Luu 23

Jusu nɛ dǒ Pale jǔ

(Matio 27.1-2, 11-14; Maɛ 15.1-5; Chɔɔn 18.28-38)

1Wɛ̀ u̍h kli̍hgbɛ̍ sɔ bloɔ̍, iě u̍h gba̍ Jusu dě kɔ̀mla̍ Pale jǔ. 2Iě u̍h tè ɔ̍ tìh i̍ blaɛ gbɔ̀. U̍h la̍a̍, “Jɔ̍gbau la ɔ̍ pa̍ à bloa̍ nyɔ̍ sɔ̀n i̍. Ɔ̍ la̍ à bɔ̌ taa̍sìh sà-a dě Bloa̍ Joi we̍. Iě ɔ̍ la̍ ɔ̍ chɛ̀ bo ɔ̀ nu̍ Nyɔsoa-a Chèɛ̀ Tba̍ju ɔ̀ nu̍-a blǔh baa-ɛ.”

3Wɛ̀ Pale tèle ɔ̍ i̍, ɔ̍ la̍a̍, “Mɔ̀ bo ɔ̀ nu̍ Juu nyɔ̍-a blǔh baa ae?”

Iě Jusu sà ɔ̍ wlu̍ pɔ̀n we̍, ɔ̍ la̍a̍, “Mɔ̀ bo ɔ̀ dǎ laǎn.”

4Wɛ̀ Pale la̍a̍ dě slaǎ sà nyɔ̍ klaaᵻ ke nyɔ̍ tlùgbei̍ laa̍ we̍, “Ǐn se̍ jɔ̍gbau la dɛ̍ sɔ̀n pùn jě.”

5Jɛ u̍h bla̍ dlǔ i̍, u̍h la̍a̍, “Ɔ̍ po̍ nyɔ̍ nǎ dě Judia bloa̍ kli̍hgbɛ̍ kɛ̍n i̍, iě ɔ̍ pa̍ nyɔ̍ɔ sɔ̀n i̍. Ɔ̍ tè ɛ̍ gbɔ̀ dě Kaladii fɔɔ, iě ɔ̍ ji̍ ka da̍a.”

Jusu nɛ dǒ Ɛlo jǔ

6Ti̍ Pale wɔ̌n-a wlu̍ la-ɛ, iě ɔ̍ tèle dɛ̍ i̍, ɔ̍ la̍a̍, “Jǔ la Kaladii jǔ bo ae?” 7Ɔ̍ juo-ao dɛ̍ i̍ ka Jusu nɛ-a dǒ kɔ̀mla̍ Ɛlo sɔ̀n-ɛ, iě ɔ̍ dbo̍ ɔ̍ dě Ɛlo we̍. Nɛ̀ Ɛlo-a chɛ̀ nɛ dǒ Juluslɛn wlɔ̀ di̍i̍ dǒ ti̍ laa̍ di̍i̍. 8Ti̍ Ɛlo jě-a Jusu-ɛ, sɔ ɛ̍ tè-e ɔ̍ wlùh i̍. Dɛ̍nu̍ɛ, ɔ̍ wɔ̌n Jusu-a pɔ̀n, iě ɔ̍ wlè ɔ̍ jě-ɛ i̍ pɔ̀n gbai wɛ̀. Ɔ̍ pɔ̀n ɔ̍ iě ɔ̍ jbaɛdih po̍ la̍ jě. 9Ɛ̍ tìh Ɛlo tèle Jusu dɛ̍ᵻ dɔu i̍. Jɛ ɔ̍ se̍ ɔ̍ wlu̍ pɔ̀n we̍ sà. 10Wɛ̀ slaǎ sà nyɔ̍ klaaᵻ ke telě nǎ poe nyɔ̍ blaɛ Jusu tìh i̍ kàka̍. 11Ɛlo ke ɔ̍ fledlǔ po̍ Jusu ja̍a̍i̍, iě u̍h nui ɔ̍ jlii̍h kɛ̍n i̍. Wɛ̀ u̍h pa̍-ɛ ɔ̍ dɛ̍wlo̍o̍ chɛ̀wɛ-ɛ. Iě Ɛlo dbo̍ ɔ̍ dě de̍ Pale we̍. 12Dǒ weɛ̍ laa̍ di̍i̍ bo Ɛlo ke Pale sà jbɛɛ, jɛ u̍h nyeɛ̍ɛn de.

