LEVITIKO 15
15
Ko Mea se 'Ma mai i Loto i te Foitino
1Konei a fakatonuga ne tuku mai ne te Aliki ki a Mose mo Alona 2mo tino Isalaelu. Kafai se tagata e isi se sua ne vau mai loto i tena foitino, a te sua tena e se 'ma, 3e pau eiloa me sali mai io me ko se sali mai. 4So se moega e sagasaga io me takato a ia i ei ka se 'ma. 5So se tino e patele ki tena moega 6io me e sagasaga i luga i so se mea ko oti ne sagasaga ki ei a te tagata tena, e tau a ia o fano o koukou kae 'ta faka'lei ona gatu, kae e tumau eiloa tena lailai ke oko eiloa ki te afiafi. 7So se tino e patele ki te tino tena e isi se sua se 'ma e vau mai i a ia, e tau o 'ta faka'lei ona gatu kae koukou, kae e tumau eiloa tena lailai ke oko ki te afiafi. 8Kafai se tino ne puaki ne te tagata se 'ma tena, e tau mo te tino tena ne puakigina o 'ta faka'lei ona gatu kae koukou, kae e se 'ma eiloa a ia ke oko ki te afiafi. 9So se nofoga e sagasaga ki ei te tagata tena ka se 'ma. 10So se tino e patele ki se mea ne sagasaga ki ei te tagata tena ka se 'ma a ia ke oko eiloa ki te afiafi. So se tino e amo ne ia se mea ne nofo ki ei a te tagata se 'ma tena, e tau mo ia o 'ta ona gatu kae koukou, kae e se 'ma eiloa a ia ke oko ki te afiafi. 11Kafai e seki fulu a lima o te tagata ne sali tena sua, kae e patele atu ki se tino, e tau mo te tino tena o 'ta faka'lei ona gatu kae koukou, kae e se 'ma eiloa a ia ke oko ki te afiafi. 12So se 'tia fatu e patele ki ei te tagata tena e tau o foa; so se pola lakau e patele ki ei a te tagata tena e tau o fulu faka'lei.
13Kafai ko lei te tagata tena i tena masaki, e tau mo ia o fakatali i aso e fitu, ka oti aso e fitu ko 'ta ei ona gatu kae koukou i se vaipuna, tena ka 'ma ei a ia. 14I te valu o aso, ka ave ne ia se ava lupe io me se ava tamā lupe ki te faitaulaga i te mataloa o te Faleie o te Aliki. 15Ka ofo atu ne te faitaulaga te manu eva e tasi ke fai mo taulaga mo agasala, ka ko te sua manu eva mo fai te taulaga sunu. I te faiga tena, ka fai ei ne ia se sauniga mo te fakamaga o te tagata tena.
16Kafai se tagata ko sali ki tua tena sua tagata, e tau mo ia o koukou faka'lei, kae ka tumau eiloa tena se 'ma ke oko ki te afiafi. 17Kafai ne siu se laugatu io me se mea ne faite ki pakili manu i te sua tena, e tau te mea tena ke 'ta faka'lei, kae e se 'ma eiloa ke oko ki te afiafi. 18A te tagata mo te fafine e tau o koukou faka'lei manafai ko oti ne fakatasi, kae e se 'ma eiloa laua ke oko ki te afiafi.
19Kafai ko masaki a te fafine i te masaki o fafine, ka se 'ma a ia i aso e fitu. So se tino e patele ki ei ka se 'ma ke oko eiloa ki te afiafi. 20So se mea e sagasaga io me takato ei a ia i aso e masaki ei a ia, ka se 'ma. 21-23So se tino e patele ki tena moega, io me patele ki se mea ne sagasaga ei a ia, e tau o 'ta ona gatu kae koukou, kae ka se 'ma eiloa a ia ke oko ki te afiafi. 24Kafai se tagata e moe mo te fafine tena i aso e masaki ei a ia, ka se 'ma a ia i aso e fitu. So se moega e takato a ia ki ei ka se 'ma.
25Kafai se fafine e fano tena sua i ne nai aso, kae se ko te taimi e masaki ei a ia i te masaki o fafine, io me ko te sua tena e tafe mai i tua o te taimi ne masaki ei a ia, ka se 'ma a ia i aso e fano ei tena sua, e pela eiloa manafai e maua a ia i te masaki o fafine. 26So se moega e takato ei a ia, io me se mea e sagasaga ei a ia i te vaitaimi e fano ei tena sua, ka se 'ma. 27So se tino e patele ki se mea i mea kona ka se 'ma, tela la, e tau mo ia o 'ta ona gatu kae koukou faka'lei; a ia e se 'ma eiloa ke oko ki te afiafi. 28Kafai ko gata te fanoga o tena sua, ka fakatali a ia i aso e fitu, ka oti aso kona, ko 'ma ei a ia. 29I te valu o aso, ka ave ne ia se āva lupe io me se ava tamā lupe ki te faitaulaga i te mataloa o te Faleie o te Aliki. 30Ka ofo atu ne te faitaulaga te sua manu eva ke fai mo taulaga mo agasala, ka ko te sua manu eva ke fai mo taulaga sunu, ko te faiga tena e fai ei ne ia a te sauniga o te faka'maga o te fafine tena.
31Ne faipati atu a te Aliki ki a Mose ke polopoloki a tino Isalaelu e uiga ki feitu e lailai ei latou, ko te mea ke mo a e fakalailai ne latou a te Faleie o te Aliki, tela i te kogaloto o te fa'kai. Kafai e fakalailai ne latou, ko latou ka mate.
32Kona a fakatonuga e uiga ki tagata kola e vau te sua mai olotou foitino, 33e pela foki ki fafine kola e maua ne te masaki o fafine, io pela foki ki se tagata e moe mo se fafine e se 'ma.
Currently Selected:
LEVITIKO 15: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific