Marko 14

Bakpane Benengu Bása Lili Ka Badu Yesu

1Kébu emeyi anyɔ asa na Yudaƒuɔ badi bana emeyi kedee ani baalɔ Kukpi Lili Bɔvia Limeyi ku Bodobodo Ɔni Néteƒu Limeyi. Na bakpane benengu ku ɔda bubo ala batinane badi bakya baawia ulu ɔni lɛlɔ basia na bɔbɛ kemmo na beƒie Yesu na badu-nwu. 2Básu lɛlɔ banii, “Útalɛka bɔbla lɛla lɛmɛni na emeyi amɛni bɔdi kemmo. Ɔsika si ɔɔɔdi lɛni ni, bekyuli badubɔkɛ kɔnyi na bata benye-bu lɛlɔ.”

Uleku Ɔdi Úwilimi Nnɔmii Ƒɛƒɛɛ Úwi Yesu Lili

3Yesu ɔ́kya Betania na Simon ɔni néƒi ɔlɛgyie dii kesii. Uwi ɔni na Yesu ulie ɔdaku bɔdi ni, uleku ɔdi úbo mmɔ na ɔda lɛtabi suɛlɛ suɛlɛ ɔsii ɔni baalɔ alabasta. Na ɔsii ɔmmɔ kemmo ni, nnɔmii bɔni muunwenyi ƒɛƒɛɛ bɔdi buwi. Na baalɔ nnɔmii bɔmɛni nard, na bɔ́ƒɔ kuye geen. Uleku ɔmɛni ɔ́lɛmi ɔsii na úti nnɔmii bɔmmɔ úwi Yesu lili lɛlɔ.

4Ɔmɛni úkpoku bekyuli bani nnye mmɔ. Na béti kɔnyi básu banini, “Bi ɔsu na uubile nnɔmii bɔmɛni udu lɛni? 5Ɔkana na nka uti-mu uye na ɔkɛ aani lɛkwa limodi kabla lɛyuƒɔla na uti ɔmmɔ ute bekyuli bani neeebo lɛla lɛdi.” Na ɔmɛni ɔsu ni, bádɔnku-nwu momoomo.

6Nsu Yesu ɔ́su-ma ɔnini, “Bɛnyonu-nwu! Bi ɔsu na bilaya na ɔkɛ kɔtu bɔyɔ? Ɔ́bla lɛla lɛbuni úte-mi. 7Bawabane bakya-mii akɔ uwi biala. Na uwi biala na amii bɛɛyɔ́ ni, bɛkana na bibunku-ma. Na ami ni, ɔɔɔdi uwi biala na ndubɔkya-mii kudɔ. 8Uleku ɔmɛni ɔ́bla lɛla lɛni na wakana. Úti nnɔmii bɔmɛni úwi-mi lɛlɔ úse ute mina kukpi asa na bava-mi. 9Na muute-mii bɔti sɔsɔ ka kesi kesii na badubɔkɔ lɛsa na Katɔti litemi buni lɛlɔ na kayawi kamɛni ƒui ni, badubuti lɛla lɛni na uleku ɔmɛni ɔ́bla mɛni basu batina na beti beteenyimo-nwu.”

Yuda Ɔ́tuna Ka Ɔkya Yesu Kakya

10Amu na Yuda Iskariot ɔni ndi Yesu batalane leevu-inyɔ akɔ unwi ni, ɔ́tɔlɔ úsie bakpane benengu kudɔ ɔnii utákya Yesu kakya na uti-nwu ɔkya-ma enu kemmo. 11Kubiti kɔ́da-ma geen na etemila ani na úbasu-ma ɔsu, na ama lɛnɔ básu ka badubute-nwu egulabi. Anwuɔsu Yuda ɔkya ɔɔwia ulu ɔbuni ɔni lɛlɔ na ɔdubɔsia na udie-nwu ute-ma.