Pale sà Jusu-a mɛ̌ɛ wlu̍ kɛ̍n

(Matio 27.15-26; Maɛ 15.6-15; Chɔɔn 18.39–19.16)

13Wɛ̀ Pale gbòe slaǎ sà nyɔ̍ klaaᵻ ke, nyɔ̍-a wlu̍ kwa̍ blě nyɔ̍ ke nyɔ̍gbei i̍. 14Iě ɔ̍ la̍a̍ dě u̍h we̍, “Mɔ̀ ja jɔ̍gbau la nɔ̌ ǐn we̍ iě mɔ̀ la̍ ɔ̍ pa̍ mɔ̀-a bloa̍-a nyɔ̍ sɔ̀n i̍. Ǐn tèle ɔ̍ i̍ da̍a mɔ̀ jlǐhwai, jɛ dɛ̍ᵻ mɔ̀ po̍-a dǒ ɔ̍ dlǔ-ɛ, ǐn se̍ i̍h-a dɛ̍-o-dɛ̍ jě dǒ ɔ̍ pùn. 15Ɛlo se̍ ɔ̍ dɛ̍ pùn jě ke. Ɛ̍ kɔn ɔ̍ dbo̍ ɔ̍ de̍ nɔ̌ àɔ̀ we̍. Jɔ̍gbau la dɛ̍ nyɔ̍ iě-a ɔ̍ kɛ̍n i̍ dbǎ-ɛɛ, ɛ̍ se̍ nɛ. 16Ɛ̍ tìh-ɛ, ǎn mu̍ ɔ̍ bla̍ sǔh wɛ̀ iě ɔ̍ i̍ tǎli.”

[ 17Pò ɛ̍ nu̍ Sììkɛ̍n Weɛ̍-a Peě-ɛ, nɛ̀ Pale kɔn ɔ̍ iě gbɛ̍n-nyɔ̍ due sèìe gbɔ̀gbɔ̀ dǒ Juluslɛn nyɔ̍ we̍.] 18Jɛ u̍h kli̍hgbɛ̍ sà slɛ̀ wɔ̍n, iě u̍h po̍ wlu̍ due, u̍h la̍a̍, “Dbǎ ɔ̍, nɛ̀ ìn sèìe Bawlaba dǒ àɔ̀ we̍.” ( 19Bawlaba ɔ̀ poe-a kasoo dǒ nyɔ̍ gbe̍ja̍a̍ po̍ tìh ke slɛ̀ ja̍ sà tìh we̍ dǒ Juluslɛn-ɛ bo.)

20Wɛ̀ Pale wlu-i dě u̍h we̍ dɛ. Dɛ̍nu̍ɛ, ɔ̍ pɔ̀n Jusu sèìe-ɛ i̍. 21Jɛ u̍h sà slɛ̀ wɔ̍n dɛ, u̍h la̍a̍, “Kɔ̍ ɔ̍, kɔ̍ ɔ̍ dǒ gbàɛ̍ kɛ̍n i̍ tu̍ wlì.”

22Wɛ̀ Pale wlu dě u̍h we̍ gbɔ̍ᵻ ta̍a̍n naɛ, ɔ̍ la̍a̍, “Dɛ̍ ɛ? Dɛ̍ sɔ̀n we̍ ɔ̍ nu̍ ɛ? Ǐn se̍ dɛ̍ sɔ̀n ɛ̀ iě-a ɔ̍ dbǎ-ɛ jě. Ɛ̍ tìh-ɛ, ǎn mu̍ ɔ̍ bla̍ sǔh, wɛ̀ iě ɔ̍ i̍ tǎli.”

23Jɛ u̍h bla̍ dlǔ i̍ kleǐn u̍h-a plǎn-ɛ i̍. U̍h-a pɔ̀n Jusu iě kɔ̍-ɛ dǒ gbàɛ̍ kɛ̍n i̍ tu̍ wlì. Wɛ̀ u̍h-a i̍ wǐi-ɛ sà Pale klà. 24Iě ɔ̍ sà Jusu wlu̍ kɛ̍n, dɛ̍ u̍h-a pɔ̀n-a i̍-ɛ, ɛ̍ iě nɛ. 25Wɛ̀ ɔ̍ sèìe jɔ̍gbau u̍h-a pɔ̀n-a i̍-ɛ, ɔ̀ poe-a kasoo slɛ̀ ja̍ sà tìh ke nyɔ̍ gbe̍ja̍a̍ po̍ tìh-ɛ. Wɛ̀ ɔ̍ sà Jusu kwlǎ dě u̍h we̍ u̍h iě dɛ̍ u̍h-a pɔ̀n-a ɔ̍ nui-ɛ i̍-ɛ nui.

