ESOTO 29
29
Ko te Fakatapuga o Alona mo ana Tama Tagata
(Levi 8.1-36)
1“Tenei te mea ka fai ne koe ki a Alona mo ana tama tagata o fakatapu latou mo fai a faitaulaga ki a au. Puke se tama pulumakau mo se avā mamoe tagata kola e seai ne pona. 2Fakaaoga te falaoa mai te saito tafasili i te lei, o palu ei te falaoa, kae ke seai se mea faka'fete e fakaaoga. A nisi falaoa ke palu mo te sinu olive, ka ko nisi ke seai se sinu olive e palu ki ei. A nisi falaoa ke faite ke foliga pela me ne masi e nani ki te sinu. 3Ka oti ko tuku aka ki se kete, ko ofo mai ei ki au i te taimi e ofo mai ei te pulumakau tagata, mo mamoe tagata e lua.
4“Aumai Alona mo ana tama tagata ki te mataloa o te Faleie tela e nofo ei au, kae fai ki ei ke kou'kou faka'ma. 5Ka oti ko fakapei ei Alona ki gatu faitaulaga — ko te tilima, te efota, te gatu loa tela e pei mai luga o te efota, te ufi fatafata mo te fusi ei. 6Tena, ko tuku ki tena ulu te pulou kae fakamau ki tena pulou te fakailoga o tena fakatapuga mo pati konei ke tusi i ei, ‘E fakatapu mo te Aliki.’ 7Puke aka ei te sinu milimili, ligi ki tena ulu, ko milimili ei a ia.
8“Puke mai ana tama tagata, ko fakapei ei olotou tilima. 9Sai ne fusi laugatu i olotou taugasulu kae sai olotou ulu ki ne pulou laugatu. E faū pena ne koutou a Alona mo ana tama tagata, ko te lotou gafa ka fai mo faitaulaga ki a au ki te se gata mai.
10“Puke mai te pulumakau tagata ki mua o te Faleie e nofo ei au, kae fai ki a Alona mo ana tama tagata ke tuku olotou lima ki te ulu o te pulumakau. 11Tamate te pulumakau tagata tena, i oku mua i te mataloa o te Faleie. 12Puke aka ne toto o nani ei a nifo o te fata-fai-taulaga, ki ou matikao, ka ko te toega o te toto ke ligi ki koga i lalo o te fata-fai-taulaga. 13Ka oti ko fakataka ei keatea te gako tela e ufi i ei ana totoga. Tapale aka foki te feitu o te ate tafasili i te lei, pela foki mo nonu o ia e lua fakatasi mo gako kola e piki i ei, ko sunu ei i luga o te fata-fai-taulaga, mo fai te taulaga ki a au. 14Ka ko kano o te pulumakau tena, mo tena pakili mo gakau, ke sunu katoa i tua o te koga e nofo koutou i ei. Te mea tena se taulaga mo te fakamagaloga o agasala a te faitaulaga.
15“Puke se mamoe mai mamoe tagata kola e lua, kae fai ki a Alona mo ana tama tagata ke tuku olotou lima ki tena ulu. 16Ka oti ko tamate ei te mamoe tena, kae ave ana toto o ligiligi ki feitu e fa o te fata-fai-taulaga. 17Ka oti ko katikati ei ki potumea; fulu aka ana totoga mo ana vae tua, ko tuku ei mai luga o te ulu mo nisi faasi mea o ia. 18#Efe 5.2; Fili 4.18Sunu katoa te mamoe tena mo fai te taulaga meakai. Ko te manogi o te taulaga tenei e fiafia au ki ei.
19“Puke te sua mamoe — te mamoe tela e fakaaoga mo fakatapuga kae fai ki a Alona mo ana tama tagata ke na olotou lima ki tena ulu. 20Ka oti ko tamate ei, kae puke ne mu toto o tuku ki te mata ki lalo o te taliga fakaatamai o Alona, pela foki ki taliga o ana tama tagata. Tuku foki ne toto ki maikao matua o olotou lima fakaatamai; e pela foki ki maikao matua o olotou vae fakaatamai. Te toega o toto ke ligiligi ki feitu e fa o te fata-fai-taulaga. 21Puke ne mu toto i luga o te fata-fai-taulaga, mo ne sinu milimili, ko apiapi ei ki luga i a Alona mo ana gatu, pela foki ki ana tama tagata mo olotou gatu. I te faiga tena ko fakatapu ei Alona mo ana tama tagata pela foki mo olotou gatu ki a au.
22“Fakataka keatea te gako o te mamoe, pela foki mo gako i te velo, mo te gako tela e ufi ei ana totoga. Kati aka foki te feitu o te ate tafasili i te lei, te ava nonu mo gako e mau i ei mo te vae tua fakaatamai. 23Mai te kete falaoa tela ko oti ne ofo mai ki a au, puke aka ne falaoa — e takitasi mai vaega falaoa kola ne fakatonu atu ke faite. E tasi te falaoa ne faite mo te sinu olive, kae tasi e seai se sinu olive ne fai ki ei, kae tasi te masi. 24Tuku a meakai katoa konei ki lima o Alona mo ana tama tagata, kae fai ki a latou ke fakatapu a mea kona ke fai mo meaalofa taua ki a au. 25Ka oti ko toe puke ei a mea kona mai a latou o sunu i luga o te fata-fai-taulaga, mai luga o te taulaga sunu, ke fai mo taulaga meakai ki a au. Ko te manogi o te taulaga tenei e fiafia au ki ei.
