LEVITIKO 19
19
Ko Tulafono o te 'Malu mo te Fai mea Tonu
1Ne faipati atu a te Aliki ki a Mose 2#Levi 11.44,45; 1Pete 1.16ke faipati atu ki te fenua o Isalaelu penei, “te otou Atua e 'malu. 3#Eso 20.12; Teu 5.16; Eso 20.8; Eso 31.13; Teu 5.12 E tau mo koutou o ava ki otou matua mo tamana, kae tausi ki te Sapati, e pela mo taku fakatonuga. Au ko te Aliki te otou Atua.
4 #
Levi 26.1;
Eso 20.23; 34.17; Teu 27.15 “Sa tapuaki atu ki nisi atua kae tiaki a au; sa faite ne atua ki fiti kae tapuaki ki ei. Au ko te Aliki te otou Atua.
5“Kafai e ta ne koe se manu mo fai te taulaga fakafetai, masaua o tausi ki fakatonuga ko oti ne tuku atu ne au, kae ka talia ne au a te taulaga. 6A te kano o te manu e tau o kai i te aso eiloa ne tamate ei a te manu io me ko te aso mai tua ifo. A kano manu e toe atu ki te tolu o aso e tau o sunu, 7me ko se 'ma, kae kafai e isi se tino ko oti ne kai ki ei, ka se talia ne au a te taulaga. 8So se tino e kai ki te kano manu tena ka agasala a ia me e fakaseaoga ne ia a te mea ko oti ne fakatapu mai ki a au, tela la, ko se toe taku ei a ia se tino o toku fenua.
9 #
Levi 27.15; Teu 24.19-22 “Kafai ko kati otou fatoaga, sa katigina a saito kola i tafatafa o otou fatoaga; sa toe foki ki tua o kati a saito kola ne seki kati. 10Kafai ko tau otou vine, masaua o sa toe foki atu i loto i toga vine a koutou o toe tau a fuagavine kola ne tiaki io me o toe puke aka a vine kola ne ta'tela ki lalo. Tuku ei a mea kona ma tino ma'tiva mo tino fakaalofa. Au ko te Aliki te otou Atua.
11 #
Eso 20.15; Teu 5.19;
Eso 20.16; Teu 5.20 “E tapu te kaisoa, te faitogafiti mo te loi. 12#Eso 20.7; Teu 5.11; Mata 5.33 Sa tauto ki toku igoa manafai e seki mafaufau koe o tausi tau feagaiga; me e fakamasiasi fua ne koe toku igoa. Au ko te Aliki te otou Atua.
13 #
Teu 24.14,15 “Sa fakatogafiti ne koe se tino io me kaisoa ana mea. Sa funa ne koe se 'togi o se tino ne fakagalue ne koe, e tusa eiloa me ko te 'togi o ia i se afiafi fua e tasi. 14#Teu 27.18 Sa pati maseigina se tino taliga tuli, io me tuku se mea i mua o te tino kivi ko te mea ke siga. Ma'taku mai ki a au; au ko te Aliki te otou Atua.
15 #
Eso 23.6-8; Teu 16.19 “A fakamasinoga i te fono ke fai mo te fakamaoni; sa fapito ki tino ma'tiva io me ma'taku ki tino mau'mea. 16Sa fakasalalaugina ne tala 'loi e uiga ki te sua tino. Kafai se tino ko tu i te fono o fakasao tena ola, sa mataku o fakaasi tau molimau manafai e iloa ne koe e mafai o maua se fesoasoani ki a ia. Au ko te Aliki.
17 #
Mata 18.15
“Sa nofo mo te loto ita ki te sua tino, kae taumafai o fai fakalei te va o koulua, ke mo a koe e agasala e pogai i a ia.#19.17: ke ... i a latou; io me ko te mea ke se fai ne koe a te agasala tenei ki a latou. 18#Mata 5.43; 19.19; 22.39; Male 12.31; Luka 10.27; Loma 13.9; Kala 5.14; Iako 2.8 Sa taui atu se mea 'se a se tino e fai ki a koe, sa tumau foki tou kaitaua ki a ia, kae alofa ki tou tuakoi e pela eiloa mo tou alofa ki a koe eiloa. Au ko te Aliki.
19 #
Teu 22.9-11
“Faka'logo mai ki aku fakatonuga. Sa fakaavagagina a manu i vaega kesekese. Sa toki ne fuaga e lua kae se pau i se fatoaga e tasi. Sa pei ki gatu e sui ki laugatu e lua.