Jusu kɔ̍-ɛ dǒ gbàɛ̍ kɛ̍n i̍ tu̍ wlì

(Matio 27.32-44; Maɛ 15.21-32; Chɔɔn 19.17-27)

26Fledlǔ-a gba̍-a la̍ Jusu-ɛ, dǒ u̍h gbɛ̍n-ɛ Samo, ɔ̀ sɔ-a dǒ Saiwlein wlɔ̀ di̍i̍-ɛ, nɛ̀ ɔ̍ ji̍ dǒ Juluslɛn. Iě u̍h nu̍ ɔ̍ kloǒ wɛ̀ u̍h po̍ ɔ̍ Jusu-a gbàɛ̍ kɛ̍n i̍ tu̍ wlè i̍. Wɛ̀ ɔ̍ wɔ̀ dǒ Jusu de̍e̍.

27Nyɔ̍ tlùgbei̍ wɔ̀ dǒ ɔ̍ de̍e̍. Nɛ̀ nynɔ̌gbaɔᵻ duuh nɛ-a dě u̍h nynɛ̌-ɛ, u̍h-a fìn-i Jusu-a tìh. 28Wɛ̀ Jusu fèàɛ̀ dě u̍h we̍, iě ɔ̍ la̍a̍, “Juluslɛn nynɔ̌gbaɔᵻ, mɔ̀ bɔ̌ ǎn tìh i̍ fìn-ɛ. Jɛ mɔ̀ fìn mɔ̀-a chɛ̀-a tìh, ɛ̍ ke mɔ̀-a nynuu̍ ke. 29Dɛ̍nu̍ɛ, ti̍-a mu̍ ji̍ wɛ̀ nyɔ̍ɔ iě ka dǎ, ‘Nynɔ̌gbaɔᵻ ùh sie-a slàmàɛ̀-ɛ ke, ùh-u se̍-a kwlǐ nɛ wɛ̀ ùh iě-a nynuu̍ nyǎ-ɛɛ, u̍h nmɔ i̍.’ 30Nɛ̀ nyɔ̍gbei-a mu̍ ka dǎ dě tlu̍hᵻ klaaᵻ we̍, ‘Mɔ̀ gbǎ àɔ̀ kɛ̍n, nɛ̀ tlu̍hᵻ plìh sìle àɔ̀.’ 31Nɛ̀ tàjɛ̀ tu̍ᵻ nui-a delee-ɛ, dǒ nyɔ̍gbei-a nui ìh kaɛn la, jɛ nɛ̀ à ji̍ i̍h-a kau gbǎ naɛ jě.”

32Wɛ̀ fledlǔ sà jɔ̍gbauᵻ sɔɔ̌n ùh nu̍-a dɛ̍ᵻ sɔ̀nᵻ nu̍ nyɔ̍-ɛ dǒ wlɔ̀, u̍h ke Jusu iě tàdùè dbǎ-ɛ. 33U̍h nyni̍-a tà u̍h-a dǎɛ-a Dlǔgba Tlu̍h-ɛ, dǒ u̍h kɔ̍-ɛ Jusu ke dɛ̍ᵻ sɔ̀nᵻ nu̍ nyɔ̍ sɔɔ̌n laa̍ dǒ gbàɛ̍ kɛ̍n i̍ tu̍ᵻ wlì. Due nɛ dǒ ɔ̍ di̍na̍ we̍, iě dɔɔ nɛ dǒ ɔ̍ kwe̍na̍ we̍. 34Wɛ̀ Jusu la̍a̍, “Baa, tǎli u̍h-a gblɛ̍n sɔ̀ɛ̀n-a tìh i̍. Dɛ̍nu̍ɛ, u̍h se̍ dɛ̍ u̍h-a nu̍-a juo.”

