Ala Kalɔ Buse 14

Abram Údie Lot Na Ɔgbankpi Kemmo

1Na uwi ɔmmɔ kemmo ni, Amraƒel mɔɔdi lɛga na Sinear, na Ariok ɔdi ɔga na Elasar, na Kedorlaomer ɔdi ɔga na Elam, na Tidal ɔdi ɔga na Goyim. 2Amu na uwi ɔmɛni kemmo ni, baga bedeedi bamɛni báta kekpo ku Bera ɔni ndi ɔga na Sodom ku Birsa ɔni ndi ɔga na Gomora ku Sinab ɔni ndi ɔga na Adma ku Semeber ɔni ndi ɔga na Seboim ku Bela, kalɔ kani lɛnɔ baalɔ Soar ɔga lɛlɔ. 3Baga bekplodi bamɛni básala bana bekpone na bátása ɔkwalɛ ɔni baalɔ Sidim, na bɔɔlɔ mmɔ Mma Ɛpu ɔmwi. 4Akwa leevu-anyɔ sɔɔn na baga bekplodi bamɛni bakya Ɔga Kedorlaomer kalɔ. Na lɛkwa leevu-lɛtɛdi kemmo ni, baga bamɛni lɛnɔ báta bénye Kedorlaomer lɛlɔ.

5Ɔmmɔ kama na lɛkwa leevu-linedi kemmo ni, Kedorlaomer ku baga bani na anwu ku-ma násala lɛlɔ mmɔ básɔ báta bésie bétékpoku Reƒaiƒuɔ na Asteroƒ Karnaim kalɔ lɛlɔ ku Susiƒuɔ na Ham kalɔ lɛlɔ ku Emiƒuɔ na Sare Kiriataim kalɔ lɛlɔ ku 6Horiƒuɔ na Seir abi lɛlɔ. Na ɔkɛ mmɔ útédu kalɔ kani baalɔ El-Paran na ketele kudɔ. 7Mmɔ na básɔ bénwini bésie En-Misƒat, kesii kani basɔ baalɔ lɛnɔ banii Kades. Na bádi Amalek kalɛkɛ mmɔ ƒui lɛlɔ ku Amoriƒuɔ bani nli Hasason Tamar kalɔ lɛlɔ.

8Amu na Sodom ɔga ku Gomora ɔga ku Adma ɔga ku Seboim ɔga ku ɔga ɔni mɔɔdi Bela kalɔ kani basɔ baalɔ Soar lɛlɔ báta bátu akpagya na bététile ulu na Sidim Ɔkwalɛ kemmo. 9Na békpoku Ɔga Kedorlaomer ɔni mɔɔdi Elam kalɔ lɛlɔ ku Tidal ɔni mɔɔdi lɛga na Goim kalɔ lɛlɔ ku Amraƒel ɔni mɔɔdi lɛga na Sinear ku Ariok ɔni mɔɔdi lɛga na Elasa kalɔ lɛlɔ. Na lɛkpa linwi lɛdi baga ine na beekpóku lɛkpa linyɔdi bani ndi baga ɛlɔ. 10Ɔƒɛni Sidim Ɔkwalɛ ɔmmɔ kemmo ni, libu lɛdi lɛkya mmɔ lɛni kemmo na béku nnɔ tonwu mataa kɔni na beewi lilu. Na uwi ɔni na Sodom ku Gomora baga beekeli ni, bana bekyuli badi bánu libu lɛmmɔ kemmo. Na bakladi békeli bésie abi lɛlɔ. 11Baga ine bammɔ béƒie Sodom ku Gomora bekeline bamɛni ala ku adila ƒui báƒɔ na bátɔlɔ. 12Ɔmmɔ ɔsu bétiku Abram ɔnwani Lot ku nwuna ala lɛnɔ, ɔsika Sodom mmɔ na ɔ́kya.

13Na ukyuli ɔni kani nákana bukeli ni, anwu nébo ubedie litemi lɛmɛni kalɔ úte Abram, Hebrini ɔmmɔ. Na uwi ɔmmɔ kemmo ni, Abram kakyakɔ kedenku Mamre egyii enengudi ammɔ. Na Mamre ɔmɛni ɔdi Amorini ɔni ndi Eskol ku Aner ɔnwani. Na bekyuli bamɛni ƒui ni, ama ku Abram básala lɛlɔ na badi benwi. 14Amu ka Abram únu ka béƒie ɔnwani Lot bátɔlɔku ni, ɔ́lɔ nwuna kaduli nkyuli eti aku ku leevu-maane (318) bani na bátina kekpo ala kaduɛ. Na básia bekyuli bamɛni kama laa útédu kalɔ kani baalɔ banii Dan. 15Ka údu usien ni, Abram úle bekpone bamɛni na bétéyu-ma bátu, na békpoku-ma na bágya-ma bálɛku mmɔ ku usi útálɛ Hoba kalɔ lɛlɔ na Damasko katɔ kakɛ. 16Na ɔ́sɔ ɔ́ƒɔ Lot ku nwuna ala ani ƒui na béti békeliku mmɔ. Na ɔ́ƒɔ beleku ku bekyuli bamba bani ƒui na bákpanku bátɔlɔku mmɔ.

17Ɔmmɔ kama ka Abram útádi Ɔga Kedorlaomer lɛlɔ ɔ́wɔlɔ ku baga bani na anwu ku-ma badi benwi mmɔ ni, Sodom ɔga úbo úbasiaku-nwu na ɔkwalɛ ɔni baalɔ Save kemmo na basɔ baalɔ mmɔ Ɔga Ɔkwalɛ.

18Amu na Katɔti ɔni Ntulo Ƒui ɔkpane ɔni baalɔ Melkisedek na ɔ́si Salem ɔma kemmo ni, údie bodobodo ku ntɛ bɔdi úte Abram. 19Úvele kusɛ kusɛ úte-nwu ɔnini,

“Katɔti Ɔni Ntulo Ƒui na anwu nédie katɔ ku kalɔ ni,

ɔdubɔya na nwuna kusɛ kusɛ ɔsiaku Abram.

20Na kusɛ kusɛ kani beete Katɔti ɔni Ntulo Ƒui,

ɔsika anwu néti ƒula bekisine ɔ́kya-a enu kemmo.”

Amu na Abram úti ala ani ƒui na úƒie mmɔ ana lɛkpa leevudi úte ɔkpane ɔmɛni.

21Sodom ɔga úvele Abram ɔnini, “Nyonu bekyuli bammɔ te-mi, na eti ala ammɔ ƒui.”

22Nsu Abram údie kenye na ɔ́su Sodom ɔga ɔnini, “Katɔti ɔni Ntulo Ƒui na anwu nédie katɔ ku kalɔ ni, anwu na lɛkɔliku mina enu lite. Na lɛ́kpali ala lɛ́lɔ-nwu lɛnyi lɛ́su nnini, 23‘Lɛɛɛdubo lɛla lɛni ndi awɔ lɛdi lɛdi bɔƒɔ ina ƒula lɛgbanvuo kabuli muedi.’ Na alasu anii ami ɔsu na Abram únwini ɔlakɛne. 24Lɛɛɛdubo lɛla lɛdi bɔƒɔ butulo lɛla lɛni na mina bekyuli bamɛni bádi ku kadikɔ kani ndubuti lite ama bani násiaku-mi. Aka na ndubuti lite Ane ku Eskol ku Mamre bani na ami ku-ma bɔdi benwi.”

Currently Selected:

Ala Kalɔ Buse 14: lef

Highlight

Copy