɛ̍ tù nyɔ̍, iě dɔɔ nu̍ ɛ̍ chɛ̍n-nyɔ̍.’ 38Klè kɔn dbo̍ mɔ̀ se̍-a nu̍-ɛ, ɛ̍ bo ǐn dbo̍ mɔ̀ mɔ̀ iě chɛ̍n. Nyɔ̍ duuh bo ùh nu̍ dbo̍ la, iě mɔ̀-a jě ɛ̍ dɛ̍ we̍.”

39Sɛmewlea nyɔ̍ dɔu sɔ-a dǒ wlɔ̀ laa̍ di̍i̍-ɛ, u̍h gbaɛ Jusu wlùh dǒ nynɔ̌ laa̍ ɔ̍ kunǎ po̍ wlu̍ kɛ̍n. Ɔ̍ la̍a̍, “Ɔ̍ bla̍ dɛ̍ᵻ kli̍hgbɛ̍ ǐn dǔ-a nu̍-ɛɛ we̍i̍ dě ǐn we̍.” 40Ɛ̍ kɔn u̍h ji̍-aɛ, wɛ̀ u̍h sà ɔ̍ wìè-i. Iě ɔ̍ sì wǐh sɔɔ̌n dǒ u̍h we̍.

41Dǒ ɔ̍ chɛ̀-a wlu̍ kɛ̍n bo nyɔ̍ dɔu duuh sɔ wɛ̀ u̍h gbaɛ ɔ̍ wlùh. 42Iě u̍h la̍a̍ dě nynɔ̌ laa̍ we̍, “Ɛ̍ se̍ àn wlu̍-a tìh à se̍ wlùh gbaɛ-ɛ blě dɛ o, jɛ à chɛ̀ wɔ̌n ɔ̍ wlu̍ wɛ̀, iě à juo dɛ̍ i̍ ka ɔ̍ nu̍-a kmɔ̌ la ɛ̍ Sèìe Nyɔ̍ chɛ̀ɛ̌chɛ̀-ɛ.”

Jusu pǔh-i kwǐ nyɔ̍-a jɔ̍gbau jǔ

43Jusu wɔ̀-a wǐh sɔɔ̌n dǒ u̍h we̍ sì-ɛɛ, iě ɔ̍ mu̍ Kaladii fɔɔ. 44Jɛ ɔ̍ chɛ̀ bo ɔ̀ sà ɛ̍-ɛ, ɔ̍ la̍ u̍h-u tè Nyɔsoa-a tu̍owli po̍ nyɔ̍ ja̍ dǒ ɔ̍ chɛ̀ blǐ blǔh kɛ̍n. 45Ti̍ ɔ̍ sǐ-a Kaladii-ɛ, nyɔ̍ nɛ-a deě-ɛ, sɔ u̍h gbɛ̍n ɔ̍ tìh i̍. U̍h gbɛ̍n ɔ̍ tìh i̍ dɛ̍nu̍ɛ, ti̍ u̍h mu̍-a Sììkɛ̍n Weɛ̍-a Peě kɛ̍n dǒ Juluslɛn wlɔ̀ di̍i̍-ɛ, u̍h jě ɔ̍ nu̍-dɛ̍ᵻ kli̍hgbɛ̍ deě.

46Wɛ̀ Jusu mu̍ dǒ de̍ Keina wlɔ̀ di̍i̍ i̍ nala dě Kaladii, tà ɔ̍ nui-a nǐ nmɔ̍ we̍i̍-ɛ. Nɛ̀ kwǐ nyɔ̍ due-a jǔ jɔ̍gbau-a poa-ɛ dǒ Kepanium wlɔ̀ di̍i̍. 47Ti̍ ɔ̍ wɔ̌n-a pɔ̀n ka Jusu sɔ-a Judia iě ɔ̍ ji̍-a Kaladii fɔɔ-ɛ, wɛ̀ ɔ̍ mu̍ dě ɔ̍ we̍. Iě ɔ̍ ba̍le ɔ̍, ɔ̍ iě ɔ̍ jǔ jɔ̍gbau u̍h-a gbɛ̀n-a dǒ wlì-ɛ pǔh-i la̍ mu̍. 48Iě Jusu la̍a̍ dě ɔ̍ we̍, “Bɔ̌ ke̍, pò mɔ̀ se̍ nyɔ̍ wɔ̍n flɔn-ɛ jbaɛdih la jě de-ɛ, nɛ̀ mɔ̀ se̍ wlùh gbaɛ-ɛ blě mu̍ ae?”

49Wɛ̀ ɔ̍ la̍a̍, “Nyɔ̍ klaa, dbǎkà, ji̍ à iě mu̍ wɛ̀ ǎn jǔ-u je̍e mɛ̌.”

50Jusu la̍a̍ dě ɔ̍ we̍, “Mu̍, àn jǔ-a mu̍ kmɔ̌ nɛ.”

Jɔ̍gbau gbaɛ Jusu-a wlu̍ wlùh iě ɔ̍ mu̍. 51Ɔ̍ nɛ dǒ mu̍ la̍ wɛ̀ ɔ̍ ke ɔ̍ pòi̍nynuu̍ gbèɛ̀ɛn dǒ wìè-i, nɛ̀ u̍h ja pɔ̀n. U̍h la̍a̍, “Àn jǔ pǔh wɛ̀.”

52Wɛ̀ ɔ̍ tèle u̍h i̍, ɔ̍ la̍a̍, “Ti̍we̍ ɔ̍ pǔh ɛ?” U̍h la̍a̍, “Jlǔh chɛ̍n wìè kɛ̍n sɔ̀nwa̍n sǔh iě ɔ̍ gbèwè bɔ̌.” 53Sɔ jǔ baa laa̍ ɔ̍ juo-o dɛ̍ i̍, dɛ̍nu̍ɛ, ti̍-a taǐn laa̍ bo Jusu la̍ ɔ̍ jǔ-a mu̍ kmɔ̌ nɛ-ɛ. Ɛ̍ nu̍ ɛ̍ ɔ̍ ke ɔ̍ chɛ̌ kli̍hgbɛ̍ blě wlùh gbaɛ.

54Jusu-a sɔ Judia mu̍ dě Kaladii fɔɔ ìè jbaɛdih po̍-a gbɔ̍ᵻ sɔɔ̌n naɛ la.

Currently Selected:

Chɔɔn 4: KDNT

Highlight

Copy