Wɛ̀ fledlǔ gblè Jusu-a jlii̍ dǒ nibo fɔ̀n-ɛ we̍. 35Nɛ̀ nyɔ̍gbei nyna doǒ i̍ u̍h-a gbɛ̀n ɔ̍ ja̍. Jɛ nɛ̀ Juu nyɔ̍-a nyɔ̍ klaaᵻá nui ɔ̍ jlii̍h kɛ̍n i̍. U̍h la̍a̍, “Ɔ̍ pǔh-i nyɔ̍ duuh, ɔ̍ pǔh-i ɔ̍ chɛ̀ la̍ pò ɔ̍ tù Nyɔsoa-a Chèɛ̀ Tba̍ju-ɛ.”

36Fledlǔ-a nui ɔ̍ jlii̍h kɛ̍n i̍ ke. U̍h ji̍ dǒ ɔ̍ we̍ iě u̍h dǎ ɔ̍, ɔ̍ iě u̍h-a gba̍n nmɔ̍ nǎ. 37Iě u̍h la̍a̍, “Pò ìn tù Juu nyɔ̍-a blǔh baa chɛ̀-ɛ, nɛ̀ ìn pǔh-i àn chɛ̀ la̍.”

38Wlu̍ la bo u̍h chlǐh dǒ ɔ̍ dlǔwèàì, ɛ̍ la̍a̍, “Ɔ̀ la Juu nyɔ̍-a Blǔh Baa bo.”

39Dɛ̍ᵻ sɔ̀nᵻ nu̍ nyɔ̍ u̍h pèle-a dǒ gbàɛ̍ kɛ̍n i̍ tu̍ wlì-ɛ, u̍h-a due chɛ̀ Jusu we̍. Ɔ̍ la̍a̍, “Ìn se̍ la̍ mɔ̀ Chèɛ̀ Tba̍ju ae? Pǔh-i àn chɛ̀, ɛ̍ ke àɔ̀ ke.”

40Jɛ ɔ̍ ba̍ po̍ ɔ̍ bɔ̌ i̍. Ɔ̍ la̍a̍, “Bɔ̌ à wɔ̌n i̍. Nɛ̀ ple̍ Nyɔsoa jǔ ae? Kàn kɔn ba̍ u̍h gbɛ̍n-a m̀-ɛ, ɛ̍ kɔn ba̍ bo u̍h gbɛ̍n ɔ̍ ke. 41Jɛ àɔ̀ nɔ̀ɔ̍, nɛ̀ à nɛ ɛ̍ ka̍. Dɛ̍nu̍ɛ, dɛ̍ᵻ à nu̍-a i̍-ɛ, i̍h kɔn pɛ̌ɛ la bo à jě la̍. Jɛ jɔ̍gbau la nɔ̀ɔ̍, ɔ̍ se̍ dɛ̍ sɔ̀n nu̍.” 42Wɛ̀ ɔ̍ la̍a̍ dě Jusu we̍, “Jusu, ti̍ àn mu̍-a kmɔ̌ wlu̍ i̍ kɔn-ɛ, nɛ̀ ìn nu̍ ǐn wlùh we̍ o.”

43Iě Jusu la̍a̍ dě ɔ̍ we̍, “Tìh-a taǐn ǎn sèàɛ̍ ìn wlùh, sèàn weɛ̍ la, àn mu̍ dě ǐn we̍ Wlɔ̀ Plǔ di̍i̍ nɛ.”

Jusu-a mɛ̌ɛ

(Matio 27.45-56; Maɛ 15.33-41; Chɔɔn 19.28-30)

44Jlǔh blaɛ dǒ wìè dlǔ i̍ sǔh, wɛ̀ kwile gbǎ dǒ blǔh kli̍hgbɛ̍-a chɛ̀ kɛ̍n. Kǎ ɛ̍ nɛ te̍e̍ wɛ̀ jlǔh te̍le i̍. 45Sɔ jlǔh-u fa̍n dɛ. Wɛ̀ jliɛ̍ ɛ̀ pèle-a dě Nyɔsoa-a slaǎ sà gbò-a gblǒ wɔ̍i̍n-ɛ, iě ɛ̍ fǎle ɛ̍ gblè fɔ̌ᵻ sɔɔ̌n. 46Wɛ̀ Jusu wǐ, ɔ̍ la̍a̍, “Baa, dě ìn kwa̍a̍ bo ǐn po̍ ǎn sùù.” Ɔ̍ wɔ̀-a ɛ̀ la bla̍-aɛ, iě ɔ̍ chɛ̍n feɛ.