20“Kafai se tino ne tauto ke togi atu tena pologa fafine ki te sua tino mo fai tena avaga fakasalasala, kae e seki tuku atu a te togi ki a ia, ko tena uiga kafai e moe a te tagata tena mo tena pologa fafine, e se tau a ia o tamate, kae ke fakasala fua;#19.20: te tagata ... tau; io me a te sukesukega ka fai kae ka se aofia ei laua. me i te pologa fafine tena koi pule eiloa ne ia. 21Ka aumai ne te tagata tena se mamoe tagata ki te mataloa o toku Faleie mo fai tena taulaga mo te toe togiga o tena agasala. 22Tena, ka fai ei ne te faitaulaga a te sauniga e faka'ma ei a agasala a te tagata tena, ko fakamagalo ei a ia ne te Atua.
23“Kafai ko ulu atu koutou ki loto i te fenua o Kanana kae toki ne koutou ne lakau kaina, masaua i fuaga lakau kona e se 'ma i tausaga e tolu. I taimi kona, e se tau o kai ne koutou. 24I te fa o tausaga e tau o ofo atu a fuaga kona ke fai mo taulaga e fakaasi ei te otou fiafia ki a au,#19.24: ke fakaasi ei te otou fiafia ki a au; io me o tavae ei a au. te Aliki. 25I te lima o tausaga ko mafai ei ne koutou o kai ki fuaga kona. Kafai e fai ne koutou a mea kona, kae ka fua malosi otou lakau. Au ko te Aliki te otou Atua.
26 #
Kene 9.4; Levi 7.26,27; 17.10-14; Teu 12.16,23; 15.23;
Teu 18.10
“Sa kai ki ne kano manu e isi ne toto i ei. Sa fai vailakau. 27#Levi 21.5; Teu 14.1 Sa katigina a laulu i tafatafa o tou ulu io me katikati tou talafa. 28Sa ta ne ta'u i tou foitino io me katikati tou foitino o fakaasi tou tagi fanoanoa ki se tino mate. Au ko te Aliki.
29 #
Teu 23.17
“Sa fakamasiasi ne koutou otou tamaliki fafine o ave ke fai mo fafine tali tagata i faletapu; kafai e fai ne koutou te mea tena, ko koutou ka fuli atu ki nisi atua,#19.29: Fafine tali tagata i faletapu: A fafine penei e maua i faletapu o tino Kanana, ko koga kola e tapuaki a tino ki atua uluola. E isi se talitonuga e fai pela me i te moe mo fafine fina lalolagi konei e fakapatonu ei a te fuataga lei o fatoaga mo te fanafanau o manu. ko tena uiga ka fonu te fenua i amioga masei. 30#Levi 26.2 Tausi faka'lei te Sapati, kae faka'malu te koga e tapuaki mai ei koutou ki a au. Au ko te Aliki.
31 #
Teu 18.11; 1Samu 28.3; 2Tupu 23.4; Isa 8.19 “Sa olo o sala fesoasoani ki tino kola e ka'laga sale ki agaga o tino mate. Kafai e fai ne koutou a te mea tena, ko koutou ka se 'ma. Au ko te Aliki te otou Atua.
32“Ava kae faka'malu ki tino ma'tua. A koutou ke ma'taku mai ki a au; au ko te Aliki.
33 #
Eso 22.21; Teu 24.17,18; 27.19 “Fai faka'lei ki tino fakaalofa kona e nofo tasi koutou i te otou fenua. 34A faiga a koutou ki a latou ke pela eiloa mo faiga a koutou ki otou tino Isalaelu. A koutou ke alofa ki a latou e pela mo te otou a'lofa ki a koutou eiloa. Masaua i te otou nofoga i te fenua o Aikupito a koutou ne tino fakaalofa. Au ko te Aliki te otou Atua.
35 #
Teu 25.13-16; Faata 20.10; Eseki 45.10 “Sa fakaaoga ne koutou ne fua 'se o fakaloiloi te sua tino, me se fua o mea mafa, me se fua o mea loa mo te lauefa. 36Masaua ke fakaaoga ne koutou mo te fakamaoni a fua kona. Au ko te Aliki te otou Atua, tela ne aumai ne ia koutou keatea mai i Aikupito. 37Fakalogo ki aku tulafono mo fakatonuga katoa. Au ko te Aliki.”
Currently Selected:
LEVITIKO 19: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific