Macce 3

Woo kiŋ Yahya Ɓoktohi

1Ŋ kiis caam, Yahya Ɓoktohi#3:1 Yahya Ɓoktohi : a yi Saaŋ Batiis ŋ farañse. hotukka ŋ nduufaŋ Yudee, a yegɗoheeɗa woo kiŋ Kooh. 2A woyeeɗa ne : « Ɓoƴsohaat pesohaaɗ, Nguuriŋ-Ɗafki reɓiɗ. » 3Yahya Ɓoktohi a yi woosuuɗi Esayi woyee an :

« Hooso wa ɗaa leehuk ŋ nduufa an :

“ Paɗaat waasiŋ Heɗ ɓoo,

haɓɗiɗaat ɗe waas ci, ca yurah ! ” »#Esayi 40:3

4Yahya meeɗ ɓekuk kulɓa haɓɗohuuɗ find ngeelemb, a toka ŋ kinoh kiŋ ɗe na und.#Malasi 3:23; 2 Buur ci 1:8 A pesohee paƴ na yeeleel kuum. 5Ɓooɓa genee Yerusalem, na ɓaŋ Yudee, na ɓaŋ ɓakaŋ Yurdan jen, hayeeɗa nga ɗe. 6Ɓa teyɗukeeɗa bakaaɗ caŋ ɓa, a ɓokteeɗa ɓa ŋ kalaŋ Yurdan.

7Wa a hot ne ɓo' laayiɗ ɓaah ŋ ɓooɓi na woyse Farisen#3:7 Farisen : Farisen ca nikee Yawuut ca meeɗ taambiɗ waasiŋ Musaa findi wa fiisohu, na mbaah ci ɓa ɓaatee nga, po ɓooɓa jen ambeen ne ɓa kosiɗ Kooh lool. na Sadusen#3:7 Sadusen : ini uup ŋ Sadusen ci nikee kilifa ŋ Yawuut ci. Ɓa koseeɗi ne kaaniɗ ci hey hulte (Macce 22:23). Ɓa nameeɗi kos malaakaaci na jiiniici (Tum ci 23:8). Laayiɗ nga ɓa nikee seeƴkiɗoh ŋ waasiŋ Musaa, te ɓa ambee ne teereeci yatuus ciŋ Musaa, weɗ ne Tawreet, uupɗee Fiis ci cinooci njiriñ (marka teerndiŋ Macce 22:32, ɗiski Yeesu kooɗoh teereeciŋ Musaa ne a lof ɓa). nikee hayeeɗa nga ɗe ne ɓa ɓoktu, a woosa ɓa ne : « Ini ɗu añaand haa ne iiñ jen, ɗu liiɓiɗ ne ɗu miniɗ penduk ayrukiŋ Kooh wi na haye e ? 8Tumohaaɗ ciŋ ɗu baahaat, wa teeɓoh ne ɗu ɓoƴsohiɗ pesohaaɗ. 9Te kinaat ɗaar rek ɗu woyee ŋ ɗooƴ ɗu ne : “ Ɓoo rimkoh ŋ Ibrahiima. ” Ñam na woyee ɗu ne, atoh cii, Kooh miniɗ pulɗiɗ Ibrahiima kuɓu nga ca. 10Kiw ki ƴutiɗ ne wa giing tas kidig, te waa nu raakɗi rim baahiɗ ɗah, wa hey ƴoɓse, wa njafu ŋ yongkaaha.

11Mi na ɓoktee ɗu ŋ masuɓ ne ɗu ɓoƴsoh pesohaaɗ. Waaye raakiɗ ɓoyi na haye ŋ finhooso, a yi uup po fuuf, te woliɗ ɗe ñafaɗ ciŋ ɗe joombiɗ to. A yi, a ɓoktohan ɗu Fuuɗsi Hoolohngaani na yongkaah. 12A amb saliŋ ɗe ŋ yaah, ne a nistoh pees na fuñind. A nangɗoh pees ciŋ ɗe ŋ ndap, a doh fuñndi ŋ yongkaahi heyɗi ƴime. »

Yeesu teyɗukiɗ ɓokti

13Ŋ neeh caam, Yeesu pulohha Galile, a kaɗta kalaŋ Yurdan ŋ Yahya Ɓoktohi ne yeem ɓokit ɗe. 14Waaye Yahya teyɗukɗi, woosa ɗe ne : « Ñam etoh ɓoktuk nga ɗa, fu hayee nga so ! » 15Yeesu loffa ɗe ne : « Ɗiski wa nik, faɗa wa nikoh an. Wa in moɗiɗ ne ɓoo mitɗoh ini Kooh nakoh jen an ! » Ŋ ineem Yahya teyɗukka.

16Wa Yeesu ɓoktu po a pulla masma, jaarra Eel ci rangsukka, a hotta Fuuɗsi Hoolohngaani, Fuuɗsiŋ Kooh yipkeeɗa nga ɗe findi banuut. 17Hooso kerhukka ŋ Eel ci an : « Yii, a yi Kuɓkiŋ ngo#3:17 Kuɓkiŋ Kooh : findi Fiis ci Hooliɗ ci woyoha, ŋ camba, e Kooh dong nikee te Yeesu yi Woo kiŋ ɗe, nikee nga ɗe (Saaŋ 1). Yeesu, findi a hayoh Adina, wa ɗalohiɗ na findi ɓooɓi na hayohe nga ; a raakɗi baabu ŋ kehƴi. A Kooh tum po a rimukka ŋ ɓitiɓ inhaaɗi ƴaar te malaakaani gapoh raakuukiŋ ɗe woo ne a hey ɓeeɗkohse Kuɓkiŋ yi Ɗafkiɗi (Macce 1:18-25; Luk 1:26-56; 2:1-20) kon ini a puloh ŋ Kooh weɗ tah a ɓeeɗkohsee Kuɓkiŋ Kooh. Kuɓkiŋ Kooh, wa tokisɗi ne Kooh ɓay faan a rimmba kuɓu na ɓitiɓ findi ɓo'. ŋ waaɗ keeh-keeh, yi neɓ po ŋ keeñ. »

Currently Selected:

Macce 3: YM

Highlight

Copy