ESOTO 19
19
Ko Tino Isalaelu i te Mauga o Sinai
1-2Ne tiaki ne tino Isalaelu a Lefiti, kae ko te aso muamua o te tolu o masina mai tua ifo o te tiakinaga ne latou Aikupito, ne oko atu ei latou ki te vao o Sinai. I kona ne fakamanava ei latou i kautafa o te mauga o Sinai, 3ka ko Mose ne fanake ki luga i te mauga o fai'pati mo te Atua.
Ne kalaga mai te Aliki ki a ia mai te mauga, kae fai mai ke faipati atu a ia ki tino Isalaelu, te fanauga a Iakopo, penei: 4“Ne lavea ne koutou a mea kola ne fai ne au ki tino Aikupito, mo taku aumaiga i a koutou ki a au i konei, e pela me se aeto e ave ne ia ana tamā punua i luga i ona kapa'kau. 5#1Pete 2.9#Teu 4.20; 7.6; 14.2; 26.18; Tito 2.14Nei la, kafai e faka'logo mai koutou ki a au kae tausi taku feagaiga, ka fai koutou mo oku tino tonu eiloa. A te lalolagi katoa e o oku, ka ko koutou ko oku tino filifilia, 6#Faka 1.6; 5.10ko tino kola ko tuku katoatoa mai olotou olaga ki a au, kae ka tavini mai koutou ki a au e pela mo ne faitaulaga.” 7Tela la, ne fanaifo a Mose ki lalo mai te mauga, 'luku fakatasi ei ne ia a takitaki o tino Isalaelu kae taku atu ki a latou a mea katoa kola ne fakatonu mai ne te Aliki ki a ia. 8Ne tali fakatasi mai a tino katoa penei, “Ka fai ne matou a mea katoa kola ne faipati mai ei te Aliki.” Ne taku atu a te mea tena ne Mose ki te Aliki.
9Ne fai mai a te Aliki ki a Mose, “Ka fanatu au ki a koe i te kaumana matolu, ko te mea ke lagona ne tino ma faipati atu au ki a koe, ka talitonu ei foki a latou ki a koe i taimi katoa.”
Ne taku atu ne Mose ki te Aliki a te tali a tino Isalaelu ki a ia 10kae fai mai te Aliki ki a ia penei, “Fano o taku atu ki tino ke fakaaoga te aso nei mo te aso taeao, e fakatapu kae faka'ma ei olotou loto mo te tapuakiga. E 'tau mo latou o 'ta olotou gatu, 11kae ke toka latou i te aso a taeao atu. I te aso tena ka vau ei au ki lalo mai te mauga o Sinai, ki te koga tela e mafai o lavea ei au ne tino katoa. 12#Epe 12.18-20Fai se tuakoi fakapukupuku i te mauga, ko te mea ke se oko atu ki ei a tino. Fai atu foki ki a latou ke sa olo ake ki te mauga, io me fakapilipili atu ki ei. Kafai e isi se tino e 'laka atu ki ei tona vae, ka tamate a ia; 13e 'tau o peipei a ia ki fatu io me sana ki matasana, kae mo a eiloa e fakapatele atu ki ei se tino. E fakasino te mea tena ki tino mo manu; e 'tau eiloa o oko ki ei te mate. I te taimi tela e fakatagi ei te pu, ko fatoa olo ake ei a tino ki luga i te mauga.”
14Ne fanaifo a Mose ki lalo mai te mauga, folafola mai ei ne ia ki tino ke fakatoka latou mo te tapuakiga. Tela, 'ta ei ne tino olotou gatu, 15kae ne toe fai mai Mose ki a latou, “Ke toka koutou i te aso e tafa mai ki te aso taeao. Mai i te taimi nei, ke mo a e olo koutou ki otou avaga.”
16 #
Faka 4.5
#
Teu 4.11,12 I te tafataeao o te tolu o aso, ne pa'pa fa'tili kae 'lapa uila, kae sae mai te kaumana matolu i luga o te mauga, lagona ei foki ne tino a te tagi malosi o te leo o te pu. Ne pole'pole i te ma'taku a tino katoa i te koga tena. 17Ne takitaki atu ne Mose a latou mai te koga ne 'nofo ei latou o fakafetaui ki te Atua, kae ne 'tu atu a latou i kautafa o te mauga. 18A te mauga o Sinai ne fakapulou ne te au, me i te Aliki ne fanaifo ki lalo i te mauga i te afi. Ne fanake ki luga te au e pela eiloa mo te au o te lase, ka ko na polepole malosi ei foki a tino katoa. 19A te leo foki o te pu e gasolo ake eiloa o maluga. Ne faipati atu a Mose, kae tali mai a te Atua ki a ia i te fatili. 20Ne fanaifo te Aliki ki te ulu o te mauga o Sinai, kae kalaga ifo ki a Mose ke fanake ki kona. Ne fanake a Mose, 21kae ne faipati mai te Aliki ki a ia penei, “Fano ki lalo kae fai atu ki tino ke mo a e oko mai ki te tuakoi manafai e o'mai latou o onoono ki a au; kafai e fai ne latou te mea tena, ka 'mate te tokoukega o latou. 22A faitaulaga foki kola e o'mai pili mai ki a au, e 'tau o faka'ma olotou loto, i te mea ma fakasala ne au a latou.”
23Ne fai atu a Mose ki te Aliki, “E se mafai ne tino o olo ake ki luga, me ne fakatonu mai ne koe ke iloa ne matou i te mauga e tapu, kae ke fai foki se tuakoi fakapukupuku i te mauga ke se oko ki ei se tino.”
24Ne tali mai te Aliki, “Fano ki lalo o aumai Alona ke o'mai tasi mo koe. Ka ko faitaulaga mo tino, e se 'tau o oko mai latou ki te tuakoi i te mea ma fakasala ne au a latou.” 25Tela, fanaifo ei a Mose o taku atu ki tino a mea kola ne faipati mai ne te Aliki.
Currently Selected:
ESOTO 19: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
