ESOTO 28
28
Ko Gatu mo Faitaulaga
(Eso 39.1-7)
1“Ami mai tou taina ko Alona mo ana tamaliki, ko Natapu, Apiu, Eleasalo mo Itamala. Vae mai keatea latou mai tino Isalaelu, ko te mea ke tavini mai latou ki a au i te tofi o faitaulaga. 2Fai ne gatu fakafaitaulaga mo tou taina ko Alona, ke mata malu kae gali a ia. 3Kalaga ki tino katoa kola ne tuku atu ne au ki a latou te poto i galuega ki mea taulima, fai foki ki a latou ke sui a gatu o Alona ko te mea ke tuku katoa atu tona loto ki te tofi o te faitaulaga i loto i taku galuega. 4Fai foki ki ei ke fai se ufi fatafata mo se efota, mo se gatu loa, mo se tilima suisui fakagaligali, mo se pulou, mo se fusi. Ke faite ne latou a gatu fakafaitaulaga konei mo Alona tou taina mo ana tamaliki foki, ko te mea ke mafai ne latou o tavini mai ki a au i te tofi o faitaulaga. 5A tino poto i mea taulima konei ke fakaaoga ne latou te vulu lanu usi, lanu kulakula mo te vulu kula, mo te filo aulo, mo te laugatu lino gali.
6“Ke fai ne latou se efota ki te vulu lanu usi, lanu kulakula mo te lanu kula, te filo aulo, mo se laugatu lino gali, kae teuteu fakagaligali ki mea suisui. 7Faite ne pakāve e lua mo sai ki ei te efota, a mea kona e safe ki tuauma ko fakamau ifo ei ki ona feitu. 8Fai foki se ka'fanoa gali e laga foki eiloa ki mea kola ne faite ki ei te efota. Faite ke soko tasi pela eiloa me se laugatu e tasi. 9Ko aumai ei ne fatu kanelia e lua kae ke lomi ki ei a igoa o tama a Iakopo e tokosefulu lua, 10kae ke fano eiloa i te fakasologa o olotou tausaga, e toko ono i te sua fatu, kae toko ono foki i te isi fatu. 11Sala mai se tino poto i te ta mama, ke ana tusigina ki luga i fatu konei e lua, a igoa o tama a Iakopo, ko faka'mau atu ei fatu konei ki olotou tulaga aulo. 12Ko faka'piki atu ei ki tuauma o te efota, ko itukaiga e sefulu lua kona o te fenua o Isalaelu. E fai pena, ko tena uiga ke tauave ne Alona olotou igoa i ona tuauma, ko te mea ko au, te Aliki, ka manatua faeloa ne au toku fenua. 13Faite se ava tulaga aulo 14mo se ava seni aulo e fili pela me se kafa, ko fakamau ei ki tulaga kona.
Ko te Ufi Fatafata
(Eso 39.8-21)
15“Faite ake se ufi fatafata mo te Faitaulaga Pule ke fai mo mea e fakaasi mai ei te loto o te Atua. E faite foki ki mea ne faite ki ei te efota, kae e tai pau foki a suisuiga fakagaligali i ei. 16Faite ke pau te loa mo te lauefa kae ke fetulua, e luasefulu lua senitimita te loa, e luasefulu lua foki senitimita te lauefa. 17Fakamau ki ei e fa laina o fatu taua; i te laina muamua fakamau ki ei te lupi, te topasi mo te kaneti; 18kae i te lua o laina, ko te emela, te safaila, mo te taemani; 19i te tolu o laina, ko te takosi, te akate mo te emesita; 20i te fa o laina ko te pelila, te kaneli mo te iasepi. A mea konei ke fakamau katoa ki tulaga aulo. 21A fatu konei e sefulu lua — ke tofu eiloa te fatu mo te igoa o tamaliki a Iakopo, e fakaasi i ei a itukaiga o Isalaelu. 22Faite aka ne seni aulo mo te ufi fatafata, kae ke 'fili pela me ne kafa. 23Faite ne mama aulo e lua ke fakapiki ki tulimanu tafa ki luga o te ufi fatafata; 24ko sai ei a uka aulo konei e lua ki mama aulo e lua. 25Ka ko nisi mata kola e lua o te uka aulo ke sai ki tulaga kona e lua, tena la, a uka kona e fakapiki mai mua o te efota. 26Ko faite ei foki se ava mama aulo kae fakapiki ki tulimanu ki lalo o te ufi fatafata i te feitu ki loto, kae tafa ki te efota. 27E toe fai foki ne koe se ava mama aulo ko fakapiki ei ki te feitu ki lalo mai mua o tuauma e lua o te efota e pili ki te mata tuiga kae mai luga ake o te kafanoa gali. 28Sai a mama konei o te ufi fatafata ki mama o te efota kae sai ki te uka lanu usi, ko te mea ke takato fakalei te ufi fatafata mai luga ake o te kafanoa kae ke se gasuesue.
