ESOTO 6
6
1Kae ne tali mai a te Aliki ki a Mose, “Nei, ka lavea ne koe a te mea ka fai ne au ki te tupu. Ka fai malo ne au ke tuku atu oku tino ke olo. Ka fai malo ne au ke tuli ne ia latou mai Aikupito.”
Ko Kalaga atu te Atua ki a Mose
2 #
Kene 17.1; 28.3; 35.11; Eso 3.13-15 Ne faipati mai te Atua ki a Mose penei, “Au ko te Aliki. 3Au ne fakaasi ki a Apelaamo, mo Isaako, pela foki ki a Iakopo i a au ko te Atua Tafasili i te Malosi, kae seki fakailoa toku igoa tapu, tela ko te ALIKI. #6.3: Te ALIKI: Onoono ki te Eso.3.14. 4Ne fai foki taku feagaiga mo latou; ne tauto au ki a latou me ka tuku ne au te fenua o Kanana ke nofo ei latou, te fenua tela ne 'nofo ei latou pela me ne tino fakaatea. 5Nei ko oti ne lagona ne au te tagi fita o tino Isalaelu, kola e fakapologa ne tino Aikupito; kae ne masaua ake ei ne au taku feagaiga. 6Tela la, fai ki tino Isalaelu i au e fai atu ki a latou, ‘Au ko te Aliki; ka fakasao kae fakasaoloto ne au koutou mai te nofopologa i Aikupito. Ka sisi aka toku lima tafasili i te malosi o tuku ifo fakasalaga 'mafa eiloa ki luga i a latou, kae ka fakasao koutou ne au. 7Ka fai ne au koutou mo oku tino tonu eiloa, ka ko au ka fai mo otou Atua. I te taimi e fakasaoloto atu ei koutou ne au mai te pologa i Aikupito, ko te taimi tena ka iloa ei ne koutou i au ko te Aliki te otou Atua. 8Ka tuku atu ne au te fenua tela ne tauto ne au ke tuku ki a Apelaamo, Isaako mo Iakopo, kae ka tuku atu ne au mo koutou. Au ko te Aliki.’ ” 9Ne fai atu ne Mose a pati konei ki tino Isalaelu kae seki talitonu latou me ko fita olotou mafaufau i te fakagalue fakamafa ne tino Aikupito.
10Ne fai mai te Aliki ki a Mose, 11“Fano o fai ki te tupu o Aikupito ke tuku atu a tino Isalaelu ke olo keatea mai tena fenua.”
12Ne tali atu Mose, “Kona a tino Isalaelu seki fakalogo mai ki a au, kae ka pefea eiloa o fakalogo mai ki a au a te tupu o Aikupito? Au nei se tagata valea fua i te faipati.”
13Ne fakatonu mai ne te Aliki a Mose mo Alona penei: “Fai ki tino o Isalaelu mo te tupu o Aikupito i a koulua ne fakatonu atu ne au ke taki ne koulua a tino Isalaelu keatea mai Aikupito.”
Ko te Fakasologa o Kaiga o Mose mo Alona
14Ko Leupena, te toekimua a Iakopo, e tokofa ana tama tagata: ko Hanoka, ko Palu, ko Heselona mo Kami; ko latou ko tupuga o kaukaiga kola e iloa i olotou igoa. 15Simeona e tokoono ana tama tagata: ko Iemuelu, ko Iamina, ko Ohata, ko Iakini, ko Soala mo Saula, te tama tena a te fafine Kanana; ko latou kona ko tupuga o kau kaiga kola e iloa i olotou igoa. 16#Nume 3.17-20; 26.57,58; 1NTupu 6.16-19A Levi e tokotolu ana tama tagata: ko Kelesona, ko Koate mo Melali; ko latou ko tupuga o kau kaiga kola e iloa i olotou igoa. A Levi ne ola e tusa mo te 137 ona tausaga. 17A Kelesona e tokolua ana tama tagata: ko Lipini mo Simei; a te tokolua nei e tokouke la fanau. 18A Koate e tokofa ana tama tagata: ko Amalamo, ko Isala, ko Hepelona mo Usieli. Ne ola Koate e tusa mo te 133 ona tausaga. 19A Melali e tokolua ana tama tagata: ko Mali mo Musi. Konei katoa te kau kaiga o Levi mo olotou fanauga.
20Ne avaga Amalamo ki a Iokapeta, te tuagane o tena tamana; ko laua ko matua o Alona mo Mose. Ne ola Amalamo e tusa mo te 137 ona tausaga. 21A Isala e tokotolu ana tama tagata: ko Kola, ko Nefeku mo Sikeli. 22E tokotolu foki tamaliki a Usieli: ko Misaeli, ko Elisafana mo Siteli.
23Ne avaga Alona ki te tuagane o Nasona tela ko Elisepa, te tama a Aminatapu; ne fai la tama ko Natapu mo Apiu mo Eleasalo mo Itamala. 24A Kola e tokotolu ana tama tagata: ko Asili, ko Elekana mo Apiasafa; a latou ko tupuga o te kau kaiga o Kola. 25A Eleasalo te tama tagata a Alona ne avaga ki te tama fafine a Petueli kae fai te la tama ko Fineaso. Ko latou konei ko ulu o kaiga mo kaukaiga o te matakaiga o Levi.
26Ko Alona mo Mose ko te tokolua ne fai ki ei te Aliki ke taki te kau Isalaelu keatea mai Aikupito. 27Ko laua kola ne fai ki te tupu o Aikupito ke fakasaoloto te kau Isalaelu.
Ko te Fakatonuga a te Aliki ki a Mose mo Alona
28I te faipatiga a te Aliki ki a Mose i Aikupito, 29e penei ana pati: “Au ko te Aliki. Fai ki te tupu o Aikupito a mea katoa kola ne fai atu ne au ki a koe.”
30Kae tali atu a Mose, “E iloa ne koe i au se tino e valea i te faipati; ai a ka fakalogo mai fua ei te tupu ki a au?”
Currently Selected:
ESOTO 6: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