Yesu Ku Nwuna Batɛyane Badi Kukpi Lili Bɔvia Adila

12Na limeyi lideedi na Bodobodo Ɔni Néteƒu Limeyi bɔdi kemmo uwi ɔni na baadú Kukpi Lili Bɔvia koƒonubi bakpa na bana ɔdi kenye ni, Yesu batɛyane béye-nwu banini, “Wɛ na aayɔ́ ka butáklibi bula limeyi lɛmɛni bɔdi buse bute-ɔ?”

13Amu na Yesu ɔ́ƒuna bana akɔ inyɔ na ɔ́su-ma ɔnini, “Bisie ɔma kemmo na bɛdubɔsiaku ukyuli ɔdi ka uti ntu ku ketubui. Bɛsiaku-nwu na bitéduo kaduli kani kemmo na wetéduo. 14Na bɛsu kaduli ɔlati bɛnini, ‘Ala ɔtinane ɔnii tina-bu ɔtɔ ɔni kemmo na anwu ku nwuna batɛyane badubo babadi bana Kukpi Lili Bɔvia Limeyi adila.’ 15Mmɔ ni, ɔdubɔtina-mii ɔtɔ ubendi ɔdi na ɔtɔ katɔ ɔni kemmo na báklibi ala bése-bu kaduɛ. Bɛnwa limeyi buni lɛmɛni adila bise mmɔ.”

16Batɛyane bamɛni bátɔlɔ na bésie ɔma kemmo, na bátánu ka lɛla biala lise aani kalɛ na Yesu ɔ́su-ma. Na bánwa Kukpi Lili Bɔvia Limeyi lɛmɛni adila bése.

17Ka useyi uwi údu ni, Yesu ku nwuna batɛyane leevu-inyɔ bammɔ bésie bétéduo mmɔ. 18Na uwi ɔni na belie badaku bɔdi ni, Yesu ɔ́su ɔnini, “Mɔɔsu-mii geen ka bina akɔ unwi ɔni na ami ku-nwu bulie bɔɔdi mɛni ɔdubɔkya-mi kakya.”

19Litemi lɛmɛni lɛ́bla-ma ɔkwɛnu, na bakya beeye-nwu unwi unwi banini, “Geen ni, ngyi ka ɔɔɔdi ami na ada, munuu ami?”

20Yesu údie kenye ɔnini, “Bina leevu-inyɔ bamɛni kemmo unwi na ɔdi. Na ami ku-nwu mɔɔkya kɔnu lɛkyami kemmo mɛni. 21Ami, ɔni ndi Ukyuli Ɔyawine Ubi, lísela ntékpi aani kalɛ na Bunweni Kedee Ɔku ɔ́tina kalɛ. Nsu ulése buɛɛ ulete ukyuli ɔni ndubɔkya-mi kakya. Si bátawɔ ukyuli ɔmmɔ muedi ni, nka ɔdia-nwu utulo!”

Bádi Blɔti Adila Kedee

22Uwi ɔni na badaku bɔdi ni, Yesu úti bodobodo ɔdi. Na ka ɔ́gya Katɔti enu ɔ́wɔlɔ ni, ɔ́bwɛ-nwu kɔkɛ kɔkɛ na úle úte nwuna batɛyane. Na ɔ́su-ma ɔnini, “Bɛƒɔ ɔmɛni na bɛdi. Ɔmɛni ndi mina ɔlɔna.”

23Amu na úti ɔɔƒɛɛ ɔdi, na ka ɔ́gya Katɔti enu ni, úti úte-ma na báni.

24Na ɔ́su-ma ɔnini, “Ɔmɛni ndi mina ubugya ɔni na ndubuti liwiakun na bekyuli pii lili, na ɔsɔ ɔdi bunyimi bɔwɔdi na bayawine ku Katɔti ntɛ. 25Na sɔsɔ ni, nsɔ lɛɛɛdubo ntɛ bɔmɛni udu bɔdi bɔni lɛnɔ, ntu lɛni ntɛ bɔwɔdi bɔdi udu na Katɔti lɛga kadikɔ.”

26Amu na bátu ɔnu ɔdi béte Katɔti bumwi na bávi bálɛ bésie Inɔ Egyii Kɔbi lɛlɔ.

