Mahte 24

Temple a pye vai Jesuh naw pyenki

(Mk 13:2; Lk 21:5-6)

1Jesuh Temple üngka naw akcea a ceh üng, axüisaw he naw Temple ime mhnuh khai hea a veia lawki he. 2Jesuh naw, “Hin avan nami jah hmuki am niki aw? Akcanga ka ning jah mthehki, lung matca pi, hin üng am ve khaia a pyehnak vaia kcün pha law khai,” a ti.

Khuikhatnak ja mkhuimkhanak

(Mk 13:3-13; Lk 21:7-19)

3Olip mcunga khana a ngawh üng axüisaw he ampyua law u lü, “Itüha, acukba thawn law khai ni? Na lawnak vaia akcün ja akpäihnak kcün msingnak vai cun i ni? Jah mtheha” ami ti.

4Jesuh naw, “U naw pi käh a ning jah mhleimhlak vaia mceiei ua. 5“Khyang khawkän ka ngming üng law lü, Keia hana ngsaih lü ‘Kei, Khritaw ni’ ti lü khyang khawhah jah mhlei law khaie. 6“Nami peia ngtuknake kthaie ja athuknaka pi ngtuknaka thange cun nami jah ngja law khai. Cunüngpi käh cäicing kawm uki. Acuna ngkhawe cun thawn law khaie, cunüngpi akcüna päihnak tinak am ni. 7“Pee mat ja mat, pungnu mat ja mat, ngtung’at law khaie. Mdek alum üng, khaw jaw khyat pai law khai, ngkhyü ngsün law khai. 8“Ahin he cun na hmi hlüki a huiheia mäiha khuikhanakea cuteinaka kyaki.

9 # Mt 10:22 “Acunüng ning jah man u lü ami ning jah mkhuimkha vai ja ami ning jah hnim vaia khyang hea kut üng ning jah ap khaie. Khyang naküt naw keia phäh ning jah hneng khaie. 10“Acuna kcün üng khyang khawhah naw ami jumnak hawih u lü mat ja mat nghneng law khaie, hleihlak law khaie. 11“Sahma ksee po law u lü khyang khawhah jah mhleimhlak law khaie. 12“Am dawkia khut pawhnak da law lü mhläkphyanak ng’yeng law khai. 13#Mt 10:22“Cunsepi, adütnak vei cäpa jumeiki naw küikyannak yah khai. 14“Khankhaw Pea mawng thangkdaw cun khawmdek van üng sang lü khyang naküta veia saksia mdanga kya khai. Acun käna akcüna päihnak pha law khai.

Kpyükpye theiki Kyükyawksee

(Mk 13:14-23; Lk 21:20-24)

15 # Dan 9:27; 11:31; 12:11 “Sahma Danjelah naw cangcim üng a pyena kba, ‘Kpyükpye theiki kyükyawkse angcimcaihnak säiha ngdüi se, nami hmu khai. 16“Acunüng Judaha veki naküt mcungea dawng u se. 17#Lk 17:31“Mkhyung khana veki im k’uma a ka lo khaia käh kyum law se. 18“Loa veki naw pi a suisak loei khaia käh nghlat be se. 19“Acuna mhnüp üng mpyaikie ja cihtui k’aw naca kpawmeikie ta aktäa khuikha khaie ni. 20“Nami dawngnak vaia mhnüp cun khawksik khya ja Sabbath mhnüpa käh a kya vaia Pamhnama veia ktaiyü ua. 21#Dan 12:1; Malam 7:14“Khawmdek a ngtüi üngkhyüh am hmuh khawi, malama pi am hmuh be ti vai khuikhatnak kyühkse cun pha law khai. 22Khawmhnüpe cun Pamhnam naw a jah tawisak päng ni; am a tawisak vai sü üng, u pi xüng khai am ve. A jah xüa khyang hea phäh Pamhnam naw khawmhnüpe cun jah tawisak khai.

23 ‘Hia ni Khritaw, cuia ni Khritaw’ tiki a ve üng, käh nami kcangnak vai. 24“Isetiüng ta, Khritaw kcang am nikie ja sahma ksee po law khaie. Pamhnama jah xü khyang he pi a thawn theia ta, ami jah mhleinak vaia müncanksee pi jah pawh law khaie. 25“Ngai ua, akcün am a pha law ham üng ma lü ka ning jah mtheh päng ni.

26 # Lk 17:23,24 “Acunakyase, ‘Mesijah cun khawmkyanga ni’ ami ti üng käh nami ceh vai! Ani cun ‘Angthupnaka ve ve’ ami ti üng pi käh jah kcang na ua. 27“Nghngilaw da mlaih se khawkyak cäpa khaw a vaia kba, Khyanga Capa cun law be khai.

