ESOTO 13
13
Ko te Fakatapuga o Toekimua Tagata
1Ne faipati mai te Aliki ki a Mose penei, 2#Nume 3.13; Luka 2.23“Tuku katoatoa mai ki a au toekimua tagata katoa, me i toekimua tagata katoa o Isalaelu, pela foki mo uluaki tama tagata a manu e aku.”
Ko te 'Kaiga o Falaoa se Fakafete
3Ne faipati atu a Mose ki tino Isalaelu penei, “Ke masaua ne koutou te aso tenei — te aso tela ne tiakina ei ne koutou Aikupito, te koga tela ne pologa ei koutou. Tenei te aso tela ne fakasao ei koutou ne te Aliki ki tena 'mana malosi. E seai se falaoa faka'fete e 'tau o kai ne koutou. 4Ko tiakina ne koutou Aikupito i te aso tenei o te masina muamua, te masina o Apipa. 5Ne tauto fakamaoni eiloa te Aliki ki otou tupuga ke tuku atu mo koutou a te fenua o tino Kanana, tino Heti, tino Amoli, tino Hivi mo tino Iepuse. Kafai ko ave ne ia koutou ki loto i te fenua maumea kae laukele ola tena, e 'tau mo koutou o fakamanatu te 'kaiga tenei i te masina muamua i tausaga katoa. 6I aso e fitu e 'tau mo koutou o 'kai ki falaoa se faka'fete, ka ko te aso fakaoti tela ko te fitu o aso, e 'tau o fai ne koutou se 'kaiga fakamanatu o fakaaloalo atu ki te Aliki. 7I aso e fitu, e tapu se tino i a koutou e kai ki se falaoa faka'fete. E tapu se mea faka'fete io me se falaoa faka'fete e lavea i luga i te fenua. 8Kafai ko kamata te 'kaiga fakamanatu tena, fakamatala atu ki otou tama tagata me e fai ne koutou te mea tena ona ko galuega a te Aliki ne fai mo koutou i te tiakinaga ne koutou Aikupito. 9Ka fai te mea tenei mo mea fakamanatu, pela me se mea e sai i otou lima io me i otou lae; ka fakamanatua atu ei ki a koutou ke tumau koutou o tauloto kae sukesuke ki Tulafono a te Aliki, me ko te Aliki ne aumai ne ia koutou keatea mai Aikupito i tena 'mana malosi. 10Ke fakamanatu ne koutou te 'kaiga tenei i te taimi tela ne fakasino atu i tausaga katoa.
Ko Toekimua
11“Ka aumai ne te Aliki a koutou ki loto i te fenua o tino Kanana, tela ne tauto fakamaoni atu ei a ia ki a koutou mo otou tupuga. Kafai ko tuku atu ne ia ki a koutou, 12#Eso 34.19,20; Luka 2.23e 'tau mo koutou o ofo atu a toekimua tagata katoa ki te Aliki. A uluaki tama tagata katoa a otou manu e a te Aliki, 13kae e 'tau mo koutou o toe fesuiaki mai ki te Aliki a toekimua tagata o asini ki tamā mamoe, o ofo atu ki te Aliki. Kafai e se manako koe ke fesuiaki te asini ki te tamā mamoe, fati aka la te ua o te asini. E 'tau mo koutou o avatu ki te Aliki se mea mo sui otou toekimua tagata katoa. 14I taimi fakamuli, kafai e fesili atu otou tamaliki me se a te aso fakamanatu tenei, kae ka tali atu koutou penei, ‘Ko te aso ne au mai ei matou ne te Aliki ki tena mana malosi mai Aikupito, te koga tela ne pologa ei matou. 15I taimi kola ne makeke ei te loto o te tupu kae ita ma tuku mai matou ke olo, ne tamate ne te Aliki a toekimua tagata katoa i te fenua o Aikupito, tino ola fakatasi mo manu. Tena te mea e ofo atu ei ne matou a toekimua tagata o manu ki te Aliki kae sui mai ki ei omotou toekimua tagata. 16A te sauniga tenei ka fai pela me se mea fakamanatu, e sai ki lima io me ki lae o tatou; a te mea tena ka fakamasaua mai ki a tatou i a tatou ne aumai ne te Aliki keatea mai Aikupito ki tena ‘mana malosi.’ ”
Ko te Pou Kaumana mo te Pou Afi
17I te taliaga ne te tupu o Aikupito a tino Isalaelu ke olo, ne seki taki latou ne te Atua i te auala toetoe tela e fanake mai i te tafatai o Filisitia. Ne mafaufau aka te Atua penei, “E se manako au ke ma'fuli mafaufauga o tino kae foki ki Aikupito mafai ko iloa ne latou i a latou ka taua mo nisi tino.” 18Tena te mea ne taki ei latou ne te Atua i te auala loa, tela e fano i loto i te koga lavaki ki te Tai Kula.#13.18: Tai Kula: (a tena uiga faka-Epelu “Tai o Mouku Vai” tela e faka uiga (1) ko vaega o vai e uke kola pelapelā i te vasia o te mata o te Maofega o te Suesa mo te tai Metitilani te kogā koga o mea kola ne tupu kae fakamatala i te Esoto 13, kae e masani foki o fakauiga ki te (2) te Maofega o te Suesa, mo te (3) Maofega o Akapa. Kae e ui eiloa i te feitu tena, kae ko tino Isalaelu e toka faeloa mo sose taua.
19 #
Kene 50.25; Epe 11.22 A Mose ne ave ne ia, a ivi o Iosefa, e pela eiloa mo te tautoga a latou ki te pati a Iosefa pela, “Kafai ko fakasao koutou ne te Atua mai te fenua nei, masaua ke ave ne koutou toku foitino ki te fenua tela ka olo koutou ki ei.”
20Ne tiaki ne tino Isalaelu a te fa'kai o Sukota o fakamanava i te kogā laukele o Etama i te gataga o te koga lavaki. 21I te ao katoa, a te Aliki e fano faeloa i olotou mua e foliga ki se pou kaumana o takitaki latou, kae i te po katoa, e takitaki ne ia latou ki te pou afi, ko te mea ke mafai ne latou o ma'laga i te ao mo te po. 22A te pou kaumana e fano faeloa i olotou mua i ao katoa, ka ko te pou afi i po katoa.
Currently Selected:
ESOTO 13: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