26“Puke te fatafata o te mamoe tenei kae fakatapu ke fai mo meaalofa ki a au. A te vaega tenei o te mamoe e a koe.
27“Kafai ko faū se faitaulaga, ko te fatafata mo te kauaga o te mamoe tagata, tela ne fakaaoga i te faūga, ka fakatapu ke fai mo meaalofa ki a au. Ka oti ne fakatapu ko tuku fakaatea ei ma faitaulaga. 28Tenei taku tulafono e se mafai o fuli: kafai ko fai a taulaga fakafetai a oku tino, ko te fatafata mo te kauaga e puke ma te faitaulaga. Tena te meaalofa a tino ki a au, te Aliki.
29“Kafai ko mate Alona, a gatu faitaulaga o ia e 'tau o tuku ki ana tama tagata me 'tau o pei ki ei mafai ko faū latou. 30A te tamaliki tagata a Alona tela e sui ne ia tena tamana i te tofi o te faitaulaga, tela foki e fano sale ki te Faleie e nofo ei au o galue i te Koga Tapu, e 'tau o pei a gatu kona o Alona i aso e fitu.
31“Puke aka a kano o te mamoe tela ne fakaaoga i te faūga o Alona mo ana tama tagata, o ave o saka i se koga tapu. 32Ka oti ko kai ei ne latou i te mataloa o te Faleie tela e nofo ei au, fakatasi mo falaoa kola e 'toe i te kete. 33Ka 'kai foki ne latou a mea ne fakaaoga i te sauniga o te fakamagaloga o agasala i te taimi ne faū ei latou. Ko faitaulaga fua e kai ne latou a mea konei me ko oti ne fakatapu. 34Kafai e isi ne kano manu io me ne falaoa e 'toe ki te taeao, e 'tau o sunu; e se 'tau o kai me ko tapu.
35“Fai a sauniga mo te faūga o Alona mo ana tama tagata i aso e fitu e pela eiloa mo taku fakatonuga ki a koe. 36I aso takitasi o aso kona e fitu, e 'tau mo koutou o ofo mai se pulumakau tagata mo fai te taulaga tela e magalo ei agasala. A te mea tena e faka'ma ei te fata-fai-taulaga. Ka oti ko milimili ei te fata-fai-taulaga ki te sinu olive ko te mea ke 'malu. 37Ke fai te mea tena i aso takitasi o aso o fitu. Ko te fata-fai-taulaga ka malu katoatoa, ka ko te tino io me so se mea o patele ki ei ka pakia i te mana o tena malu.#29.37: Ka fakamaseigina ne te malosi o tena 'malu: E fakatalitonugina me i sose tino io me se mea ka pakia manafai ne fakapatele ki se mea tapu.
Ko Taulaga i Aso Takitasi
(Nume 28.1-8)
38“I aso takitasi i aso katoa konei mai mua, ke ofo mai ne koutou ki a au i luga o te fata-fai-taulaga a tamā mamoe e lua kola ko takitasi tausaga. 39Ofo mai te mamoe muamua i te taeao, ka ko te sua tamā mamoe i te afiafi. 40Konei a mea e ofo fakatasi mai mo te mamoe muamua: e tasi te kilokalame o falaoa 'lei mai i te saito e palu fakatasi mo te sinu olive 'ma e tasi te lita, ligi foki se lita e tasi mai te uaina mo fai foki te taulaga. 41I te afiafi ko ofo ei te sua tamā mamoe, kae fakatasi ki ei a falaoa mo sinu olive mo te uaina, ke pela eiloa mo te aofaki i te taeao. A te mea tenei se taulaga meakai ki a au, te Aliki, ka ko tena manogi e fiafia au ki ei. 42I taimi katoa fakamuli, a te taulaga sunu tenei ka ofo mai i oku mua, i te mataloa o te Faleie e nofo ei au. Tena te koga e fetaui ei au mo oku tino kae faipati foki au ki a koe. 43I kona ka fetaui ei au mo tino Isalaelu, ka ko te mainaga o oku ka faka'malu ne ia te koga tena. 44Ka faka'malu ne au te Faleie mo te fata-fai-taulaga, kae ka fakakese ne au a Alona mo ana tama tagata ke galue mo oku i te tofi faitaulaga. 45Ka nofo au fakatasi mo tino Isalaelu, kae ka fai au mo olotou Atua. 46Ka iloa ne latou i a au, ko te Aliki te lotou Atua, tela ne aumai ne au latou keatea mai Aikupito ko te mea ke nofo atu au ki a latou. Au ko te Aliki te lotou Atua.
Currently Selected:
ESOTO 29: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