47Wloma nyɔ̍-a fledlǔ-a chape jě-a dɛ̍ ɛ̀ nɛ-aɛ, iě ɔ̍ po̍ Nyɔsoa tìhwe̍. Ɔ̍ la̍a̍, “Jɔ̍gbau la, i̍-i slɛ̌-nyɔ̍ bo chɛ̀.”

48Nyɔ̍ ùh gbǎ-a tàdùè ùh iě-a tài̍ jě-ɛ, u̍h jě-a dɛ̍ ɛ̀ nɛ-aɛ, iě u̍h blě gbǎᵻ wlì i̍ tbaɛ u̍h-a mu̍ de̍ i̍. 49Nyɔ̍ kli̍hgbɛ̍ ùh ke Jusu ju̍o̍e-a i̍-ɛ ke nynɔ̌gbaɔᵻ ùh gbǎ-a ɔ̍ de̍e̍ ùh ke ɔ̍ sɔ-a dě Kaladii fɔɔ-ɛ, u̍h nyna-ɛ nya̍, iě u̍h-a jě ìh kli̍hgbɛ̍ la i̍h-a nɛ la̍.

Josɛ tè Jusu i̍

(Matio 27.57-61; Maɛ 15.42-47; Chɔɔn 19.38-42)

50Jɔ̍gbau due bo, ɔ̍ nynɛ̌ nu̍ Josɛ. Ɔ̍ sɔ dǒ Juu-a wlɔ̀ kɔn nynɛ̌ nu̍-a Awlematia-ɛ di̍i̍. Ɔ̍ nu̍ Juu nyɔ̍-a taɔ klaaᵻá due, iě ɔ̍ nu̍ nyɔ̍ chɛ̀, ɔ̍ gblɛ̍n slɛ̌ i̍. 51Ɔ̍ se̍ Juu nyɔ̍-a tìh i̍ chɛ̍n-ɛ ke u̍h-a nu̍-dɛ̍ we̍ wɔ̌ɛn. Dɛ̍nu̍ɛ, ɔ̍ gbɛ̀n-e wìè-i ɔ̍ iě Nyɔsoa-a kmɔ̌ wlu̍ i̍ kɔn la̍ jě. 52Ɔ̍-ɔ laa̍ bo ɔ̀ mu̍ dě Pale we̍, iě ɔ̍ jbǎ Jusu-a kǔ. 53Wɛ̀ ɔ̍ sà ɔ̍ dǒ gbàɛ̍ kɛ̍n i̍ tu̍ wlì. Iě ɔ̍ pìàɛ̍n ɔ̍ flɛmɛ̍ dlǔ i̍. Wɛ̀ ɔ̍ tè ɔ̍ i̍ dě gbàlɔ̍ biě ɛ̀ u̍h blǔ-ia dǒ sɔɔ̌ wlì-ɛ di̍i̍, tà u̍h-u se̍a nyɔ̍ i̍ tè sàì-ɛ. 54Nɛ̀ ɛ̍ nu̍ Juu nyɔ̍-a dɛ̍ᵻ gba̍a̍ po̍ weɛ̍, nɛ̀ u̍h-a wlè-weɛ̍-a ji̍ gbɔ̀ tè la̍.

55Wɛ̀ nynɔ̌gbaɔᵻ ùh ke Jusu sɔ-a Kaladii-ɛ wɔ̀ dǒ Josɛ de̍e̍. Iě u̍h jě gbàlɔ̍ biě kɔn di̍i̍ Jusu tè-ea i̍-ɛ, ɛ̍ ke ka ɔ̍ kǔ nu̍-a i̍ pɛ̌n-ɛɛ ke. 56Wɛ̀ u̍h mu̍ de̍ wlɔ̀. Iě u̍h po̍ nɔ̌-dɛ̍ᵻ ke nɔ̌ chlǎn gba̍a̍ dǒ Jusu-a kǔ we̍.

Wɛ̀ u̍h fɔ dǒ wlè-weɛ̍ di̍i̍, ɛ̀ telě la̍ u̍h iě-a nu̍-ɛ.

Currently Selected:

Luu 23: KDNT

Highlight

Copy