Yesu Ɔ́su Úse Ɔnii Petro Ɔdubuni-nwu

27Mmɔ ni, Yesu ɔ́su nwuna batɛyane ɔnini, “Bina ƒui bɛdubukeli-mi. Ɔsika Katɔti ɔ́su na Bunweni Kedee Ɔku kemmo ɔnini,

“ ‘Ndubɔdu baƒonu ɔdane,

na nwuna baƒonu badubugyingya.’

28Nsu na mina bɔsɔ bɔta bɔsi kekpine kama ni, ndubɔgyu lɛtɔ-mii na Galilea.”

29Amu na Petro ɔ́su-nwu ɔnini, “Ami ni, lɛɛɛdubo-ɔ bukeli kudii, si ina bakladi ƒui badubukeli-ɔ!”

30Yesu ɔ́su Petro ɔnini, “Mɔɔsu-ɔ geen ka asa na akɔkɔ ɔdubute kenye kunyɔdi ɔmwi lɛdigye lɛmɛni ni, awɔ ɔlati adubɔsu kɔtɛ ƒui ka aaagyi-mi.”

31Petro ɔ́sɔ ɔ́su-nwu kpakplaa útulo udeedi ka, “Si ina ɔlɛka badu ami ku-ɔ ƒui ni, lɛɛɛdubo bɔsu ka lɛɛɛgyi-ɔ.” Na nwuna batɛyane bamɛni ƒui básu lɛni kani.

Yesu Ɔ́kpali Katɔ Na Getsemane

32Ɔmmɔ kama ni, bésie bétédu kesii kani baalɔ banii Getsemane. Na Yesu ɔ́su nwuna batɛyane ɔnini, “Bɛsɔ bilie kalɔ mɛni na ami lisie ntákpali katɔ.” 33Amu na útiku Petro ku Yakobo ku Yohane ɔ́da. Na ka kayi keekpóku-nwu na lɛla lɛni ndubo-nwu lɛlɔ ɔsu ni, 34únwini na ɔ́su-ma ɔnini, “Muunú ɔlɛ na mina kɔyu kemmo geen aani si bukpi nda. Bɛsɔ binye mɛni na bitaagyumana.”

35Ka úsie anumi blii ni, ɔ́sɔ úbi kalɔ na úvele Ɔti ɔnii, “Si nka wadia ni, na lɛbibo uwi ɔmɛni ɔvi-mi lɛlɔ.” 36Amu na ɔ́su ɔnini, “Ati, mina Ɔti! Akana na abla lɛla biala. Si átuna ni, na aƒɔ lɛbibo ɔɔƒɛɛ ɔmɛni na mina kudɔ. Nsu ni, tabla mina lɛyɔla, mmomu bla ƒula lɛdi.”

37Amu na únwini úbo nwuna batɛyane ɛtɛ bammɔ kudɔ, na úbanu ka batɛ baalɛɛ. Na ɔ́su Simon Petro ɔnini, “Simon, bɔlɛɛ bɛda? Bitakana bulie bɔgyumana budu ɔdɔ unwi pɛ?” 38Amu na ɔ́su-ma lɛnɔ ɔnini, “Bilie bitaagyumana na bitaakpali katɔ kalɛ na bileduo bukpoku taanu kpakplaa kemmo. Kɔyu kɔɔyɔ́ ka kɔbla, nsu ɔlɔna use kpɛtɛ kpɛtɛ.”

39Ɔ́sɔ ɔ́tɔlɔ úsie kama utákpali katɔ aani kudeedi kalɛ kani. 40Na ɔ́sɔ únwini úbo nwuna batɛyane kudɔ na ɔ́sɔ úbanu ka bátɛ baalɛɛ. Bátakana bana anumi bubimi. Na bátati lɛla lɛni basu-nwu.

41Ka ɔ́sɔ únwini úbo kɔtɛdi kɔmɛni ni, úye-ma ɔnini, “Bɔtɛ na bɛtɛ bɛɛnwuna, na bɛdaku bɔlɛɛ? Ɔ́dia, bɛgyinya! Uwi ɔmmɔ úudu! Kakya ɔkyane úuti ami, ɔni ndi Ukyuli Ɔyawine Ubi, ɔkya bekyuli bekpidi enu kemmo. Bɛɛnu-ma ka bási badubo. 42Bɛta na buteesie butásiaku-ma. Bɛɛnu ukyuli ɔni nákya-mi kakya ka ɔtɔnku-ma.”

