KENESE 39
39
Ko Iosefa mo te Avaga a Potifala
1Ko oko atu nei a te kau Isamaeli ki Aikupito, fakatasi mo Iosefa tela ne togi mai ne latou mai ana taina. Ne togi atu ne latou a Iosefa ki te ofisa a te tupu e tokotasi tela e igoa ki a Potifala tela ko te kapeni o sotia tiute i te palesi. 2#Galu 7.9Ne fakatasi atu te Aliki ki a Iosefa, kae fai ne ia a Iosefa ke manuia i ana mea katoa e fai. Ne nofo Iosefa i te fale o tena pule ko Potifala, 3kae ne lavea ne Potifala i te Aliki e fakatasi ki a Iosefa kae fakamanuia foki ki a ia i ana mea katoa e fai. 4Ne fiafia Potifala ki a Iosefa, tela ne fai ei ne ia a Iosefa mo fai tena tavini tonu. Ne fakasopo ne ia a Iosefa ke pule i tena fale mo ana mea katoa. 5Mai te taimi tena, ona ko Iosefa, ne fakamanuia ei ne te Aliki a tino katoa i te fale o Potifala, fakatasi mo mea katoa i loto i te fale e pela foki mo ana fatoaga katoa. 6Ne tuku ne Potifala a mea katoa ki te pulega a Iosefa, tela la, ko seai eiloa se mea e fakamafa ei ona mafaufauga, na ko meakai fua e kai ei a ia.
A Iosefa se tagata foitino lei, kae tino gali. 7Tela, ne fiafai ei a te avaga a Potifala ki a Iosefa, kae ne fai ki a Iosefa ke moe laua. 8Ne seki talia ne Iosefa kae fai atu penei, “Kiloke, e seai eiloa se mea e mafa ei mafaufauga o toku pule i loto i te fale nei, me e talitonu i a au e nofo i konei. Ko oti ne fakasopo ne ia a au ke pule i ana mea katoa. 9A te malosi o taku pulega e seai eiloa se kese mo te malosi o tena pulega. E seai eiloa se mea i ana mea e seki talia mai ne ia ke pule au i ei, na ko koe fua eiloa. Tela la, e mafai pefea ne au o fai se vaega mea masei pena, e agasala ei au i mua o te Atua?” 10Ne tumau eiloa te avaga a Potifala o fai sale ki a Iosefa i aso takitasi ke moe laua, kae e se talia eiloa ne Iosefa.
11Kae i te aso e tasi, ne fano a Iosefa ki loto i te fale o fai ana galuega, kae e seai eiloa se tavini i kona. 12Ne puke atu a te avaga a Potifala ki te gatu loa o Iosefa, futi mai ne ia ki a ia kae fai atu penei, “vau ke moe taua.” Ne fiti aka Iosefa, tele eiloa ki tua, ka ko tena gatu loa ko i lima o te avaga a Potifala. 13I te mateaga ne te avaga a Potifala i te gatu loa o Iosefa ne to i tena telega ki tua, 14tela ne kalaga atu ei a ia ki ana tavini kae fai atu penei, “Kilo mai ki te mea tenei! A te tagata Epelu tenei ne aumai ne taku avaga ko fai ne ia se amioga masei ki a tatou. Ne ulu mai ki loto i toku potu, o taumafai o puke malo a au, ka ko au ne kalaga malosi ki luga. 15I te lagonaga ne ia taku kalaga, ne tele ei a ia ki tua, kae tiakina tena gatu loa tenei i oku tafa.”
16Ne tausi eiloa ne ia te gatu loa tena o Iosefa ke oko eiloa ki te taimi ne oko mai ei a Potifala ki te fale. 17Ne fakamatala atu foki ne ia te tala tena ki tena avaga, muna a ia, “A te pologa Epelu tela ne aumai ne koe ne ulu mai ki loto i toku potu o taumafai o puke malo au. 18Kae i taku kalagaga ne tele ei a ia ki tua, kae tiakina tena gatu loa i oku tafa.”
19Ne kaitaua Potifala, 20tela ne 'pei ei ne ia a Iosefa ki te falepuipui tela e tausi ei a pagota a te tupu. 21#Galu 7.9Ka ko te Aliki ne fakatasi eiloa ki a Iosefa, kae fakamanuia atu foki ki a ia. Tela la, a te tino tausi pagota ne fiafia eiloa ki a Iosefa. 22Ne fai ne ia a Iosefa ke pule i pagota katoa, kae ke fakapogai foki ki a ia a mea katoa e fai i loto i te falepuipui. 23Ne lei katoa a mea e fai ne Iosefa, me i te Aliki e fakatasi mo ia, tela la, a te tagata tausi pagota e se ti onoono sale ki mea e tausi ne Iosefa me e lei katoa.
Currently Selected:
KENESE 39: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
