Ala Kalɔ Buse 13

Abram Ku Lot Begyingyaku Lɛlɔ

1Ɔmmɔ kama ni, Abram ɔ́tɔlɔ Egyipte úti ɔ́kɔ úsie kesii kani baalɔ Negev. Na útiku ulekudi ku ala ani ƒui na ubo. Na Lot lɛnɔ ɔ́siaku-nwu. 2Abram úbenwini ɔlakɛne na bebuo bani na ubo ku sika ugyiedi ku ɔƒualadi ɔsu.

3Ka ɔ́si Negev mmɔ ni, úsie ɔ́vi ekpo ekpo laa na úbedu lɛma lɛni ndi Betel ku Ai. Lɛma lɛmɛni ntɛ na ɔ́ka nwuna kevo bɔtu. 4Na mmɔ na ɔ́ka lɛkpabi bɔtu bute Katɔti. Mmɔ na Abram útaakpali Katɔti lɛnyi teemwi-nwu.

5Uwi ɔmmɔ kemmo ni, Lot ɔni lɛnɔ nkɛ ɔsiaku Abram ni, anwu lɛnɔ ubo bebuo lidu lidu na bemomo geen na ɔ́tu nvo pii lɛnɔ. 6Ɔmmɔ ɔsu ni, kalɔ kammɔ kétedu-ma ka bélie básala. Ɔsika bana ala ani na bebo emomo. Anwuɔsu na bátakana mmɔ buduku. 7Ɔmɛni úbaya na kadɔ keduo Abram bebuo lɛlɔ banune ku Lot bebuo lɛlɔ banune ntɛ. Na uwi ɔmmɔ kemmo lɛnɔ ni, Kanaanƒuɔ ku Perisiƒuɔ bakya kalɔ kammɔ kemmo.

8Na ɔmmɔ ɔsu ni, Abram ɔ́su Lot ɔnini, “Taya na kadɔ kakya ami ku-ɔ ntɛ iye ƒula bebuo lɛlɔ banune ku ami badi ntɛ. Ɔsika banwani na bɔdi. 9Aanu ka kalɔ kamɛni ƒui kewi ƒula anumi. Ya na bugyingyaku lɛlɔ. Na si awɔ ésie kɔdianu ni, na ami nteesie kɔmiinu.”

10Amu na ka Lot ɔ́kɔliku anumi na ɔ́nu ɔ́mana ni, ɔ́nu ka Yordan kalɔ kani nwi késela ƒui ni, ntu bɔkya-ka kemmo geen. Na kese aani Katɔti kemo kani na ɔ́bla na Eden. Na kese aani Egyipte kalɔ kani nwi késie ɔma ɔni ndi Soar kakɛ. Na uwi ɔni na ɔɔnu ala amɛni ƒui lɛni ni, ɔdi uwi ɔni na Katɔti útakyula tɔ Sodom ku Gomora kalɔ. 11Ɔmmɔ ɔsu kalɔ kani nwi késie Yordan kakɛ mmɔ na Lot ɔ́ƒuna. Na ɔ́yu ulu úsie ɔƒɛ katukɔ. Mmɔ nkyuli inyɔ bamɛni bégyingyaku lɛlɔ. 12Abram úlie Kanaan kalɔ lɛlɔ. Na Lot ɔ́tu nwuna nvo na kalɔ ƒiaa ntɛ kesii kani nde Sodom. 13Na uwi ɔmmɔ kemmo ni, Sodom bekyuli bebo kuli ɔkplu na bátaabla alaekpidi lidu lidu taaƒiɔ Katɔti.

14Ɔmmɔ ɔsu ni, uwi ɔni na Lot ɔ́mami Abram lɛlɔ ni, Katɔti ɔ́su Abram ɔnini, “Talaku ƒula anumi na anu asi kesii kani na enye na anu esie katɔ kakɛ ku kada kakɛ. Na anu esie ɔƒɛ katukɔ ku ɔƒɛ kanukɔ. 15Na kalɔ kani ƒui na aanu ka kewi mmɔ ni, aka na ndubuti lite-ɔ ku ƒula bawɔ uwi ƒui. 16Na ndubɔya na ƒula bawɔ bemomo aani kɔnwinimi. Na si ukyuli ɔdi ɔ́kana na ɔka kɔnwinimi kɔmmɔ ni, ɔdubɔkana na ɔka ƒula bawɔ lɛnɔ. 17Sie na atáka amana kalɔ kammɔ ƒui linene ku bɔbɛbɛ, ɔsika aka na liti muute-ɔ.”

18Anwuɔsu Abram ɔ́ta mmɔ ku nwuna ala ƒui na úsie kesii kani na Mamre egyii enengudi enye na Hebron kalɔ lɛlɔ. Na mmɔ na ɔ́tu lɛkpabi úte Katɔti.

Currently Selected:

Ala Kalɔ Buse 13: lef

Highlight

Copy