Mahte 4

Jesuh Hlawhlepnak

(Mk 1:12-13; Lk 4:1-13)

1 # Heb 2:18; 4:15 Acunüng Jesuh cun Khawyai naw a hlawhlep vaia Ngmüimkhya naw khawmkyang khawa a cehpüi. 2Jesuh cun khawmhnüp kphyükip la mthan kphyükip ei jeih se, a ei cawi lawki. 3Acunüng Khawyai cun a veia law lü, “Nang Pamhnama caa na kya kcang üng, hina lung he hin muka thawn law khai hea jah mtheha” a ti.

4 # Deut 8:3 Jesuh naw “Khyang cun muk am xüngki am ni, cunüngpi Pamhnama ngthukhyü am va xüngki tia cangcim üng awmki” ti lü a pyen.

5Acunkäna Khawyai naw Jesuh cun Jerusalem Mlüh Ngcim, a hlüngnak säih Temple khana cehpüi lü, 6#Sal 91:11,12“Nang Pamhnama capa kcang na ni üng, ahin üngka naw kco lü

‘Pamhnam naw a khankhawngsä he jah mtheh khai ni;

acun he naw ami kut am ning na man khaie ni,

acunüng na khaw naw lung he am jah hne yah khai ni’” ti lü cangcim üng awmki ni a ti.

7 # Deut 6:16 Jesuh naw, “Na Bawipa Pamhnam ä na hlawhlep vai ti lü pi cangcim üng ng'yuki ni” a ti.

8Acunkäna Khawyai naw Jesuh cun khawmcung k'hlüngnua khana cehpüi lü khawmdeka bawinak ja a hlüngtainak he cun a mhnüh. 9Khawyai naw, “Ngdäng lü na na sawkkhah üng ahin he avan ka ning pe khai,” a ti.

10 # Deut 6:13 Jesuh naw, “Satan akcea cita, na Pamhnam däk va sawkhah lü, ani däka khut va na pawh vai ti lü cangcim üng awmki” a ti.

11Acunkäna Khawyai naw ceh ta se, khankhawngsä he law u lü Jesuh cun kuei lawki he.

Jesuh naw Kalilea a Khut cuteiki

(Mk 1:14-15; Lk 4:14-15)

12 # Mt 14:3; Mk 6:17; Lk 3:19,20 Johan thawngim üng ami khyum a ngjak üng Jesuh cun Kalilea citki. 13#Jn 2:12Nazaret khaw ceh ta lü Zebulung ja Naptalih hne, Kalile tuilinu pei Kapenawm mlüha awmki. 14Acun cun sahma Hesajah naw a na pyen a kümceinak vaia kyaki.

15 # Hesa 9:1,2 “Mliktui da lamki lam läka awmki;

Zebulung khaw la Naptalih khaw, Jordan mliktui yea,

khyang mjükce hea venak Kalile,

16nghmüp k'uma awmki hea khyang he naw

akvai hmu khaie.

Thihnak khaw nghmüp k'uma awmki hea khana

akvai pha law khai ni” ti lü a pyen.

17 # Mt 3:2 Acun üngkhyüh tün lü Jesuh naw, “Ngjut ua, Khankhaw Pe ng'et law ve” ti lü ngthu pyenki.

Jesuh naw Ngaksui Kphyü a jah khünak

(Mk 1:16-20; Lk 5:1-11)

18Jesuh Kalile tuili kama a ceh üng ngbengna xawi Sihmon (Pita ami ti) ja a na Andru ngaksui xawi, ng'üntui üng ngvai ani vawi k'um üng jah hmu lü, 19Jesuh naw, “Na läk law nia, nga nani suia mäiha kei naw khyang ksui ning ka ning jah mthei khai ni” a ti. 20Acunüng ani ngvai jah hawih hüt ni lü Jesuh läki xawi.

21Acunkäna va cit betü lü ngbengna xawi Jakuk ja Johan, Zebedea ca xawi, ani pa mah am mlawng üng ani ngvai jah pyanei ni se jah hmu lü a jah khü. 22Acunüng akjanga ani mlawng ja ani pa jah hawih hüt ni lü Jesuh läki xawi.

Jesuh naw Mhnateiki a m'yai be

(Lk 6:17-19)

23 # Mt 9:35; Mk 1:39 Jesuh cun Kalile pei avan üng cit hü lü, Sinakok k'uma jah mthei lü, Pamhnama Khawa thangkdaw jah mtheh lü am phetkiea natnak hlikhaü mjüküm üng khuikhaki he jah mdaw beki. 24Jesuh cun Siria hne abäng üng ngthang hü se, khyang kkun he, hlikhaü mjüküm naw a jah hui he, khawyaia a jah awmnak he, mcimpawm nawt lü ngtawng hüki he, akxo he a veia jah lawpüi u se a jah mdaw be. 25Kalile khaw üngka, Dekapoli khaw üngka, Jerusalem mlüh üngka, Judah khaw üngka, Jordan mliktui kam üngka, khyang khawhah naw Jesuha hnu läki he.

Currently Selected:

Mahte 4: DNT

Highlight

Copy