28 # Lk 17:37 “Ahawia pi akthia venaka, langktahe ngcun khaie ni.

Khyanga Capa a law bea mawng

(Mk 13:24-27; Lk 21:25-28)

29 # Hesa 13:10; Jol 2:10,31; 3:15; Malam 6:12-13; Hez 32:7; Jol 2:10; 3:15 “Acuna, khuikhatnaka mhnüpe käna, khaw nghmüp law khai. Khyalawn pi am vai law ti. Aisie khankhaw üngkhyüh kya law khaie, khankhaw khyaihbahnake pi ami venak üngka naw jah ksät khai. 30#Dan 7:13; Zakh 12:10-14; Malam 1:7“Acunüng khyanga Capa msingnak cun khana ngdang law khai. Khawmdek khyang naküt Khyanga Capa hlüngtai kyäpsawknak am khana khawngmei ngcum lü law be se, hmu u lü kyap khaie. 31“Pungnu tum lü a khankhawngsä he naw a xüe cun khawmdek avan üng jah mkhäm hü be khai hea jah tüih law khai.

Fikdung am a msuimcäpnak

(Mk 13:28-31; Lk 21:29-33)

32 “Hina Fikdung üngka naw ngtheingthang ua. A kpyange tawi law u lü a hnah a hlip law üng, khawkhye cäh lawki ti, nami ksingki he. 33“Acuna kba ni, nangmi naw ahin he nami jah hmuh üng, akcün cäh law lü mkawt pei pha lawki ti ksing ua. 34“Akcanga ka ning jah mthehki, tukbäih ksawn üng khyang he am ami thi päih ham üng acun he avan cun kümcei law khaie ti süm ua. 35“Khawmdek ja khankhaw khyük ni sepi, ka khyü nglung matca pi a kümcei kaa käh khyük yah khai.

Akcün ja mhnüp u naw am ksing

(Mk 13:32-37; Lk 17:26-30,34-36)

36 “Acuna mhnüp ja akcün cun iti üng pha law khai ti, u naw pi am ksing. Khankhawngsäe naw pi am ksing u. Capa # 24:36: Amsah naw “Capa naw pi am ksing” ti hin am yuksih u. naw pi am ksing. Ka pa däk naw ni a ksing. 37#Gen 6:5-8“Khyanga Capa a law be vai cun Nawea kcün üngkaa mäiha kya law khai. 38“Mlikpitui am a phu law hama kcüne üngka naw Nawe mlawng k’uma a luh vei cäp, khyang he cun ei awkie, nghnumi ja kpami ngkhyunglakie; 39#Gen 7:6-24“Mlikpitui phu law lü khyang avan a jah cehin vei cäpa i käh sim lü awmki he. Acun üng ami vea mäiha, Khyanga Capa a law be vai üng pi acukba kya law khai. 40“Loa ve yümki xawi üng mat jäk lü mat hawih hüt khai. 41“Ksum su yümki nghnumi nghngih üng mat jäk lü mat hawih hüt khai. 42“Nami Bawipa a lawnak vaia akcün am nami ksingkia kya se, a na ngäng ua. 43#Lk 12:39,40“Im mah naw mpyukei a law vaia kcün a ksing vai sü ta, a im mpyukei naw käh a kpye vaia mtät kyet khai ti nami ksingki. 44“Acuna mäiha, nangmi pi a na ngcüngcei ua. Isetiüng ta, Khyanga Capa cun am nami sümhmuha kcün üng law be khai.

Üpnak vaia veki ja am vekia mpya

(Lk 12:41-48)

45 “Im mahpa naw, a imbunga eiawk akcün phäh phäh üng jah pyangmtham pawhmsah khaia a mcawn themngvai lü cingcaikia mpya cen u ni? 46“Acun he jah na pawhmsah se a mahpa naw ima a law be üng, a hmuh lawa mpya ta a josen ve. 47“Akcanga ka ning jah mthehki, amahpa naw acuna mpya üng a khawh naküt ap khai. 48“Cunsepi, mpya kse ania üng ta, ‘ka mahpa a law be vai hjo ham khai ni’ ti lü ngaihnipki. 49“A püi mpyae jah kpai lü ju awk ktai k’eiea hlawnga a na eiawk hü hngaki. 50“Am a ngaihhmuh ja am a na ksinga kcün mhnüp mat üng, acuna mpyaa mahpa law be khai. 51“A mahpa naw a mtemtea mawi#24:51: “Amtemtea mawi lü akcea xawtin khai” ti lü akhäk üng veki.lü hypocritea venaka vesak hnga se, acuia kyahnak ja, mnicui hakyetnak am khuikhatnak khamei khai.

Currently Selected:

Mahte 24: DNT

Highlight

Copy