Béƒie Yesu

43Yesu ɔ́mu únye-ma kudɔ mmɔ na ɔdaku bɔtɛmi asa na Yuda ɔni ndi nwuna batɛyane leevu-inyɔ bammɔ kemmo unwi úbo. Na bekyuli lisu lɛni nási bakpane benengu ku ɔda bubo ala batinane ku ɔma benengu kudɔ básiaku-nwu badubo. Bada ligyii ku lɛkɛɛ.

44Kakya ɔkyane ɔmɛni ɔ́su bekyuli bamɛni úse ɔnini, “Ukyuli ɔni na bɛdubɔnu ka mɔɔkya kɔgbu ni, anwu mmɔ. Biƒie-nwu na bɛda-nwu kpakplaa bɛtɔlɔku.” 45Uwi ɔni na Yuda ɔ́da ɔ́lɛ Yesu kudɔ kani na ɔ́lɔ-nwu ɔnini, “Unwoti!” Ka ɔ́ni úde-nwu ni, ɔ́kya-nwu kɔgbu. 46Anwuɔsu béƒie Yesu na báda-nwu kpakplaa. 47Nsu bani nnye mmɔ ku Yesu badi kemmo unwi ɔ́ni nwuna ɔkɛɛ ɔ́kpa na úbeyi ɔkpane unengudi kabla ɔblane kɔtu.

48Amu na Yesu ɔ́su-ma ɔnini, “Bi ɔsu na ɔlɛka biti ligyii ku lɛkɛɛ bɛda asa bibo bɛnii bibeƒie-mi aani si uyune ɔdi na ndi? 49Limeyi biala ami ku-mii bɔkya kakpakɔ, na nkya mɔɔtina litemi buni mmɔ na bíteƒie-mi. Nsu aani kalɛ na Katɔti Bunweni Kedee Ɔku ɔ́su ni, ubo lɛni.” 50Amu na nwuna batɛyane ƒui békeli bátɔlɔ-nwu kudɔ.

51Na uwi ɔmɛni kemmo ni, okloƒu ɔdi mbi kɔdi blii kɔdi lɛlɔ kani nkɛ nsiaku-nwu na ɔɔnu ala amɛni. Beƒiene bammɔ báwia ka nka beƒie okloƒu ɔmɛni. Nsu nwuna kɔdi kani báda. Ɔ́nwanɛ lɛlɔ ɔ́ƒɔ, 52na ɔ́lɛ-ma enu kemmo. Na úkeli ɔ́tɔlɔ ku kasɔngya. Na ɔda nwuna kɔdi ɔ́kya-ma kudɔ.

Yesu Unye Benengu Anumi

53Amu na bétiku Yesu bésienku ɔkpane unengudi kesii. Mmɔ na bakpane benengu ku ɔma benengu ku ɔda bubo ala batinane bása belie. 54Petro anwu ɔkpɛ kama buɛɛ na úbavi útéduo kaduli kammɔ. Na ɔ́sɔ úlie bagyumanane bammɔ kudɔ, na ɔɔwaa ogya.

55Bakpane benengu bamɛni ku litemi batɛne bani nlie mmɔ ƒui báyɔ ka nka bawia Yesu litemi lɛdi lɛni lɛlɔ basia na bakɛ-nwu badu. Nsu bátakana lɛla lɛdi bɔnu bɔsiku-nwu lɛlɔ. 56Bekyuli pii bébo bébetemi básiku-nwu lɛlɔ, nsu bana ƒui inye bɔ́vumanaku lɛlɔ.

57Amu na badi báta báda-nwu kenye na básu banini, 58“Búnu ka ɔ́su ɔnini, ‘Ndubɔƒɛ kakpakɔ kani na bátu mɛni. Na emeyi atɛ kama ni, nsɔ ndubɔtu kabambadi kani na ɔɔɔdi bekyuli bayawine nátu-ka.’ ” 59Nsu ama lɛnɔ, bana butemi bútabla unwi ku bana bakpana bɔdi.

