ESOTO 18
18
Ko Asiasi mai a Ietelo ki a Mose
1A Ietelo, te tamana o te avaga a Mose, se faitaulaga o te fenua ko Mitiana, ne logo a ia i mea katoa kola ne fai ne te Atua ki a Mose mo te fanauga a Isalaelu, i te aumaiga a latou ne Mose mai Aikupito. 2#Eso 2.21,22Ne vau a ia ki a Mose, kae ne fakatasi mai foki a Sepola te avaga a Mose tela ne tuku i Mitiana, 3#Galu 7.29fakatasi mo ana tamaliki tagata e tokolua ko Kelesoma mo Eliesa. A Mose, ko oti ne fai ake pela, “A au ne nofo pela me se tino fakaalofa i se fenua fakaatea” tela ne fakaigoa ei ne ia te sua tamaliki tagata ko Kelesoma.#18.3: Kelesoma: Te uiga o te igoa tenei faka-Epelu “se tino o fenua fakaatea.” #18.3: Eliesa: A te uiga o te igoa tenei faka Epelu “Te Atua e fesoasoani mai kae fakasao ne ia a au mai te fakasauaga a te tupu o Aikupito.” 4Ne fai aka foki a ia pela, “Ne fesoasoani mai ki a au a te Atua o toku tamana, kae ne fakaola ne ia a au mai te tupu o Aikupito tela ne fai o tamate ne ia au”; tela ne fakaigoa ei ne ia te sua tamaliki tagata ko Eliesa. 5Ne o'mai fakatasi a Ietelo mo te avaga a Mose mo ana tamaliki tagata e tokolua ki te koga lavaki tela e nofo i ei a Mose i te mauga tapu. 6Ne aumai tena fekau ki a Mose i a latou ko o'mai, 7tela ne fanatu ei a Mose o fakafetaui ki a ia. Ne ifo atu kae sogi atu a Mose ki a ia. Ne fakatau fesilisili foki laua e uiga ki o la olaga, tena, olo atu ei laua ki loto i te faleie o Mose. 8Ne taku atu ne Mose ki a Ietelo a mea katoa ne fai ne te Aliki ki te tupu mo tino Aikupito, ko te mea ke fakasao ei a tino Isalaelu. Ne taku atu foki ne ia a mea faigata ne oko ki tino Isalaelu i te lotou malaga, e pela foki mo te fakasaoga o latou ne te Aliki. 9I te lagonaga ne Ietelo a mea katoa kona, ne fiafia a ia 10kae fai aka penei, “Ke vikia te Aliki, tela ne fakasao ne ia koutou mai te tupu mo tino Aikupito! Ke vikia te Aliki, tela ne fakasao ne ia ona tino mai te nofo pologa! 11Ko iloa nei ne au, i te Aliki e sili atu i atua katoa, me ne fai ne ia te mea tena ki tino Aikupito ka koi fakasaua malosi a latou ki tino Isalaelu.” 12Tela ne aumai ei ne Ietelo te taulaga ke 'sunu katoa mo nisi taulaga ake foki o ofo atu ki te Atua; ka ko Alona mo takitaki katoa o Isalaelu ne olo atu fakatasi mo ia o 'kai i te kaiga tapu, ko te tapuakiga tena a latou.
Ko te Tofiga o Famasino
(Teu 1.9-18)
13I te sua aso, ne fakatoka ne Mose a finauga i te va o tino; ne galue a ia pena mai i te taeao ke oko ki te po. 14I te laveaga ne Ietelo a mea katoa kona ne fai ne Mose, ne fesili atu ei a ia, “Ne a katoa au mea ne fai mo tino konei? Ai a e fai tokotasi ei ne koe te galuega tenei, ka ko tino e 'tu faeloa mai i te taeao ke oko ki te po o fakatagi ki a koe?”
15Ne tali atu a Mose, “E 'tau mo au o fai te mea nei, ona ko tino e o'mai ki a au o tauloto te loto o te Atua. 16Kafai e isi se finauga i te va o tino e tokolua, e o'mai a laua ki a au, ko fa'kaiku ei ne au me ko oi te tino i a laua e tonu, ko taku atu ei foki ne au ki a laua a fakatonuga mo tulafono a te Atua.”
17Ne fai mai a Ietelo, “E se ko te auala tonu tena e fai ne koe. 18Ka oko ki a koe te vaivai, e pela foki mo tino. Ko to lasi te galuega tenei e fai tokotasi ne koe. 19Nei, ke fai atu mua saku fesoasoani 'lei, ka fakatasi ei foki te Atua mo koe. Se mea tonu ke fai koe mo sui o tino i mua o te Atua, o avatu olotou finauga ki a ia. 20E 'tau ei mo koe o akoako atu ki a latou a fakatonuga a te Atua, o fakamatala atu foki ki a latou te olaga e 'tau o ola ei latou mo mea foki e 'tau o fai ne latou. 21Kae se gata fua i kona, e 'tau o filifili ne koe ne tino 'tau ke fai mo takitaki o te fenua: ko takitaki o taki tokoafe, mo taki tokoselau, mo taki tinolima, mo taki tinogafulu ei. A latou kona ne tino e mataku ki te Atua kae fakana ki ei a tino, kae e se fai togafiti fakaloiloi foki. 22Ke fai a latou kona mo famasino tumau o tino. E mafai ne latou o aumai a mataupu faigata ki a koe, kae ke fai ne latou a mataupu faigofie. Ka faigofie tena ki a koe, me ka amo tasi ne latou mo koe tau amoga. 23Kafai e fai ne koe te mea tena, e pela mo te fakatonuga a te Atua, e se mafai koe o vaivai, ka mafai foki ne tino katoa o toe olo atu ki olotou fale mo te ma'lie i te fakatokaga o olotou fakalavelave.”
24Ne talia ne Mose te fesoasoani a Ietelo, 25fili ei ne ia a tino 'tau mai tino katoa o Isalaelu. Ne 'tofi ne ia a latou ke fai mo takitaki o taki tokoafe, mo taki tokoselau, mo taki tinolima, mo taki tinogafulu ei. 26Ne ga'lue latou e fai mo famasino tumau o tino. Ne avatu ne latou a mataupu faiga'ta ki a Mose, kae fa'kaiku ne latou a mataupu faigofie.
27Fakamuli ifo, ne fakamavae atu a Mose ki a Ietelo, toe foki atu ei a Ietelo ki tona fenua.
Currently Selected:
ESOTO 18: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