29“I te taimi e ulu atu ei Alona ki te Potu Tapu, ke pei a ia ki te ufi fatafata tenei, e lomi i ei a igoa o matakaiga o Isalaelu, ko te mea, ko au, te Aliki, ka manatua faeloa ne au toku fenua. 30#Nume 27.21; Teu 33.8; Esela 2.63; Nee 7.65Tuku te Ulima mo te Tumema#28.30: Ulima mo te Tumema: Ne mea e lua kola ne fakaaogagina ne faitaulaga o 'sala ke iloa te loto o te Atua; e se iloa tonu me ne fakaaoga pefea a mea konei taumua. ki loto i te ufi fatafata ko te mea ke fanatu mo Alona i te taimi e vau ei a ia ki loto i te koga tapu tela e nofo tumau ei au. I taimi katoa pena, e 'tau mo ia o pei mai te ufi fatafata tenei, ko te mea ke mafai ne ia o iloa mo te mautinoa, a toku loto mo te fenua o Isalaelu.
Ko Nisi Gatu Fakafaitaulaga
(Eso 39.22-31)
31“A te gatu loa tela e silia tena loa i te efota ke faite katoa eiloa ki te vulu lanu usi. 32Ke isi eiloa se pu mo faulu te ulu. A kapakapa o te pu tenei ke fakamalosigina ki se lagaga fakatamilo ke mo a e masae gofie. 33-34A kapakapa ki lalo o te gatu loa tena ke 'sui ki ei a ata o fuagalakau o te lakau ko te pomekalanite ki te vulu lanu usi, lanu kulakula, mo te kula, kae fakavasavasa ki tamā pēle aulo. 35Ke pei Alona ki te gatu loa tenei i taimi o te galuega, i a ia se Faitaulaga. A te taimi e vau ei a ia ki toku koga nofo i te Potu Tapu io me ko te taimi ka fano ei a ia, e lagona faeloa te tagitagi o leo o pele, ko seai ei se sala ki te mate e oko ki a ia.
36“Faite ake foki se mea ki te tina aulo kae lomi ki ei te muna tenei ‘Fakatapu mo te Aliki.’ 37Ko sai atu ei ki te feitu ki mua o te pulou, ke sai ki te uka lanu usi. 38Ke pulou atu Alona ki te mea nei, ko te mea ko au te Aliki, ka talia ne au a taulaga katoa a Isalaelu e avatu ki a au; e tusa fua me fai ne latou ne mea 'se i te avatu o olotou taulaga.
39“Laga ake se tilima mo Alona ki laugatu lino gali mo se pulou ki laugatu lino gali foki, pela foki mo se kafanoa e teuteu ki suisuiga fakagaligali.
40“Fai ne tilima, kafanoa mo ne pulou foki mo tamaliki tagata a Alona ke mata malu kae gali latou. 41Fakapei atu a mea nei ki tou taina ko Alona mo ana tamaliki tagata. Ko faū kae fakatapu latou ki te milimili ki sinu olive ke mafai ne latou o tavini mai ki a au i a latou ne faitaulaga. 42Sui ne tivae mutu mo latou ki te laugatu lino, mai te taugasulu ke oko ki kauaga, ko te mea ke ufi ki ei olotou koga e se tau o lavea. 43E 'tau mo Alona mo ana tama tagata o pei faeloa ki ei i taimi e olo ei latou ki te Faleie e nofo ei au, io me fakapilipili atu ki te fata-fai-taulaga o fai te tofi faitaulaga i te Koga Tapu, ko te mea ke se mate latou. A te mea nei se fakatonuga e tumau ki a Alona mo ana tama tagata.
Currently Selected:
ESOTO 28: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