60Ɔkpane unengudi ɔ́ta únye bana ƒui anumi na úye Yesu ɔnini, “Eenú etemila ani na baasu? Elebimi kenye? Bi na ebo na asu?” 61Nsu Yesu úbile kenye na útasu lɛla lɛdi.

Ɔkpane ɔmɛni ɔ́sɔ úye-nwu ɔnini, “Awɔ ndi Kristo ɔni na Katɔti ɔ́ƒuna úse? Awɔ ndi Unwoti Kedee Ubidi?”

62Yesu ɔ́su-nwu ɔnini, “Ami mmɔ. Na bɛdubɔnu Ukyuli Ɔyawine Ubi ka ulie Katɔti Ɔyikune Ƒui kɔdianu. Na bɛdubɔnu ka ɔ́si katɔ ɔdubo na ulɔyɔ kemmo!”

63Mmɔ ni, ɔkpane unengudi ɔmɛni ɔlati ɔ́ni nwuna awu ɔ́bwɛ na kɔnyi kemmo na ɔ́va ɔnini, “Anii bi? Bɔsɔ buláwia litemi kama benyene badi lɛnɔ! 64Ɔ́tɛmi enyekpi na Katɔti lɛlɔ! Dɛ na bɛ́nu?”

Amu na bana ƒui báyoli banii badu-nwu kukpi kɔtɔ. 65Bana akɔ badi bése kalɔ beetuo lisuo teewi Yesu. Na bényimi-nwu anumi, na badaku-nwu bubo ku bana enu. Na bakya baasu-nwu banini, “Ka agyi ala ƒui ni, su-bu ukyuli ɔni nébo-ɔ!” Amu na bagyumanane badi bétiku Yesu bátɔlɔku, na bétébo-nwu.

Petro Úni Yesu Ɔnii Ɔɔɔgyi-nwu

66Petro ɔ́ƒɔ lɛlɔ ulie kaduli mmɔ asa na kaduli ulekubi ɔni nlie ɔkpane unengudi kudɔ úbo. 67Uwi ɔni na ɔ́nu Petro ka uli ɔɔwaa ogya ni, ɔ́su-nwu ɔnini, “Awɔ lɛnɔ nka asiaku Yesu Nasareni ɔmmɔ!”

68Amu na Petro úni na ɔ́su ɔnini, “Bi? Ńtenu lɛla lɛni na aasu mɛni kalɔ!” Amu na ɔ́ta ɔ́lɛ úsie kayakun. Ka uudú kayakun kani na akɔkɔ úte kenye.

69Ulekubi ɔmɛni ɔ́sɔ úbanu-nwu mmɔ, na ɔ́sɔ ɔdaku bekyuli bani nnye mmɔ bɔsu ɔnini, “Ɔdi bana akɔ unwi!” 70Nsu Petro ɔ́sɔ úni.

Uwi útetu asa na bani nnye mmɔ baasu-nwu banini, “Útalɛka eni anii aaadi-ma akɔ unwi, ɔsika awɔ lɛnɔ ási Galilea.”

71Amu na Petro ɔ́va ɔnini, “Lɛka ka Katɔti ɔni-mi kɔtu si ɔkɔ na ndaku bɔnyi! Lɛɛɛgyi ukyuli ɔni lɛlɔ na biitemi mɛni!”

72Kɔnakunwi ni, akɔkɔ ɔ́sɔ úte kenye kunyɔdi, na Petro únyimo ka Yesu ɔ́su-nwu ɔnini, “Asa na akɔkɔ ɔdubute kenye kunyɔdi ni, adubɔsu kɔtɛ ƒui ka aaagyi-mi.” Ka úbenu nwuna lɛlɔ kalɔ ni, kɔyɔ kúwi Petro na ɔ́da lɛdi údie na uuwulo.

Currently Selected:

Marko 14: lef

Highlight

Copy